1Shí éí Alpha dóó Omega nishłį́, Diyin Bóhólníihii Christ; aooʼ, jó shí ndi éí áshtʼį́, bee hodeeztʼiʼii áádóó bee nihonítʼiʼii nishłį́, nahasdzáán yáNináʼnídláii.

2Shí, bitsʼą́ą́dééʼ hosélį́ʼígíí yinízinée bá bohooshłaa dóó ałtso ííshłaa, ázhą́ ShiTaaʼ ndi, shí shídéétʼiʼígíí—díí ałtso ííshłaago índa tʼáá ałtsoní bikʼih shóhólnííh dooleeł—

3Tʼáá ałtso adziilii tʼáá yíníshtąʼ doo, nihoníyáadi Chʼį́įdii dóó binaanish yíłchxǫʼjįʼ índa, dóó ayóó átʼáó ndahwiitʼaah bijį́įdi, éí nihokááʼ yikááʼ kéédahatʼíinii bikʼijįʼ kódeeshłííł, nihokááʼ diné tʼááłáʼí nízínígo binaanish dóó ádeiyiilaaígíí bikʼehgo bá ndahodééshʼááł.

4Áko nihokááʼ diné tʼááłáʼí nízínígo tʼáá aaníigo ádaa ńdaʼdookąął doodago éí tidahwiidoonih, hááłá Shí, Diyin God, éí biʼiinaʼ doo nidootʼihii nishłį́.

5Ákohgo, shí ándahwiitʼaah bee nahoníʼánígíí doo niʼ kódeeshłííł da, ákondi doo chxǫhooʼį́į́góó hóyééʼii biih jidookah, dajichah, dóó yéego dajidilwoshgo dajichah doo, dóó hawooʼ ahídazhdiłkʼash doo, aooʼ, shílaʼ nishtłʼajígo dayikahígíí kodaatʼį́į doo.

6Ákótʼée ndi, díí tiʼhooʼnííh doo ninítiʼ da doo haʼníigo náháásdzo da, akótʼée ndi hoolʼáágóó tiʼhooʼnííh haʼníigo náháásdzoh.

7Áádóó ałdóʼ, hoolʼáágóó chʼį́į́diitahdi tiʼhooʼnííh éí náháásdzoh; ákohgo nááná łaʼ Diyin God bizaad biyiʼ éí hózhǫ́ bikʼidiʼdootį́įłgo baa haneʼ, ákohgo índa nihokááʼ dineʼé baʼáłchíní bijéí yindoolnish, éí shízhiʼ tʼáá ałtsojįʼ baa haʼniih doo biniyé.

8Ákohgo, díí tʼáá aaníinii tʼah doo béédahoozįįhígíí bee nił hodeeshnih, háálá hastóí bikʼidahodiiniiʼígi átʼáo ni ałdóʼ nił bééhodoozįįł.

9Shí nichʼįʼ yáshtiʼ díí bíká nándiiłtį́, azhą́ tʼáá sáhí ndi, áko shił hazʼą́ądi yah adíínááł.

10Háálá, áko shooh, Diyin bikʼeh hojíłʼį́įgo tʼah doo béédahoozįįhígíí, dóóládóʼ ayóó átʼée da! Háálá, áko shooh, shí éí biʼiinaʼ doo nidootʼihii nishłį́, dóó shílákʼeedóó tiʼhooʼnííh achʼįʼ kóshínígíí éí tiʼhooʼníí doo ninítiʼii átʼé, háálá Biʼiinaʼ Doo Nidootʼihii éí shízhiʼ. Ákohgo—

11Hoołʼáágóó tiʼhooʼnííh éí Diyin God bibee tiʼhooʼnííhii átʼé.

12Tiʼhooʼnííh doo ninítʼiʼii éí Diyin God bibee tiʼhooʼnííhii átʼé.

13Ákohgo, Shí ádaa náʼiiníkąąh nidishní, dóó shibee hazʼáanii bikʼeh honíłʼį́ éí Joseph Smith, Jun. bílákʼeedóó neiyílyá, éí shízhiʼ binahjįʼ;

14Áádóó ayóó átʼáo sheʼadziilii binahjįʼ neiyílyá;

15Éí bąą Shí ádaa náʼiiníkąąh nidishní—ádaanáʼííníkąąh, tʼahdoo shizééʼdę́ę́ aláahdi hóyéeʼgo bee atínishłééhdą́ą́ʼ, dóó shiʼatíʼálʼį́ bee, áádóó shiʼáháchxįʼ bee, áko bee tiʼhwiisíníniiʼígíí baa yínííł nílį́į doo—haanízahjįʼ yínííł dííleełígíí doo nił bééhózin da, haitʼáo tʼáá íiyisíí bikʼeʼíyééʼígíí doo nił bééhózin da, aooʼ, haitʼáo bíníldzil dooígíí doo nił bééhózin da.

16Háálá áko shooh, Shí, Diyin God, tʼáá ałtsoní díí bee bá tiʼhwiiséniiʼ, áko ádaa ńdaʼooskango tʼáá bí doo tiʼdahwiidoonih da;

17Ákondi doo ádaa ńdaʼookąąhgóó shí tiʼhoséniiʼígi átʼáo tiʼdahwiidooʼnih;

18Shí, Diyin God ndi, tʼáá ałtsoní yiláahdi átʼéii, baa tiʼhooshníhígíí biniinaa shitah hoditsxiz, dóó shitásiildę́ę́ʼ dił hadahaaznaʼ, áádóó tʼáá áłah atsʼíískʼeh dóó iiʼsizíiniikʼeh tiʼhwiiséniiʼ—dóó bąąh haʼíízhahí díchʼíiʼgo bee shei yíkánígíí doo deeshdlį́į́łgóó, tʼóó shitsʼą́ąjįʼ kódeeshłííł niizį́į́ʼ—

19Ákótʼée ndi, aZhéʼé ayóó átʼáo baa hodooʼnih, áádóó yishdlą́ą́ʼ dóó nihokááʼ dineʼé ałtso bá hashtʼehooshłaa.

20Ákohgo, ádaa náʼiiníkąąh náánidishní, doodago éí ayóó átʼáo adziilii bee hojoobaʼ íínínízingo ándeeshłííł; dóó nibąąhági ádaatʼéii baa hodiilnih, doodago díí bee ná nahwiistʼánée bee tihwiidíínih, éí tʼáá áłtsʼíísígo, aooʼ, éí shiʼIiʼsizʼį́ Diyinii nitsʼą́ąjįʼ kweeshłaayę́ędą́ą́ʼ tʼáá kóníshéhgo sínílnih.

21Áádóó Shí ándishní ádaa náʼookąąh tʼéiyá bee naʼnítin, áádóó díí nihokááʼ dineʼé doo bił ííshją́ą́ ádíílííł da hódzą́ shiiʼ siláhígíí bikʼehgo índa.

22Háálá kʼad atsįʼ deidooyį́į́łgo doo yideiyíghah da, ákondi abeʼ tʼéiyá baa hidookááł; ákohgo, díí tsʼídá doo bił béédahodoozįįł da, doodago éí nahjįʼ kódabidiʼdoolnííł.

23Shí hoołʼaah, dóó shizaad yísíníłtsʼą́ą́ʼ; dóó shiʼIiʼsizʼį́ Diyinii bibee aa áhwiinítʼį́, bee yínááł, dóó shí shinahjįʼ kʼé neehólǫ́ǫ doo.

24Shí éí Jesus Christ áshtʼį́; Diyin aZhéʼé yinízinígíí ádeishłííł biniyé níyá, dóó yinízinígíí áshʼį́.

25Áádóó ałdóʼ, Shí ándishní ninaagóó dabighanígíí beʼasdzą́ą́ tʼáadoo bidááhnílíní; doodago ninaagóó dabighanígíí tʼáadoo beʼiinaʼ nidootʼihgo bíká ánítʼíní.

26Áádóó ałdóʼ, shí ándishní ninchxǫ́ʼí tʼáadoo baa nichįʼí, ákondi baa nidleeʼgo Naaltsoos Mormon Wolyéhígíí naaltsoos bee ndootʼááłgo bee ákáʼadíílwoł, éí tʼáá aaníinii dóó Diyin God bizaad biyiʼ silá—

27Éí Gentile dineʼé bichʼįʼ haneʼ ííshłaa, áko tʼáá hodíínaʼí Jew dineʼé bee bił hodoonih, éí Laman dineʼé yitsʼą́ą́dóó dahyikah, áko dah nahatʼá bee yisdáʼiildéehii deidoodląął, dóó Messiah doogáałgo doo hádeidéezį́įʼ da doo háálá tʼáá íídą́ą́ʼ níyá.

28Áádóó ałdóʼ, ándishní nijéí biyiʼdi dóó hodiitsʼaʼgo sodílzin; aooʼ, nihokááʼ dineʼé bidááhdóó dóó tʼáá nahonitʼingi, áádóó diné bitahgóó dóó tʼáá sáhí ałdóʼ.

29Áádóó haneʼ yáʼátʼéehii bee naʼnítin doo, aooʼ, dziłghą́ąʼdi baa hodíílnih, dóó tʼáá ałtso dahnahazʼą́ą́góó, dóó tʼáá ałtso dineʼé deidííłtséłígíí bitahgóó.

30Áádóó neʼajoobaʼ tʼáá átʼé bee hólneʼ doo, shaʼíínílíigo, saad yee atídaʼałínígíí tʼáadoo ákótʼáo bichʼįʼ hááhádziihí.

31Áádóó naʼnitin baa saad dahólónígíí tʼáadoo baa yáníłtiʼí, ákondi ádaa náʼookąąh dóó Yisdáʼiiníiłii wodlánígíí tʼéiyá bee naʼnítin doo, dóó tó bee ałzį́į́h binahjįʼ bąąhági ádaatʼéii bee hanídaʼdiitʼaah, áádóó kǫʼ ndi, aooʼ, Iiʼ Sizį́ Diyinii ałdóʼ bee.

32Áko shooh, díí tsʼídá ílį́įgo dóó akéeʼdi bee hazʼáanii díí bídadéétʼiʼígíí naadeeshłééł; háálá díí bee tʼáá ákwííjį́ nigáál bee áníłʼį́įgo tʼáá bííghah, azhą́ neʼiinaʼ ałtso nííníłtiʼjįʼ ndi.

33Áádóó díí bee nichʼįʼ haʼoodzíʼígíí doo bikʼeh áhwiinlaagóó yínííł biih díínááł, aooʼ, azhą́ ninaadeełii dóó ni ndi nahjįʼ kóndiʼdoolnííł.

34Ninaadeełii łaʼ bee ákáʼadíílwoł, aooʼ, azhą́ łahdóó nikéyah ndi, dóó tʼáá ałtsóní bee tʼáá hazhóʼí naʼáłchíní chodayoołʼínígíí éí doodah.

35Naaltsoos álʼį́įdi bee bił ahaʼdinítʼą́ągo naahááʼáhígíí nidíílééł. Áájígo ąąhsínítʼínígíí nahjįʼ kódíílííł.

36Nikin dóó nighandóó dah didíínááł, tʼáá hazhóʼí naʼáłchíní yideestsééł nínízingo tʼéiyá;

37Áádóó tʼáadoo niʼ kónítʼéhí tʼáá ałtsó bichʼįʼ hadíídzih; aooʼ, naʼnítin, yéego yíníkąąhgo, tʼáá aaníinii baa hodíílnih, nizhí yéego diitsʼaʼgo, baa nił hózhǫ́ǫgo, dílwoshgo—Hosanna, hosanna, dooládóʼ Bóhólníihii Diyin God bízhiʼ bikʼihojídlíi da!

38Tʼáá áłahjįʼ sodílzin, dóó shiʼIiʼ Sizį́ Diyinii tʼáá ahą́ą́h nił hólǫ́ǫgo ádeishłííł, dóó bee nikʼihojidoodliiłígíí ayóó átʼéii doo—aooʼ, azhą́ nahasdzáán bikááʼ daʼílį́įnii chooztʼeʼígíí bilááhdi ndi áádóó nidaʼiiłchxǫǫhígíí bilááh átʼeego.

39Áko shooh, díísh doo baa nił hózhǫ́ǫgo yídííłtah da dóó sodílzingo nijéí tsʼídá bił hózhǫ́ǫgo?

40Doodago doo daʼooʼíinii nidaʼaʼeeshígíísh biláahgo naʼíʼeesh doo?

41Dooísh hajoobaʼ dóó aʼohgo aʼdíínílzin da, dóó shidááhdóó honíyą́ągo áʼdínílzin doo? Aooʼ, nihiYisdáʼiiníiłii baa nínááh. Amen.