1 Ita, adtoy, gapu iti banag a tinarigagayam, katulongak nga Oliver Cowdery, a maammuan kaniak, itdek kenka dagitoy a balikas:

2 Adtoy, naipakitakon kenka, iti namin-adu a daras babaen ti Espirituk, a pudno dagiti banag nga insuratmo; gapuna ammom a pudnoda.

3 Ket no ammon a pudnoda, adtoy, mangtedak kenka iti bilin, nga agpannurayka kadagiti banag a naisurat;

4 Ta kadakuada banagda amin a naisurat maipanggep iti pamuon ti simbaanko, ti ebangheliok, ken ti batok.

5 Gapuna, no bangonemto ti simbaanko, iti pamuon ti ebangheliok ken ti batok, awanto ti bael dagiti ruangan ti impierno a maibusor kenka.

6 Adtoy, maluluomen ti lubong iti kinamanagbasol; ket nasken unay a maallukoy dagiti annak ti tattao nga agbabawi, nga agpadpada dagiti Gentil ken kasta met ti balay ti Israel.

7 Gapuna, iti pannakabuniagmon kadagiti ima ti katulongak a ni Joseph Smith, Jun., a maibatay iti dayta imbilinko kenkuana, natungpalnan ti banag nga imbilinko kenkuana.

8 Ket ita, dika masdaaw no apay nga inawagak a para iti bukodko a panggep, panggep dayta nga ammok; gapuna, no nareggetto nga agtungpal kadagiti bilinko mabendisionanto iti agnanayon a biag; ket Joseph ti naganna.

9 Ket ita, Oliver Cowdery, agsaoak kenka, ken kasta met ken ni David Whitmer, babaen ti wagas ti pammilin; ta, adtoy, bilinek nga agbabawi amin a tao iti sadino man, ket agsaoak kadakayo, a kas ken ni Pablo nga apostolko, ta naawagankayo a kas iti umasping iti nakaawaganna.

10 Laglagipenyo a napateg dagiti kararua iti imatang ti Dios;

11 Ta, adtoy, nagsagaba ti Apo a Mannubbotyo iti patay iti lasag; gapuna sinagabana ti saem ti amin a tao, tapno mabalin nga agbabawi ti amin a tao ken umasidegda kenkuana.

12 Ket nagungar manen manipud iti patay, tapno mayasidegna amin a tao kenkuana, iti kasasaad a panagbabawi.

13 Ket ita nalaus ti rag-ona iti kararua nga agbabawi!

14 Gapuna, naawagankayo a mangyararaw kadagitoy a tao iti panagbabawi.

15 Ket no pudno a kasapulan ti panagtrabahoyo iti unos ti panagbiagyo a mangyararaw kadagitoy a tao iti panagbabawi, ket yegyo, uray no maysa la a kararua kaniak, anianton a rag-oyo iti sibayna iti pagarian ti Amak!

16 Ket ita, no nalausto ti rag-oyo iti maysa a kararua a mayegyo kaniak iti pagarian ti Amak, anianto la ketdin a rag-oyo no mangyegkayo kaniak iti adu a kararua!

17 Adtoy, adda iti sangoyo ti ebangheliok, ken ti batok, ken ti panangisalakanko.

18 Agdawatkayo iti Ama babaen ti naganko, iti pammati a sipapammati nga umawatkayonto, ken magun-odyonto ti Espiritu Santo, a mangipakita iti amin a banag a maikanada kadagiti annak ti tattao.

19 Ket no awan ti pammatiyo, namnama, ken panangngaasiyo, awan ti maaramidyo.

20 Dikayo makisupanget iti ania man a simbaan, malaksid iti simbaan ti sairo.

21 Kupikopanyo ti nagan ni Cristo, ket sipaparbengkayo nga agsao iti pudno.

22 Ket kas iti kaadu ti agbabawi ken mabuniagan iti naganko, a ni Jesucristo, ken agibtur agingga iti panungpalan, kastanto met ti maisalakan.

23 Adtoy, Jesucristo ti nagan nga inted ti Ama, ket awan ti sabali a nagan a naited a pakaisalakanan ti tao;

24 Gapuna, nasken nga awaten ti amin a tao ti nagan nga inted ti Ama, ta daytanto a nagan ti pakaawaganda iti maudi nga aldaw;

25 Gapuna, no dida ammo ti nagan a pakaawaganda, saanda a maaddaan iti lugar iti pagarian ti Amak.

26 Ket ita, adtoy, adda pay dagiti sabali a mangipakdaar iti ebangheliok, nga agpadpada kadagiti Gentil ken kadagiti Hudio;

27 Wen, a sangapulo-ket-dua; ket dagitinto Sangapulo-ket-dua ti disipulok, ket kupikopandanto ti naganko; ket dagitinto Sangapulo-ket-dua ti agtarigagay a mangkupikop iti naganko a sipupuso.

28 Ket no tarigagayanda a kupikopan ti naganko nga addaan iti naan-anay a panggep ti puso, maawagandanto a mapan iti amin a lubong a mangikasaba iti ebangheliok iti tunggal parsua.

29 Ket isuda dagiti inordenak a mamuniag iti naganko, a maibatay iti dayta a naisurat;

30 Ket adda kadakayo dayta a naisurat; gapuna, nasken nga aramidenyo a maibatay kadagiti balikas a naisurat.

31 Ket ita agsaoak kadakayo, dagiti Sangapulo-ket-dua—Adtoy, umdas ti paraburko kadakayo; magnakayo a sililinteg iti sangok ket saankayo nga agbasol.

32 Ket, adtoy, dakayo dagiti inordenak a mangorden kadagiti saserdote ken maestro; a mangipakdaar iti ebangheliok, a maibatay iti bileg ti Espiritu Santo nga adda kadakayo, ken maibatay kadagiti nakaawagan ken sagut ti Dios kadagiti tao;

33 Ket siak, ni Jesucristo, ti Apoyo ken ti Diosyo, nasaokon.

34 Saan a balikas dagitoy dagiti tao wenno ti tao, ngem siak; gapuna, paneknekanyo a nagtaud kaniak a saan nga iti tao;

35 Ta ti timekko ti mangibagbaga kadakuada kadakayo; ta naitedda kadakayo babaen ti Espirituk, ket babaen ti bilegko mabasayo ida a saggaysa; ket no saan a gapu iti bilegko diyo koma ida maala;

36 Gapuna, mabalinyo a paneknekan a nangngegyo ti timekko, ken ammoyo dagiti balikasko.

37 Ket ita, adtoy, itedko kenka, Oliver Cowdery, ken kasta met ni David Whitmer, tapno sapulenyo dagiti Sangapulo-ket-dua, nga addaan iti tarigagay iti nasaokon;

38 Ket babaen ti tarigagayda ken dagiti aramidda maam-ammoyo ida.

39 Ket no masapulanyo ida ipakitayonto kadakuada dagitoy a banag.

40 Ket agtamedkayonto nga agdayaw iti Ama babaen ti naganko.

41 Ket nasken a mangasabakayo iti lubong, a kunayo: Nasken nga agbabawikayo ken mabuniagan, iti nagan ni Jesucristo;

42 Ta nasken nga agbabawi ken mabuniagan amin a tao, ken saan la a lallaki, ngem babbai, ken ubbing a nakadanonen iti tawen a kaadda ti sungsungbatan.

43 Ket ita, kalpasan ti panangawatyo iti daytoy, nasken a tungpalenyo dagiti bilinko iti amin a banag;

44 Ket babaen dagiti imayo agaramidak iti nakakaskasdaaw nga aramid kadagiti annak ti tattao, iti panangallukoy iti adu kadagiti basolda, tapno umayda agbabawi, tapno makaumayda iti pagarian ti Amak.

45 Gapuna, kangatuan iti amin a banag dagiti bendision nga itedko kadakayo.

46 Ket kalpasan ti panangawatyo iti daytoy, no saanyo a tungpalen dagiti bilinko saankayonto a maisalakan iti pagarian ti Amak.

47 Adtoy, siak, ni Jesucristo, ti Apo ken ti Diosyo, ken ti Mannubbotyo, nasaok babaen ti bileg ti Espirituk. Amen.