Wóltaʼii 3
Diyin Yá Yáłtiʼí Joseph Smith díí diyingo bił ííshją́ą́ ályaa, Harmony, Pennsylvaniadi, Yaʼiishjááshtsoh 1828 yihahgo, éí 116 naaltsoos ahetʼáád yooʼeejaaʼyę́ę bidéétʼiʼ éí Naaltsoos Mormon Wolyéhígíí tʼáá haʼaltahgi naasdzoh bitsʼą́ą́dę́ę́ʼ bilagáanakʼehjí ályaa, éí Lehi binaaltsoos wolyé. Diyin Yá Yʼáłtiʼí chʼééh doo íínízin da ndi díí ndaháasdzoh yaaʼáhályą́née yee lą́ asłį́į́ʼgo Martin Harris yee níjaaʼ, éí tʼóó hónísgháníjįʼ Naaltsoos Mormon Wolyéhígíí bilagáanaají álnééhgo yá naʼazoií nilį́į́ ńtʼę́ę́ʼ. Diyingo ííshją́ą́ eʼélnééh éí Urim dóó Thummin binahjįʼ nihił hóóneʼ. (Wóltaʼii 10gi yídííłtah.)
1–4, Diyin Bóhólníihii bihoogááł éí tsʼídá tʼááłáʼí áhoolʼáá góneʼ bee áhootʼį́; 5–15, Joseph Smith éí ádaa náʼiidookąął éí doodaiiʼ ataʼ haneʼ bee yílyáhę́ę da bigháádoolyééł 16–20, Naaltsoos Mormon Wolyéhígíí hadilyaago Lehi baʼáłchíní yinahjįʼ yisdádookah.
1 Diyin God bindaanish, biʼídaʼoolʼįįł, dóó dabiníyéí doo bikʼeh adiʼdoodleeł da, dóó doo tʼáadoo biniyéhí da dooleeł.
2 Diyin God doo nahoneeshtłʼiizhgo naagháa da, dóó doo nishnáájígo dahdiigááh da doodaiiʼ nishtłʼajígo da, áádóó yee haadziʼígíí doo łahgo ánáyoodlííł da, áko beʼatiin éí kéházdon, dóó bihooghááł éí tsʼídá tʼááłáʼí áhoolʼáá góneʼ bee áhootʼiʼ.
3 Béénílniih, béénílniih Diyin God binaanish éí doo bikʼehʼadidleeh da, ákondi nihokááʼ dineʼé binaanish éíí bikʼeh adidleeh;
4 Áko diné laʼída diyingo bił ííshją́ą́ adaʼályaa ndi, dóó ląʼígo áyóó átʼáó bidziilgo naanish ííłʼį́į́ʼ ndi, ákondi beʼadziil yee ádaadzódlíigo, dóó doo Diyin God bizaad yikʼehółʼį́į́góó, dóó tʼáá bí yinízinígií dóó atsʼísee yikééʼ yigááłgo, éí ndootłish dóó Diyin God tʼáá ákogiʼ átʼéii báháchįʼ ádąąhniidoodlééł.
5 Áko shooh, díí baa áhályą́ą doogo naahniilyá, áko haitʼáo nibee hazʼáanii naa haasyáhígíí tsʼídá tʼáá ákogi ádaatʼé; dóó bee nihikʼidahozhdoodliił nichʼįʼ kólyaaígíí ałdóʼ béénílniih.
6 Áádóó jó áko, Haanéélą́ą́ʼdi Diyin God ándííniidígíí doo bikʼeh hwííníłʼiin da ńtʼę́ę́ʼ dóó Diyin God bibee hazʼáanii ałdóʼ, áádóó diné nichʼįʼ yídaʼoołkąąhígíí bikééʼ dahdiniyá.
7 Háálá, áko shooh, tʼáadoo Diyin God bilááhgo diné béénildzid doo ńtʼę́ę́ʼ. Áko diné Diyin God bizaad nahjįʼ kódeiyiilaa, dóó bizaad deijoosłááʼ—
8 Yéego yinídláa doo ńtʼę́ę́ʼ; dóó nichʼįʼ dahdoolnih doo ńtʼę́ę́ʼ dóó chʼį́įdii beʼiinízįįdii bikǫʼ yee ádiłtʼóhígíí tʼáá átʼé yichʼįʼ naaʼáhályą́ą doo ńtʼę́ę́ʼ; áádóó tʼáá áłtso bee nichʼįʼ anáhóótʼiʼdi nił hólǫ́ǫ doo ńtʼę́ę́ʼ.
9 Áko shooh, Joseph éí ánítʼį́, dóó Diyin Bóhólníihii bánidíílnishgo nikʼidiilniiʼ, ákondi bee hazʼáanii kʼíínítiʼígíí biniinaa, doo baa ákonínízingóó neʼadziil da niʼkódoonííł.
10 Ákondi béénílniih, Diyin God éí joobaʼ, áko, bee hazʼáanii naaníláhígíí bitsʼą́ą́jí iindzaaígíí baa ádaa náʼiiníkąąh, dóó nániʼdiiltínígíí tʼahdii tʼáá akótʼé, dóó naanish ánááníłʼį́į́ doogo nikʼinááhodiiniiʼ;
11 Díí kwíínlaago tʼéiyá, nitsʼádoolyééł dóó nááná łaʼ nihokááʼ dineʼégi ánítʼée doo, dóó aʼiilyéii ntsʼą́ą́ʼ nídidoolyééł.
12 Áádóó Diyin God bee ííníʼį́įgo dóó adziilii bee átaʼhodíílníhgo naah niinílá éí naanish bichʼįʼ kónídíídlííł ńtʼę́ę́ʼ, ákótʼée ndi díí dílzinii diné doo yáʼáshóonii bílákʼée yínílá,
13 Éí Diyin God binaʼnitin doo bił nilį́į da, dóó Diyin God bidááhdóó tsʼídá dílzingo yee ádééhaasdzííʼyę́ę kʼíínítiʼ, áádóó tʼáá bí binahwiitʼaah yaʼoozlííʼ dóó tʼáá bí biʼhódzáanii yaa haniih.
14 Áádóó díí biniinaa bee nikʼihoodiiniiʼyę́ę łah ánáhooʼnííłjįʼ naanáádiilyá—
15 Háálá tʼóó nikʼihodiinííʼę́ędą́ą́ʼ Diyin binaʼnitin bikʼi naʼaldeehgo tʼóó bá hwiiníłʼaʼ.
16 Ákótʼée ndi, shinaanish tʼáá náás yitʼih doo, háálá nihokááʼ dineʼé Yisdáʼiiníiłii níyáago bił béédahózinígiʼ átʼáo, éí Jew dineʼé tʼáá aaníí yaa dahalneʼígíí binahjįʼ, tʼáá éíígi átʼáo ałdóʼ shidineʼé Yisdáʼiiníiłii bił béédahodoozįįł.
17 Áádóó Nephi dineʼé, dóó Jacob dineʼé, dóó Joseph dineʼé, dóó Zoram dineʼé ałdóʼ bichʼįʼ, éí dabizhéʼé tʼáá aaníigo bił béédahózinyę́ę binahjįʼ.
18 Áádóó díí tʼáá aaníinii Laman dineʼé bił béédahodoozįįł, Lemuel dineʼé ałdóʼ, dóó Ishmael dineʼé ałdóʼ, éí dabizází doo yáʼátʼéehii yaa naakaiyę́ę biniinaa bidaʼoodląʼ yitsʼáhaaskai, éí Diyin Bóhólníihii bikʼéí Nephi dineʼé ndeidoołtsxiłgo yee lą́ asłį́į́ʼ, háálá doo yáʼádaatʼéhígíí dóó tsʼídá woolchʼį́į́d yaa naakaiígíí biniinaa.
19 Áádóó díí tsʼídá áhodooníłígíí biniyé béésh tʼąhí hastʼeʼniiʼnil, éí díí dahaneʼ biyiʼ ndaháasdzoh—áko Diyin Bóhólníihii yee yił ahadaʼdeestʼánée bohodoolnííł, éí bidineʼé yił yee ahadaʼdeestʼą́;
20 Áádóó áko Laman dineʼé da dabizheʼéyę́ę bił béndahodoozįįł, áádóó Diyin Bóhólníihii yee yił ahadaʼdeestʼánée bił béndahodoozįįł, áádóó áko diyin binaʼnitin bee yisdáʼiildéehii da deidoodląął dóó Jesus Christ biyáʼatʼéehii yadaʼoolíi doo, dóó bízhiʼ deiyoodlánígíí binahjįʼ ayóó átʼéiigo adabidiʼdoolnííł, dóó ádaa ńdaʼooskango éí binahjįʼ da yisdáʼdookah. Amen.