1 Chex’ab’inq, ex xb’eenil re lin iglees, li kech’utub’ eerib’ sa’ lin k’ab’a’ laa’in, li Jesukristo ajwi’, li Ralal li yo’yookil Dios, laj Kolol re li ruchich’och’; a’ yaal jo’ nekexpaab’ank re lin k’ab’a’ ut nekepaab’eb’ lin taqlahom.

2 Jun sut chik ninye eere, chex’ab’inq, ut ab’ihomaq ut paab’omaq li chaq’rab’ li tink’e eere.

3 Xb’aan naq chi yaal ninye, jo’ xech’utub’ eerib’ jo’ chanru li taqlahom li kexintaqla wi’, ut wankex sa’ aatin chirix li jun chi na’leb’ a’in, ut xextz’aaman chiru li Yuwa’b’ej sa’ lin k’ab’a’, chi jo’kan ajwi’ texk’uluq.

4 K’ehomaq reetal, chi yaal ninye eere, nink’e eere li xb’een taqlahom a’in, naq texxik sa’ lin k’ab’a’, li junjunq eere, ka’ajwi’ lin moos aj Jose Smith, alalb’ej, ut laj Sidney Rigdon ink’a’.

5 Ut nink’e reheb’ a’an jun taqlahom naq te’xik chiru jun k’amok, ut taak’eemanq rik’in lix wankil li Musiq’ej jo’q’e te’sutq’iiq chaq.

6 Ut laa’ex texxik sa’ lix wankilal lin Musiq’, ut teejultika lin evangelio, sa’ ka’kab’il, sa’ lin k’ab’a’, ut teetaqsi xyaab’ eekux jo’ rik’in xyaab’ jun trompeet, ut teech’olob’ li waatin chanchaneb’ lix anjel li Dios.

7 Ut texxik ut texkub’sinq ha’ rik’in ha’, ut teeye: Chejal eek’a’uxl, chejal eek’a’uxl, xb’aan naq taanach’oq chaq li awa’b’ejihom re choxa.

8 Ut chalen sa’ li na’ajej a’in texxik sa’eb’ li na’ajej sa’ xjayal li rokeb’aal saq’e; ut a’ yaal jo’ teetaweb’ li te’k’uluq eere, teewaklesi lin iglees sa’ li junjunq chi na’ajej—

9 Toj reetal naq tixtaw xq’ehil naq taak’utb’esimanq cheru chalen chaq taqe’q, jo’q’e taakawresimanq li tenamit re li Ak’ Jerusalen, re naq texch’utub’amanq sa’ junajil, re naq laa’exaq lin tenamit ut laa’inaq lee Dios.

10 Ut jo’kan wi’chik, ninye eere, naq lin moos aj Edward Partridge taaxaqliiq sa’ li opiis li b’arwan kinxaqab’ wi’. Ut taak’ulmanq naq wi naq’etok aatin, jalan chik taaxaqab’amanq sa’ xna’aj. Chi jo’kan. Amen.

11 Jo’kan wi’chik ninye eere, naq moko k’eeb’ilaq ta re ani junaq chi xik re xjultikankil lin evangelio, malaj re xwaklesinkil lin iglees, ka’ajwi’ wi k’ojob’anb’il xb’aan junaq li k’eeb’il xwankil, ut nawb’il xb’aan li iglees naq k’eeb’il xwankil ut naq k’ojob’anb’il jo’ tento taa’uxq xb’aaneb’ laj jolominel re li iglees.

12 Ut jo’kan wi’chik, eb’ li xb’eenil, laj tij, ut laj tzolonel re li iglees a’in te’xk’ut li jar raqal chi na’leb’ re lin evangelio, li wan sa’ li Santil Hu ut lix Hu laj Mormon, sa’ li wan wi’ lix tz’aqalil li evangelio.

13 Ut eb’ a’an te’xk’e reetaleb’ li sumwank ut li jar raqal re li iglees re te’xb’aanu, ut a’inaq li te’xk’ut, jo’ chanru te’b’eresiiq xb’aan li Musiq’ej.

14 Ut li Musiq’ej taak’eemanq eere xb’aan li tijok chi wank eepaab’aal; ut wi moko nekek’ul ta li Musiq’ej ink’a’ texk’utuq.

15 Ut chixjunil a’in teek’e eech’ool chixb’aanunkil jo’ kexintaqla chirix li k’a’ru nekek’ut, toj reetal taak’eemanq lix tz’aqalileb’ lin loq’laj hu.

16 Ut naq teetaqsi lix yaab’ eekux xb’aan laj K’ojob’anel Ch’oolej, tex’aatinaq ut teeye profeetil aatin jo’ nink’oxla naq us;

17 Xb’aan naq, k’ehomaq reetal, laj K’ojob’anel Ch’oolej nanawok re chixjunil li k’a’aq re ru, ut naxch’olob’ xyaalal li Yuwa’b’ej ut li K’ajolb’ej.

18 Ut anajwan, k’ehomaq reetal, nawaatina li iglees. Matkamsin; ut ani nakamsin maak’a’aq xkuyb’al lix maak sa’ li ruchich’och’ a’in, chi moko sa’ li ruchich’och’ chalel.

19 Ut jo’kan wi’chik, ninye, matkamsin; a’ut ani nakamsin taakamq.

20 Mat-elq’ak; ut ani na’elq’ak ut ink’a’ tixjal xk’a’uxl taa’isiiq chaq.

21 Mattik’ti’ik; ani natik’ti’ik ut ink’a’ tixjal xk’a’uxl taa’isiiq chaq.

22 Taara laa wixaqil chi anchal aach’ool, ut tatjiloq rik’in a’an ut maajun chik.

23 Ut ani na’ilok re jun li ixq re xrahinkil ru tixtz’eqtaana li paab’aal, ut maak’a’aq li Musiq’ej rik’in; ut wi moko naxjal ta xk’a’uxl taa’isiiq chaq.

24 Matmuxuk sumsu; ut ani namuxuk sumsu, ut moko naxjal ta xk’a’uxl, taa’isiiq chaq.

25 A’ut ani xmuxuk sumsu ut naxjal xk’a’uxl chi anchal xch’ool, ut naxkanab’, ut maajun wa chik naxb’aanu, taakuy xmaak;

26 A’b’an wi naxb’aanu wi’chik, ink’a’ taakuye’q xmaak, taa’isiiq chaq b’an.

27 Maamaa’usila laa was aawiitz’in, chi moko taab’aanu junaq ra re.

28 Nakanaw naq k’eeb’il inchaq’rab’ chirix li k’a’aq re ru a’in sa’eb’ lin loq’laj hu; ani namaakob’ ut moko naxjal ta xk’a’uxl taa’isiiq chaq.

29 Wi nikinaara, tatk’anjelaq chiwu ut taapaab’ chixjunil lin taqlahom.

30 Ut k’e reetal, taajultiko’q aawe eb’ li neb’a’, ut re li k’a’ru aawe, taaq’axtesi re xtenq’ankileb’ li k’a’ru wan aawe chixk’eeb’al reheb’, rik’in jun sumwank ut jun xhuhil li eechanink li ink’a’ naru xq’etb’al.

31 Ut a’ yaal jo’ nekek’e xkomon li k’a’ru eere reheb’ li neb’a’, we laa’in teeb’aanu chaq; ut taak’ojob’amanq chiru li obiisp re lin iglees ut eb’ lix tenq’ aj k’ehol na’leb’, wiib’ reheb’ li xb’eenil, malaj xb’eenileb’ aj tij, anihaq tixxaqab’ malaj ak xxaqab’ ut xk’ojob’ choq’ re li ajom a’an.

32 Ut taak’ulmanq, naq chirix naq k’ojob’anb’il chiru li obiisp re lin iglees, ut chirix naq a’an ak xk’ul chixjunil li ch’olob’anb’il aatin a’in chirix li k’a’ru re lin iglees li q’axtesinb’il, naq ink’a’ naru xmaq’b’al chiru li iglees, jo’ chanru lin taqlahom, li junjunq chi winq taakanaaq chi teneb’anb’il chiwu, jo’ mertoom sa’ xb’een tz’aqal li k’a’ru re, malaj li k’a’ru xk’ul chi q’axtesinb’il, jo’ nimal li taatz’aqloq choq’ re a’an ut lix junkab’al.

33 Ut jo’kan wi’chik, wi wan eechej sa’ ruq’ li iglees, malaj yalaq ani wan chi sa’, li taaq’axoq re li na’ajman choq’ re xk’eeb’al xtenq’ankileb’, chirix li xb’een q’axtesink a’in, a’an jun rela’ li taaq’axtesimanq re li obiisp, taak’uulamanq re xk’eeb’al xtenq’ankileb’ li ani maak’a’eb’ re, chi yalaq jo’q’e, re naq li junjunq chi winq li taaraj xtenq’ankil tixk’ul chi tz’aqal ut taak’uluq jo’ chanru li ajb’il xb’aan.

34 Jo’kan ut, li rela’ taak’uulamanq sa’ lin k’uuleb’aal kab’l, re xk’eeb’al li taak’anjelaq reheb’ li neb’a’ ut li maak’a’eb’ wan re, jo’ xaqab’anb’ilaq xb’aan li taqenaqil ch’utam re li iglees, ut li obiisp ut lix ch’utam;

35 Ut re naq taaloq’manq li ch’och’ choq’ re lix chaab’ilal li iglees sa’ komonil, ut re xkab’lankil li ochoch re loq’onink, ut re xwaklesinkil li Ak’ Jerusalen, li toj moqon taak’utb’esimanq—

36 Re naq eb’ lin tenamit re li sumwank te’ch’utub’amanq sa’ junajil sa’ li kutan a’an naq tink’ulunq sa’ lin santil ochoch. Ut a’in ninb’aanu choq’ re lix kolb’al lin tenamit.

37 Ut taak’ulmanq naq ani li namaakob’ ut moko naxjal ta xk’a’uxl taa’isiiq chaq sa’ li iglees, ut ink’a’ tixk’ul wi’chik li k’a’ru xq’axtesi chaq choq’ reheb’ li neb’a’ ut li maak’a’eb’ wan re sa’ lin iglees, malaj sa’ jalan chik aatin, choq’ we laa’in—

38 Xb’aan naq a’ yaal jo’ nekeb’aanu re li q’axal ka’ch’in reheb’ a’in, we laa’in nekeb’aanu chaq.

39 Xb’aan naq taak’ulmanq, li k’a’ru kinye rik’in xtz’uumaleb’ re lin profeet taatz’aqloq ru; xb’aan naq laa’in tinwosob’tesi xkomon lix b’ihomaleb’ li ani neke’k’ulub’ank re lin evangelio sa’ xyanqeb’ laj Gentil, choq’ reheb’ li neb’a’ re lin tenamit li wankeb’ sa’ lix junkab’al laj Israel.

40 Ut jo’kan wi’chik, miwan xq’etq’etil aach’ool; chixjunil laa waq’ moko utz’u’ujinb’ilaq ta, ut lix chaq’al ru, a’anaq xchaq’al ru lix k’anjel tz’aqal aawuq’;

41 Ut chixjunil li k’a’aq re ru chib’aanumanq chi ch’ajch’o chiwu.

42 Moko aj q’emaqat ta; xb’aan naq ani aj q’em ink’a’ tixk’ux xwahil chi moko tixk’e chirix li raq’il laj k’anjenel.

43 Ut yalaq ani sa’ eeyanq yaj, ut maak’a’ xpaab’aal re k’irtesiik, a’ut napaab’an, taach’olaniiq rik’in anchal li tuulanil, rik’in q’een ut q’unal tzakemq, ut a’in moko rik’in ta ruq’ jun laj xik’ ilonel.

44 Ut eb’ li xb’eenil re li iglees, wiib’ malaj numenaq wiib’, te’b’oqe’q, ut te’tijoq choq’ reheb’ ut te’xk’e li ruq’ sa’ xb’eeneb’ sa’ lin k’ab’a’, ut wi neke’kam, we laa’in te’kamq, ut wi neke’kana chi yo’yo, we laa’in te’wanq chi yo’yo.

45 Tatwanq sa’ komonil rik’in rahok, jo’kan naq tatyaab’aq xb’aan xsachikeb’ li neke’kam, ut q’axal wi’chik choq’ reheb’ li maak’a’eb’ xyo’onihom naq te’wakliiq chi yo’yo rik’in loq’alil.

46 Ut taak’ulmanq naq eb’ li neke’kam chi weheb’ moko te’xyal ta li kamk, xb’aan naq ki’aq choq’ reheb’;

47 Ut eb’ li moko neke’kam ta chi weheb’, rahilal sa’ xb’eeneb’, xb’aan naq k’a lix kamikeb’.

48 Ut jo’kan wi’chik, taak’ulmanq naq ani wan xpaab’aal wik’in re k’irtesiik, ut moko eetalinb’il ta choq’ re li kamk, taak’irtesiiq.

49 Ani wan xpaab’aal chi ilok, taa’iloq.

50 Ani wan xpaab’aal chi ab’ink, taa’ab’inq.

51 Li yeeq roq li wan xpaab’aal chi pisk’ok, taapisk’oq.

52 Ut eb’ li maak’a’eb’ xpaab’aal chixb’aanunkil li k’a’aq re ru a’in, a’ut neke’paab’ank we, wankeb’ xwankil chi ok choq’ walal; ut a’ yaal jo’ moko neke’xq’et ta lin chaq’rab’, teekuyeb’ xyajel.

53 Tatxaqliiq sa’ xna’aj laa mertoomil.

54 Maamaq’ li raq’ laa was aawiitz’in; taatoj li b’arwan nakak’ul rik’in laa was aawiitz’in.

55 Ut wi nakak’ul li naq’axok re li taak’anjelaq choq’ re aatenq’ankil, taak’e re lin k’uuleb’aal kab’l, re naq taab’aanumanq chixjunil li k’a’aq re ru jo’ chanru li k’a’ru inyehom.

56 Tattz’aamanq, ut te’k’eemanq lin loq’laj hu jo’ chanru kinxaqab’, ut te’kole’q rix sa’ xyaalalil;

57 Ut na’ajman ru naq tatwanq chi ch’anch’o chirixeb’, ut ink’a’ taak’uteb’ toj reetal naq xak’uleb’ chi tz’aqal.

58 Ut nink’e eere jun taqlahom naq chirix a’an teek’uteb’ chiruheb’ chixjunil li winq; xb’aan naq te’k’ute’q chiruheb’ chixjunil li tenamit, junkab’al, aatinob’aal, ut teepal.

59 Taak’am li k’a’ru k’ulb’il aab’aan, li xk’ehe’ aawe sa’eb’ lin loq’laj hu choq’ chaq’rab’, re taawanq choq’ inchaq’rab’ re xjolominkil lin iglees;

60 Ut ani nab’aanunk re jo’ chanru li k’a’aq re ru a’in taakole’q, ut ani ink’a’ nab’aanunk re taak’ehe’q sa’ tojb’a-maak wi jo’kan nakana.

61 Wi tattz’aamanq, taak’ul chi tasal tasal li k’utb’esinb’il na’leb’, chi tasal tasal eenawom, re naq tatruuq chixnawb’al li muqmuukil na’leb’ ut li tuqtuukil k’a’aq re ru—li k’a’ru nak’amok chaq sahil ch’oolejil, li k’a’ru nak’amok chaq yu’am chi junelik.

62 Tattz’aamanq, ut taak’utb’esimanq cheru sa’ li kutan k’oxlanb’il inb’aan, b’ar taakab’lamanq li Ak’ Jerusalen.

63 Ut k’ehomaq reetal, taak’ulmanq naq eb’ lin moos te’taqlamanq sa’ releb’aal saq’e ut sa’ rokeb’aal, sa’ xnim li saq’e ut sa’ xtz’e.

64 Ut anajwan ajwi’, li ani naxik sa’ releb’aal saq’e chixtzolaqeb’ li te’jale’q xch’ool chi eelelik sa’ rokeb’aal saq’e, ut a’in xb’aan li k’a’ru taachalq sa’ ruchich’och’, ut eb’ li muqmuukil molam.

65 K’e reetal, taawil chixjunil li k’a’aq re ru a’in, ut nimaq aaq’ajkamunkil; xb’aan naq k’eeb’il eere xnawb’al li muqmuukil na’leb’ re li awa’b’ejihom, a’b’an re li ruchich’och’ moko k’eeb’il ta xnawb’al.

66 Teek’e reetaleb’ li chaq’rab’ li ak xek’ul, ut tiikaqex chi paab’ank.

67 Ut moqon teek’uleb’ li sumwank re li iglees, xkomon li tz’aqalaq re eexaqab’ankil, arin jo’ ajwi’ sa’ li Ak’ Jerusalen.

68 Jo’kan ut, ani moko tz’aqal ta xna’leb’, chitz’aamanq we, ut laa’in tink’e re chi numtajenaq ut moko tinch’iila ta.

69 Waklesihomaq eeraam ut chisaho’q sa’ eech’ool, xb’aan naq eere laa’ex k’eeb’il li awa’b’ejihom, malaj sa’ jalan chik aatin, lix laawil li iglees. Chi jo’kan. Amen.

70 Eb’ laj tij ut laj tzolonel te’wanq xmertoomil, jo’ chanru ajwi’ eb’ li komon.

71 Ut eb’ li xb’eenil ut li taqenaqil aj tij li xaqab’anb’ileb’ re xtenq’ankil li obiisp choq’ aj tenq’ aj k’ehol na’leb’ sa’ chixjunil li k’a’aq re ru, tento te’wanq lix junkab’aleb’ chi tenq’anb’il rik’in li eechej li q’axtesinb’il re li obiisp, choq’ re lix chaab’ilaleb’ li neb’a’, ut choq’ re jalaneb’ chik li ajom, jo’ chanru naq ak yeeb’il;

72 Malaj ut tento te’xk’ul jun tiikil eeqaj choq’ re chixjunil lix k’anjel, jun mertoomil ilom malaj jalan chik chan ru, jo’ chanru k’oxlanb’ilaq naq us, malaj k’oxlanb’ilaq xb’aaneb’ laj tenq’ aj k’ehol na’leb’ ut li obiisp.

73 Ut jo’kan ajwi’ li obiisp tixk’ul li k’a’ru taak’anjelaq re, malaj jun tiikil eeqaj choq’ re chixjunil lix k’anjel sa’ li iglees.

74 K’ehomaq reetal, chi yaal ninye eere, naq yalaq ani sa’ eeyanq, li xe’kanab’ank re li rochb’een xb’aan ko’b’eetak yumb’eetak, malaj sa’ jalan chik aatin, wi te’xch’olob’ xyaalal cheru chi kub’enaq anchal xch’ooleb’ naq jo’kan wan, moko teerisi ta chaq sa’ eeyanq;

75 A’b’anan wi nekenaw naq yalaq ani xe’xkanab’ li rochb’een re xmuxb’al xsumlajik, ut a’aneb’ li xe’b’aanunk re, ut yo’yo li rochb’een, te’isiiq chaq sa’ eeyanq.

76 Ut jo’kan wi’chik, ninye eere, naq texwanq chi yo’lek ut teeril eerib’, rik’in anchal li patz’ok, re naq maajun xkomon a’an teek’ul wi sumsuukeb’;

77 Ut wi moko sumsuukeb’ ta, te’xjal xk’a’uxl chirix chixjunileb’ lix maak, malaj ut ink’a’ teek’ul.

78 Ut jo’kan wi’chik, li junjunq li wan sa’ li iglees a’in re li Kristo, tixk’e xch’ool chixpaab’ankil chixjunil li taqlahom ut sumwank re li iglees.

79 Ut taak’ulmanq, naq wi yalaq ani sa’ eeyanq te’kamsinq, te’q’axtesimanq a’an, ut taa’uxmanq reheb’ jo’ chanru xchaq’rab’il li tenamit, xb’aan naq chijultiko’q eere naq maak’a’ xkuyb’al xmaak; ut taatz’ilmanq xyaalalil jo’ chanru lix chaq’rab’il li tenamit.

80 Ut wi junaq winq malaj ixq taamuxuq sumsu, li winq malaj ixq taatz’ile’q rix chiru wiib’ xb’eenil re li iglees, malaj numenaq wiib’, ut li junjunq chi aatin taaxaqab’aaq chirix xb’aan wiib’ aj yehol nawom re li iglees, ut moko re ta laj xik’ ilonel; a’b’an wi numenaq wiib’ aj yehol nawom, q’axal us wi’chik.

81 A’b’anan li winq malaj ixq taateneb’aaq xtojb’a-maak xb’aan xtz’uumal re wiib’ aj yehol nawom, ut eb’ li xb’eenil te’xk’ojob’ li na’leb’ chiru li iglees, ut li iglees te’xtaqsi li ruq’ chiru a’an, re naq taa’uxmanq reheb’ jo’ chanru lix chaq’rab’ li Dios.

82 Ut wi naru, aajel ru naq taawanq ajwi’ li obiisp aran.

83 Ut jo’ka’in teeb’aanu sa’ chixjunil li na’leb’ li taachalq cheru.

84 Ut wi jun winq malaj ixq taamaq’oq, a’an taaq’axtesimanq chiru lix chaq’rab’il li tenamit.

85 Ut wi li winq malaj ixq taa’elq’aq, a’an taaq’axtesimanq chiru lix chaq’rab’il li tenamit.

86 Ut wi li winq malaj ixq taatik’ti’iq, a’an taaq’axtesimanq chiru lix chaq’rab’il li tenamit.

87 Ut wi li winq malaj ixq tixb’aanu yalaq paay chi maa’usilal, a’an taaq’axtesimanq chiru li chaq’rab’, a’an ajwi’ li re li Dios.

88 Ut wi laa komon winq malaj ixq taarahob’tesinq aawe, taak’ul a’an chi wankex eejunes sa’ wiib’al, ut wi a’an tixch’olob’ xmaak teek’am eerib’ sa’ usilal.

89 Ut wi li winq malaj ixq ink’a’ naxch’olob’ xmaak, taaq’axtesi chiru li iglees, moko chiruheb’ ta li komon, chiruheb’ b’an li xb’eenil. Ut taab’aanumanq sa’ jun ch’utam, ut a’an moko chiruhaq ta li ruchich’och’.

90 Ut wi laa komon winq malaj ixq naxrahob’tesiheb’ naab’al, taaq’use’q chiru naab’al.

91 Ut wi yalaq ani narahob’tesink chi k’utk’u, a’an taach’iilaaq chi k’utk’u, re naq taaxutaanaq. Ut wi ink’a’ naxch’olob’ xmaak, a’an taaq’axtesimanq chiru lix chaq’rab’ li Dios.

92 Wi yalaq ani narahob’tesin chi muqmu, a’an taach’iilaaq chi muqmu, re naq taaruuq chiru xch’olob’ankil lix maak sa’ muqmu chiru li ani xrahob’tesi, ut chiru li Dios, re naq li iglees ink’a’ taa’aatinaq re xch’iilankil.

93 Ut chi jo’kan texb’eresinq sa’ chixjunil li k’a’aq re ru.