Wóltaʼii 43
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Atsá Biyáázh 1831 yihahgo. Ákweʼé hoolzhishgo łaʼ sodizin atah danilínígíí bíniʼdeeʼaʼ háálá nááná łahdę́ę́ʼ diné tʼáá ádzaagóó diyingo bił ííshją́ą́ ádaʼałʼį́ dabiłníigo. Diyin Yá Yáłtiʼí Diyin Bóhólníihii neiyídéíłkidgo díidí bił chʼétʼą́ éí Sodizinjí elders danilínígíí bee bił hodoonihgo. Áłtséhígíí éí Sodizinjí nahatʼá bee oonishígíí; akééʼdi éí hóyéeʼgo áhodooníłígíí elders adahwiisʼáágóó dah daʼínéhígíí yee ndeidínóotįįł.
1–7, Diyingo ił ííshją́ą́ ádaalʼíinii dóó bee hazʼáanii éí tʼááłáʼí bikʼihodiiniiʼígíí tʼéiyá baa doolyééł; 8–14, Jesus Yikééʼ Naazíinii éí Diyin Bóhólníihii yidááhdóó tʼáá ałtsoní deidísingo ádaʼáłʼį́ kótʼáo hadaałtʼéego ádabiʼdiilyaa; 15–22, Sodizinjí elders danilínígíí éí diné ádaa ńdaʼoohkąąh dabidohníigo ndanohtin dóó Diyin Bóhólníihii ayóó átʼéego beiníłką́ągo yibaʼ hashtʼeʼ ádadilnééh dooleeł; 23–28, Diyin Bóhólníihii tʼáá Bí bizhí yee diné yichʼįʼ yáłtiʼ dóó nahasdzáán yee bidziilígíí binahjįʼ; 29–35, Tʼááłáhídi Mííl Nááhaigo áádóó Chʼį́įdii dahidootłʼóółgo baa hodoolzhish.
1O daʼíísínółtsʼą́ą́ʼ, elders shisodizinjí atah danohłínígíí, saad bee nihichʼįʼ haasdziihígíí dadidohtsʼį́į́ł.
2Háálá áko shooh, tʼáá aaníí, tʼáá aaníigo, nihichʼįʼ haasdziih, bee hazʼáanii łaʼ niheiyílyá éí shisodizin bá átʼé, éí nihá bikʼidiishniiʼígíí beeʼ hazʼáanii dóó diyingo ííshją́ą́ ádaʼalyaaígíí shílákʼeedóó baa hashłé.
3Áádóó díí tʼáá aaníigo nihił bééhózin doo—doo nááná łaʼ nihá bikʼihodiiniiʼ da éí náábiʼdiilyáajįʼ bee hazʼáanii dóó diyingo ííshją́ą́ ádaʼalyaaígíí baa halyée doo, éí tʼáá shí 3ʼ sizį́įgo tʼéiyá.
4Ákondi tʼáá aaníí, tʼáá aaníigo, nihichʼįʼ haasdziih, díí aa halyéhígíí nihaidoolééłgo nihá bikʼihodiiniiʼígíí doo nááná łaʼ da éí tʼáá bí binahjįʼgo tʼéiyá; háálá aa halyé yá sizínígíí beʼadziil baa náádidoolyééł ndi tʼáá háiida bitséskʼeh góneʼ adoogáałgo yikʼididoolnih.
5Áádóó díí bee hazʼáanii nihá átʼée doo, áko háiida bee hazʼáanii dóó diyingo ííshją́ą́ ádaʼalyaa nihidááhdóó yee ndaʼnitingo tʼáadoo deinohdlání;
6Áádóó díí nihaa nishłé áko doo danihinóʼááh da doo, áko nihił bééhózin doo éí doo shitsʼą́ą́dóó átʼée da.
7Háálá tʼáá aaníigo nihichʼįʼ haasdziih, háiida yíísį́į́ʼgo éí yah ahóótʼiʼ góneʼ yah adoogáał áádóó bee nihichʼįʼ haasdzííʼyę́ęgi átʼáo bidiʼdoolzį́į́ł, éí nihá bikʼidiishniiʼígíí diyingo ííshją́ą́ ádaʼalyaaígíí baa háláhę́ę dóó náasdi baa deeshłéłígíí bee ndaʼnohtin doo.
8Áádóó áko, shooh, bee hazʼáanii łaʼ nihaa nílá, áko áłah nídaohdleehgo ndaʼahinohtin dóó nihiʼoodląʼ dabidziilgo ádaołʼį́į doo, áko haitʼáo shisodizinjí ahił ndaołnishgo deiyínółyeed doo, shinahatʼá dóó shibee hazʼáanii tsʼídá hazhóʼí ádaołʼį́į doo, éí nihaa nílá.
9Áádóó ákótʼáo shisodizinjí ákótʼáo shinahatʼá bee nanihidiʼdínóotʼį́į́ł, áádóó nihee yílyáhígíí bee hadadínółtʼee doo, áádóó ádééhadahisodzíʼígíí bikʼehgo shidááhdóó tʼáá ałtsojįʼ dadínóhsingo ádaʼoołʼį́į́ doo—
10Áko díí ádaołaago, diyingo nihił hazʼą́ągo nihee yílyahígíí tsʼídá ayóó átʼáo ádoolnííł. Áádóó díí tʼáadoo ádaołaagóó éiyá, nihitsʼą́ą́ʼ náádidoolyééł, azhą́ nihaa dahaasyáa ndi.
11Bąąhági átʼéii nihee dahólónígíí ádąąh táádaohgis; shidááhdóó hadanołtʼéego ádaʼdoołnééh;
12Áádóó áyóó átʼáo hazʼą́ tʼáá íiyisíí danohsingo, Joseph Smith, Jun. bikʼidadoołnííh, áádóó shidááhdóó niheʼoodląʼ bee sodadołzingo bíkáʼanídaahjah doo.
13Áádóó ałdóʼ, nihichʼįʼ haasdziih, áko diyingo hazʼą́ bitʼáá aaníinii tʼahdoo béédahozįįhígíí nihił ííshją́ą́ ádadoolnííł danohsingo, chʼiyáán dóó ééʼ, áádóó naanish ádíílííł bidííniidígíí ííléehgo tʼáá haʼátʼííshį́į́ yinízinígíí bee bíkáʼadoohjah.
14Áádóó díí tʼáadoo ádaohdzaagóó tʼáá éí yikʼidadiilniiʼgo bił hólónée bitah naagháa doo, áko shidááhdóó dineʼé hadaałtʼéhígíí bąąh hą́ą́h nisingo bił honishłǫ́ǫ doo.
15Nihichʼįʼ hanáánásdziih, elders shisodizinjí atah danohłínígíí daʼíísínółtsʼą́ą́ʼ, shí nihikʼidiishniiʼ: Doo nanihidíʼnóotįįł da biniyé anihííłʼaʼ da, ndi nihokááʼ dineʼé baʼáłchíní ndadínohtįįł shiʼIiʼ Sizį́ Diyinii bibeʼadziilii nihilákʼééláhígíí bee;
16Áádóó nihí yáʼąąshdééʼ nanihidiʼdínóotįįł. Hadanołtʼéego ádaʼdoołnééh áádóó adziilii nihaa dahidoolyééł, áko bee haasdzíʼígíí bedaʼdoohłííł.
17Daʼíísínółtsʼą́ą́ʼ, háálá, áko shooh, Diyin Bóhólníihii ayóó átʼéego nídoodááłgo bichʼįʼ hoolzhish.
18Háálá Diyin Bóhólníihii éí yáʼąąshdę́ę́ʼ hadoodzihgo bichʼįʼ yoołkááł; yáʼąąsh nahidooʼnaał dóó nahasdzáán ditsxiz dooleeł, Diyin God bidilní nízáádgóó ayóó íítsʼaʼgóó didootsʼį́į́ł, áádóó adahwiisʼáágóó daneeznáanii kwíídidooniił: Daʼiinóhdlánígíí nídoohjeeh dóó dahinohná; bąąhági ádaotʼínígíí tʼáá ákǫ́ǫ́h daʼoołhosh nihiká ánáádeeshniidgo índa.
19Ákohgo nihiʼééʼ nihoozhnííʼ gónaaʼígíí bedaʼohtłʼóh dóó doo yáʼádaashóonii bitsʼánóhkááh.
20Nihizhí dadiitsʼaʼgo ádaohlééh dóó tʼáadoo niʼ kódanohtʼéhé. Tʼáá ałtso diné dah deiyíkááhgóó ádaa ńdaʼoohkąąh dabidohní, tʼáá áłah hadaastihígíí dóó noosélí, tʼáá áłah ąąh shijééʼ dóó tʼáá bineʼ naakaiiʼígíí ndi, kódabidohní: Diyin Bóhólníihii ayóó átʼéego nídoodááłdi bichʼįʼ hashtʼeʼ ádadoołnééh;
21Háálá shí, diné nishłį́įgo, shizhí diitsʼaʼgo dóó ádaańdaʼoohkąąh nihidííniidgo, dóó dashijiinohłáago, adhwiisʼáádę́ę́ʼ iiʼniʼ dadiistsʼą́ą́ʼgo haʼátʼíísh éí dadidoohniił, éí tʼáá ałtso dahiinánígíí yichʼįʼ hadaasdzííʼgo, kódadidooniił—Ádaa ńdaʼoohkąąh, dóó Diyin Bóhólníihii ayóó átʼéego nídoodááłdi bichʼįʼ hashtʼeʼádadoołnééh?
22Aooʼ, áádóó ałdóʼ, atsiniltłʼish haʼaʼaah dóó ńléí eʼeʼaahjigo dajiilgishgo, áádóó biinééʼ tʼáá ałtso dahiináanii yichʼįʼ hadadoodzih, dóó tʼáá ałtso dabidiiztsʼaʼígíí bijaaʼ daawozh doo, díí saad yee ádaaníigo—Ádaa ńdaʼoohkąąh, dóó Diyin Bóhólníihii ayóó átʼéego nídoodááłdi bichʼįʼ hashtʼeʼádadoołnééh?
23Áádóó ałdóʼ, Diyin Bóhólníihii éí yáʼąąshdééʼ hadoodzihgo bichʼįʼ yoołkááł, éí kóbididooniił: Daʼíísínółtsʼą́ą́ʼ, O ałʼąą dineʼé tʼáá ánółtso adahwiisʼáádę́ę́ʼ dahdeiyínóhkáhígíí, Diyin God ánhiilaaígíí bizaad deisinółtsʼą́ą́ʼ.
24O, ałʼąą dineʼé tʼáá ánółtso adahwiisʼáádę́ę́ʼ dahdeiyínóhkááhii, díkwíidi lá ahąʼánánihiishdlaa naʼahóóhai bitʼaʼ biyaa biyázhí ahąʼánéíyilʼįįhígiʼ átʼáo, ákondi doo ádeinohsin da!
25Haanéélą́ą́ʼdi shąʼ shá ndaalʼaʼí hadahaasdziʼígíí binahjįʼ hágo nihidííniid, dóó Diyin yá ndaalʼaʼí ákáʼandaajahígíí, dóó tʼáá shí shiinééʼ bee, dóó daʼdiʼníigo biinééʼ bee, dóó ndaʼdilchʼilgo biinééʼ bee, dóó níłtsą́ bił dooyoł biinééʼ bee, dóó kéyah nahaʼnáago biinééʼ bee, dóó ayóó átʼáo ńló bee nahałtingo, dóó dichin dóó tʼáá áłtsóní ałʼąą átʼéego naałniih yiiʼ naakai doo, dóó ayóó átʼéego dilnígiʼ átʼáo dadiitsʼaʼgo, dóó ánahwiitʼaah biinééʼ bee, dóó iʼííʼą́ąjįʼ ajoobaʼ biinééʼ bee, dóó ayóó átʼéego dóó aa haʼniih biinééʼ bee dóó hoolʼáágóó iiná biʼatʼį́ bee, áádóó éí hoolʼáágóó bee yisdáʼiildéehii yee yisdáʼnihidooʼish, ákondi doo ádeinohsin da!
26Áko shooh, beiníłką́, bąąh haʼíízhahí bee honishkéhígíí biiʼ haʼdéíbįįdgo.
27Áko shooh, tʼáá aaníigo nihichʼįʼ haasdziih, áko díí saadígíí éí nihiBóhólníihii Diyin God bizaad átʼé.
28Éí bąą, shidáʼákʼehgi tʼáá łahídi nináádaałnish, nináádaałnish—nahasdzáán bikááʼ kéédahatʼíinii tʼáá łahídi bíká ánáádadidoohniił.
29Háálá shí íínisinígi baa hoolzhiizhgo nahasdzáán bikááʼ deeshááłgo nahodeeshʼááł, áádóó shidineʼé yisdádookah dóó nahasdzáán bikááʼ shił nidahohʼáa doo.
30Háálá ayóó átʼáo Tʼááłáhídi Mííl Nááhaijįʼ, shá ndaalʼaʼí shizaad yee hadadoodzih, éí baa hodoolzhizh.
31Háálá Chʼį́įdii éí dahaastłʼǫ́ǫ doo, áádóó biʼdoochidgo tʼóó kónízáhíjįʼ bóhólníih doo, áádóó índa nahasdzáán bee nihodoogááł.
32Áádóó tʼáá háíshį́į́ diyinkʼehgo hiináago jineeskʼolgi átʼéego łahgo ádoonííł, áádóó nahasdzáán kǫʼ bee yóóʼálnééh nahalin doo.
33Áádóó doo yáʼádaashóonii kǫʼ doo ntséesii biih dahidooltłʼił, áádóó haadadoníłígíí nihokááʼ dineʼé doo bił béédahózin da, dóó tsʼídá doo bił béédahodoozįįł da, éí shidááhdóó nahaaskaigo bá nahoníʼą́ągo índa.
34Díí saadígíí deisínółtsʼą́ą́ʼ. Áko shooh, Shí éí Jesus Christ áshtʼį́, nihokááʼ dineʼé Yisdáʼyiiníiłii. Díí nihijéí biih dahohłé, áádóó dadínóhsingo hoolʼáágóó nihintsékees biiʼ dahólǫ́ǫ doo.
35Dah hodínóhsin. Shibee hazʼáanii tʼáá átʼé bikʼehgo dahinohná. Tʼáá ákótʼée doo. Amen.