1 Dou vakatudaliga, Oi kemudou na italatala qase ni noqu lotu, ka rogoca na noqu vosa, ka vuli vei au me baleti kemudou, kei na veika me baleta na vanua oqo kau a kauti kemudou mai kina.

2 Ni’u sa kaya vakaidina vei kemudou, sa kalougata ko koya sa muria tiko na noqu ivakaro, ni sa bula tiko se ni sa mate; ia ko koya sa yalodina tiko ga ena veika rarawa, ena levu sara na kena isau ena matanitu vakalomalagi.

3 Dou na sega ni raica rawa e matamudou vakayago, ena gauna oqo, na ituvatuva ni nomudou Kalou me yaco ena gauna mai muri, io kei na lagilagi ena muria mai ni sa oti e vuqa na veika rarawa.

4 Ni sa oti na veika rarawa, ena yaco na veivakalougataki. Raica ena yaco mai na siga dou na vakaisalataki kina ena lagilagi; e se bera tiko ni yaco na auwa, ia sa voleka sara na kena gauna.

5 Dou nanuma tiko oqo, na veika au sa tukuna oti vei kemudou, io dou tugana sara ki lomamudou, ka vakabauta ena gauna sa yaco mai kina.

6 Raica, au sa kaya vakaidina vei kemudou, a ka oqo au sa talai kemudou kina—ia mo dou talairawarawa, ka vakarautaki kemudou mo dou vakadinadinataka na veika ena yaco;

7 Ka vakakina mo dou na dokai ni dou a mai tura na yavu ka vakadinadinataka ni oqo na vanua me tara kina na Saioni ni Kalou;

8 Ka vakakina me na qai vakarautaki talega e dua na magiti sa uro vei ira na dravudravua; io, na magiti sa uro, na waini sa makawa ka makare sara, me kila kina ko vuravura ni na yaco vakaidina na veika era sa tukuna na parofita;

9 Io, ena vakarautaki vakavinaka, e dua na ivakayakavi, mai na vale ni Turaga, ka ra na sureti kina na veimatanitu kecega.

10 Taumada, ko ira na vutuniyau kei ira sa kila ka, ko ira na vuku kei ira na turaga;

11 Ia ni sa oti oqori ena qai yaco na siga ni noqu kaukauwa; ka ra na qai sureti mai ki na vakamau ni Lami, ko ira na dravudravua, na lokiloki, kei na mataboko, kei na didivara, me ra kania na ivakayakavi ni Turaga, sa vakarautaki me baleta na siga bibi ko ya ena qai yaco mai.

12 Raica, koi au, na Turaga, au sa tukuna na veika oqo.

13 Ia ka na vakadinadinataki mai Saioni, io, mai na gusudra na lewe ni nona koro na Kalou—

14 Io, ena ka oqo au sa talai kemudou yani kina, ia au sa digitaki Etuwate Patereji na noqu tamata, ka lesia vua na nona itavi ena vanua oqo.

15 Ia kevaka ena sega ni veivutunitaka na nona ivalavala ca, ko ya na tawa vakabauta kei na mataboko ni yalo, me na qaqarauni de na bale ga.

16 Raica sa lesi oti vua na nona itavi, ia ena sega ni lesi tale.

17 Ia ko koya sa taura na itavi sa lesi oqo me turaganilewa ni Isireli, me vaka ena gauna makawa, me wasea na vanua sa solia na Kalou vei ira na luvena;

18 Ka me lewai ira na nona tamata ena nodra ivakadinadina na bula dodonu, erau na vukei koya kina na nona daunivakasala, me vaka na lawa ni matanitu era sa virikotora na parofita ni Kalou.

19 Niu sa kaya vakaidina vei kemudou, me vakayacori na noqu lawa ena vanua oqo.

20 Me kakua ni dua na tamata e nanuma ni sa vakatau ga vua na lewa; ia me na lewai koya na Kalou ena lewa sa tauca, me vaka na nona lewa, se, me dua tale, ko koya na dauvakasala se vakatawana tiko na idabedabe ni veilewai.

21 Me kakua ni dua na tamata e beca na lawa ni vanua, raica ko koya sa muria tiko na ivakaro ni Kalou ena muria tale ga na lawa ni vanua.

22 O koya oqo, mo dou vakarorogo vei ira na turaga levu, me yacova na gauna sa mai lewa kina ko koya na daunilewa, raica ena vakamalumalumutaki ira kecega na meca e ruku ni yavana.

23 Raica na lawa dou sa ciqoma mai ligaqu sa lawa ni lotu, ia ena sala oqori me na taurivaki kina. Raica, sai koya oqo na vuku.

24 Ia oqo, au a vosa tiko vei kemudou me baleti Etuwate Patereji na noqu tamata, ia ena mai vakaitikotiko ena vanua oqo o koya, kei rau ka sa lesia me nona daunivakasala; io ena tiko tale ga kina ko koya au sa lesia me ivakatawa ni noqu lololo;

25 O koya, me ra kauta mai na nodra dui vuvale ki na vanua oqo, io me ra veivosakitaka vakataki ira ka vakakina vata kei au.

26 Ia raica, sa sega ni kilikili meu veivakaroti tiko ena ka kecega; ia ko koya sa waraka ga me kitaka na ka e tukuni vua ena veika taucoko, sa tamata ca ka vucesa; io ena sega sara na kena isau.

27 Au sa kaya vakaidina, me ra gumatua ena cakacaka vinaka ko ira na tamata kecega, io me ra vakayacora e levu na ka mai na nodra kila ga vakataki ira na ka e dodonu, ka vakayacora na veika dodonu eso.

28 Sa tu vei ira na kaukauwa, me ra vakayacora ga na ka era gadreva. Ia na tamata kecega sa vakayacora na veika dodonu, ena rawata vakaidina na kena isau.

29 Ia ko koya sa waraka ga me kitaka na ka e vakaroti vua, se muria na ivakaro ena yalo lomalomarua, ka rogoca ena vucesa, ena cudruvi vakaidina.

30 Ko cei koi Au, sa kaya na Turaga, meu bulia na tamata ka sega ni beitaka ni sa talaidredre ki na noqu ivakaro?

31 Ko cei koi Au, sa kaya na Turaga, io meu yalayala tu ka qai sega ni vakayacora?

32 Au sa solia na ivakaro, ia era sa sega ni talairawarawa kina na tamata; au sa bokoca tani ka ra sega ni ciqoma na veivakalougatataki.

33 Era sa qai kaya ki lomadra: Sa sega sara ni cakacaka ni Turaga oqo, ni sa sega ni vakayacora na nona yalayala. Ena ca vei ira sa kaya vakaoqori, raica sa waraki ira na kedra isau mai eli ka sega mai cake.

34 Ia oqo au sa tukuna vei kemudou e so tale na idusidusi me baleta na vanua oqo.

35 Sa noqu lewa yalomatua me ivakaraitaki ki na Lotu ko Matini Erisi na noqu tamata, ena nona solia na nona ilavo ki vua na bisopi ni lotu.

36 Ka vakatalega kina me muria na ivakaro oqo ko koya yadua sa lako mai ki na vanua me rawata na nona ivotavota vakawa; io me vakayagataka na nona ilavo me vaka sa veidusimaki kina na lawa.

37 E sa ka ni yalomatua talega me voli na qele ena vanua ko Inidipenideni, me tara kina na lololo, kei na vale ni taba ivola.

38 Kei na so tale na idusidusi vei Matini Erisi na noqu tamata ena qai vakatakila vua na Yalo na veika me kitaka, me rawata kina na nona ivotavota vakawa ka sa ganiti koya;

39 Ia me veivutunitaka sara na nona ivalavala ca, raica sa gadreva ko koya me ra dokai koya na kai vuravura.

40 Ka vakatalega kina me vakayacora ko Viliame W. Felepi na noqu tamata na itavi au sa lesi koya kina, me mai taura na nona ivotavota vakawa ena vanua oqo;

41 Ka vakatalega kina ni sa kilikili me veivutuni ko koya, raica au sa sega ni vakadonui koya sara, koi Au na Turaga, ni sa vakalevulevui koya ka sega ni vakayalomaluataki koya vei au.

42 Raica, ko koya sa veivutunitaka na nona ivalavala ca, ena vosoti, ia koi Au, na Turaga, au na sega ni nanuma tale na nona ivalavala ca.

43 Ena ka oqo dou na kila kina na tamata sa veivutunitaka vakaidina na nona ivalavala ca—raica, ena tusanaka, ka biuta laivi sara vakadua.

44 Ia oqo, sa dina sara, meu tukuna na ka e baleti ira na vo ni italatala qase ni noqu lotu, raica e sa vo e vuqa na yabaki me qai yaco na gauna, me ra toki mai ka mai tawana na nodra ivotavota vakawa ena vanua oqo, vakavo ga kevaka e ra gadreva ena masu ni vakabauta, kevaka wale ga e lesia vei ira na Turaga.

45 Ia, raica, mo dou vakasoqoni ira vata mai na tamata mai na iyalayala kei vuravura.

46 O koya, mo dou soqoni vata kece mai; kei ira sa sega ni lesi me ra mai tiko ena vanua oqo, me ra vunautaka yani na kosipeli ki na veiyasana vakavolivolita; ia ni sa oti ko ya, me ra lesu tale ki na nodra itikotiko.

47 Me ra vunau yani ka tukuna na ivakavuvuli dina ena veisalatu, ka wasea na nodra ivakadinadina ena veivanua kecega, io me ra vunauci ira na vutuniyau, na turaga kei ira na tamata wale, kei na dravudravua me ra veivutuni.

48 Ia me ra tauyavutaka yani na isoqosoqo lewe ni lotu vei ira kecega na kai vuravura era sa veivutuni

49 Ia me ra digitaka ka tokona e dua na itini, mai na domodra na isoqosoqo lewe ni lotu, ki na isoqosoqo lotu mai Oaio, me soqona na ilavo me voli kina na qele e Saioni.

50 Kau sa vakaroti Sidini Rikitoni tale ga na noqu tamata, me vola e dua na ivakamacala ni vanua ko Saioni, kei na ka sa inaki ni Kalou, io me vaka ena vakatakila vua na Yalo;

51 Ka dua tale ga na ivola veikauyaki kei na isolisoli, me soli vei ira kece na lewe ni lotu me ra cau mai kina, ia me qai soli na ilavo kece oqori ki na ligana na bisopi, ki na ligana ko koya, se vua sa digitaki, me vaka sa vinaka vua se me vaka sa dusimaka ko koya, me voli kina na qele me nodra ivotavota vakawa na luve ni Kalou.

52 Ia, raica, au sa kaya vakaidina vei kemudou, sa vakarota na Turaga me ra lomasoli na tisaipeli kei ira na luve ni tamata, io me ra volia na yasana taucoko oqo, ena loma ni dua ga na gauna lekaleka sa rawa kina.

53 Raica, sai koya oqo na vuku. Me ra kitaka oqo de ra sega ni taura na nodra ivotavota vakawa, ka ra qai rawata ga ena vakadavei ni dra.

54 Ia, ni sa voli oti na qele, me ra lesi sara na veimataqali daucakacaka me ra laki cakacakataka na vanua oqo, me yaga vei ira na lewe ni lotu ni Kalou.

55 Me vakayacori vakavinaka na kena cakacaka kece; io sa itavi ni bisopi se na itini mai na lotu me dau tukuna mai vagauna na cakacaka kece sa vakayacori tiko.

56 Ia me lewai vakavinaka ka kakua ni vakusakusataki na nodra vakasoqoni vata, me kua talega ni vakariritaki; ia me vakayacori ga me vaka na nodra ivakasala na italatala qase ni lotu ena veigauna ni koniferedi, me vaka na kila e dau vakatakilai vei ira ena veigauna.

57 Ia me vakalougatataka ka vakatabuya ko Sidini Rikitoni na noqu tamata na vanua oqo, kei na tiki ni qele me na tara kina na valetabu, me nona na Turaga.

58 Ia me kacivi tale e dua na soqoni ni koniferedi; oti me rau qai lesu na noqu tamata, ko Sidini Rikitoni kei Josefa Simici Lailai, io me tomani rau yani ko Oliva Kaudari, me ratou vakayacora na vo ni cakacaka au sa lesia vei iratou ena nodratou vanua, kei na vo ni cakacaka me vaka sa dusimaki ena koniferedi.

59 Ia me kakua ni dua e lesu mai na vanua oqo vakavo ga ke vakadinadinataka ena nona ilakolako, na veika e sa kila ka vakabauta tudei.

60 Me kau tani mai vei Saiba Petesoni na nona ilesilesi; ia me sa dua ga na lewe ni lotu, ka me qaravi koya ga, ka cakacaka vata kei ira na nona i tokani, me yacova ni sa totogitaki kece ena nona ivalavala ca; ni sa sega ni tusanaka ko koya na nona cala, ia sa via vunia tiko ga.

61 Me ra mai vakayaco koniferedi tale ga eke na vo ni italatala qase ni lotu, era sa lako tiko mai ki na vanua oqo, raica e so vei ira oqori sa vakalougatataki vakalevu sara, ia sa vakalevu sara.

62 Ia ko Etuwate Patereji na noqu tamata me na liutaka na nodra koniferedi oqori.

63 Ia ni ra sa lesu tale, me ra vunautaka yani na kosipeli ena nodra ilakolako, io me ra vakadinadinataka tale ga na veika sa vakatakilai vei ira.

64 Ni sa dina sara, me tekivu vunautaki yani eke na itukutuku vinaka, qai dewa ki na veivanua kecega, io me yacova na iyalayala kei vuravura—raica ena vunautaki yani na kosipeli vei ira na tamata kecega, ka ra na raica na ivakatakilakila ko ira sa vakabauta.

65 Ka raica sa lako mai na Luve ni Tamata. Emeni.