1 Daʼíísínółtsʼą́ą́ʼ, O shisodizinjí daʼnohtahígíí, diyingo hazʼą́ nihaa dahaasyáhígíí; nahasdzáán haidiilaii bizaad deisínółtsʼą́ą́, yáʼąąshdi naazléii dóó tʼáá ałtsoní yáʼąąshdi kéédahatʼínígíí áyiilaii, dóó éí tʼáá ałtsoni dahiinánígíí, dóó ndahaʼnánígíí, dóó dahólónígíí áyiilaa.

2 Áádóó Shí ánáádíshní, shizaad bikʼeh dahonołʼį́, áko anoonééł doo nihikʼeh didoodleeł da; doo nidayínóhłíi da yę́ę ałtso ííshį́, áádóó ałtso daʼoogizhgo, nihiyiʼ naazíinii tʼáadoo yisdátʼeezh da dooleeł.

3 NihiTaaʼ yichʼįʼ nihá akʼíyáłtiʼí nilíinii deisínołtsʼą́ą́ʼ, éí bidááhdóó nihíhígíí nihá yaa naʼookąąh—

4 Kóníigo: ShiTaaʼ, áko shooh tʼáadoo bąąhági áátʼįįdyę́ę tiʼhoozniiʼ dóó biʼdiisyį́, éí tsʼídá nił yáʼíítʼééh; áko shooh niYeʼ bidił deeznaʼą́ą, éí niheiníłtinígíí bidił bee tʼáá íiyisíí naa haʼniih doo;

5 Éí bąą, aTaaʼ, shízhiʼ deiyoodlánígíí tʼáá baa sínítiʼ, áko shaa hakááhgo shikʼeh dahółį́į doo dóó hoolʼáágóó dahiináa doo.

6 Daʼíísínółtsʼą́ą́ʼ, O shisodizinjí daʼnohtahígíí, dóó elders danilínígíí bił daʼíísínółtsʼą́ą́ʼ, dóó shizhí dadidohtsʼį́į́ł tʼah jį́ haʼnínídą́ą́ʼ, dóó nihijéí tʼáadoo daołtłʼisí;

7 Háálá tʼáá aaníí nihichʼįʼ haasdziih Shí éí Alpha dóó Omega nishłį́, bee hodeeztʼiʼii áádóó bee nihonítʼiʼii, nahasdzáán beʼadinídíín dóó binahjįʼ daʼiináanii—éí adinídíinii chahałheeł biyiʼdi bitsʼádiʼnídíín dóó éí chahałheeł doo yikʼiʼdiitʼįįh da.

8 Tʼáá shíhígíí baa níyá, dóó tʼáá shíhígíí doo dashiniizį́į́ʼ da; ákondi ląʼída shikééʼ dahdiikaiígíí adziilii baa dahisélá áko ląʼída álilee yee ádeidoolííł, dóó Diyin God yiyeʼké dadooleeł; áádóó shízhiʼ deiyoodlánígíí ndi éí ałdóʼ adziilii baa dahisélá áko hoolʼáágóó iiná nídeididoolééł.

9 Áádóó tʼáá ákótʼáo nahasdzáán bikááʼ hoolʼáágóó diyingo shibee ahaʼdeetʼáanii bichʼįʼ kwííshłaa, éí nahasdzáán bitahgóó beʼadinídíinii dadooleeł biniyé, áádóó shidineʼé yikʼeh ádaʼałʼį́į doo, áko Gentile dineʼé yiká ádaatʼį́į doo, áádóó shilą́ąjįʼ haneʼ yooʼááłgo shá honítiʼgo hashtʼeidoolííł.

10 Éí bąą, baa doohááł, áádóó éí níyáhígíí ałkʼidą́ą́ʼ diné ahił ndahaʼáhę́ęgiʼ átʼáo bił nahodeeshʼááł, áádóó tʼáá ánółtso yéego bee nihił ndahosíʼánígíí nihichʼįʼ kódeeshłííł.

11 Éí bąą, tʼáá ánółtso ahił daʼíísínółtsʼą́ą́ʼ dóó shihódzáanii ndi nihił ííshją́ą́ ádeeshłííł—éí Enoch dóó bikʼéí, biDiyin God dabidohnínígíí bihódzáanii,

12 Éí nahasdzáán bikááʼdóó dego náádabiʼdiiʼnil, dóó shił hazʼą́ą́góó anááʼeezh—Diyinkʼehgo oodááł baa hoolzhiizhdi índa éí kintah niʼ bikááʼgóó ninádooʼnił—éí yoołkáałgi tʼáá ałtso diné dahodísinígíí hadeinitáa łeh ńtʼę́ę́ʼ, ákondi tʼáadoo yikʼékai da háálá doo yáʼádaashóonii dóó éí tsʼídá aláahdi woolchʼį́dígíí baa naʼaldeehígíí biniinaa;

13 Áádóó déʼéyóní áádóó, tʼóó nahasdzáán bikááʼ tádadinéehii daniidlį́, dajiníigo ádá hadadziisdzííʼ;

14 Ákondi ádééhaʼoodzííʼ haiílyá áko éí bikʼízh dookahgo hatsʼíís tʼáá dahólǫ́ǫgo dazhdoołtsééł.

15 Éí bąą, daʼíísínółtsʼą́ą́ʼ áko nihił ndahashʼáa doo, áádóó ałkʼidą́ą́ʼ diné ahił ndahaʼáhę́ęgiʼ átʼáo, nihichʼįʼ yáshtiʼ dóó nihił ííshjání éʼéshʼį́į doo.

16 Áádóó shikééʼ naazíinii shitsʼíís bee bidááhdóó yiizį́ʼę́ęgiʼ átʼáo tʼáá baa hatʼaadí ííshją́ą́ ádeeshłííł, áádóó kódíshníigo, bichʼįʼ haasdzííʼ: Náníshdáahdi bee daatʼį́į dooígíí bíndashídóołkid, yádiłhił biyiʼdę́ę́ʼ kʼos shił yildohgo sheʼayóó átʼéii bee nídeeshdááł, áko ałkʼidą́ą́ʼ danihizhéʼé bił ahadaʼsidétʼánée beʼdeeshłííł biniyé,

17 Háálá nihiiʼ naazíinii nízaadgóó nihitsʼíís doo yił hólǫ́ǫgo ąąh naazhjééʼ nahalingo danółʼį́, nihá nináʼdoolyééł beiníłką́ądi haa hodooníłígíí nihił ííshją́ą́ ádeeshłííł, áádóó ałdóʼ Israel daʼníłtsʼą́ą́jigo ahineeskaadyę́ę ahanináhidootʼish.

18 Áádóó áko Diyin bighan ntsaaígíí Jerusalemdi siʼą́ągo daołtsą́, éí Diyin God bighan átʼé dadohní, dóó niheʼanaʼí díí kin tsʼídá doo ndoołdas da daaní.

19 Ákondi, Shí tʼáá aaníigo nihichʼįʼ haasdziih, chahałheeł biyiʼ aniʼįįhii níyáhígi átʼéego tʼáadoo hooyání díí oochíłígíí bee íʼdooldįįłii bikʼi hodooleeł, dóó díí diné tʼáá ałtso ndadooltsxił dóó adahwiisʼáágóó diné dah deiyínééh bitahgóó adahidínóolkał.

20 Áádóó díí Diyin bighan ntsaaígíí kʼad danółʼínígíí niʼjįʼ ndoołdas tsé doo ndi łaʼ ałkʼidasiʼą́ą da doo.

21 Áádóó baa hodoolzhish, Jew dineʼé díí oochíłígíí biyiʼ doo bił yóóʼahodoogáał da, íʼdooldįįłii bee haasdzį́ʼę́ę tʼáá ałtso bohoolyaago índa.

22 Nahasdzáán bił yóóʼahodoogáłígíí nihił béédahózin dadohní; áádóó ałdóʼ ádadohní yáʼąąsh dóó nahasdzáán bił yóóʼahodoogááłgo nihił béédahózin;

23 Áádóó díí tʼáá aaníí átʼé dadohní, háálá díí tʼáá ákótʼé; ákondi díí bee nihił hweeshneʼígíí doo bił yóóʼahodoogááł da tʼáá ałtso bidahoolyaago índa.

24 Áádóó díí Jerusalem bídéétiʼígíí bee nihił hweeshneʼ; áádóó áájįʼ ayííłką́ągo, chʼéédzíʼígíí tʼáá ałtso ałʼąą dineʼé bitahgóó áłtsʼádahidínóolkał;

25 Ákondi éí ahínáhidootʼish; tʼahdii tʼáá áadi ałtsʼąą ndaakai doo Gentile dineʼé bił hoolzhishígíí bohoolyaago índa.

26 Áádóó áadi hoolzhishgo anaaʼ baa dahodiitsʼaʼ doo dóó anaaʼ baa atseezį́ ádaalʼį́į doo, dóó nahasdzáán bikááʼ tʼáá ałtsogóó bííghahí daaníigo hahóóʼáa doo, dóó biláʼ ashdlaʼii bijéí yee doo hadaʼólníi da dooleeł, áádóó kódadidooniił Christ doo hah nádáah da nahasdzáán bee nihoníyáajįʼ índa.

27 Áádóó nihokááʼ dineʼé bee ayóóʼóʼónínée ádoodįįł, dóó bąąhági átʼéii bił hwiidooʼaał.

28 Áádóó Gentile dineʼé bił hoolzhishígíí baa hoolzhiizhgo, chahałheeł yiiʼ naháztʼánígíí adinídíín bitahgóó adiʼdidoołdlał, dóó éí Diyin binaʼnitin bee yisdáʼiildéehii tʼáá átʼé átʼée doo;

29 Ákondi doo dabidiʼdoołnááł da; háálá adinídíín doo yikʼedaʼdiitą́ą da doo, háálá nihokááʼ dineʼé binaʼnitinígíí biniinaa bijéí shitsʼą́ąjigo kódeidoolííł.

30 Áádóó náás daʼahílchíihii Gentile dineʼé bił hoolzhishígíí bohodoolnííł.

31 Áádóó náás daʼahílchíihii nihokááʼ dineʼé dahiinánígíí, doo anídahidookah da ntsihodinídéél binááł áhoodzaago índa; háálá naałniih naʼałtseedii adahwiisʼáágóó kéyah bikʼi hodooleeł.

32 Ákondi shikééʼ naazíinii dahodílzin hazʼą́ągi naazį́į doo, dóó doo nahjįʼ kódoolnííł da; ákondi doo yáʼádaashóonii bitahgóó éí, nihokááʼ dineʼé bizhí yee hadadidoolwosh dóó Diyin God dayódziih doo áádóó dadínóonééł.

33 Áádóó ałʼąą ádahootʼéégóó ałdóʼ kéyah ndahaʼnáa doo, dóó łą́ągo dahodoochxǫǫł; ákondi nihokááʼ dineʼé bijéí shichʼįʼ deidoołtłʼis, áádóó béésh hał ałchʼįʼ yił hadadidoolchił, ałkʼijįʼ ńdeididootį́į́ł, dóó ndaʼahidooltsxił.

34 Áádóó áko, Shí Diyin Bóhólníihii díí saad shikééʼ naazíinii bee bichʼįʼ haasdzííʼgo, éí bíní deiyiiłʼaʼ.

35 Áádóó Shí ábidishní: Tʼáadoo bikʼee nitsidaahkaaí, háálá, díidí tʼáá ałtso ádahoodzaago, nihił béédahodoozįįł bee ádééh hadaʼiisdzííʼ adaalyaayę́ę ałtso bidahodoolnííł.

36 Áádóó adinídíín bee aʼdíídláádgo, haneʼ bee akʼidiʼdootį́įłii nahalin doo éí nihił ííshją́ą́ ádeeshłííł—

37 Dadohááł dóó tsin ííʼá fig danołʼį́, áádóó nihinááʼ bee deidoołtsééł, áádóó bąąh dah daʼiitsoi, dóó bitʼąʼ tʼah daalzhólígo, shį́ kʼadę́ę́ baa hoolzhíísh dadidoohniił;

38 Ákohgo índa éí áajį ayííłką́ągo tʼáá ałtsóní díidi deidoołtsééł, áadi índa bił béédahodoozįįł áajįʼ aʼdoolkiłígíí kʼadę́ę́ baa hoolzhíísh doo.

39 Áádóó baa hodoolzhish háiida shá hodísinígíí Diyin Bóhólníihii ayóó átʼéego doogáłígíí yíká deezʼį́į doo, áko Diné Silį́įʼii nádááh bee yitʼínígíí yaa dahalneʼ doo.

40 Áádóó bee daatʼínígíí dóó ayóó ádahooníiłii deidoołtsééł, háálá éí wódahdi yádiłhił biyiʼdi, dóó wóyahdi nahasdzáán bikáaʼgi daatʼį́į doo.

41 Áádóó dił, dóó kǫʼ, dóó łid dahdeiyíjoołgo deidoołtsééł.

42 Áádóó Diyin Bóhólníihii tʼah doo yighááhdą́ą́ʼ kóhodoonííł, jóhonaaʼéí bikááʼ chahodoołhił, áádóó tłʼéhonaaʼéí dił nahalin dooleeł, áádóó sǫʼ yáʼąąshdę́ę́ʼ adahidinóodah.

43 Áádóó diné chʼéédziʼígíí kweʼé hazʼą́ągi ahínááhidootʼish;

44 Áádóó índa shíká dadéezʼį́į dooleeł, dóó, áko shooh, deeshááł; dóó yáʼąąshdi kʼos biyiʼ dashiidoołtsééł, adziilii dóó ayóó átʼéego bee hadiníshtʼéego; Diyin yá ndaalʼaʼí dadiyinii tʼáá átʼé bił; áádóó doo shiká dadeezʼį́ʼígíí éí nahjįʼ kódabidiʼdoolnííł.

45 Ákondi Diyin Bóhólníihii tʼah doo béésh hał yee adziłhaałgóó, Diyin yá naalaʼí łaʼ bidilní ayóó íitsʼaʼgo yididoołtsʼį́į́ł, dóó Diyin yá naazíinii ańdahaaskaiyę́ę náádidoojah dóó kʼos biyiʼdi shaa hidookah.

46 Éí bąą, ahodóółzeeʼgo hanáłyį́į́hyę́ę nihikʼihojídlíi doo; háálá kʼad dashoołtsá tʼáá shí ashtʼį́įgo nihił béédahoozin, áko shaa hidoohkah dóó nihiiʼ sizíinii hiináa doo, dóó nihá nináʼílyá éí hadíłtʼée doo; dóó Diyin yá naazíinii nahasdzáán bikááʼ dį́į́ʼ nahazʼą́ądę́ę́ʼ náádidoojah.

47 Áko índa Diyin Bóhólníihii diné dah deikáhígíí béésh hał yikʼijįʼ adzidoołhał.

48 Áádóó áko Diyin Bóhólníihii díí dził siʼą́ąjįʼ niʼ yikááʼ nikídidoolʼis, áádóó áłtséídoonił, dóó nahasdzáán nahaʼnáa dooleeł, dóó naah kónátʼįįh dooleeł, áádóó yáʼąąsh ndahazʼą́ądi ałdóʼ daditsxiz doo.

49 Áádóó Diyin Bóhólníihii biinééʼ yee hadoodzih, áádóó nahasdzáán nidahoneesʼą́ą́dę́ę́ʼ diné tʼáá ałtso dazhdidootsʼį́į́ł; áádóó nihokááʼ dineʼé tʼáá ałtso yínííł danilį́į doo, dóó aa daadlohę́ę doo ákodaʼiilaaígíí yaa ákodadínóozįįł.

50 Áádóó nitsohodinídéél éí aa daadlohyę́ę ndabidoołtsxił, tʼáá ádzaagóó ándahałtʼiʼígíí ábiʼdiʼdoolkʼą́ą́ł; áádóó bąąhági átʼéii hadeinitáhą́ą ałtso dooldah dóó tsídzáhídooltłʼił.

51 Áádóó Jew dineʼé dashidinóołʼįįł dóó adadidooniił: Díí nilaʼ dóó nikeeʼ atídaalyaaígíí shąʼ haʼátʼíí ádaatʼé?

52 Ákohgo índa Diyin Bóhólníihii nishłínígíí bił béédahodoozįįł; háálá ábidideeshniił: Díí atíshiʼdiilyaaígíí éí shikʼiské bighan góneʼ atíshiʼdiilyaa. Shí éí dah biʼdiiltínée áshtʼį́. Shí éí Jesus tsin ałnáozʼá bikʼijįʼ bił oʼoolkaalyę́ę áshtʼį́. Shí éí Diyin God biYeʼ nishłį́.

53 Áádóó bąąhági ádaatʼįįdígíí biniinaa daachah doo; áko yínííł yiiʼ ndaakai doo háálá biʼaláahdi naatʼáanii atídeiyiilaaígíí biniinaa.

54 Áádóó índa doo daʼoodláanii dah deiyíkáhígíí bá ninádaʼdoolyééł, dóó Diyin bee hazʼáanii doo bił béédahózinígíí tsʼídá áłtsé atah náádahiiʼnáa doo; áádóó doo yéego atíbidiʼdoolnííł da.

55 Áádóó Chʼį́įdii éí dahaastłʼǫ́ǫ doo, áko nihokááʼ dineʼé baʼáłchíní doo bijéí yikʼi bidziil da doo.

56 Áádóó éí bijį́įdi, sheʼayóó átʼéii bee náníshdáahdi, áadi haneʼ bee akʼidiʼdootį́įłgo ałtso bóhodoolnííł éí chʼíkę́ę́hyę́ę neeználtʼéego yaa halneʼ.

57 Háálá dahóyáanii dóó tʼáá aaníinii bił béédahoozinii, dóó Iiʼ Sizį́ Diyinii daboolóosgo ádaʼdiilyai, dóó doo yóóʼadabidiʼnootʼaʼígíí—Shí tʼáá aaníigo nihichʼįʼ haasdziih, éí kʼídahalneʼgo doo kǫʼ biihidooltłʼił da, ákondi éí bijį́ yídaníłdzil doo.

58 Áádóó nahasdzáán yikááʼ kéédahatʼį́į doogo baa dahidoolyeeł; áádóó áłʼąą dínóotʼį́į́ł dóó dabidziilgo iiná ádeiłʼį́į doo, áádóó badaʼáłchíní bąąhági ádaatʼéii tʼáágééd dadínóosééł dóó yisdádookah.

59 Háálá Diyin Bóhóníihii bitah hólǫ́ǫ doo, dóó biʼayóó átʼéii bił hólǫ́ǫ doo, dóó biʼaláahdi naatʼáanii dóó bee hazʼáanii beediyiiʼaahígíí nilį́į doo.

60 Áádóó áko, shooh, Shí nihichʼįʼ haasdziih, díí baa haneʼígíí tʼáá kódíjįʼ nihił bééhodoozįįłgo chʼídeeshʼááł, Ahaʼdeetʼą́ Ániidíii éí bá ataʼ hóóneʼgo índa, dóó éí biyiʼ éí díí tʼáá ałtso bééhodoozįįł;

61 Ákohgo kʼad bá ataʼ haneʼgo anílééh, áko ííshją́ą́ ádadoolníłígíí bichʼįʼ hashtʼeʼídíínílzin doo.

62 Háálá tʼáá aaníigo nihichʼįʼ haasdziih, áko ayóó ádaatʼéii ádahodooníłígíí nihibaʼ doo;

63 Nááná łaʼ kédaayahdi anaaʼ baa dahodoohtsʼaʼ doo; ákondi, shooh, Shí nihichʼįʼ haasdziih, áyíídígóó ádahoonííł, kǫ́ǫ́ nihichʼéédą́ągi ndi, áádóó tʼáadoo ląʼí náhááhdą́ą́ʼ tʼáá nihí nihikéyah biyiʼ anaaʼ baa dahodohtsʼaʼ doo.

64 Éí bąą Shí, Diyin Bóhólníihii, kónihidííniid, haʼaʼaah kédaayahdę́ę́ʼ ahíhoohkááh, elders shisodizinjí atah danohłínígíí áłah wohłeeh; eʼeʼaahjigo kédaayahígíí bichʼįʼ dohkááh, áadi kéédahatʼínígíí ádaa ńdaʼoohkąąh dabidohní, ádaa ńdaʼooskango éí, sodizin bitah hadadidoolnííł.

65 Áádóó nihijéí dóó nihíniʼ bee tʼááłáʼí ádanohtʼéego, bee daʼohtʼínígíí áłah ádaohłééh áko éí bee kéyah nihaa didootʼáłígíí ndahidoołnih.

66 Áádóó New Jerusalem wolyée doo, éí kéyahgi kʼé bee bił hazʼą́ą doo, kin dashijaaʼgi hóyéédę́ę́ʼ deiyíkáahii bá doo, áádóó Tsʼídá Áláahdi Diyin God yikééʼ naazíinii tʼáá hasihgo bá hazʼą́ą doo;

67 Áádóó Diyin Bóhólníihii biʼayóó átʼéii áadi doo, áádóó Diyin Bóhólníihii bibáhádzidii ałdóʼ áadi bił dahólǫ́ǫ doo, áko doo yáʼádaashóonii doo áajįʼ dabíneʼ da doo, áádóó Zion hoolyée doo.

68 Áádóó baa hodoolzhish doo yáʼádaashóonii bitahgóó, nihokááʼ dineʼé tʼááłáʼí nízínígo binaago dabighanígíí béésh hał doo yichʼįʼ yił hadadidoolchił da áko Ziongóó dadínóochééł éí baaʼ áhodooyąął biniyé.

69 Áádóó yáʼąąsh biyaagi ałʼąą dineʼé tʼáá ałtso bitahdę́ę́ʼ yaa hakááh dooleeł; áádóó doo tʼáá éí tʼéiyá dineʼé anaaʼ ádeiłʼį́į da doo.

70 Áádóó doo yáʼádaashóonii bitahgóó ádahaʼníi doo: Zion doo bikʼijįʼ ndadiibah da, háálá Ziondi kéédahatʼíinii ayóó dabidziil; éí bąą doo bikʼeh dadidiidleeł da.

71 Áádóó baa hodoolzhish tʼáá ałtso diné dahdeiyínééhdę́ę́ʼ yáʼátʼéehgo dahiinánígíí ahíhidootʼish, dóó Zionjįʼ nahidookah, hoolʼáágóó ił hózhǫ́ biyiin yee dahataałgo.

72 Áádóó áko nihichʼįʼ haasdziih, díí adahwiisʼáágóó tʼáadoo baa dahołneʼé tʼáá nihí tʼéiyá nihił béédahózin doo shí íiniizį́įʼgo índa, áko díí naanish diné, dóó niheʼ anaʼí binááł ałtso ádadoohłííł, áko ánihidííniidyę́ę ałtso ádaahłaago índa bindashoołnishígíí yaa ákodadínóozįįł;

73 Áko díí yaa ákodaaniizį́į́ʼgo, díí yéego yaa ntsídadookos.

74 Háálá Diyin Bóhólníihii níyáago tʼóó báhádzidgo hakʼijįʼ nilį́įgo baa áko dazhdínóozįįł, áko yééʼ bił dahodooleeł, áádóó nízaadi naazį́įgo daditsxiz dooleeł.

75 Áádóó tʼáá ałtso nihokááʼ dineʼé dah deiyíkááhgóó nídaaldzid doo Diyin Bóhólníihii hakʼijįʼ silį́ʼígíí, dóó beʼadziilii yee átʼéhígíí biniinaa. Tʼáá ákótʼée doo. Amen.