Wóltaʼii 64
Diyin Yá Yáłtiʼí Joseph Smith díí diyingo bił ííshją́ą́ ályaa éí Sodizinjí elders danilínígíí yee yił hodoolnih biniyé, Kirtland, Ohiodi, Biniʼantʼą́ą́tsoh 11, 1831 yihahgo. Diyin Yá Yáłtiʼí éí Diyin God Bizaad Bible ataʼ haneʼ ánáánéídoodlííł biniyé Hiram, Ohiogóó doonééłgo yíká hastʼeʼádílnééh ńtʼę́ę́ʼ, éí Missouridi naagháago biniinaa tʼóó honíshgháníjįʼ niʼ kóyiilaa. Łaʼ hastóí Ziongóó (Missouri) doohnééł dabiʼdooniid éí Ghąąjįʼ ahoolzhiizhgo tʼáá tsxiłgo yichʼįʼ hastʼeʼ ádadilnééh. íídą́ą́ʼ diyingo bił ííshją́ą́ ályaa.
1–11, Akééʼ Naazíinii ahaanídaʼdoohtʼaah dabiʼdooniid, doo ákódaadzaagóó éí hózhǫ́ yéego daʼasih doo; 12–22, Tʼáadoo ádaa ndaʼooskanígíí éí sodizin bidááhdóó ndahidootʼish; 23–25, Diyin bibéeso ndeiyiléhígíí éí Diyin Bóhólníihii doogááł bijį́įdi doo abiʼdidoolkʼą́ą́ł da; 26–32, Akééʼ Naazíinii tʼáadoo nihąąh hááʼáhí dabiʼdooniid; 33–36, Akʼijįʼ danilínígíí éí Ziondi doo daʼatah da dooleeł; 37–40, Sodizin éí dineʼé dahdeinééhígíí yá ndahodooʼááł; 41–43, Zion ałʼąą dínóotʼį́į́ł.
1Áko shooh, Bóhólníihii nihiDiyin God konihiłní, O elders shisodizinjí atah danohłínígíí, daʼdoohtsʼį́į́h dóó akʼedaʼdoohtįįh, áko nihá nisinígíí ndadidoołééł.
2Háálá tʼáá aaníigo nihichʼįʼ haasdziih, éí nihokááʼ bił nidahaztʼiʼígíí bikʼeh dahdidoohdleełgo nihá nisin; ákohgo nihaa aʼááh nisin.
3Łaʼ nihitahdóó ndaʼiisííʼ; ákondi Shí tʼáá aaníigo nihichʼįʼ haasdziih, kʼad tʼéiyá, sheʼayóó átʼéii biniyé, dóó iiʼnaazíinii yisdádookah biniyé, ndaʼisiyoosííʼyę́ę nihá yóóʼadííʼą́.
4Nihaa dajideeshbaał, háálá diyingo hazʼą́ nihaa hisélá.
5Áádóó diyingo hazʼą́ bi tʼáá aaníinii bibee aanídítį́hí shá naalʼaʼí Joseph Smith, Jun., doo bighadoonił da, shí bee bikʼidiishniiʼígíí biniinaa, tʼah hiinánídą́ą́ʼ, dóó shiʼóʼoolʼįįł yikʼeh hółʼį́įgo tʼéiyá.
6Łaʼ tʼáadoo biniyéhígóó bikʼijįʼ danilį́įgo baa háádaadzih ńtʼę́ę́ʼ;
7Ákótʼée ndi, niʼiisííʼ; ákondi Shí tʼáá aaníigo nihichʼįʼ haasdziih, Shí, Diyin Bóhólníihii, ndaʼiisíhígíí shidááhdóó yaa dahalneʼgo dóó sháánídiʼdííʼááł dashiłníigo éí ndaʼiisííʼyę́ę bá yóóʼadideeshʼááł, łaʼda bąąhági átʼéii baa dasidooʼą́ągo tʼáá éí binaalteʼ dasoolį́įgo éí aniné yiih nihidooʼish.
8Shikééʼ nisoozíinii, ałkʼidą́ą́ʼyę́ęgi átʼáo, ałkʼijįʼ nídaadleeh ńtʼę́ę́ʼ dóó bijéí yee tʼáadoo ahaanídaʼdeestʼą́ą da; dóó díí doo yáʼátʼéhígíí biniinaa atíʼdabiʼdiilyaa dóó yéego bichʼahoʼdooshkeed.
9Ákohgo, Shí nihichʼįʼ haasdziih, ałhaanídaʼdiyoohaah dooleeł; háálá háiida bikʼisoo bichʼįʼ doo ákǫ́ǫ́ ádáátʼįįdii doo yaa nídiʼaahgóó éí Diyin Bóhólníihii hakʼijįʼ yisʼą́ą doo; háálá doo ákódaadzaagóó éí bí aláahgo asih doo.
10Shí, Diyin Bóhólníihii, háiida baa naʼdiyiishʼaahígíí éí tʼáá shí shóhólníihgo baa naʼdiyiishʼaah dooleeł, ákondi ni éí tʼáá ałtso nihokááʼ dineʼé baa náʼdiyíʼaah doo.
11Áádóó tʼáá nihijéí biyiʼídi kódadidoohniił—bíniʼdii Diyin God ni dóó shí nihitaʼgi nahaʼáa dooleeł, dóó íʼiilaaígíí bikʼehgo baʼ doolyééł.
12Áádóó tʼáá háiishį́į́ niʼiisiʼígíí tʼáa doo yaa ádaa náʼooskangóó, dóó tʼáa doo yaa hoolneʼgo, éí sodizin binaatʼáanii bidááhdóó ndoołóós, áádóó Diyin God bizaad áníhiłnínígíí bikʼehgo bá ndahodoohʼááł, bee hazʼáanii éí doodago nihił ííshjání ályaaígíí bikʼehgo.
13Áádóó díigi átʼáo ádadoohłííł áko Diyin God ayóó átʼáo baa haʼniih doo—doo éí tʼáa doo andooʼánígíí biniinaa da, doo éí aa ááh nohsingo, ákondi bee hazʼáanii bikʼehgo tʼáá ákótʼáo íʼiinlaaígíí yaa hodoolnih, áko doo éí bee hazʼáanii ayiiláii bíní hwiidííłʼááł da—
14Shí tʼáá aaníigo nihichʼįʼ haasdziih, háálá díí biniyé díí ádadoohłííł.
15Áko shooh, Shí, Diyin Bóhólníihii, shá naalʼaʼí Ezra Booth bichʼįʼ shá háchįʼ ńtʼę́ę́ʼ, áádóó shá naalʼaʼí Isaac Morley ałdóʼ, háálá bee ndahwiistʼánée, dóó shibee hazʼáanii doo yikʼeh hółʼínígíí biniinaa;
16Bijéí yee doo yáʼáshóonii yíká átʼį́į ńtʼę́ę́ʼ, áádóó Shí, Diyin Bóhólníihii, éí shi Iiʼ Sizį́ Diyinii bitsʼą́ą́ʼ tʼą́ą́ʼ kwííshłaa. Doo chʼį́įdii átʼée éí chʼį́įdii bitsʼą́ą́dééʼ átʼé dííniid ; ákótʼée ndi shá naalʼaʼí Isaac Morley éi baa nídiníʼą́.
17Áádóó ałdóʼ shá naalʼaʼí Edward Partridge, áko shooh, niʼiisííʼ, áádóó Chʼį́įdii éí biʼiiʼ sizíinii yidoołchxǫǫłgo yíká átʼį́; ákondi díí bił ííshją́ą́ ályaago, dóó doo yáʼátʼéehii yaa ádaa náʼooskango, éí baa nídiʼdootʼááł.
18Áádóó áko, Shí tʼáá aaníigo nihichʼįʼ haasdziih shá naalʼaʼí Sidney Gilbert shí baa ntséskeesgo, díkwíí da damóo azlį́įgo, binaanish ííłʼínéegi nídoodááł, éí kéyah Ziongi ákáʼanánílwoʼ doo biʼdooniidę́ęgi;
19Áádóó yiyiiłtsánée dóó yidiiztsʼáʼą́ą éí shikééʼ naazíinii yee yił hodoolnih, áko doo yóóʼ ahidookah da. Áádóó díí biniyé bee nihichʼįʼ haasdzííʼ.
20Áádóó ałdóʼ, Shí nihichʼįʼ haasdziih, shá naalʼaʼí Isaac Morley doo bilááh átʼéego nabidiʼnitaah da doo, áko doo éí atíʼánihidoolííłgo nahaʼáa da doo, áádóó bee nahoníʼą́ díí bidáʼákʼeh éí nihaa nahidoonih.
21Shá naalʼaʼí Frederick G. Williams éí bidáʼákʼeh doo baa nahidoonih da, háálá Shí, Diyin Bóhólníihii, kéyah Kirtlanddi bidziilgo hazʼą́ągo íídoolííł, ashdlaʼ nááhaijįʼ, ákónízahjįʼ hoolzhishgo doo yáʼádaashóonii doo ádeeshdįįł da, áko díí binahjįʼ łaʼ da yisdáʼhideeshʼish.
22Áádóó éí ałtso ayííłką́ągo, Shí, Diyin Bóhólníihii, kéyah Zion gódeʼ deeskaiígíí éí bijéí hajoobaʼ ádeinízinígíí doo bikʼíhodeeshʼah da; háálá Shí, Diyin Bóhólníihii, nihokááʼ ʼdineʼé baʼáłchíní bijéí hojoobaʼ ádeinízin doo nisin.
23Áko shooh, kʼad hoolzhishígíí dííjį́ bee wójíi doo Diné Silį́įʼii nádzáajįʼ inda, áádóó tʼáá aaníí nináʼádeetʼaah bijį́ wolyée doo, áádóó éí bijį́ shidineʼé Diyin bibéeso ndeiyiilée doo; háálá Diyin Bóhólníihii doogááł bijį́įdi Diyin bibéeso ndeiyiiléhígíí doo adabiʼdiʼdoolkʼą́ął da.
24Áádóó dííjį́ bikééʼdóó éí dahodookʼą́ą́ł dooleeł—díí éí Diyin Bóhólníihii bikʼehgo áháʼní—háálá Shí tʼáá aaníigo nihichʼįʼ haasdziih, yiską́ągo ádaadazódlíhígíí tʼáá átʼé dóó doo yáʼáshǫ́ǫ́góó ádaʼałʼínígíí éí tséhégod nidahalin doo; áádóó adabideeshkʼą́ą́ł, háálá shí éí Diyin Tʼáá Ałtsoní bee Bóhólníihii nishłį́; áádóó tʼah tʼáá Babylongi naakaiígíí ałtso nidadeestsxił.
25Ákohgo, shiinídlą́ągo, tʼah dííjį́ wolyéhígíí biyiʼ nanilnish doo.
26Áádóó shá naalʼaʼí, Newel K. Whitney dóó Sidney Gilbert, binaalyéhí báhooghan dóó binaadeełii kweʼé baa nahidoonihgo doo ákótʼée da; háálá díí éí doo hódzą́ átʼée da sodizin atah danilínígíí tʼáá ákǫǫígíí, éí tʼáá ákǫ́ǫ́ kéédahatʼį́, éí kéyah Zion góde dadookah.
27Áko shooh, shibee hazʼáanii biyiʼ ání, éí doodago dooda, niheʼanaʼí doo nihąąh hadeiyííłʼáa da doo ní;
28Ákondi shooh, doo éí łaʼgi baa náʼiisdzo da Diyin Bóhólníihii yinízinígíí doo yéʼałʼį́į́góó, dóó bił yáʼátʼéhígíí yikʼe naʼiilé.
29Ákohgo, ákáʼanájahii danohłį́, Diyin Bóhólníihii bá ndaałʼaʼ; áádóó Diyin Bóhólníihii íínízingo bikʼehgo ádaʼoołʼínígíí éí Diyin Bóhólníihii binaanish átʼé.
30Áádóó díí akéedi dayoołkáałdi bikééʼ naazíinii biká anáʼahinołchééh doogo yee nihikʼidiilniiʼ, áko Ziondi kéyah baa dahidoolyéłígíí daabí dooleeł.
31Áádóó ako shooh, Shí, Diyin Bóhólníihii, nihił hashneʼ, áádóó shizaad éí tʼáá aaníí átʼé áádóó doo bił yóóʼahodoogááł da, áko éí nídeididoolééł.
32Ákondi díidí tʼáá ałtso baa hodoolzhish góneʼ ádahodoonííł.
33Ákohgo, haaʼíshąʼ yáʼádaatʼéehii baa nidaohkaígíí tʼáadoo ádadoołáhí, háálá naanish ayóó átʼéii bitłʼááhdi nástłʼínii bindaałnish. Áádóó tsʼídá doo bíhólníih nidzinígíí ndi éí bitsʼą́ą́dóó tsʼídá ayóó átʼéii haleeh.
34Áko shooh, Diyin Bóhólníihii éí bijéí hojoobaʼ dóó kʼadę́ę áká iilyeedígíí yinízin; ádeinízinígíí dóó akʼeh dahółʼínígíí díí akéedi dayoołkáałdi yáʼátʼéehii kéyah Zion bikááʼgóó nídanitʼį́į́hii deiyą́ą doo.
35Áádóó akʼijįʼ danilínígíí éí kéyah Ziondóó nahjįʼ kódabidiʼdoolnííłgo doo daʼatah da doo, dóó chʼídabidiʼnóolkał, dóó kéyah doo baa dahidootʼááł da.
36Háálá, Shí tʼáá aaníigo nihichʼįʼ haasdziih akʼijįʼ danilínígíí éí doo Ephraim yitsʼą́ą́dééʼ dineʼé danilį́į da, ákohgo éí hatahdóó hahidooʼnił.
37Áko shooh, Shí, Diyin Bóhólníihii, díí akéedi dayoołkáałdi shisodizin ánahwiiʼaahii dahyiskid yikáá dahsidá nahalin doo, éí doodago tsʼídá hódahdi dah sidáa doo, éí tʼáá ałtso ałʼąą dineʼé dah deiyíkáhígíí yá ndahwiiʼááh dooleeł.
38Háálá baa hodoolzhish éí Ziondi kéédahatʼíinii éí tʼáá ałtso Zion bídadéétiʼígíí yee yá ndahwiiʼaah doo.
39Áádóó dabiyoochʼídígíí dóó tʼóó ádaʼdilínígíí éí ndabinitaah doo, áádóó hastóí naakitsʼáadah dóó diyin yá yádaałtiʼii doo danilínígíí béédahodoozįįł.
40Áádóó Bishop ndi, ánahwiiʼaahii nilíinii, dóó bikééʼ dahsikéhígíí, éí naanish bee bikʼidahodiiniiʼígíí doo tʼáá íiyisíí bił danilį́įgo éí baa ákóhodínóozįįłgo bá nidahidiyootʼááł, áádóó łaʼ bitséskʼeh anáádahidooʼnił.
41Háálá, áko shooh, Shí nihichʼįʼ haasdziih Zion ałʼąą dínóotʼį́į́ł, áádóó Diyin Bóhólníihii biʼayóó átʼéii bił hólǫ́ǫ doo;
42Áádoó diné yichʼįʼ dah naatʼaʼí nilį́į doo, áádóó tʼáá ałtso ałʼąą dineʼé yáʼąąsh biyaadóó dah deiyíkáhígíí baa dahakááh doo.
43Áádóó éí bijį́ baa hodoolzhish nahasdzáán bikááʼ ałʼąą dineʼé dah deiyíkáhígíí bí biniinaa daditłid doo, dóó Ziondi kéédahatʼínígíí biniinaa yéédaaldzid doo. Háálá Diyin Bóhólníihii yee haadzííʼ. Amen.