1 Imdenganyo, O dakayo nga elder ti simbaanko, a nangummong iti bagbagiyo iti naganko, nga isu ni Jesucristo nga Anak ti sibibiag a Dios, ti Mangisalakan iti lubong; no la ketdi mamatikayo iti naganko ken tungpalenyo dagiti bilinko.

2 Manen kunak kadakayo, imdengan ken denggen ken tungpalenyo ti paglintegan nga itedko kadakayo.

3 Ta pudno kunak, nga iti panangummongyo iti bagbagiyo a maibatay iti bilin nga intedko kadakayo, ket nagnanaminganyo ti maipanggep iti daytoy a banag, ket dinawatyo iti Ama iti naganko, ket iti kasta maawatyonto.

4 Adtoy, pudno kunak kadakayo, itedko kadakayo daytoy umuna a bilin, a mapankayo babaen ti naganko, tunggal maysa kadakayo, malaksid kadagiti katulongak a da Joseph Smith, Jun., ken Sidney Rigdon.

5 Ket itedko ti bilin kadakuada a mapan iti ababa a panawen, ket maitedto babaen ti bileg ti Espiritu no kaano ti panagsublida.

6 Ket mapankayo babaen ti bileg ti Espirituk, a mangikasaba iti ebangheliok, a sagdudua, babaen ti naganko, nga ingatoyo ti timekyo a kas iti aweng ti trumpeta, a mangipakdaar iti balikasko a kas kadagiti anghel ti Dios.

7 Ket mapankayo a mamuniag iti danum, a kunayo: Agbabawikayo, agbabawikayo, ta asidegen ti pagarian ti langit.

8 Ket manipud iti daytoy a lugar mapankayo kadagiti paset iti laud; ket no la ketdi masarakanyo dagiti umawat kadakayo bangonenyo ti simbaanko iti tunggal paset—

9 Agingga a dumteng ti panawen a maibutaktak kadakayo manipud iti ngato, inton maisaganan ti siudad ti Baro a Jerusalem, a pannakaummongyo a sangsangkamaysa, tapno agbalinkayo a taok ket siak ti Diosyo.

10 Ket manen, kunak kadakayo, nga agakemto ti katulongak a ni Edward Partridge iti akem nga intudingko kenkuana. Ket mapasamakto, a no agbasol addanto sabali a matudingan a mangsukat kenkuana. Pudno a kasta. Amen.

11 Manen kunak kadakayo, a saan a maited iti asino man a mapan mangikasaba iti ebangheliok, wenno mangbangon iti simbaanko, malaksid no ordenan ti addaan iti turay, ken ammo ti simbaan nga addaan iti turay ken gagangay nga inordenan dagiti dadaulo ti simbaan.

12 Ket manen, dagiti elder, saserdote ken maestro daytoy a simbaan nasken nga isuroda dagiti pagbatayan ti ebangheliok, nga adda iti Biblia ken ti Libro ni Mormon, nga isu ti pakabuklan ti ebanghelio.

13 Ket tungpalenda dagiti katulagan ken kasuratan ti simbaan, ket dagitoy ti isuroda, kas panangiturong kadakuada ti Espiritu.

14 Ket maitedto kadakayo ti Espiritu babaen ti kararag ti pammati; ket no diyo maawat ti Espiritu saankayo a mangisuro.

15 Ket tungpalenyo amin dagitoy kas imbilinko maipanggep iti panangisuroyo, agingga a maited ti pakabuklan dagiti nasantuan a kasuratak.

16 Ket iti panangingatoyo iti timekyo babaen ti Mangliwliwa, agsao ken mangipadtokayonto no namnamaek a pagsayaatan;

17 Ta, adtoy, ammo ti Mangliwliwa ti amin a banag, ket paneknekanna ti kasuratan a maipanggep iti Ama ken iti Anak.

18 Ket ita, adtoy, agsaoak iti simbaan. Saankayo a mamapatay; ket isu a mamapatay awanto ti pakapakawananna iti daytoy a lubong, wenno iti umay a lubong.

19 Ket manen, kunak, saankayo a mamapatay; ngem isu a mamapatay matayto.

20 Saankayo nga agtakaw; ket isu nga agtakaw ken saan nga agbabawi mapapanawto.

21 Saankayo nga agulbod; ket isu nga agulbod ken saan nga agbabawi mapapanawto.

22 Ayatenyo ti asawayo a naimpusuan, ket makinaigkayo kenkuana laeng ket awanen ti sabali.

23 Ket isu a mangmatmat iti maysa a babai tapno gartemanna ilibakna ti pammati, ket mapukawna ti Espiritu; ket no saan nga agbabawi mapapanawto.

24 Saankayo a makiabig; ket isu a nakiabig, ket saan nga agbabawi mapapanawto.

25 Ngem isu a nakiabig ken nagbabawi a naimpusuan, ket lipatennan, ken saannan a sunotan pay, mapakawanto;

26 Ngem no aramidennanto manen, saanton a mapakawan pay, ngem mapapanawto.

27 Saanyo a pagsawan iti dakes ti kaarrubayo, wenno dangran.

28 Ammuenyo a dagitoy a paglintegan maipanggep kadagitoy a banag naitedda kadagiti nasantuan a kasuratak; isu a nagbasol ket saan nga agbabawi mapapanawto.

29 No ay-ayatendak pagserbiandak ken tungpalenyo amin a bilinko.

30 Ket adtoy, laglagipenyo dagiti nakurapay, ket idatonyo dagiti sanikuayo a pangtulong kadakuada, babaen ti katulagan ken kari a di malabsing.

31 Ket no la ketdi mangibinglaykayo iti kinabaknangyo kadagiti nakurapay, aramidenyonto kaniak; ket maidatagda iti obispo ti simbaanko ken kadagiti mamagbagana, dua kadagiti elder, wenno nangato a saserdote, no asino ti tudingannanto wenno natudingan ken pasingkedanna iti dayta a panggep.

32 Ket mapasamakto, a kalpasan ti pannakaidatagda iti obispo ti simbaanko, ken kalpasan ti pannakaawatna kadagitoy a pammaneknek maipanggep iti pannakaited-pateg kadagiti sanikua ti simbaan, a saanda a maala manipud iti simbaan, a mainugot kadagiti bilinko, adda sungsungbatan ti tunggal tao kaniak, nga agbantay iti sanikuana, wenno iti dayta naawatna babaen ti pannangted-pateg, nga umdas nga agpaay kenkuana ken iti kaamaanna.

33 Ket manen, no adda dagiti sanikua iti ikub ti simbaan, wenno asino man a tao, nga ad-adu ngem iti kasapulanda kalpasan daytoy immuna a pannakaidaton, a nabati iti maidaton iti obispo, maidulinto daytoy a maipaay kadagiti awanan, no dadduma, a tunggal tao nga agkasapulan mabalin a maikkan a sibubuslon ket umawat a maibatay iti kayatna.

34 Ngarud, maidulin iti pagidulinak ti nabati, a maited kadagiti nakurapay ken makasapul, a kas intuding ti nangato a konseho ti simbaan, ken ti obispo ken ti konsehona;

35 Ken para iti panggep a panaggatang kadagiti daga para iti pagimbagan ti kaaduan iti simbaan, ken pangpabangon kadagiti balay a pagkararagan, ken pangbangon iti Baro a Jerusalem a maipalgakto kalpasan daytoy—

36 Tapno aguummongto dagiti natulagan a taok iti dayta nga aldaw a yaayko iti templok. Ket aramidek daytoy para iti pannakaisalakan dagiti taok.

37 Ket mapasamakto, nga isu a nagbasol ken saan nga agbabawi mapapanawto iti simbaan, ket saannanton a mapasubli manen ti inikkan-pategna kadagiti nakurapay ken agkasapulan iti simbaanko, wenno iti sabali a pannao, kaniak—

38 Ta no la ket aramidenyo iti kabassitan kadagitoy, aramidenyo kaniak.

39 Ta mapasamakto, a maipatungpalto ti imbagak babaen ti ngiwat dagiti propetak; ta ikkak-pategto ti kinabaknang dagiti umawat iti ebangheliok kadagiti Gentil kadagiti nakurapay a taok nga adda iti balay ti Israel.

40 Ket manen, saankayo koma nga agpannakkel iti pusoyo; aramidenyo a nalinis amin a pagan-anayyo, ket ti pintasda pintas ti aramid dagiti imayo;

41 Ket aramidenyo amin a banag a nadalus iti imatangko.

42 Saankayo nga agsadsadut; ta ti managsadsadut saanto a mangan iti tinapay wenno agkawes iti pagan-anay ti trabahador.

43 Ket asino man kadakayo ti agsakit, ket awan ti pammatina a maimbagan, ngem mamati, mataraonanto a sidudungngo, iti bulbulong ken nalukneng a taraon, ken saan a babaen ti ima ti kabusor.

44 Ket dagiti elder ti simbaan, dua wenno ad-adu, matudingandanto, ket agkararagda ken ipatayda dagiti dakulapda kadakuada iti naganko; ket no matayda matayda kaniak, ket no agbiagda agbiagda kaniak.

45 Agbiagkayo a sangsangkamaysa iti ayat, iti kasta lumdaangkayo iti isisina ti matay, ken kangrunaanna kadagiti awan iti namnamada iti nadayag a panagungar.

46 Ket no mapasamakto a dagiti matay kaniak didanto maramanan ti patay, ta nasam-itto para kadakuada;

47 Ket isuda a matay a saan a kaniak, ay-ayda pay, ta napait ti ipapatayda.

48 Ket manen, mapasamakto nga isu nga addaan iti pammati kaniak a maimbagan, ken saan a maituding a matay, maimbaganto.

49 Isu nga addaan iti pammati a makakita makakitanto.

50 Isu nga addaan iti pammati a makangngeg makangngegto.

51 Ti pilay nga addaan iti pammati a makalagto makalagtonto.

52 Ket isuda nga awanan iti pammati a makaaramid kadagitoy, ngem mamatida kaniak, addaanda iti bileg nga agbalin nga annakko; ket no la ketdi ta dida aglabsing kadagiti paglintegak tulonganyo ida kadagiti an-annayenda.

53 Agtakderkayo iti lugar a pagrebbenganyo.

54 Diyo alaen ti pagan-anay ti kabsatyo; bayadanyo ti awatenyo iti kabsatyo.

55 Ket no magun-odyo ti ad-adu ngem iti kasapulanyo, itedyo iti pagidulinak, tapno maaramid amin a banag a maibatay iti imbagak.

56 Dumawatkayo, ket maitedto dagiti nasantuan a kasuratak a kas intudingko, ket maitalimengdanto a maaywanan;

57 Ket nasken unay a tenglenyo ti riknayo maipanggep kadakuada, ket saanyo nga isuro ida agingga a maawatyo ida a sibubukel.

58 Ket itdek kadakayo ti bilin a kalpasanna isuroyonto ida iti amin a tao; ta maisurodanto iti amin a pagilian, kakabsat, pagsasao ken tattao.

59 Alaenyo dagiti banag nga inawatyo, a naited kadakayo kadagiti nasantuan a kasuratak para iti paglintegan, nga agbalin a paglintegak a mangiwanwan iti simbaanko;

60 Ket isu a mangaramid a maibatay kadagitoy a banag maisalakanto, ket isu a di mangaramid kadakuada mailunodto no agtultuloy a kasta.

61 No agdawatkayo, umawatkayo iti paltiing iti kada paltiing, pagsiriban iti kada pagsiriban, tapno maammuanyo dagiti datdatlag ken makapatalingenngen a banag—a mangyeg iti ragsak, a mangyeg iti agnanayon a biag.

62 Agdamagkayo, ket maibutaktakto kadakayo iti naituding a panawenko a pakabangonan ti Baro a Jerusalem.

63 Ket adtoy, mapasamakto a maibaon dagiti katulongak iti daya ken iti laud, iti amianan ken iti abagatan.

64 Ket uray ita, bay-anyo a ti mapan iti daya isurona ida tapno mapasurotda a mapan iti laud, ket daytoy banag ti umay iti daga, ken iti nalimed a kinnunsabo.

65 Adtoy, tungpalenyo amin dagitoy a banag, ket dakkelto ti gunggonayo; ta maitedto kadakayo ti pannakaammo kadagiti datdatlag iti pagarian, ngem saanto a maammuan ti lubong ida.

66 Tungpalenyo dagiti paglintegan nga inawatyo ket agtalinaedkayo a napudno.

67 Ket awatenyo kalpasan daytoy dagiti katulagan ti simbaan, a kas iti umdas a pangrugianyo, ditoy man wenno iti Baro a Jerusalem.

68 Ngarud, isu nga agkurkurang iti pagsiriban, bay-anyo nga agdawat kaniak, ket itedko kenkuana a siwawaya ket saanko a pabainan.

69 Itag-ayyo dagiti pusoyo ket agrag-okayo, ta para kadakayo ti pagarian, wenno iti sabali a pannao, naiteden dagiti tulbek ti simbaan. Pudno a kasta. Amen.

70 Addanto pagrebbengan dagiti saserdote ken maestro, a kas kadagiti kameng.

71 Ket dagiti elder wenno nangato a saserdote natudingan a mangtarabay iti obispo a kas mamalbalakad iti amin a banag, matulonganto dagiti kaamaanda manipud iti sanikua a naikkan-pateg ti obispo, a para iti pagimbagan dagiti nakurapay, ken sabali pay a pagpaayan, kas naibagan;

72 Wenno umawatdanto iti umno a tangdan para iti amin a serbisioda, iti man pagrebbenganda wenno ania man, a mabalin a napanunot wenno inkeddeng dagiti mamalbalakad ken obispo.

73 Ket ti obispo, met, umawat met iti tulong, wenno iti umno a tangdan iti amin a serbisiona iti simbaan.

74 Adtoy, pudno kunak kadakayo, nga asino man kadakayo, a mangisina iti kasimpungalanna gapu iti panagdederrep, wenno iti sabali a pannao, no paneknekanda kadakayo a sipapakumbaba a daytoy ti gapu, diyo ida papanawen kadakayo;

75 Ngem no makakitakayo iti nangpanaw iti kasimpungalanna gapu iti pannakiabig, ket isuda a mismo ti naglabsing, ket sibibiag ti kasimpungalanda, mapapanawda kadakayo.

76 Ket manen, kunak kadakayo, nga agsiput ken agannadkayo, iti amin a damag, nga awan ti maawatyo a kasta kadakayo no siaasawada;

77 Ket no saanda a siaasawa, agbabawida iti amin a basolda wenno saanyo ida nga awaten.

78 Ket manen, tunggal tao a kameng iti daytoy a simbaan ni Cristo, nasken a tungpalenda amin a bilin ken katulagan ti simbaan.

79 Ket mapasamakto, nga asino man kadakayo ti pumatayto maidatag ken makedngandanto a maibatay kadagiti paglintegan ti daga; ta laglagipenyo nga awan ti pakapakawananna; ket mapaneknekanto a maibatay kadagiti paglintegan ti daga.

80 Ket no asino man a lalaki wenno babai ti makiabigto, mausigto iti sango ti dua nga elder ti simbaan, wenno ad-adu, ket maiparang amin a balikas a maibusor iti lalaki wenno babai babaen ti dua a saksi ti simbaan, a saan a ti kabusor; ngem nasaysayaat pay no ad-adu ngem dua ti saksi.

81 Ngem makedngan ti lalaki wenno babai babaen ti agtaud iti ngiwat ti dua a saksi; ket idatag dagiti elder ti kaso iti simbaan, ket itag-ayto ti simbaan dagiti imada a maibusor iti lalaki wenno babai, tapno makednganda a maibatay iti paglintegan ti Dios.

82 Ket no mabalin, nasken nga adda met a mangimatang ti obispo.

83 Ket kastanto ti aramidenyo iti amin a kaso a dumteng kadakayo.

84 Ket no agsipdut ti lalaki wenno babai, maidatagto ti lalaki wenno babai iti paglintegan ti daga.

85 Ket no agtakaw ti lalaki wenno babai, maidatagto ti lalaki wenno babai iti paglintegan ti daga.

86 Ket no agulbod ti lalaki wenno babai, maidatagto ti lalaki wenno babai iti paglintegan ti daga.

87 Ket no agaramid ti lalaki wenno babai iti ania man a pagbasolan, maidatagto ti lalaki wenno babai iti paglintegan, uray pay iti Dios.

88 Ket no agbasol kadakayo ti kabsatyo a lalaki wenno babai, agsinnangokayonto laeng; ket no agpudno ti lalaki wenno babai agkinnaawatankayonto.

89 Ket no saan nga agpudno ti lalaki wenno babai idatagyo ti lalaki wenno babai iti simbaan, saan a kadagiti kameng, ngem kadagiti elder. Ket maaramidto iti miting, ket saan nga iti sango ti lubong.

90 Ket no agbasol iti adu ti kabsatyo a lalaki wenno babai, madusanto iti kaaduan.

91 Ket no asino man ti agbasol a sibabatad, maungtanto iti tallaong, tapno mapabainan. Ket no saan nga agpudno ti lalaki wenno babai, maidatag ti lalaki wenno babai iti paglintegan ti Dios.

92 No asino man ti agbasolto iti nalimed, maungtanto ti lalaki wenno babai iti nalimed, tapno maaddaan ti lalaki wenno babai iti gundaway nga agpudno a sililimed iti lalaki wenno babai a nagbasolan ti lalaki wenno babai, ken iti Dios, tapno saan unay a babalawen ti simbaan ti lalaki wenno babai.

93 Ket kasta ti panangiturongyonto iti amin a banag.