1 E tei ana Ekaretia Kristo ni boong aika kaitira aikai, n tengaa wanibubua ao tenibwii te ririki man rokon ara Uea ao ara Tia Kamaiu Iesu Kristo n te rabwata, ao e baireaki raoi man kateaki ni kaineti nakon tuan abara, man ana kantaninga ao ana tua te Atua, n te kaaua n namwakaina, ao n te kaonoua ni bong n te namwakaina ae e aranaki bwa Eberi—

2 Bon tua ake a kaotaki nakon Iotebwa Timiti te Ataei, are e weteaki iroun te Atua, ao ni katabuaki bwa ana abotoro Iesu Kristo, n riki bwa te moan unimwaane n te ekaretia aei;

3 Ao nakon Oliver Cowdery, are e weteaki naba iroun te Atua, bwa ana abotoro Iesu Kristo, n riki bwa te kauoman n unimwaane n te ekaretia aei, ao ni katabuaki i aan bain Iotebwa Timiti;

4 Ao aio ni kaineti nakon ana akoi ara Uea ao ara Tia Kamaiu Iesu Kristo, are nakoina te mimitong ni kabane, ngkai ao n aki toki. Amen.

5 Ao i mwin kaotakina raoi nakon te moan unimwaane aei bwa e a reke irouna kamaunaan ana bure, e a manga bon reketaati ni kaibwabwarun te aonaba;

6 Ma i mwin ana rairannano, ao e kananorinanoa ni koaua, rinanon te onimaki, E karaoi mwakuri ni ibuobuoki nakoina te Atua rinanon te anera ae tabu, ae ubuna ai aron iti ni karawa, ao kunikaina a itiaki ao ni mainaina riki nakon mainaina ni kabane;

7 Ao n anganna tua aika a na kairia;

8 Ao n anganna te mwaaka mai eta, man bwaai ake a kaman katauraoaki, ibukin rairakin Ana Boki Moomon;

9 Are kanoana rongorongon te botanaomata ae bwaka, ao bwaninin ana euangkerio Iesu Kristo nakoia Tientaire ao nakoia Iutaia naba;

10 Are e anga man ana kairiiri te Tamnei, ao e kamatoaaki nakoia tabeman man aia mwakuri n ibuobuoki anera, ao e taekinaki nakon te aonaba mai irouia—

11 Ni kakoaua nakon te aonaba bwa koroboki aika a tabu a bon koaua, ao bwa te Atua e bon kairiia aomata ao ni weteia nakon ana mwakuri ae tabu n te tai ma te roro aei, ni ikotaki naba ma rooro ake ngkoa;

12 N aio e kaotia bwa boni ngaia naba te Atua are ngkoananoa, ngkai, ao n aki toki. Amen.

13 Ngaia are, ibukin ae iai taan kakoaua aika korakora, mai irouia e na motikaki taekan te aonaba, ao ni kabane naba naake man te tai aei a na karekea ataakin te mwakuri aei.

14 Ao naake a karekea n te onimaki, ao a mwakuria te raoiroi, a na karekea te baunuea are te maiu ae akea tokina;

15 Ma naake a kamatoai nanoia n aki kakoaua, ao n totokoia, e na bon uotiia nakon kabuakakaaia—

16 Bwa te Uea ae te Atua e a tia n taekini; ao ngaira, unimwaanen te ekaretia, ti a tia n ongo ao ni kaota koauan ana taeka Uean karawa ae mimitong, are ana bwai te neboaki n aki totoki. Amen.

17 Man bwaai aikai ti ataia bwa iai te Atua i karawa, are akea tiana ma tokina, man ae akea tokina nakon ae akea tokina ae bon te Atua naba are e aki bibitaki, are e karaoa karawa ma aonaba, ao bwaai ni kabane ake i nanoia;

18 Ao bwa e karika te aomata, mwaane ao aine, n ai arona ao ni katotongana, e karikiia;

19 Ao e angania tua bwa a na tangiria ao ni beku irouna, ti ngaia te Atua ae e maiu ao e koaua, ao bwa bon ti ngaia te Atua ae a na taromauria.

20 Ma man riaoan te tua aikai aika tabu aomata a riki n tangira bwain te rabwata ao n nano n riaboro, ao a riki bwa aomata aika bwaka.

21 Mangaia are, te Atua ae Moan te Mwaaka e anga Natina ae Te Rikitemanna, n aron ae e koreaki ni koroboki aika tabu ake e tia n anga ibukina.

22 E rinanon taian kaririaki ma e aki mutiakini.

23 E tauraki, e mate, ao e manga uti n te katenua ni bong;

24 Ao e waerake nako karawa, n tekateka i angatain te Tama, n tautaeka ma te mwaaka ae korakora ni kaineti ma ana kantaninga te Tama;

25 Bwa a aonga ni kabane naake a na kakoaua ao ni bwabetitoaki n arana ae e tabu, ao n teimatoa n onimaki ni karokoa te toki, ni kamaiuaki—

26 Tiaki ti naake a kakoaua i mwin are e roko i nukan te tai, n te rabwata, ma ni kabane naake man moan rikin te aonaba, ao ni kabane ake a maiu naba i mwaain rokona, ake a kakoauai aia taeka burabeti aika tabu, ake a taetae ngke a kairaki n te bwaintituaraoi ae te Tamnei ae Raoiroi, are a kakoaua ibukina ni bwai ni kabane, a na karekea te maiu ae akea tokina,

27 Ao naake naba a na roko i mwina, ake a na kakoauai bwaintituaraoi ao ana wewete te Atua rinanon te Tamnei ae Raoiroi, are e kaota koauan te Tama ao te Nati;

28 Are te Tama, te Nati, ao te Tamnei ae Raoiroi ae te Atua ae ti temanna, akea tiana ma tokina, ae akea tokina. Amen.

29 Ao ti ataia bwa ni kabane aomata a na riai n raira nanoia ao ni kakoaua aran Iesu Kristo, ao n neboa te Tama n arana, ao n teimatoa n te onimaki n arana ni karokoa te toki, ke a na aki kona ni kamaiuaki n uean te Atua.

30 Ao ti ataia bwa te karaoiroaki rinanon ana akoi ara Uea ao ara Tia Kamaiu Iesu Kristo e bon eti ma ni koaua;

31 Ao ti ataia naba, bwa te katabuaki rinanon ana akoi ara Uea ao ara Tia Kamaiu Iesu Kristo e bon eti ma ni koaua, nakoia ni kabane naake a tangiria ao a beku iroun te Atua ma ni kabane marurungiia, aia iango, ao korakoraia.

32 Ma iai te kantaninga ae kona n riki bwa a na kona aomata ni bwaka man te akoaki ao ni kitana te Atua ae e maiu;

33 Ngaia are kaain te ekaretia a na tarataraia ao n tataro n taai nako, bwa a kawa ni bwaka n te kariiriiaki;

34 Eng, ao a na riai naake a katabuaki n tarataraia naba.

35 Ao ti ataia bwa bwaai aikai a koaua ao a kaineti nakon ana kaotioti Ioane, n aki karaka, ke n anai man te taeka ni burabeti n ana boki, koroboki aika tabu, ke ana kaotioti te Atua are a na roko i mwina man te bwaintituaraoi ao mwaakan te Tamnei ae Raoiroi, bwanaan te Atua, ke aia mwakuri n ibuobuoki anera.

36 Ao te Uea ae te Atua e a tia n taekinii; ao te karineaki, te mwaaka ao te mimitong e na anganaki arana ae tabu, ngkai ao n aki toki. Amen.

37 Ao teuana riki, n tuangakin te ekaretia ni kaineti ma aron te bwabetito—Ni kabane naake a kananorinanoia imatan te Atua, ao n tangiria ni bwabetitoaki, ao n roko ma naano aika uruaki ao tamnei aika raraoma, ao ni kakoaua imatan te ekaretia bwa a bon raira nanoia raoi man aia bure nako, ao a kukurei ni katokaa i aoia aran Iesu Kristo, n iai irouia te nanomatoa ni beku irouna ni karokoa te toki, ni kaotia raoi man aia mwakuri bwa a tia ni karekea Tamnein Kristo nakon kamaunaan aia bure, a na butimwaeaki n te bwabetito nako nanon ana ekaretia.

38 Tabeia unimwaane, ibonga, tia reirei, rikan, ao kaain ana ekaretia Kristo—Te abotoro bon te unimwaane, ao bon weteana bwa e na bwabetito;

39 Ao ni katabuia tabeman riki unimwaane, ibonga, tia reirei, ao rikan;

40 Ao ni katabua te kariki ao te wain—te kanikina ibukin rabwatan ao raraan Kristo—

41 Ao ni kamatoaia naake a bwabetitoaki nako nanon te ekaretia, n te katoka bai ibukin te bwabetito n te ai ao te Tamnei ae Raoiroi, ni kaineti nakon koroboki aika tabu;

42 Ao n anga reirei, ni kabwarabwara, ni kaungaia, ni bwabetito, ao n tararua te ekaretia;

43 Ao ni kamatoaia nakon te ekaretia n te katoka bai, ao n anga te Tamnei ae Raoiroi;

44 Ao ni kairii tenaan botaki nako.

45 A na kairii taian botaki unimwaane n aron ae a kairaki iroun te Tamnei ae Raoiroi, ni kaineti nakon ana tua ao ana kaotioti te Atua.

46 Taben te ibonga bwa e na tataekinna, anga reirei, kabwarabwara, kaungaia, ao ni bwabetito, ao ni katabua te toa,

47 Ao ni kawari aia auti kaain te ekaretia, ao ni kaungaia n tataro ma bwanaaia ao ni karaba ao ni karaoi ni kabane taben te utu.

48 Ao e kona naba ni katabuia tabeman ibonga, tia reirei, ao rikan.

49 Ao e na kairii botaki ngkana e aki roko te unimwaane;

50 Ma ngkana iai te unimwaane, e na tii tataekini, anga reirei, kabwarabwara, kaungaia, ao ni bwabetito,

51 Ao ni kawarii aia auti kaain te ekaretia n tatabemania, ni kaungaia bwa a na tataro ma bwanaaia ao ni karaba ao ni karaoi ni kabane taben te utu.

52 N taabe ni kabane aikai e na ibuobuoki te ibonga nakon te unimwaane ngkana e kainnanoaki.

53 Taben te tia reirei bon tararuaan te ekaretia n taai nako, ao n raonia ao ni kakorakoraia;

54 Ao n taraia bwa e na akea te buakaka n te ekaretia, ke te kaiangatoa imarenaia, ke te kewe, te winnanti, ke taekinan ae buakaka;

55 Ao n taraia bwa e na aki toki ana botaki te ekaretia, ao n taraia naba bwa ni kabane kaain te ekaretia a na karaoa tabeia.

56 Ao e na kairii botaki n akean te unimwaane ke te ibonga—

57 Ao e na bubuokaki n tai nako, n tabena nako n te ekaretia, irouia rikan, ngkana e kainnanoaki.

58 Ma akea irouia tia reirei ke rikan te kariaiakaki ni bwabetito, ni katabua te toa, ke te katoka bai;

59 E ngae n anne, a na kauringiia, kabwarabwara, kaungaia, ao n anga reirei, ao ni kaoia ni kabane bwa a na nako nakon Kristo.

60 Ni kabane unimwaane, ibonga, tia reirei, ke rikan a na katabuaki ni kaineti nakon bwaai n tituaraoi ao ana wewete te Atua nakoia; ao a na katabuaki ni mwaakan te Tamnei ae Raoiroi, are iroun teuare e katabuia.

61 Unimwaane aika mwaiti ake kaain ana ekaretia Kristo a na riai ni botaki ni maungatabu teuana te tai i nanon teniua te namwakaina, ke man te tai teuana nakon te tai teuana n aron are baireaki ke rineaki n taian maungatabu are taekinaki.

62 Ao maungatabu ake a tia n taekinaki a na riai ni karaoi taben te ekaretia are e riai ni karaoaki n te tai anne.

63 Unimwaane a na riai ni karekei aia beeba ni kariaia mai irouia unimwaane ake tabeman, n ana rinerine te ekaretia n taabo ake a nako mai iai, ke man taian maungatabu.

64 Ibonga, tia reirei, ke rikan n tatabemania nako, ake a katabuaki iroun te ibonga, a na kona n anaa aia beeba ni kakoaua mai irouna n te tai anne, te beeba ni kakoaua are, ngkana e kaotaki nakon te unimwaane, e na reke iai nakoina te beeba ni kariaia, are e na kariaiakaki iai ni karaoi tabena ni weteana, ke e kona ni karekei man te maungatabu.

65 Akea te aomata ae e na katabuaki nakon tenaan nakoa n te ekaretia, n te tabo are kateaki iai te mwanga n te ekaretia, n akean aia rinerine kaain te mwanga anne;

66 Ma unimwaane ake taan tararua, bitiobi ake a mwamwananga, kaain te kauntira ae rietata, ibonga aika rietata, ao unimwaane, a na kona n reke irouia te kariaia ae onoti ni karaoa te katabu, n te tabo are akea iai mwangan te ekaretia are e na kona ni karaoaki iai te rinerine.

67 Tenaan beretitenti n te nakoanibonga ae rietata (ke te unimwaane ae tararua), bitiobi, kaain te kauntira ae rietata, ao te ibonga ae rietata, e na katabuaki n ana kairiri te kauntira ae rietata ke te maungatabu ni kabuta.

68 Tabeia kaain te ekaretia i mwin butimwaeakia n te bwabetito—Unimwaane ke ibonga a na riai n iai aia tai ae tau ni kabwarabwarai bwaai ni kabane ni kaineti ma ana ekaretia Kristo ni kamatataia, i mwaain kanakin te toa ao kamatoakia n te katoka bai irouia unimwaane, bwa aonga ni karaoaki bwaai ni kabane n aroia.

69 Ao a na riai kaain te ekaretia ni kaotia imatan te ekaretia, ao imataia naba unimwaane, man nakonakoia ao aia kakarabakau aika raraoi, bwa a bon tau nako iai, bwa aia mwakuri ma aia onimaki e booraoi ma taian koroboki aika tabu—n nakonako n te itiaki imatan te Uea.

70 Kaain ana ekaretia Kristo ake iai natiia a na riai ni uotiia nakoia unimwaane i matan te ekaretia, ake a na katokai baia i aoia n aran Iesu Kristo, ao ni kakabwaiaia n arana.

71 Akea ae e na kona ni karinaki i nanon ana ekaretia Kristo ni karokoa e a roko n te roro ni bukinaki i matan te Atua, ao e bon kona n raira nanona.

72 Te bwabetito e na karaoaki n aron ae kaotaki ikai nakoia ni kabane naake a raira nanoia—

73 Te aomata are e weteaki iroun te Atua ao iai irouna te kariaiakaki mai iroun Iesu Kristo ni bwabetito, e na ruo nako nanon te ran ma te aomata are teuare ke neiere e roko ibukin te bwabetito, ao n taekinna, ni weteia n arana: N reken te kariaiakaki mai iroun Iesu Kristo, I bwabetitoiko n aran te Tama, ao te Nati, ao te Tamnei ae Raoiroi. Amen.

74 I mwina e na kateboa teuaane ke neienne i nanon te ran, ao ni manga kawaerakea man te ran.

75 E bon riai bwa e na kaaitibo n taai nako te ekaretia n anaa te kariki ma te wain bwa kauringaan te Uea ae Iesu;

76 Ao te unimwaane ke te ibonga e na katabua; ao e na katabua n te aro aei—e na katorobubua ma kaain te ekaretia ao ni wetea aran te Tama n te tataro ni koaua, ni kangai:

77 O te Atua, te Tama ae Akea Tokina, ti butiko n aran Natim, Iesu Kristo, bwa ko na kakabwaia ma ni katabua te kariki aei nako nanon tamneia ake a na bane n anaia; bwa a na kanna ni kauringa iai rabwatan Natim, ma ni kakoaua nakoim, O te Atua, te Tama ae Akea Tokina, bwa a bon kukurei ni katokaa i aoia aran Natim, ma n aki toki n ururingnga ma ni kaawakin ana tua nako ake e a tia n anganiia; bwa e aonga ni memena Tamneina irouia n taai nako. Amen.

78 Aio aron katabuan te wain—e na anaa naba te mwangko, ao ni kangai:

79 O te Atua, te Tama ae Akea Tokina, ti butiko n aran Natim, Iesu Kristo, bwa ko na kakabwaia ma ni katabua te wain aio nako nanon tamneia ake a na bane n nimma, bwa a na karaoia ni kauringa raraan Natim, are e waanako ibukiia; bwa aonga ni kakoaua nakoim, O te Atua, te Tama ae Akea Tokina, bwa a na aki toki n ururingnga, bwa e aonga ni memena Tamneina irouia. Amen.

80 Kaain ana ekaretia Kristo are e bure, ke ni kuneaki ni karaoa te bure, e na rinanoaki n aron are e taekinaki ni koroboki aika tabu.

81 E na riki bwa tabeia taian mwanga, are kanoan ana ekaretia Kristo, bwa a na kanakoa temanna ke e mwaiti taan reirei bwa a na iri maungatabu aika kakaokoro are a kairaki irouia unimwaanen te ekaretia,

82 Ma tenaan rinan n ara are araia kaain te ekaretia ake a ikotiia ma te ekaretia man te maungatabu ae e nako; ke ni kanakoa ni bain te ibonga temanna; bwa a aonga rinan n ara ni kabane n te ekaretia ae bwanin ni kawakinaki n te boki iroun te unimwaane temanna, are e rineaki irouia unimwaane ake tabeman man te tai teuana nakon te tai teuana;

83 Ao, ngkana iai ae a kabaneaki man te ekaretia, bwa e aonga ni kamaunaki araia man ana boki n ara te ekaretia ae tabangaki.

84 Kaain te ekaretia ake a mwaing man te mwanga n te ekaretia are a maeka iai, ngkana a nako nakon mwangan te ekaretia teuana are a aki ataaki iai, a na kona n uota retaia ni kakoaua bwa bon ngaia kaain te ekaretia ae a kakaonimaki ao a tau, are te beeba ni kakoaua are e na korea arana iai te unimwaane ke te ibonga ngkana kaain te ekaretia anne are e karekea te reta e kinaaki iroun te unimwaane ke te ibonga, ke e kona ni kakoauaki irouia tia reirei ke rikan n te ekaretia.