1 Chex’ab’inq, ex tenamit re lin iglees, li k’eeb’il wi’ eere li awa’b’ejihom; chex’ab’inq, ut k’ehomaq eexik rik’in li ani kik’ehok re lix k’ojob’ankil li ruchich’och’, li kiyiib’ank re li choxa ut chixjunil li teep aj aran, sa’ xk’ab’a’ li kiyiib’aman wi’ chixjunil li k’a’aq re ru wan xyu’am, ut na’eek’an, ut wan xwanjik.

2 Ut jun sut chik ninye, cherab’i lix yaab’ inkux, maare anchal textawe’q xb’aan li kamk; sa’ jun hoonal moko k’oxlanb’il ta eeb’aan akaq numenaq li saq’ehil, ut choyenaqaq li q’olok, ut moko kolb’ilaq ta lee raam.

3 Ab’ihomaq li ani wan choq’ aj aatinanel cherix chiru li Yuwa’b’ej, li yoo chi aatinak sa’ eek’ab’a’ chiru—

4 Li naxye: At inYuwa’, k’e reetal lix rahil ut lix kamik li ani maajun maak kixb’aanu, li kisaho’ wi’ chi tz’aqal aach’ool; k’e reetal lix kik’el laa Walal li kihoyman, lix kik’el li ani kak’e re naq laa’at ajwi’ nimanb’ilaq aaloq’al;

5 Jo’kan ut, at inYuwa’, chakoleb’ xyu’am li was wiitz’in a’in li neke’paab’ank re lin k’ab’a’, re naq taaruuq te’chalq wik’in ut te’wanq xyu’am chi junelik.

6 Chex’ab’inq, ex tenamit re lin iglees, ut ex xb’eenil ab’inqex sa’ komonil, ut cherab’i lix yaab’ inkux naq toj anajwan nayeeman, ut meekawob’resi eeraam;

7 Xb’aan naq chi yaal ninye eere naq laa’in li Alfa ut li Omega, lix tiklajik ut li roso’jik, lix saqen ut lix yu’am li ruchich’och’—jun saqen li nalemtz’un sa’ q’ojyin ut li q’ojyin moko naxtaw ta ru.

8 Kinchal rik’ineb’ li we, ut eb’ li we moko kine’xk’ul ta; a’ut jo’ k’ihaleb’ li ke’k’uluk we, kink’eheb’ xwankil chixb’aanunkil k’iila sachb’a-ch’oolej, ut chi ok choq’ ralal li Dios; ut reheb’ ajwi’ li ke’paab’ank re lin k’ab’a’ kink’e wankilal re xk’ulb’al li junelik yu’am.

9 Ut chi jo’kan ajwi’ kintaqla sa’ li ruchich’och’ lin sumwank li junelik nakana, re taawanq choq’ saqen chiru li ruchich’och’, ut re taawanq choq’ xaqxookil eetalil chiru lin tenamit, ut re naq eb’ laj Gentil te’sik’oq re, ut re taawanq choq’ aj k’amol esil chiru li wilob’aal, re xkawresinkil li b’e chiwu.

10 Jo’kan ut, chalqex rik’in a’an, ut rik’in li ani nachal tinna’leb’anq jo’ rik’ineb’ li winq sa’ najter kutan, ut tink’ut cheru lin kawil na’leb’ahom.

11 Jo’kan ut, chex’ab’inq sa’ komonil ut chink’utaq cheru xchaab’ilal ajwi’ inna’leb’—lix chaab’ilal xna’leb’ a’an li nekeye naq xDios laj Enok, ut eb’ lix komon,

12 Li ke’jache’ chaq ru rik’in li ruchich’och’, ut ke’k’ule’ wik’in laa’in—jun tenamit k’uulanb’il toj reetal naq taachalq jun kutan re tiikilal—jun kutan li kisik’e’ chaq xb’aaneb’ chixjunil li santil winq, ut moko ke’xtaw ta xb’aan li maa’usilal ut tz’eqb’eetalil;

13 Ut ke’xch’olob’ xyaalal naq a’aneb’ aj jalanil tenamit ut aj numeleb’ sa’ li ruchich’och’;

14 A’b’an ke’xk’ul jun yeechi’ihom naq toj te’xtaw ut te’ril sa’ lix tib’eleb’.

15 Jo’kan ut, chex’ab’inq ut laa’in tinna’leb’anq eerik’in, ut texwaatina ut tinye profeetil aatin, jo’ rik’ineb’ li winq sa’ li najter kutan.

16 Ut tink’ut chi ch’olch’o ru jo’ kink’ut chiruheb’ lin tzolom naq kinxaqli chiruheb’ sa’ li tz’ejwalej, ut ke’waatina, ut kinye: Jo’ kepatz’ we chirix li reetalil ink’ulunik, sa’ li kutan naq tink’ulunq sa’ inloq’alil sa’eb’ li choql re choxa, re xtz’aqob’resinkil ru lin yeechi’ihom li kinyeechi’i reheb’ lee yuwa’,

17 Xb’aan naq jo’ xeril lix najtil li relik chaq lee musiq’ rik’in lee tib’el jo’ jun moosil, tink’ut cheru chanru naq taachalq xkutankil li tojb’al-ix, ut jo’kan ajwi’ lix k’ojob’ankil wi’chik Israel li jek’inb’il.

18 Ut anajwan nekek’e reetal li santil ochoch a’in li wan Jerusalen, rochoch li Dios li nekeye re, ut eb’ li xik’ neke’ilok eere neke’xye naq li ochoch a’in maajo’q’e taat’ane’q.

19 A’b’anan chi yaal ninye eere, naq taachalq li sache’k-u sa’ xb’een li tasal tenamit a’in jo’ jun aj elq’ chiru q’ojyin, ut li tenamit a’in te’sache’q ut te’jek’iiq sa’ xyanqeb’ chixjunil li tenamit.

20 Ut li santil ochoch a’in li nekeril anajwan taarume’q chaq, jo’kan naq moko taakanaaq ta junaq pek sa’ xb’een li jun chik.

21 Ut taak’ulmanq, naq li jun tasal tenamit a’in reheb’ laj Judio ink’a’ taanume’q toj reetal naq li junjunq chi sache’k-u li kinye eere chirixeb’ a’an taak’ulmanq.

22 Nekeye naq nekenaw naq chalk re li roso’jik li ruchich’och’; nekeye ajwi’ naq nekenaw naq li choxa ut li ruchich’och’ te’oso’q;

23 Ut sa’ a’in yaal li nekeye, xb’aan naq jo’kan wan; a’b’an li k’a’aq re ru a’in li kinye eere moko taanume’q ta toj reetal taatz’aqloq ru chixjunil.

24 Ut a’in kinye eere chirix Jerusalen; ut naq taachalq li kutan a’an, taajek’imanq jun rela’ sa’ xyanqeb’ chixjunileb’ li tenamit;

25 A’b’an te’ch’utub’amanq wi’chik; a’ut te’kanaaq toj reetal taatz’aqloq ru lix q’ehileb’ laj Gentil.

26 Ut sa’ li kutan a’an taa’ab’imanq resil li pleet ut li esil chirix li pleet, ut chixjunil li ruchich’och’ taawanq chi choqinb’il, ut eb’ li winq te’lajq xch’ool, ut te’xye naq li Kristo naxb’ay lix k’ulunik toj sa’ roso’jik li ruchich’och’.

27 Ut taakeho’q li rahok rik’ineb’ li winq, ut taanumtaaq li maa’usilal.

28 Ut naq akaq okenaq xq’ehileb’ laj Gentil, taak’utunq jun saqen sa’ xyanqeb’ li chunchuukeb’ chaq sa’ q’ojyin, ut a’anaq xtz’aqalil lin evangelio;

29 A’b’an eb’ a’an moko neke’xk’ul ta, xb’aan naq ink’a’ neke’xk’e reetal li saqen, ut neke’risi chaq wik’in lix ch’ooleb’, xb’aan lix na’leb’eb’ li winq.

30 Ut sa’ li tasal tenamit a’an taatz’aqloq ru lix q’ehileb’ laj Gentil.

31 Ut te’wanq li winq xaqxo sa’ li tasal tenamit a’an, li toj maji’aq te’nume’q toj reetal naq te’ril jun rahilal aj b’ut’unel; xb’aan naq jun yajel aj sachonel tixnujob’resi li ch’och’.

32 A’b’anan eb’ lin tzolom te’xaqliiq sa’eb’ li na’ajej sant, ut ink’a’ te’eek’asiiq; a’b’an sa’ xyanqeb’ laj maak, eb’ li winq te’xtaqsi xyaab’eb’ xkux, ut te’xmajewa li Dios ut te’kamq.

33 Ut te’wanq li hiik sa’ b’araq chi na’ajej, ut naab’al li sachok-u; a’b’anan eb’ li winq te’xkawob’resi li raameb’ chiwix, ut te’xchap li yok’leb’ ch’iich’, li jun chiru li jun chik, ut te’xkamsi rib’ chirib’ileb’ rib’.

34 Ut anajwan, chirix naq laa’in, li Qaawa’ kinye li aatin a’in reheb’ lin tzolom, ke’numta xk’a’uxleb’.

35 Ut laa’in kinye reheb’: Minumta eek’a’uxl, xb’aan naq jo’q’e taak’ulmanq chixjunil li k’a’aq re ru a’in, taaruuq teenaw naq li k’a’ru yeechi’inb’il eere taatz’aqloq ru.

36 Ut naq li saqen taa’ok chi k’utunk, taawanq rik’ineb’ jo’ jun jaljookil ru aatin li tink’ut cheru—

37 Nekex’ilok ut nekek’e reetaleb’ lix toonaleb’ li higo, ut nekeril rik’in xnaq’ eeru, ut nekeye naq neke’ok chi tuxmek, ut toj q’uneb’ lix xaq, naq ak haye’k chaq re li saq’ehil;

38 Chi jo’kan ajwi’ taawanq sa’ li kutan naq te’ril chixjunil li k’a’aq re ru a’in, toja’ naq te’xnaw naq ak taahaye’q li hoonal.

39 Ut taak’ulmanq naq ani naxuwank we, taawanq chi ilok re rilb’al xchalik li xnimal ru xkutan li Qaawa’, re rilb’al li reetalil lix k’ulunik li Ralal li Winq.

40 Ut te’ril li eetalil ut sachb’a-ch’oolej, xb’aan naq te’k’utmanq chaq sa’ li choxa taqe’q, ut sa’ li ch’och’ taq’a.

41 Ut te’xk’e reetal li kik’, ut xam, ut xb’ook li sib’.

42 Ut rub’elaj naq taachalq xkutankil li Qaawa’, li saq’e taaq’ojyino’q ru, ut li po taakik’o’q ru, ut eb’ li chahim te’t’anje’q chaq sa’ choxa.

43 Ut li rela’ te’ch’utub’amanq toj sa’ li na’ajej a’in;

44 Toja’ ut naq te’iloq chiwilb’al, ut k’ehomaq reetal, tink’ulunq, ut tine’ril sa’eb’ li choql re choxa, tiqtooqin rik’in wankilal ut nimla loq’alil; wochb’eenaqeb’ chixjunil li santil anjel; ut ani moko wanq ta chi yo’lek re wilb’al, taa’isiiq chaq.

45 A’ut rub’elaj naq taat’ane’q li ruq’ li Qaawa’, jun anjel tixyaab’asi lix trompeet, ut eb’ laj santil paab’anel li ke’war toxe’elq chaq re ink’ulb’al sa’ li choql.

46 Jo’kan ut, wi kexwar sa’ tuqtuukilal, osob’tesinb’ilex; xb’aan naq jo’ chanru anajwan nikineeril ut nekenaw naq wankin, jo’kan ajwi’ texchalq wik’in ut taawanq xyu’am lee raam, ut taatz’aqloq re ru lix tojb’al eerix; ut eb’ laj santil paab’anel tole’elq chaq sa’ xkaajachalil chaq li ruchich’och’.

47 Toja’ naq taat’ane’q li ruq’ li Qaawa’ sa’ xb’eeneb’ li tenamit.

48 Toja’ ut naq li Qaawa’ tixk’ojob’ li roq sa’ xb’een li tzuul a’in, ut tixjach rib’ sa’ xyi, ut taachenchotq li ch’och’, ut taasaalanq chi junpak’al ut chi junpak’al chik, ut taachiq’manq ajwi’ li choxa.

49 Ut li Qaawa’ tixk’e chi aatinak lix yaab’ xkux, ut chixjunil lix maril li ruchich’och’ te’ab’inq re; ut eb’ li tenamit re li ruchich’och’ te’yaab’aq, ut eb’ li ke’se’ek chaq te’ril xmajelaleb’ xna’leb’.

50 Ut taanumtaaq li nimla rahilal sa’ xb’een laj eetz’unel, ut laj hob’onel taa’oso’q sa’ xam; ut eb’ li ke’ilok re rilb’al li maa’usilal te’yok’e’q chaq ut te’kute’q sa’ li xam.

51 Toja’ ut naq tine’ril laj Judio ut te’xye: K’a’ru li k’ob’olal a’in sa’ laa wuq’ ut sa’ laa woq?

52 Toja’ ut te’xnaw naq laa’in li Qaawa’; xb’aan naq tinye reheb’; A’ k’ob’olal a’in a’an li k’ob’olal kink’ob’e’ wi’ sa’ rochocheb’ li raab’ileb’ inb’aan. Laa’in li kintaqsiik chaq. Laa’in li Jesus li kik’ehe’ chiru krus. Laa’in li Ralal li Dios.

53 Toja’ ut naq te’yaab’aq xb’aan xmaa’usilaleb’; toja’ naq te’raho’q xch’ool xb’aan naq ke’xrahob’tesi lix rey.

54 Toja’ ut naq te’toje’q rix li jar tenamit li maak’a’eb’ xnawom chirix li Dios, ut eb’ li maajun chaq’rab’ ke’xnaw te’tz’aqonq sa’ li xb’een wakliik chi yo’yo; ut taaruuq te’xkuy xnumsinkil.

55 Ut taab’ak’e’q laj Satanas, re naq maak’a’aq xna’aj sa’ xch’ooleb’ li ralal xk’ajoleb’ li winq.

56 Ut sa’ li kutan a’an, naq tink’ulunq sa’ lin loq’al, taatz’aqloq ru li jaljookil ru aatin li kinye chirixeb’ li lajeeb’ chi tuq’ixq.

57 Xb’aan naq eb’ li wankeb’ xna’leb’ ut ke’k’uluk re li yaal, ut ke’xk’ul li Loq’laj Musiq’ej choq’ aj k’amol b’e chiruheb’, ut ink’a’ ke’b’alaq’iik—ninye chi yaal eere, ink’a’ te’yok’e’q chaq ut te’kute’q sa’ li xam, te’xkuy b’an xnumsinkil li kutan.

58 Ut li ruchich’och’ taak’eemanq reheb’ choq’ reechanihomeb’; ut te’k’ihanq ut te’kawuq xmetz’eweb’, ut eb’ li ralal xk’ajol te’ninqanq chi maak’a’ li maak, choq’ re li kolb’a-ib’.

59 Xb’aan naq li Qaawa’ taawanq sa’ xyiheb’, ut lix loq’al taawanq sa’ xb’eeneb’, ut a’anaq lix rey ut aj k’ehol chaq’rab’ chiruheb’.

60 Ut anajwan, k’ehomaq reetal, ninye eere, moko taak’eemanq ta eere xnawb’al chik chirix li jun ch’ol a’in, toj reetal taajaltesimanq ru li aatin sa’ li Ak’ Chaq’rab’, ut sa’ a’an taak’ehe’q chi nawmank chixjunil li k’a’aq re ru a’in;

61 Jo’kan naq nink’e eere naq teejaltesi ru anajwan, re naq texkawresimanq choq’ re li k’a’aq re ru toj taachalq.

62 Xb’aan naq chi yaal ninye eere, naq li k’a’aq re ru nim ru na’oyb’enink eere;

63 Nekerab’i resileb’ li pleet sa’ jalanil ch’och’; a’b’an k’ehomaq reetal, ninye eere, xe’nach’ok chaq, toj chire ajwi’ lee rokeb’aal, ut moko k’iila chihab’ ta chik naq teerab’i resil li pleet sa’ tz’aqal lee ch’och’.

64 Jo’kan naq laa’in, li Qaawa’, kinye, ch’utub’omaq eerib’ chalen chaq sa’eb’ li ch’och’ sa’ releb’aal saq’e, molk’ahomaq eerib’ ex xb’eenil re lin iglees; ayuqex sa’eb’ li ch’och’ sa’ rokeb’aal li saq’e, b’oqomaqeb’ chaq li wankeb’ aran re te’xjal xk’a’uxl, ut a’ yaal jo’ neke’xjal xk’a’uxl, waklesihomaqeb’ li iglees choq’ we.

65 Ut chi junaj eech’ool ut chi junaj eek’a’uxl, ch’utub’omaq lee b’ihomal re texruuq chixloq’b’al jun eechanihomej, li moqon taaxaqab’amanq choq’ eere.

66 Ut li Ak’ Jerusalen taayeemanq re, jun ch’och’ re tuqtuukilal, jun tenamit re xkolb’al eerib’, jun na’ajej re wank sa’ xyaalalil choq’ reheb’ laj santil paab’anel re li Dios Q’axal Taqenaq;

67 Ut lix loq’al li Qaawa’ taawanq aran, ut lix xuwankil ru li Qaawa’ taawanq ajwi’ aran, jo’kan naq eb’ laj maak ink’a’ te’ok rik’in, ut Sion taayeemanq re.

68 Ut taak’ulmanq sa’ xyanqeb’ laj maak, naq li junjunq chi winq li ink’a’ taachapoq re lix yok’leb’ ch’iich’ chiru li ras riitz’in, taa’ajmanq naq taa’eeleliq Sion re xkolb’al rib’.

69 Ut chi sa’ a’an te’ch’utub’amanq chaq sa’ li junjunq chi tenamit rub’el choxa; ut a’anaqeb’ li jun ajwi’ chi tenamit li moko taawanq ta chi pleetik li jun rik’in li jun chik.

70 Ut taayeemanq sa’ xyanqeb’ laj maak: Mootaqe’ chixpleetinkil Sion, xb’aan naq xuwajeleb’ li wankeb’ Sion; jo’kan naq ink’a’ tooruuq chi xaqliik.

71 Ut taak’ulmanq naq eb’ li tiikeb’ xch’ool te’ch’utub’amanq chaq sa’ xyanqeb’ chixjunil li tenamit, ut te’k’ulunq Sion, rik’in xb’ichankil li b’ich re sahil ch’oolejil li junelik nakana.

72 Ut anajwan ninye eere, meekanab’ li na’leb’ a’in chi xik b’araq sa’ li ruchich’och’, toj reetal naq taa’ajmanq ru choq’ we, re naq taaruuq teechoy xb’aanunkil li k’anjel a’in sa’ rilob’aaleb’ li tenamit, ut sa’ rilob’aaleb’ li xik’ neke’ilok eere, re naq ink’a’ te’xnaw lee k’anjel toj reetal naq akaq xechoy xb’aanunkil li k’a’ru kexintaqla wi’;

73 Re naq jo’q’e te’xnaw, taaruuq te’xk’oxla li k’a’aq re ru a’in.

74 Xb’aan naq jo’q’e taak’utunq li Qaawa’, xuwajelaq chiruheb’, re naq te’chape’q xb’aan xiw, ut te’xaqliiq chi najt ut te’siksotq.

75 Ut chixjunileb’ li tenamit te’xuwaq xb’aan li xiw chiru li Qaawa’, ut lix wankilal lix nimal xmetz’ew. Chi jo’kan. Amen.