1Daʼíísínółtsʼą́ą́ʼ, O dineʼé, dóó nihijéí dajoobaʼgo dóó daʼníłtsʼą́ą́dééʼ daʼíísínółtsʼą́ą́ʼ; dóó daʼdoohtsʼį́į́h, nihí Diyin Bóhólníihii bidineʼé daniidlį́ dadohnínígíí, dóó Diyin Bóhólníihii bizaad dóó nihá yinízinígíí dadoohtsʼį́į́h.

2Aooʼ, Shí, tʼáá aaníigo haasdziih, doo yáʼádaashóonii dóó akʼijįʼ daazlį́įʼii biʼáháchʼįʼii bizaad nihikʼijį siláhígíí dadoohtsʼį́į́h;

3Iiná néididooléłígíí éí bee bóhólnííh háí beʼiinaʼ neidoołtihígíí, áádóó nahasdzáán bikáaʼgi tʼáá dahiináa dooleełígíí biʼiina doo łaʼ neidoołtih da;

4Tʼáá bí yinízinígíí dóó bił yáʼátʼéhígíí bikʼehgo haʼdootłʼį́į́ł; dóó niʼdeestsił niizį́į́go niʼdoołtsił, dóó iiʼ sizíinii chʼį́į́diitahgóó ayidoołhą́ą́łgo yíneelʼą́.

5Áko shooh, Shí, Diyin Bóhólníihii, shizhí bee yáshtiʼ, áádóó éí bikʼeh hólʼį́į doo.

6Ákohgo, Shí tʼáá aaníigo nihichʼįʼ haasdziih, bíniʼdii doo yáʼádaashóonii yaa ákodadínóozįįł, áádóó bíniʼdii akʼijįʼ daazlį́į́ʼii nídaaldzid dóó daditłid doo; áádóó bíniʼdii doo daʼoodlánígíí tʼáadoo ádaaníní doo, háálá éí bijį́įdi áháchįʼ náátsʼóʼoołdísii nahalingo bikʼijįʼ kódoolnííł, áko tʼáá ałtso bitsʼíís dahólóonii Diyin God nishłínígíí bił béédahodoozįįł.

7Áádóó bee éédahózinii yiká ádaatʼínígíí éí bee ééhózinii deidoołtsééł, ákondi éí doo yee yisdádookah da.

8Tʼáá aaníigo, Shí nihichʼįʼ haasdziih, łaʼ nihitahdóó bee éédahózinii hadeinitá, áádóó łaʼ éí tʼáa ńléídę́ę́ʼ tʼáá ákódaatʼį́įgo bee hahoolzhiizh;

9Ákondi, shooh, bee éédahózinígíí éí binahjįʼ doo hweʼoodląʼ hodooleeł da, ákondi háiida oodląʼ chodeiyoołʼį́įgo éí bikééʼdóó bee éédahózinii nihwiileeh.

10Aooʼ, oodląʼ binahjįʼ éí bee éédahózinígíí hoł ííshją́ą́ álʼįįh, nihokááʼ dineʼé íínízinígíí éí doo bikʼehgo da, éí doodago bił yáʼádaatʼéhígíí, ákondi Diyin God yinízinígíí bikʼehgo.

11Aooʼ, oodląʼ binahjįʼ éí bee éédahózinígíí hoł ííshją́ą́ álʼįįh, éí diyinkʼehgo naʼanish ayóó átʼéii bee, tʼáá háiishį́į́ beʼoodląʼ ádingo éí Diyin God tsʼídá doo yił hodooshǫǫł da; áádóó Diyin God yichʼįʼ báháchįʼígíí éí doo yaa bił hózhǫ́ǫ da; ákohgo, éí bee ééhózinii doo yił ííshją́ą́ íídoolííł da, áháchįʼ tʼéiyá yee yikʼijįʼ yisʼą́ą doo.

12Ákohgo, Shí, Diyin Bóhólníihii, bee éédahózinii dóó tʼóó bikʼedaʼayóii bíká ádaahtʼínígíí dóó oodląʼ doo chodaałʼínígíí éí doo shił yáʼátʼééh da, kótʼáo ayóó átʼáo nihokááʼ dineʼé shichʼįʼ dadeezʼį́įgo doo bá yáʼátʼééh da.

13Ákótʼée ndi, Shí éí beehazʼáanii bee bichʼįʼ yáshtiʼ, áko ląʼí da bee haasdzíʼígíí doo deinízin da dóó doo yikʼeh dahółʼį́į da.

14Łaʼ nihitah hastóí dóó sáanii aadaʼdilé; łaʼ nihitsʼą́ąjįʼ dah dadiikai, áádóó nááná łaʼ éí tʼah nihił dahólǫ́ éí náasdi índa nihił ííshją́ą́ ádoolnííł.

15Bíniʼdii yaa ákodanízin doo dóó tsxį́į́łgo ádaa nídaʼdookąął, éí doodago ánahwiitʼaah beeʼádleehí nahalingo bee dah biʼdiistłʼǫ́ǫ doo, áádóó doo hóyą́ągo ádaʼałínígíí bééhodoozįįł, áádóó doo yáʼáshǫ́ǫ́góó ádaʼiilaayę́ę tʼáá bił dahólǫ́ǫgo diné yee dabiníłʼį́į doo.

16Áádóó tʼáá aaníigo shí nihichʼįʼ haasdziih, łah ádííniidyę́ęgi átʼáo, tʼáá háiida asdzání yinéłʼį́įgo yídanoosnííʼgo, éí doodago bijéí biiʼ aaʼdííláago, éí Iiʼ Sizį́ Diyinii doo bił hólǫ́ǫ da doo, áko oodląʼ yitsʼą́ą́jigo nídooyis dóó náldzid doo.

17Ákohgo, Shí, Diyin Bóhólníihii, bee nihił hweeshneʼ ndaaldzidígíí, dóó doo daʼoodlánígíí, áádóó tʼáá ałtso dabiyoochʼídígíí, áádóó tʼáá háiishį́į́ʼ binaʼadloʼgo bił yáʼátʼééhígíí dóó biyoochʼidígíí, diné naʼageh yee tsiʼnaagháii, áádóó nichxǫ́ǫ́ʼígo éédahósinii, éí kǫʼ tsékǫʼ bił beʼekʼid dookʼą́ąłii biyiʼ góneʼ bá nahazʼą́, áko éídíígíí naakidi náʼníʼné átʼé.

18Shí tʼáá aaníigo nihichʼįʼ haasdziih, áko éí áłtsé nááʼiinánígíí doo daʼatah da doo.

19Áádóó áko shooh, Shí, Diyin Bóhólníihii, ánihidishní doo yáʼátʼéehgo nihá haʼdoodzih da, háálá díí nihitah hólónígíí biniinaa.

20Ákótʼée ndi, bidaʼoodląʼ yee hadaʼóólníigo dóó shikʼehgo ádaʼałʼį́įgo, éí éíí akʼeh didoodleeł, dóó nahasdzáán haałtʼé ályaago éí bijį́įdi baa dahideestʼánée daabí dooleeł;

21Nahasdzáán haałtʼé ályaago, dził bighą́ądi ałkééʼ sinilgo shehastóí naakitsʼáadah bił ííshją́ą́ ályaayę́ę éí bikʼehgo ndi; éí baa haneʼígíí tʼah doo tʼáá ałtso nihił ííshją́ą́ álnééh da.

22Áádóó áko, Shí tʼáá aaníigo nihichʼįʼ haasdziih, ánihidííniidyę́ęgi átʼáo ánisinígíí nihił chʼídeeshááł, áko shooh nihił ííshją́ą́ ádeeshłííł, bee hazʼáanii bikʼeh hólʼį́į́jí bee éí ndagaʼ, háálá ląʼí shibee hazʼáanii doo bikʼeh dahoniilʼį́į da doo danízin.

23Ákondi shibee hazʼáanii yikʼeh hółʼínígíí éiyá diyingo hazʼą́ bi tʼáá aaníinii baa dahidoolyééł, éí hwiiʼdę́ę́ʼ tooh dahiináanii hadaazlį́į dooleeł, áko háálį́įgo iiná doo ninítʼiʼii biih yílį́į dooleeł.

24Áádóó áko, shooh, díí éí Bóhólníihii nihiDiyin God bikééʼ naazʼíinii yá yinízin, éí kéyah Zion bikáaʼgi áłah dadooleeł, tsxį́į́łgo éí dooda, áko doo tsiʼhaʼdooldah da, éí naałniih bitsʼą́ą́dóó nihwiileeh.

25Áko shooh, díí kéyah Zion— Shí, Diyin Bóhólníihii, shílaʼ bee baa áháshyą́;

26Ákótʼée ndi, Shí, Diyin Bóhólníihii, Cæsar bíhígíí Cæsar baa nídahohʼnííł.

27Ákohgo, Shí Diyin Bóhólníihii kéyah ndahidoołnihgo nihá nisin, áko nihokááʼ bikáaʼgi nihidziilgo nihidiʼnílʼį́į doo, áko nihí dooleełgo nídooláhígíí baa ákóhwiinidzin doo, áko doo nihikʼijįʼ bádahachįʼ da doo.

28Háálá Chʼį́įdii éí diné nihikʼijįʼ bádahachįʼ doogo bijéí yiih yiyiizlá, áádóó da nidanihidoołtsxił.

29Ákohgo, kéyah Zion doo tʼóó nihaadoolyééł da ndi ndahidoołnih éí doodago baa daʼahidoohgą́ą́ł, éí doo ákótʼéego éí nihaa dahideestʼánée ádin dooleeł.

30Áádóó nidahisoołniiʼgo, éí áko shooh nihikʼihojisdliʼ doo;

31Áádóó biniyé baa daʼahohgą́ągo, doo háiida dadiyoołhééł da danihiʼdooniid, dadínohʼį́į́ʼ, niheʼanaʼí kʼadę́ę́ nihikʼijįʼ dahdiijeeh, áádóó kin dah naazjaaʼgóó atídanihiʼdilʼį́į doo, áádóó sodizin naaznilgóó ałdóʼ, ákondi tʼáá díkwíhígo chʼínohkaiígíí éí nihaa dahideestʼánée nihaa dahidoolyééł.

32Shí, Diyin Bóhólníihii, doo yáʼádaashóonii bichʼįʼ sháháchįʼ; Shí éí shiʼIiʼ Sizį́ Diyinii nahasdzáán bikááʼ kéédahatʼíinii bitsʼą́ąjįʼ kwíínísin.

33Tʼóó báhádzidgo atíʼéshʼíinii binahjįʼ ádee hadeesdzíiʼgo ádííniid, dóó nahasdzáán bikááʼgóó anaʼí dahodooleełgo bee haasdzííʼ, áko doo yáʼádaashóonii ndaʼhahiltseed doo, áádóó tʼááłáʼí nítínígo nihokááʼ dineʼé nídaaldzid doo;

34Áádóó akééʼ naazíinii ałdóʼ shoobáʼígo chʼídahidínóochééł; ákótʼée ndi, Shí, Diyin Bóhólníihii, bił honishłǫ́ǫ doo, áádóó Shizhéʼé naagháhídę́ę́ʼ adadeeshááł áádóó doo yáʼádaashóonii kǫʼ doo ntséesii biih hideeshtłʼił.

35Áádóó ako shooh, díí tʼah doo ákóhoonéeh da, ákondi hodíínaʼgo áhodoonííł.

36Ákohgo, Shí, Diyin Bóhólníihii, díí tʼáá ałtso nahasdzáán bikááʼgóó ádahodoonííłgo bee haasdzíʼígíí biniinaa, shikééʼ naazíinii éí kéyah Ziondi ahíídookahgo bá nisin;

37Áádóó tʼáá ałtso diné tʼááłáʼí nízínígo Diyinkʼehgo oodááł néídidoolééł dóó aʼólní ádídeidooltłʼóół, nahasdzáán bikááʼ kéédahatʼíinii hóyéeʼgo áhodooníłígíí yaa dahalneʼ doo; áádóó doo yáʼádaashóonii saad bee dóó danéichééhdę́ę́ʼ ánihidiʼdooldįįł dabidiʼdooniił.

38Ákohgo, bíniʼdii shi hastóí naakitsʼáadah bikʼidahodiiniiʼígíí Kirtlanddi beʼiinaʼ bídadéitiʼígíí hashtʼedeidoolííł, éí díí dáʼákʼeh yikáá kéédahatʼį́.

39Bíniʼdii shá naalʼaʼí Titus Billings, éí díí kweʼé hazʼánígíí yaa áhályą́, éí kéyah baa nahidoonih, áko dąąjįʼ ahoolzhiizhgo kéyah Ziongóó doonééłgo yichʼįʼ hashtʼeʼádidoolnííl, éí yikááʼ yił kéédahatʼínígíí bił, tʼáá shí áásésįįdígíí tʼéiyá, éí doo ákǫ́ǫ́ dahdidookah da shí ábidííniidgo índa.

40Áádóó bíniʼdii béeso tʼáá átʼé chʼíníídeeʼígíí, ląʼí éí doodago áłchídígo chʼíníídeeʼígíí éí doo átʼéhégóó baa ntséskees, éí kéyah Ziongóó bichʼįʼ doojih, éí bikʼidiishniiʼígíí baadoojih.

41Áko shooh, Shí, Diyin Bóhólníihii, shá naalʼaʼí Joseph Smith, Jun., adziilii baa deeshłééł áko Iiʼ Sizį́ Diyinii binahjįʼ bił bééhózin doo háí kéyah Zion gódeʼ dookah, áádóó akééʼ naazíinii tʼáá áadi dooleełígíí.

42Bíniʼdii shá naalʼaʼí Newel K. Whitney binaalyéhé bá hooghan tʼáá yiyoołwoł doo, éí doodago kótʼáo ałdishní, naalyéhé bá hooghan, tʼóó kónízáhíjįʼ ndi yiyoołwoł doo.

43Ákótʼée ndi, bíniʼdii béeso tʼáá átʼé eidoonił, éí kéyah Zion góde doojih.

44Áko shooh, díí éí tʼáá bí bee bóhólnííh, bíniʼdii tʼáá bí bił bééhózinígíí bikʼehgo íʼdoolííł.

45Shí tʼáá aaníigo nihichʼįʼ haasdziih, bíniʼdii ákáʼanálwoʼgo bee bidiʼdoolzį́į́ł éí akééʼ naazíinii yił tʼáá ákweʼé yił naakai doo, áádóó bíniʼdii díí adziilii bee bikʼihodidoonih;

46Áádóó áko tsxį́į́łgo sodizin bitaa díínááł, díí hózhǫ́ bee bił hólneʼgo, éí shá naalʼaʼí Oliver Cowdery bił. Áko shooh, díí éí kótʼáo nisin, shí bee nahosíʼánígiʼ átʼáo béeso ahíídoojih.

47Tʼáá háiida nihitahdóó haʼólnínígíí dóó yéego idiilkaalígíí éí nihokááʼ bił nidahaztʼiʼii yikʼeh didoodleeł.

48Tʼáá háiida binaadeeł daʼílíinii kéyah Zion góde yiʼníłniiʼgo éí díí nahasdzáán bikáaʼgi aahiditʼaahígíí łaʼ baa doolyééł, áádóó íʼiilaayę́ę tʼáá bił hólǫ́ǫ doo, náásgóó kéédahatʼį́į́ dooleełígíí baa dahidoolyééł.

49Aooʼ, kodóó náásgóó, Bóhólníihii dayoosdląądgo daninéhígíí bikʼidahojisdliʼ doo, Diyin Bóhólníihii nádzaajįʼ, áádóó ałkʼidą́ą́ʼ ádaatʼéhę́ę éí nahjįʼ kódaatʼįįh, dóó tʼáá ałtso ániidí nídadoodleeł, anoonééłdę́ę́ʼ náádahidoonaał dóó doo náádadínóonééł da, áádóó Diyin Bóhólníihii yinízinígíí bikʼehgo baa dahideestʼánée baa dahidoolyééł, éí hodílzingo kin dashijaaʼgi.

50Áádóó Diyin Bóhólníihii nádzáadi tʼáá háíshį́į́ tʼahdii hiinánígíí, beʼoodląʼ yaʼólíhígíí, éí bikʼihojidlíi doo; ákótʼée ndi, éí nihokááʼ dineʼé beʼiinaʼ yilááhgóó hidoonaał.

51Ákohgo, áłchíní yázhí są́ yiihidookah; hastóí hadaastihígíí dadínóonééł; ákondi nahasdzáán biyiʼjįʼ doo nahjįʼ kódadoolnííł da, ndi tʼáá háíshį́į́ diyinkʼehgo hiináago jineeskʼolgi átʼéego łahgo ádoonííł.

52Ákohgo, díí biniinaa hastóí naakitsʼáadah bikʼidahodiiniiʼígíí nihokááʼ dineʼé anoonééłdę́ę́ʼ náádahidooʼnaałgo yee ndeineeztʼą́ą́ʼ.

53Díí baa haʼoodzíʼígíí bíká dasídóoʼį́į doo; áádóó, Diyin Bóhólníihii bikʼehgo haʼoodzíʼígíí, éí kʼadę́ę́ baa hoolzhíísh, dóó tʼah índa, Diné Silį́įʼii nádzáajįʼ ndi.

54Áádóó áajįʼ oʼoolkidgo chʼikę́ę́h tʼah doo diné bee dahaléehii doo ádahalyánígíí dahóyą́ągo hashtʼeʼ ádaʼdiilyaaígíí yitah naaldeeh doo; áádóó áajįʼ oʼoolkidgo yáʼádaatʼéego dahiinánígíí dóó doo yáʼádaashóonii ałtsʼą́ą́ʼ kódoolnííł; áádóó áajį ayííłką́ągo shá ndaalʼaʼí ákǫ́ǫ́ deeshʼaał áko doo yáʼádaashónígíí hadeidiyoołtłʼił dóó kǫʼ doo ntséesii yiih deidiyoołtłʼił.

55Áádóó áko shooh, Shí tʼáá aaníigo nihichʼįʼ haasdziih, Shí, Diyin Bóhólníihii, shá naalʼaʼí Sidney Rigdon doo baa shił hózhǫ́ǫ da; háálá bijéí yee ayóó átʼéego ádaa dzoosdliʼ, dóó bee bichʼįʼ yáʼátiʼyę́ę doo yóóstsʼą́ą da, áko Iiʼ Sizį́ Diyinii yíniʼ yiyiiłʼaʼ;

56Ákohgo neiyízooígíí Diyin Bóhólníihii doo bił aaníi da, áádóó łaʼ nínáá néidiyoozoh; áádóó Diyin Bóhólníihii doo bił yáʼánáánátʼééhgóó, áko shooh naanish shí bee bikʼidiishniiʼyę́ę doo dah yoolééł da dooleeł.

57Áádóó ałdóʼ, Shí tʼáá aaníigo nihichʼįʼ haasdziih, tʼáá háishį́į́ bijéí biyiʼdi ádeinízingo, bá átʼeʼ ádaadingo, ndaʼiisíhígíí ádaa nídaʼoohkąąh deididooniił, bíniʼdii díí adziilii bee dabidiʼdoolzį́į́ł.

58Háálá hóyéego ádahodooníłígíí kʼad baa dahodoonih, doo tʼóó ląʼígo baa yáʼátiʼ da doo. Háálá Shí, Diyin Bóhólníihii, akéedi deiyółkáałdi doo tʼóó shaa oodlah da doo.

59Áko shooh, shí éiyá wótʼááhdę́ę́ʼ naashá, dóó wóyahdiígíí bikʼi shóhólnííh. Tsʼídá tʼáá ałtso bikʼi shóhólnííh, tʼáá ałtso biiʼ honishłǫ́, índa tʼáá ałtso bił honishłǫ́, dóó tʼáá ałtsoní naashkaah, áádóó áajįʼ iidoołkááł tʼáá ałtsoní shikʼeh dahółʼį́į doo.

60Áko shooh, Shí éí Alpha dóó Omega nishłį́, Jesus Christ ndi.

61Ákohgo, bíniʼdii tʼáá ałtso nihokááʼ dineʼé shízhiʼ haitʼáo yee yádaałtiʼígíí yaa ádahalyą́ą doo—

62Háálá áko shooh, Shí tʼáá aaníigo nihichʼįʼ haasdziih, áko ląʼí dah ádídahodiiltʼiʼ, éí Diyin Bóhólníihii bízhiʼ, doo yá dahodísingóó chodeiyółʼį́, óhólnííh bąąh ádaadingo.

63Ákohgo, bíniʼdii sodizinjí atah danilínígíí ndaʼiisíʼígíí yaa ádaa nídaʼdookąął, áádóó Shí, Diyin Bóhólníihii, shidineʼé ádadeishłííł; éí doodaiiʼ ádabidiʼdooldįįł.

64Béédaałniih tʼáá haʼátʼííshį́į́ yáʼąąshdééʼ dahooleełígíí éí dadílzin, dóó baa áháyą́ągo baa yáʼátiʼ, dóó Iiʼ Sizį́ Diyinii shił halneʼígíí bikʼehgo; áádóó díí kótʼáo éí doo hakʼijįʼ siʼą́ą da doo, áádóó sodadoołzingo Iiʼ Sizį́ Diyinii nihił dahólǫ́ǫ doo; ákohgo, díí doo kótʼáo ádaʼoohłaagóó éí nihikʼijįʼ siʼą́ą doo.

65Bíniʼdii shá naalʼaʼí, Joseph Smith, Jun., dóó Sidney Rigdon, hooghan yá hadeidínóotaał, éí Iiʼ Sizį́ Diyinii sodizin biníkááʼ góneʼ nabinitin doo.

66Díí nihił chohooʼį́ bee bikʼeh dadidoohdleeł, áko díí aa haʼniih hoolʼáágóó hólóonii doo niitʼéehii baa dahidoolyééł, doo ákótʼéégóó éí, ayóó átʼéego nihikʼijįʼ nidootʼááł. Amen.