1 Raica, sa kaya vakaoqo vei kemudou na Turaga na nomudou Kalou, Oi kemudou na italatala qase ni noqu lotu, dou vakarorogo ka rogoca, ka ciqoma na noqu lewa ena vukumudou.

2 Niu sa kaya vakaidina vei kemudou, au sa lewa mo dou rawai vuravura; ia au na qai lomani kemudou.

3 Era tu ena kemudou maliwa eso era sa ivalavala ca; ia au na kaya ga vakadua oqo vei kemudou, me baleta na noqu lagilagi, kei na nodra vakabulai na yalodra, au sa vosota kina na nomudou ivalavala ca.

4 Au na yalololoma sara vei kemudou, ni’u sa solia vei kemudou na matanitu.

5 Ena sega ni kau tani mai vei Josefa Simici Lailai, na noqu tamata, na idola ni veika vuni ni matanitu, ena kena ivakarau au sa tauyavutaka, ena nona bula taucoko, kevaka sa talairawarawa ki na noqu veicakacaka vakalotu.

6 Era tu eso era sa segata me ra kunea e dua na nona cala ka sega ni dua na kena inaki;

7 E dina sa ivalavala ca ko koya; ia au sa kaya vakaidina vei kemudou, koi Au na Turaga, au sa vosota na nodra ivalavala ca ko ira era sa vakatusa vei au na nodra ivalavala ca ka kerea me ra vosoti, io na ivalavala ca ka sega ni yaco kina na mate.

8 Ko ira na noqu tisaipeli ena gauna e liu, era dau segata me ra kunea na cala vei ira vakataki ira ka ra sega ni dau veivosoti vakataki ira e lomadra; ena vuku ni ka oqo era sa vakararawataki ka vakanakuitataki sara kina.

9 O koya, au sa kaya kina vei kemudou, ni sa dodonu mo dou veivosoti vakataki kemudou; ni na tu me cudruvi mai vua na Turaga, ko koya sa sega ni vosota na nona caka cala na wekana, ni sa tu ga vei koya na ivalavala ca e levu cake.

10 Koi Au na Turaga, au na vosoti ira ga au via vosota, ia koi kemudou sa gadrevi mo dou vosota na tamata kecega.

11 Ka sa dodonu mo dou kaya e lomamudou—me lewa mada vei au vata kei iko na Kalou, ka sauma vei iko me vaka na nomu ivalavala.

12 Ia ko koya sa sega ni veivutunitaka na nona ivalavala ca, ka sega ni vakatusa, mo dou kauta mai ki na lotu, ka cakava vua na veika sa tukuna vei kemudou na ivolanikalou, ena ivakaro se na ivakatakila.

13 Ia oqo mo dou kitaka me vakalagilagi kina na Kalou—e sega ni baleta ni dou sega ni veivosoti, ka sega ni loloma, ia mo dou dodonu kina ena lawa, me kakua kina ni cudruvi kemudou ko koya na nomudou vunilawa—

14 Au sa kaya vakaidina, mo dou kitaka na veika oqo ena vuku ni inaki oqo.

15 Raica koi au na Turaga, au sa cudruvi rau ko Esera Buci ka a noqu tamata tu e liu, ka vakakina na noqu tamata ko Aisake Moli, ni rau sa sega ni maroroya na lawa, se na ivakaro;

16 Erau sa segata na ivalavala ca e lomadrau, ia koi Au na Turaga, au sa kauta tani na Yaloqu. Erau sa vakacala me ivalavala ca na veika e sega ni ivalavala ca; ia au sa vosoti Aisake Moli na noqu tamata.

17 Ka vakatalega kina na noqu tamata ko Etuwate Patereji, raica, sa ivalavala ca ko koya, sa segata sara ko Setani me vakarusai na yalona; ia ni sa vakatakilai vei ira na veika oqo, ka ra sa veivutunitaka na nodra ivalavala ca, era na vosoti.

18 Ia oqo, au sa kaya vakaidina ni sa dodonu vei au me lesu tale na noqu tamata ko Sidini Kilipati, ni oti ga e vica na macawa, ki na nona bisinisi, kei na nona itavi vakaitini ena vanua ko Saioni;

19 Ka me laki tukuna na veika sa raica ka rogoca kivei ira na noqu tisaipeli, me ra kakua kina ni rusa. Oqo na vuna au sa tukuna kina na veika oqo.

20 Ka’u sa kaya tale vei kemudou, me kakua ni temaki ko Aisake Moli na noqu tamata me sivia na veika e rawa ni taura, ka soli vua na ivakasala cala mo dou na leqa kina, Au a solia na ivakasala me volitaki na nona iteitei.

21 E sega ni lomaqu me volitaka na nona vanua ni teitei ko Veretariki G. Viliame na noqu tamata, ni sa lomaqu, koi Au na Turaga, me dei toka mada na noqu lewa ena vanua ko Katiladi, ena loma ni lima na yabaki, au na sega ni vakarusai ira kina na dau caka ca, ia me rawa ni’u bau vakabula kina eso.

22 Ia ni sa oti na siga ko ya, au na sega ni vakacala koi Au na Turaga, e dua sa lomana dina me lako ki na vanua ko Saioni; ni’u sa gadreva koi Au na Turaga, na yalodra na luve ni tamata.

23 Raica sa vakatokai na gauna oqo me yacova ni sa lesu tale mai na Luve ni Tamata, me siga edaidai, sa siga vakaidina sara ni solibula, ka sa siga ni saumi ikatini ni noqu tamata; ni na sega ni vakamai ko koya sa saumi ikatini ena gauna ena lako mai kina ko koya.

24 Ni sa oti na siga edaidai, sa na yaco mai na siga ni veivakamai—ia sa tukuni tiko oqo me vaka na kena ivalavala vua na Turaga—ni’u sa kaya vakaidina, ni mataka ko ira kece era sa viavialevu, kei ira kece sa caka ca era na vaka na vu ni co; ka’u na vakamai ira, ni sai au na Turaga ni Lewevuqa; ka’u na sega ni laiva e dua vei ira sa vo tu mai Papiloni.

25 O koya kevaka dou sa vakabauti au, dou na cakacaka ni se vakatokai tiko me siga edaidai.

26 Ka sa sega kina ni dodonu vei au me rau sa tei volitaka mada na nodrau sitoa kei na veika erau taukena eke koi rau na noqu tamata ko Niueli K. Witini kei Sidini Kilipati; ni sega ni rai yalomatua oqori, me yacova na gauna era sa lako kece kina ki na vanua ko Saioni ko ira na vo ni lewenilotu era se tiko eke.

27 Raica, sa tukuni ena noqu lawa, se sa vakatabui, mo dinau tu vei ira na nomu meca;

28 Ia raica, e sa sega mada ni tukuni ena dua na gauna me kakua ni taura na Turaga na ka sa vinakata, ka sauma ena ka e dodonu vua.

29 Ia, me vaka ni dou itini, dou sa vakaitavi kina ena cakacaka ni Turaga; ia na veika kecega dou sa vakayacora me vaka na nona inaki na Turaga sa nona cakacaka na Turaga.

30 Sa lesi kemudrau ko koya mo drau qaravi ira na nona yalododonu ena veisiga e muri oqo, io me ra rawata kina na nodra ivotavota vakawa ena vanua ko Saioni.

31 Ia raica, koi au na Turaga au sa kaya vei kemudou, ka sa dei na noqu vosa ka na sega ni tale wale, ni ra na rawata vakaidina.

32 Raica ena yaco na ka kecega ena kena gauna.

33 O koya mo dou kakua kina ni oca ena cakacaka vinaka, ni dou sa tura tiko na yavu ni dua na cakacaka cecere. Ia ena tubu mai ena veika lalai na veika cecere.

34 Raica, sa gadreva na Turaga na yalo kei na vakasama sa vakarau tu; ia ko ira sa vakarau tu ka talairawarawa era na kania na veta ni vuata ena vanua ko Saioni ena veisiga mai muri.

35 Ia ko ira sa dauveisaqasaqa era na muduki tani mai na vanua ko Saioni, ka ra na vakasavi tani, ka na sega na nodra tikina ena vanua koya.

36 Niu sa kaya vakaidina, ko ira sa dauveisaqasaqa era sa sega ni dra i Ifireimi, o koya era na cavuraki laivi kina.

37 Raica, koi Au na Turaga, au sa vakaduria na noqu lotu ena veisiga e muri oqo me vaka e dua na turaganilewa sa dabe ena dua na delana, se ena dua na vanua cecere, me lewai ira na veimatanitu.

38 Ni na qai yaco ni ra na vakatulewa me baleta na veika kece e baleti Saioni ko ira na lewei Saioni.

39 Io era na qai vakatakilai ira na daulasu kei na dauveivakaisini, ka ra na kilai talega o ira na iapositolo kei na parofita vakailasu.

40 Ka vakakina na bisopi, o koya na turaganilewa, kei rau na nona daunivakasala, kevaka eratou sa sega ni yalodina tiko ena nodratou veiqaravi eratou na cudruvi, ka ra na biu eso me sosomitaki iratou.

41 Ia, raica au sa kaya vei kemudou, ena seraki koya ko Saioni, ka na tiko kina na lagilagi ni Turaga;

42 Ka na yaco me nodra drotini na tamata, ia ena lako mai vua eso na tamata mai na veimatanitu kecega e rukui lomalagi.

43 Ka na yaco mai na siga era na sautaninini kina na veimatanitu e vuravura ena vukuna, ka ra na rerevaki ira na lewena. Oqo na ka sa tukuna na Turaga. Emeni.