Wóltaʼii 36
Diyin Yá Yáłtiʼí Joseph Smith díí diyingo bił ííshją́ą́ ályaa éí Edward Partridge yee yił hodoolnih biniyé, Fayette, New York bíighahgi, Níłchʼitsoh 9, 1830 yihahgo (wóltaʼii 35gi alą́ąjįʼ saad dashijaaʼígíí yídííłtah). Joseph Smithʼs binákééʼ náháneʼ biyiʼ ání Edward Partridge “éí diné diyingo hodísinii nilį́ hwiinidzin, dóó Diyin Bóhólníihii bihastóí łaʼ ayóó átʼéii nilį́.”
1–3, Diyin Bóhólníihii éí Sidney Rigdon bilá binahjįʼ Edward Partridge yitsiitʼááh dahdiilniiʼ; 4–8, Tʼáá ałtso nihokááʼ dineʼé Jesus Christ binaʼnitin bee yisdáʼiildéehii dóó Diyin bibeʼadziilii baa dahasyáhígíí éí náás yee ndaʼnitin doogo bee bikʼidahodiiniiʼ.
1Áko Bóhólníihii Diyin God, Israel biDiyin Ayóóʼábóodziilii kóní: Áko shooh, shá naalʼaʼí Edward, ándishní, ni éí nikʼihojisdliʼ, áádóó nibąąhági ádaatʼéii ná yóóʼádaalyaa, áádóó shinaʼnitin bee yisdáʼiildéehii bizhí dilní diitsʼaʼ nahalingo bee naʼnítin doo;
2Áádóó shá naalʼaʼí Sidney Rigdon bilá bee nitsiitʼááh dahdideeshnih, áádóó shiʼIiʼ Sizį́ Diyinii bee nikʼihodidoonih, éí Iiʼ Sizį́ Diyinii, Aaʼáhályáanii ndi, éí diyingo hazʼą́ądi bee kʼé dahólónígíí yee nandínóotįįł;
3Áádóó nizhí yéego diitsʼaʼgo bee naʼnítin doo, kódíníigo: Hosanna, tsʼídá áláahdi Diyin God Diyin nilíinii nízhiʼ baadahwiiʼniih.
4Áádóó áko díí bee nikʼihodiiniiʼígíí dóó bee nichʼįʼ haasdzíʼígíí tʼáá ałtso nihokááʼ dineʼé bídadéétʼiʼígíi kʼad naa nishłé—
5Áko tʼáá háíshį́į́ shá naalʼaʼí Sidney Rigdon dóó Joseph Smith Jun., yidááh nahakáhígíí, díí bee bikʼihodiiniiʼígíí dóó bee bichʼįʼ haʼoodzíʼígíí deiyiiłtsoodgo, éí dabidiʼdoolzį́į́ł dóó hoolʼáágóó Jesus Christ binaʼnitin bee yisdáʼiildéehii ałʼąą dineʼé yee neinitin doogo abiʼdoolʼaʼ—
6Nideiyookąąhgo ádaa ńdaʼoohkąąh, deiłní: Díí tsiʼnaʼaldeehgo oochíłígíí bitsʼą́ąjįʼ yisdáhóhkááh, áádóó kǫʼ biyidóó hááhidoohkah, índa bąąhági átʼéii bee biʼééʼ dááchxǫʼ nahalinígi átʼéego dajiinohłá.
7Áádóó díí bee hazʼáanii éí shisodizin biyiʼ elders danilínígíí baa hidoolyééł, áko diné tʼááłáʼí nízínígo bijéí yee ahił danilį́įgo deiyiiłtsoodgo éí dabidiʼdoolzį́į́ł dóó yee ndaʼnitin doogo adabidiʼdoolʼaał, shí bee haasdzíʼígiʼ átʼáo ndi.
8Shí éí Jesus Christ áshtʼį́, Diyin God biYeʼ; ákohgo, ééʼ nihoozhnííʼ gónaaʼí bedaʼohtłʼóh áádóó tʼáá hooshchʼįʼ shighanjįʼ deeshááł. Tʼáá ákótʼée doo. Amen.