Wóltaʼii 23
Diyin Yá Yáłtiʼí Joseph Smith éí ashdlaʼ tʼáá ałkééʼ diyingo bił ííshją́ą́ ádaʼalyaa éí Oliver Cowdery, Hyrum Smith, Samuel H. Smith, Joseph Smith Sr., dóó Joseph Knight Sr. bichʼįʼ kódaalyaa, Manchester, New Yorkdi, Tʼą́ą́chil 1830 yihahgo. Díí ashdlaʼgo diné wóójiʼígíí tʼáá íiyisíí haʼátʼíí éí shinaanish dooleeł danízingo bił hóóneʼ, Diyin Yá Yáłtiʼí Diyin Bóhólníihii neiyídéíłkid dóó tʼááłáʼí nízínígo bá bił ííshją́ą́ ádaʼalyaa.
1–7, Díí tʼáá áłtsé akééʼ naazínée ndaʼnítin, yéego ńdaʼookąąh, dóó Sodizin niłdzil ádeidoolííłgo bee bikʼidahodiiniiʼ.
1Áko shooh, Oliver, tʼáá áłchʼídígo saad, bee nichʼįʼ haasdziih. Áko shooh, nikʼihojisdliʼ, dóó doo nikʼijįʼ siʼání da. Ákondi ádaahodzódlí bee ádaaʼákonínízin, doo ákotʼéego éí nandiʼdínóotah.
2Bee nikʼihodiiniiʼígíí éí sodizin daʼatahígíí bee bił hodíílnih, áádóó nihokááʼ dineʼé bidááhdóó ałdóʼ, áádóó nijéí ąą ádoonííł áko tʼáá aaníinii bee naʼnítin doo kʼad dóó ahoolʼáágóó. Amen.
3Áko shooh, Hyrum, tʼáá áłchʼídígo saad, bee nichʼįʼ haasdziih; háálá ni ałdóʼ doo nikʼijįʼ siʼání da, dóó nijéí ąą átʼé, dóó doo nanitłʼahgóó yáníłtiʼ da dooleeł; dóó hasihgo yáníłtiʼgo bee nikʼihoodiiniiʼ, áádóó sodizin daʼatahígíí tʼáá ahą́ą́h dabidziilgo íínísin doo. Ákohgo sodizin hoolʼáágóó bá nanilnish doo, jó díí nighan hazʼánígíí bá. Amen.
4Áko shooh, Samuel; tʼáá áłchʼídígo saad, bee nichʼįʼ haasdziih; háálá ni ałdóʼ doo nikʼijįʼ siʼání da, dóó hasihgo yáníłtiʼgo bee nikʼihoodiiniiʼ, áádóó sodizin daʼatahígíí dabidziilgo íínísin doo; áádóó ni éí tʼah doo nihokááʼ dineʼé nanítingo niʼdilʼaah da. Amen.
5Áko shooh, Joseph; tʼáá áłchʼídígo saad, bee nichʼįʼ haasdziih; háálá ni ałdóʼ doo nikʼijįʼ siʼání da dóó hasihgo yáníłtiʼgo bee nikʼihoodiiniiʼ, áádóó sodizin daʼatahígíí dabidziilgo íínísin doo; áádóó díí ninaanish doo kʼad dóó ahoolʼáágóó. Amen.
6Áko shooh, Joseph Knight, díí saad bee, nił ííshją́ą́ áshłééh, áko nitsin ałnáozʼáí ndidíítį́į́ł, áádóó nízhí diitsʼaʼgo nihokááʼ dineʼé bá sodílzin doo tʼáá nahonitʼingóó ałdóʼ, dóó nighan hazʼánígíí bá, dóó nikʼiské bitahgóó, dóó tʼáá ałtso nahazʼą́ą́góó.
7Áádóó, áko shooh, sodizin tʼáá aaníinii bididíínááł éí ninaanish doo, áádóó nizaad bee tʼáá ahą́ą́h hasihgo bee yáníłtiʼ doo, áko ndaalnishí bichʼįʼ ndadoolyéłígíí naadoolyééł. Amen.