Wóltaʼii 18
Diyin Yá Yáłtiʼí Joseph Smith, Oliver Cowdery, dóó David Whitmer díí diyingo bił ííshją́ą́ ádaalyaa, Fayette, New Yorkdi, Yaʼiishjááshchilí 1829 yihahgo. Diyin Yá Yáłtiʼí bikʼehgo, díí diyingo ííshją́ą́ ádaalyaaígíí “hastóí naakitsʼáadah akéedí yoołkááł biiʼ bikʼidahodidoonih bééhózingo ályaa, dóó ałdóʼ Sodizin bee aanoosééł yíneineestą́ą́ʼ.”
1–5, Diyin God bizaad éí haitʼéego Sodizin hadidoolníłígíí yitʼį́įgo áyiilaa; 6–8, Nihokááʼ dineʼé doo yáʼáshxǫ́ yiih nootʼą́; 9–16, Diné danilíinii tsʼídá ayóó daʼílį́; 17–25, Nihokááʼ dineʼé tsʼídá Christ bízhiʼ akʼideidiitʼą́ągo tʼéiyá, yee yisdáadookah; 26–36, Hastóí Naakitsʼáadah nídiiʼnil dóó bidaʼiisniiʼ éí bił ííshją́ ádaalyaa; 37–39, Oliver Cowdery dóó David Whitmer éí Hastóí Naakitsʼáadah hazhdínóotaał; 40–47, Yisdááʼdookahgo, diné ádaa ńdaʼiidookąął, tó bee dabidiʼdoolzį́į́ł, dóó bee hazʼáanii yeʼdaʼałʼį́į doo.
1Kʼad, áko shooh, Oliver Cowdery shá nanilaʼí, háálá shił bééhodoozįįł, nínízingo shíínkeedę́ę, díí saad nichʼįʼ kódeeshłííł:
2Áko shooh, nił ííshją́ ííshłaa, tʼáá ląʼídi shiʼIiʼsizʼį́ Diyinii bee, saad baa náhínzohyę́ę éí tʼáá aaníí ádaatʼé; ákohgo tʼáá aanínígíí nił béédahózin.
3Áádóó tʼáá daʼaanínígíí nił bééhózingo, áko shooh, bee hazʼáanii łaʼ nihaa nílá, saad baa ndaʼíísdzohyę́ę baʼíínílí;
4Háálá éí biiʼ éí tʼáá ałtso shisodizin bitłʼááhdóó bee hadilyaaígíí, shinaʼnitin bee yisdáʼiildéehii, dóó shitsé biiʼ ndaháasdzoh.
5Ákohgo, shinaʼnitin bee yisdáʼiildéehii dóó shitsé bikááʼdóó hadaʼdoohtłʼį́į́ł, shisodizin daʼatahígíí ląʼígo ádadoohłííł, áko chʼį́įdiitʼah bidáníʼdítʼį́hígíí doo nihikʼeh didoodleeł da.
6Áko shooh, nihokááʼ dineʼé doo yáʼáshxǫ́ yiih nootʼą́; nihokááʼ dineʼé baʼáłchíní ádaa ńdaʼooskan ályaago tʼéiyá, tʼáá áłah Gentile dineʼé dóó ałdóʼ Israel bighandóó háájéʼígíí.
7Ákohgo, Joseph Smith, Jun., shá naalʼaʼí bílaʼ yee tó níísį́į́ʼígíí éí ábidííniidę́ę yikʼehgo yeʼiilaa, éí ábidííniidę́ę ałtso ádayiilaa.
8Áádóó áko, tʼáá shí bíká áshtʼínígíí bíká áhodííniidgo éí tʼáadoo baa nił hayooí, éí biniyéhígíí shił bééhózin; ákohgo, shibee hazʼáanii yéego yikʼeh hółʼį́įgo éí hoolʼáágóó iiná bee bikʼihoozdoodliił; dóó éí Joseph wolyé.
9Áádóó áko, Oliver Cowdery, nichʼįʼ haasdziih, áádóó David Whitmer ałdóʼ, bee hazʼáanii bikʼeh hólʼį́į́jí bee; háálá, áko shooh, tʼáá ałtso ałʼąą dineʼé ádaa ńdaʼdookąął, dóó nichʼįʼ haasdziih, Paul shá naalʼaʼí bichʼįʼ haasdzíʼígiʼ átʼéego, éí diyingo bee bikiʼhodiiniiʼígíí tʼáá ni tʼáá ákótʼéego bee nikiʼhodidoonih.
10Béénílniih Diyin God bidááhgi éí diné danilíinii ayóó átʼao bił nilį́;
11Háálá, áko shooh, Diyin Bóhólníihii niháNináʼídláhígíí atsʼíísjí tiʼhoonííhgo daaztsą́; ákohgo tʼáá ałtso nihokááʼ dineʼé yee tiʼdahooníhígíí yá tiʼhoozʼniiʼ, áko tʼáá ałtso nihokááʼ dineʼé ádaa ńdaʼooskango dah yaa náhídookah.
12Áádóó anoonééłdę́ę́ʼ bí nááhiiʼnaʼ, áko tʼáá ałtso nihokááʼ dineʼé bí dah yaa náhidookah, éí ádaa náʼookąąh binahjįʼ tʼéiyá.
13Áádóó diné nilíinii ádaa náʼooskanígíí dooládóʼ ayóó átʼéego yaa bił hózhǫ́ǫ doo!
14Ákohgo, díí diné ádaa ńdaʼoohkąąh bidoohníigo bee nihikʼihodiiniiʼ.
15Áádóó díí anihíyííłką́ąjįʼ díidi diné ádaa ńdaʼoohkąąh bidohníigo, tsʼídá tʼááłáʼí ndi, shaa nánohdlóozgo, dooládóʼ ayóó átʼéego shiZhéʼé bił hazʼą́ądi baa nihił dahózhǫ́ǫ doo!
16Áádóó áko, shiZhéʼé bił hazʼą́ądi tʼááłáʼí áyóó átʼéego baa nił hózhǫ́ǫgo shaa noolóozgo, dooládóʼ tsʼídá ayóó átʼéego baa nihił dahózhǫ́ǫ doo tʼóó ahayóí shaa nooʼeezhgo!
17Áko shooh, shinaʼnitin bee yisdáʼiildéehii nihidááhgóó silá, dóó shitsé, dóó bee shiyisdááhóótiʼ.
18Oodląʼ bee shiZhéʼé bíínóhkeed, yinóhdlą́ągo éí nihaa doolyééł, áádóó Iiʼ Sizį́ Diyinii nihił hodooleeł, éí nihokááʼ dineʼé baʼáłchíní yá yinízinígíí tʼáá ałtsoní yił ííshją́ ííł’́į́.
19Áádóó oodląʼ, haʼólní, dóó diyingo ayóóʼóʼóní doo nihee hólǫ́ǫ́góó, doo ádoołíłí da.
20Sodizin łaʼ tʼáadoo bił ahíínóhbáhí, tʼáá hazhóʼí níłchʼi iiníziinjí bisodizin tʼéiyá.
21Christ bízhiʼ ákʼidoohtʼaah, dóó tʼáá aaníinii baa honohsą́ągo bee yááłtih.
22Áádóó tʼóó ahayóí shizhiʼ yee ádaa ńdaʼooskanígíí dóó tó bee daalzį́ʼígíí, éí Jesus Christ átʼį́, dóó ádaadinjįʼ yídadiilkaalígíí, éí tʼéiyá yisdáádookah.
23Áko shooh, aZhéʼé yízhí niheiníláhígíí éí Jesus Christ, dóó nihokááʼ dineʼé doo nááná łaʼ yízhí yee yisdáádookah da;
24Ákohgo, aZhéʼé nihokááʼ dineʼé tʼáá ałtso bízhiʼ yaayiizlá éí tsʼídá ákʼideididootʼááł, háálá nihoníyáadi éí ázhiʼígíí bee hágo dabidiʼdooʼniił;
25Ákohgo, yízhí bee dabidíʼdóojiiłígíí doo bił béédahózingóó, éí shiZhéʼé bił hazʼą́ądi doo yá hwiidoołʼaał da.
26Áádóó áko, shooh, shinaʼnitin bee yisdáʼiildéehii nááná łaʼ bikʼidahodiiniiʼgo yee ndaʼnitin, tʼáá áłah Gentile dóó Jew bichʼįʼ;
27Aooʼ, Naakitsʼáadah yiltʼéego ndi; dóó éí Naakitsʼáadah shikééʼ naazíinii danilį́, dóó éí shízhiʼ ákʼideididootʼááł; dóó Naakitsʼáadah tʼáá átʼé bijéí yee shízhiʼ ákʼideididootʼáłígíí deidínóozįįł.
28Áádóó tʼáá átʼé bijéí yee shízhiʼ ákʼideididootʼáłígíí deiniizį́įgo, nihokááʼ dineʼé tʼááłáʼí nízínígo adahwiisʼáágóó shinaʼnitin bee yisdáʼiildéehii yee nideidínóotįįłgo bee bikʼidahodiiniiʼ.
29Áádoó shí bee dahóósį́į́ʼ shízhiʼ yee tó daʼiisįįh doogo, éí baa nídaháásdzohyę́ę bikʼehgo;
30Áádóó éí ndaháasdzohyę́ę nihidááhgóó naaznil; ákohgo, éí saad nídaháásdzohyę́ę bikʼehgo ádaʼołʼį́.
31Áádóó áko nihichʼįʼ haasdziih, Naakitsʼáadah nółtʼéhígíí—Áko shooh, sheʼajoobaʼ éí nihííghahgo hólǫ́; shidááhdóó tsʼídá yáʼátʼéehgo wohkahgo dóó tʼáadoo nidaʼiyohsíhí.
32Áádóó, áko shooh, danihíísį́į́ʼii danohłį́ áko priests dóó ndaʼnitiní daosį́į́h doo; shinaʼnitin bee yisdáʼiildéehii bee ndaʼnohtin doo, éí Iiʼ Sizį́ Diyinii bibeeʼadziil nihił hólónígíí bikʼehgo, áádóó Diyin God bi adaʼiilyéii dóó nihokááʼ dineʼé bee bikʼidahodiiniiʼígíí bikʼehgo;
33Áádóó Shí, Jesus Christ, niDiyin Bóhólníihii dóó niDiyin God, bee haasdzííʼ.
34Díí saad éí doo dineʼé doodaiiʼ diné bitsʼą́ą́dóó da, ákondi shí shitsʼą́ą́dóó; ákohgo, tʼáá aaníí shí shitsʼą́ą́dóó átʼé dadohní doo éí diné bitsʼą́ą́dóó da;
35Háálá shiinééʼ bee nihichʼįʼ haasdzííʼ; háálá éí shiʼIiʼsizʼį́ Diyinii nihaa yiilé, áádóó sheʼadziil bee ahił deiyínółtaʼ; áádóó sheʼadziil binahjįʼ doo nihee hólǫ́ǫ da doo ńtʼę́ę́ʼ;
36Ákohgo, shiinéíʼ tʼáá aaníígo dah sidootsʼą́ą́ʼ, dóó shizaad baa ákodanozį́ʼígíí baa dahołneʼgo bíighah.
37Áádóó áko, shooh, nihąąh ninishłé, Oliver Cowdery, dóó ałdóʼ ni David Whitmer, Naakitsʼáadah yiltʼéego hadínóohtaał, éí baa haasdzíʼę́ę deinízin;
38Áádóó ádeinízin dóó yindaalnishígíí bee bééhodoosįįł.
39Áádóó bikʼínohʼáázhgo díí bichʼįʼ nídidoohnił.
40Áádóó ntsididohgoh dóó shízhiʼ binahjįʼ aZheʼé bá hodínóhsin doo.
41Áádóó nihokááʼ dineʼé tsʼídá ndanohtin, kódóhníigo: Tsʼídá ádaa ńdaʼoohkąąh dóó tó bee nidanihiʼdiilzį́į́h, Jesus Christ bízhiʼ binahjįʼ;
42Háálá tʼáá ałtso nihokááʼ dineʼé tsʼídá ádaa ńdaʼdookąął dóó to bee dabidiʼdoolzį́į́ł, dóó doo hastóí tʼéiyá da, ákondi sáanii, dóó ałchíní niʼiisííh yaa ákoniizį́į́jįʼ béédaahaiígíí ałdóʼ.
43Áádóó áko, díí nídoolá bikééʼdóó, tsʼídá shibee hazʼáanii tʼáá ałtsojįʼ bikʼeh honołʼį́į doo;
44Áádoó nihilákʼeedóó nihokááʼ dineʼé baʼáłchíní bitahgóó naanish ayóó átʼéi ádeishłííł, tʼóó ahayóí yee ndaʼiisíʼígíí yaa ákodadínóozįįł, áko ádaa ńdaʼookąąhjįʼ nidahidookah, dóó shiZhéʼé bił hazʼą́ądi dah yah anáhidookah.
45Ákohgo, bee akʼidahojisdliʼígíí tsʼídá tʼáá ałtsoní biláahgo nihaa dahálá.
46Áádóó díí nihaa dahasyá bikʼijįʼ, doo shibee hazʼáanii bikʼeh dahonółʼį́įgóó nihí doo shiZhéʼé bił hazʼą́ąjįʼ yisdáánihidoonił da.
47Áko shooh, Shí, Jesus Christ, niDiyin Bóhólníihii dóó niDiyin God, dóó nihá Nináʼnídláii, shiʼIiʼsizʼį́ Diyinii beʼadziil éí bee haasdzííʼ. Amen.