1 Dou vakatudaliga, oi kemudou na noqu tamata, dou dolava na lomamudou ka vakarorogo mai na veivanua vakayawa; ka vakarorogo koi kemudou sa vakatokai kemudou me tamata ni Turaga, ka rogoca na vosa ni Turaga kei na nona lewa me baleti kemudou.

2 Io, au sa kaya vakaidina, dou rogoca na vosa nei koya sa cudruvi ira na dau caka ca kei ira sa veisaqasaqa.

3 Ko koya sa lewa me kauti ira sa via kauta, ka maroroya tiko mai ko koya ena maroroya;

4 Ko koya sa tara cake ena nona lewa me vaka sa vinaka vua; ka vakarusa ena gauna e vinaka vua, ka sa rawa vua me kolotaka sobu na yalo ki eli.

5 Raica, koi au na Turaga, au sa vakarogoya na domoqu, ka me muri.

6 Ia, au sa kaya vakaidina, me ra vakarorogo na tamata caka ca, ka me ra rere ka sautaninini ko ira sa dauveisaqasaqa; ka me ra tarova na tebe ni gusudra na tawa vakabauta, ni na lako yani vei ira na siga ni veicudruvi me vaka na covulaca, ka na kila na tamata kecega ni sai Au na Kalou.

7 Ia ko koya sa vakasaqara na ivakatakilakila ena raica na ivakatakilakila, ia ena sega ni vakabulai kina.

8 Au sa kaya vakaidina vei kemudou, era tiko ena kemudou maliwa e so era sa via raica na ivakatakilakila, io era a sa tu sara ko ira oqo mai na ivakatekivu.

9 Ia, raica, sa sega ni yaco mai na vakabauta ena ivakatakilakila, ia na ivakatakilakila ena muri ira era sa vakabauta.

10 Io, na ivakatakilakila ena yaco mai ena vakabauta, e sega ena lewa ni tamata, se me vaka na veika era taleitaka, ia ena lewa ni Kalou.

11 Io, na ivakatakilakila ena yaco mai ena vakabauta, ena cakacaka e veivakurabuitaki, ni kevaka sa sega na vakabauta ena sega ni dua na tamata me vakamarautaka na Kalou; ia ko koya sa cudruva na Kalou sa sega ni marautaka; ia, sai ira oqori ena sega ni vakaraitaka kina na ivakatakilakila, na cudruvi ga ka ra na totogitaki kina.

12 O koya au sa sega ni marautaki ira kina, koi Au na Turaga, ko ira vei kemudou era sa dau vakasaqara na ivakatakilakila kei na veika e veivakurabuitaki me ra qai vakabauta kina, ka sega me ra vinaka kina na tamata ka meu vakalagilagi kina koi au.

13 Ia, au sa solia na ivakaro, ka vuqa era sa gole tani mai na noqu ivakaro ka sega ni muria.

14 Era a tu ena kemudou maliwa na dautagane kei na dauyalewa; eso era sa gole tani mai vei kemudou, ka so era se tu ga vata kei kemudou, era na qai vakatakilai mai.

15 Me ra liaci ira mada ka veivutuni kusarawa ko ira oqori, de na qai tau vei ira na lewa me vaka na icori, ka na qai vakatakilai mai na nodra cala, ka na qai muri ira na nodra ivalavala e matadra na tamata.

16 Kau sa kaya vakaidina vei kemudou, me vaka au a sa tukuna oti, ko ira yadua sa raica na yalewa ka dodomo kina, se kevaka e dua sa dauveibutakoci e lomana, ena sega ni tiko vei koya na Yalo, io ena rere ka cakitaka na vakabauta.

17 O koya, au sa kaya kina koi Au na Turaga, ni ko ira sa rere, kei ira sa tawavakabauta, kei ira kece na dau lasulasu, kei ira kecega sa dau taleitaka ka dau lasu, kei ira na dau cakava na cakacaka ni veidauci, kei ira na daucakaisausau, era na rawata na nodra tikina ena drano koya ka sa kama tu ena bukawaqa kei na sulifure, sai koya na ikarua ni mate.

18 Au sa kaya vakaidina, era na sega ni vakaturi cake, ena imatai ni tucake tale.

19 Ia oqo raica, koi Au na Turaga, au sa kaya vei kemudou, dou sa sega ni vakadonui, ni sa tiko na ka oqo ena kemudou maliwa.

20 Ia ko koya sa vosota tiko ena vakabauta ka vakayacora tiko na lomaqu, sai koya oqori ena qaqa, ka na rawata e dua na ivotavota vakawa e vuravura, ni sa yaco mai na siga ni veivakamataliataki;

21 Ni sa vakamataliataki na vuravura, me vaka na kena ivalavala sa vakaraitaki vei ira na noqu iapositolo mai na ulunivanua; ia na kena itukutuku taucoko dou se bera ni ciqoma.

22 Ia oqo, au sa kaya vakaidina vei kemudou, me vaka au sa kaya ni’u na vakatakila vei kemudou na lomaqu, raica au na vakatakila vei kemudou, e sega ena ivakaro, ni sa lewe vuqa era sega ni dau segata me ra muria na noqu ivakaro.

23 Ia au na solia na veika vuni ni noqu matanitu vei koya sa muria na noqu ivakaro, io ena tu vei koya me vaka e dua na ivurevure ni wai bula, ena tovure tiko ki na bula tawavakaiyalayala.

24 Ia oqo, raica, sai koya oqo na nona inaki na Turaga na nomudou Kalou ena vukudra na nona yalododonu, me ra soqoni vata yani ki na vanua ko Saioni, me kakua ena vakusakusa, de na yaco me yakusurasura, ka dau kauta mai na mate dauveitauvi.

25 Raica, na vanua ko Saioni—sa tu ena qeteqete ni ligaqu, koi Au na Turaga;

26 Ia, koi Au, na Turaga, au sa solia vei Sisa na ka sa nei Sisa.

27 Ia, au sa lewa koi au na Turaga mo dou volia na qele, mo dou kaukauwa kina e vuravura, me rawa kina ni dou kaya ni tu na nomudou ka e vuravura, me ra kakua kina ni vakayavalati me ra veicudruvi.

28 Ni sa vakauqeta na lomadra ko Setani me ra cudruvi kemudou, ka me vakadavei kina na dra.

29 Ia, ena sega ni tauri wale na vanua ko Saioni ia ena voli ena ilavo se ena dra, kevaka e sega, sa na sega na nomudou ivotavota vakawa.

30 Ia kevaka sa voli ena ilavo, dou sa kalougata kina;

31 Ia kevaka ena tauri ena vakadave dra, me vaka ni sa vakatabui mo dou vakadavea na dra, raica, era na rawai kemudou kina na nomudou meca, dou na vakanakuitataki mai na dua na koro ki na dua tale na koro, mai na dua na valenilotu ki na dua tale na valenilotu, ka na lewe vica wale ga era na tu ka rawata e dua na tikina me nodra ivotavota vakawa.

32 Koi Au na Turaga, au sa cudruvi ira sa caka ca; Au na kauta tani na Yaloqu mai vei ira na lewei vuravura.

33 Au sa bubuluitaka ena noqu cudru, ka lewa me ia na veivaluvaluti ena delai vuravura, io era na veivakamatei vakai ira na dau caka ca, ka na rere na tamata kecega;

34 Ia ko ira na yalododonu ena dredre sara me ra dro bula; ia, koi Au na Turaga, au sa tiko vata kei ira, kau na lako sobu mai lomalagi mai na iserau nei Tamaqu ka tilomi ira na dau caka ca ena bukawaqa tawaboko rawa.

35 Raica e sa bera tiko ni yaco na ka oqo, ia ena yaco vakaidina ga.

36 Ia, me vaka ni’u sa lewa koi au na Turaga na veika kece oqo e delai vuravura, au sa lewa kina me ra soqoni vata yani na noqu tamata ki na vanua ko Saioni;

37 Ia na tamata yadua me taura e ligana na ivalavala dodonu, ka vauca na tolodra ena yalodina, ka tabalaka cake na domo ni veivunauci vei ira na lewei vuravura; io me ra tukuna yani ena nodra vosa ka vakakina ena nodra sa dro tiko yani, ni sa voleka mai na veivakarusai vei ira na dau caka ca.

38 Ia, ko ira na noqu tisaipeli mai Katiladi, me ra vakarautaka mada na ka e baleti ira, o ira era tiko ena were oqo.

39 Ia ko Taito Biligi na noqu tamata, ko koya sa qarava tiko, me volitaka yani na qele, ka vakarau me cavutu ena vula itubutubu me lako yani ki na vanua ko Saioni, vata kei ira era sa tawana tiko na were, me vakavo ga ko ira au sa lesia, me ra kakua mada ni lako me yacova na gauna au sa vakarota kina.

40 Ia me vakau na ilavo kece e vo, e sega ni dua na ka vei au kevaka e levu se lailai, io me vakau ki na vanua ko Saioni, vei ira ka’u sa lesia me ra ciqoma.

41 Raica koi Au na Turaga, au na solia vei Josefa Simici Lailai, na noqu tamata, na kaukauwa me rawa kina ni kila ena Yalo o ira me ra lako cake ki na vanua ko Saioni, kei ira na noqu tisaipeli me ra wawa tiko mai.

42 Me se tei taura toka mada ga ko Niueli K. Witini na noqu tamata na nona sitoa, se ena dua tale na kena vosa, na sitoa, me dua na gauna lekaleka.

43 Ia, me solia na ilavo kece e rawa ni solia, me vakau cake ki na vanua ko Saioni.

44 Raica, sa tu ga ena qeteqete ni ligana na ka kece oqori, me cakava ga ena dela ni yalomatua.

45 Au sa kaya vakaidina, me tabaki ko koya me itini vei ira na tisaipeli ka ra na tiko mai, ka me tabaki ki na kaukauwa oqori.

46 Ia oqo mo vakusakusa yani vata kei Oliva Kaudari na noqu tamata, ka sikovi ira na veitabanilotu, ka vakamacalataka na veika oqo vei ira. Raica, oqori na ka au sa lewa, me kumuni na ilavo me vaka ka’u sa vakarota.

47 Ko koya sa yalodina tiko ga ka dauvosota, ena vakamalumalumutaki vuravura.

48 Ia ko koya sa vakauta yani na nona iyau ki na vanua ko Saioni, sa na rawata na nona ivotavota vakawa ena vuravura oqo, ia ena tauca na vua ni nona cakacaka, ka sa tu na kena isau vua ena vuravura sa bera mai.

49 Io sa kalougata na mate era sa mate ena vuku ni Turaga, mai na gauna oqo ka lako yani, me yacova ni sa lesu tale mai na Turaga, raica ena takali yani na veika makawa, ka yaco me vou na ka kecega, io era na tucake mai na mate ka sega ni mate tale; ka ra na ciqoma mai vua na Turaga e dua na nodra ivotavota vakawa, ena koro tabu.

50 Ia ko koya sa bula tiko ena nona lesu mai na Turaga, ka sa tudei tu ena vakabauta, sa kalougata ko koya; ia ena qai mate ga ni sa yacova na yabaki ni bula vakatamata.

51 Ia, ko ira na gone era na tubu cake tiko me yacova ni ra sa qase; ia era na mate na tamata qase; ia era na sega ni moce ena kuvu ni soso, ia era na vakamataliataki vakasauri me vaka na sauriva ni mata.

52 Ia, ena vuku ni inaki oqo era sa vunautaka kina na iapositolo ki vuravura na nodra tucake tale na mate.

53 Na veika oqo sai koya mo dou namaka tiko; ia, ena nona ivalavala ni vosa na Turaga, era sa voleka sara mai, ena dua na gauna walega oqo, ia ena siga ena lako mai kina na Luve ni Tamata.

54 Ia me yacova na auwa koya era na tu na goneyalewa savasava ka lialia ena kedra maliwa na vuku; ia ena auwa koya ena yaco kina na nodra tawasei vakadua na buladodonu mai vei ira na dau caka ca; ia ena siga koya au na tala kina na noqu agilosi me tomiki ira na dau caka ca ka viritaki ira ki na bukawaqa tawaboko rawa.

55 Ia oqo raica, au sa kaya vakaidina vei kemudou, koi Au na Turaga, au sega ni marautaka na noqu tamata ko Sidini Rikitoni; sa vakalevulevui koya e lomana, ka sega ni ciqoma na ivakasala, ia sa vakararawataka na Yalo;

56 Sa sega ni vakadonuya na Turaga na veika sa vola, ka me cakava tale e dua; ia kevaka ena sega ni ciqoma na Turaga, raica sa na sega tale ni tu ena ilesilesi au sa lesi koya kina.

57 Kei na dua tale, au sa kaya vakaidina vei kemudou, ko ira era gadreva e lomadra ena yalomalua, me ra vunauci ira na ivalavala ca me ra veivutuni, me ra na tabaki ki na kaukauwa oqo.

58 Ni oqo na siga ni veivunauci, ka sega ni siga ni veivosaki vakalevu. Ni koi Au na Turaga, meu na kakua ni vakalialiai ena veisiga e muri.

59 Raica, Au sa lako mai cake, ia na noqu kaukauwa sa tu talega e ra. Io au sa lewa na ka kecega, ka tiko ena ka kecega, ka curuma na ka kecega, ka vakadikeva na ka kecega, ia ena yaco mai na gauna ena vakarorogo kina vei au na ka kecega.

60 Raica, koi au na Alifa kei na Omeka, io ko Jisu Karisito.

61 Ia, me ra qarauna na tamata kecega na ivakarau ni nodra cavuta mai tebenigusudra na yacaqu—

62 Ia raica, au sa kaya vakaidina, e lewe vuqa sara era na cudruvi ena ka oqo, o ira era sa cavuta na yaca ni Turaga, ka cavuta wale ga, ni sega tu vei ira na kena dodonu.

63 Ia, me ra veivutunitaka na nodra ivalavala ca na isoqosoqo lewe ni lotu, io koi Au na Turaga au na qai vakadonui ira; kevaka e sega, era na muduki tani.

64 Mo dou nanuma tiko ni sa ka tabu na veika mai cake, sa dodonu me qarauni na kena cavuti, ka me veidusimaki kina na Yalo; a ka oqo ena sega kina na cudruvi, ia dou na rawata na Yalo ena nomudou masumasu; ia kevaka e sega, ena sega ni oti na cudruvi.

65 Me rau qara mada e dua na nodrau vale ko Josefa Simici Lailai kei Sidini Rikitoni na noqu tamata, io me vaka sa vakatakila vei rau na Yalo ena nodrau masu.

66 Na veika oqo ena tu me rawai ena dauvosota, me rawa kina vei ira era rawata me ra ciqoma e dua na lagilagi levu ka tawamudu, kevaka e sega, e dua na cudruvi levu. Emeni.