1 Hwɛ, dɛm na Ewuradze hom Nyankopɔn no se hom, O hom a hom yɛ m’asɔr mu elderfo, hom nyɛ aso na hom ntsie na hom ngye dza ɔyɛ me pɛ a ɔfa hom ho.

2 Na nokwar, mese hom dɛ, mepɛ dɛ hom dzi wiadze do konyim; dɛm ntsi, mibenya ayamuhyehye wɔ hom do.

3 Binom wɔ hom mu a wɔayɛ bɔn; mbom nokwar, mese hom dɛ, wɔ mber yi nko mu no, osian mankasa m’enyimnyam, nye akra nkwagye ntsi, medze hom bɔn akyɛ hom.

4 Mubohu hom mbɔbɔr, osiandɛ medze ahenman no ama hom.

5 Na wɔrenngye ahenman no n’esumadze nsaafee no mmfi m’akowaa Joseph Smith, Kakraba no, ne nsamu, ɔnam iyi ntsi na meyi no esi hɔ ber a ɔtse ase yi, mber dodow a odzi m’ahyɛdze do.

6 Binom wɔ hɔ a ɔnnyɛɛ hɔn hwee eso wɔaper dɛ wobenya kwan bi egyina do dze etsia no;

7 Mbom ɔayɛ bɔn; naaso, nokwar, mese hom dɛ, Emi, Ewuradze, medze hɔn a wɔkã hɔn bɔn kyerɛ me, na wɔnnyɛɛ bɔn a wɔdze kɔ owu mu, na wobisa bɔnfakyɛ no, hɔn bɔn kyɛ hɔn.

8 Tsetseberdo no, m’esuafo no peree dɛ wobenya biribi egyina do dze etsia hɔnho nkorkor, na wɔammfa hɔn bɔn annkyɛ hɔnho nkorkor wɔ hɔn akoma mu, na osian bɔn yi no ntsi, wɔtsẽaa hɔn yayaaya na wohun amandze.

9 Dɛm ntsi, mese hom dɛ, ɔsɛ dɛ hom dze hom bɔn kyɛ homho nkorkor; na nyia ɔmmfa no nua no bɔn nnkyɛ no no dzi fɔ wɔ Ewuradze n’enyim, na bɔn ne kɛse so no.

10 Emi, Ewuradze, medze hɔn a mepɛ no hɔn bɔn kyɛ hɔn, na mbom homdze, ɔyɛ hom ahyɛdze dɛ hom dze nyimpa nyina hɔn bɔn kyɛ hɔn.

11 Na ɔsɛ dɛ hom kã wɔ hom akoma mu dɛ—ma Nyame mbua emi nye ɔwo ntamu atsɛn na ontua wo kaw dɛ mbrɛ wo ndzeyɛɛ tse.

12 Na nyia onnu noho wɔ no bɔn ho, na ɔnnkã no bɔn nnkyerɛ no, hom mfa no mbra asɔr no enyim, na hom nye no ndzi dɛ mbrɛ kyerɛwsɛm no se hom, wɔ mbrasɛm anaa nyikyerɛ kwan do.

13 Na iyi na hom nyɛ ama wɔaahyɛ Nyame enyimnyam—nnyɛ dɛ hom ammfa no bɔn annkyɛ no, anaadɛ hom nnyi ayamuhyehye, mbom ama hom eedzi bem wɔ mbra n’enyi do, amma hom ammfom nyia ɔyɛ hom mbramafo no—

14 Nokwar, mese dɛ, iyi ho ntsi na hom nyɛ ndzɛmba yinom.

15 Hwɛ, emi, Ewuradze, mo bo fuuw nyia ɔyɛ m’akowaa Ezra Booth, nye m’akowaa Isaac Morley so, osiandɛ woenndzi mbra no do, na woenndzi mbrasɛm no so do;

16 Wosusuu bɔn wɔ hɔn akoma mu, na Emi, Ewuradze, motwee mo sunsum fii hɔn nkyɛn. Wobuu dza ɔnnyɛ bɔn no fɔ; naaso, medze m’akowaa Isaac Morley no bɔn akyɛ no.

17 Hwɛ, m’akowaa Edward Partridge so ayɛ bɔn, na Satan rohwehwɛ asɛɛ ne kra; mbom sɛ wɔda ndzɛmba yinom edzi kyerɛ hɔn, na wonu hɔnho wɔ bɔn no ho a, wɔdze bɛkyɛ hɔn.

18 Na afei, nokwar, mese dɛ, ohia me dɛ m’akowaa Sidney Gilbert, bɛyɛ adapɛn kakra ekyir no, ɔbɛsan n’ekyir akɔsɔw n’edwuma do, na ɔayɛ n’ananmusinyi edwuma wɔ Zion asaase no do;

19 Na dza oehu na ɔatse no oetum ada no edzi akyerɛ m’esuafo no, amma wɔaannhera. Na iyi ho ntsi na makã nsɛm yinom.

20 Na bio, mese hom dɛ, wɔronnsɔ m’akowaa Isaac Morley nnhwɛ mma ɔmmbor dza obotum asɔw, nna mma wɔmma afotu bɔn mma wɔnnhaw hom, Emi na mehyɛɛ hom dɛ hom ntɔn ne haban.

21 Mennkɛpɛ dɛ m’akowaa Frederick G. Williams bɔtɔn ne haban, osiandɛ, Emi, Ewuradze, mubosuo Kirtland asaase no mu dzen bɛyɛ mfe enum, na dɛm aber no mu no, merennkã emumuyɛfo no nngu, ama meetum agye binom nkwa.

22 Na dɛm da no ekyir no, Emi, Ewuradze, murummbu obiara a obobue n’akoma mu dze akɔ Zion asaase do no fɔ; osiandɛ, Emi, Ewuradze, morohwehwɛ adasamba hɔn akoma.

23 Hwɛ, sesei wɔfrɛ no ndɛ kɛpem dɛ Nyimpa Ba no bɛba, na nokwar, ɔyɛ afɔrbɔ da, nye da a mo nkorɔfo dze tua hɔn ebupɛn du; na nyia otua n’ebupɛn du no wɔnnkɛhyew no wɔ ne mbae ber no mu.

24 Na nhyewee no bɛba da yi ekyir—dɛm na Ewuradze ne kasa kwan tse—na nokwar Mese, ɔkyena ahantanfo nye emumuyɛfo nyinara bɛyɛ dɛ nwura; na mebɛhyew hɔn, na Emi nye Dɔm Ewuradze; na meremma obiara a ɔda ho tse Babylon no mmfa noho tɔtrɔtɔ.

25 Dɛm ntsi, sɛ hom gye me dzi a, hom bɛyɛ edwuma wɔ ber a wɔfrɛ no ndɛ da yi.

26 Na onnye dɛ mo nkowaa Newel K. Whitney nye Sidney Gilbert bɔtɔn hɔn fiadze nye hɔn ahodze wɔ ha; osiandɛ iyi nnyɛ enyansadze kɛpem dɛ asɔrmba nkaa no a wɔaka bea yi do no bɔkɔ Zion asaase do.

27 Hwɛ, wɔakã wɔ me mbra no mu, anaadɛ wɔabra hom dɛ, mma hom nnkitsa hom atamfo kaw;

28 Mbom hwɛ, wɔnnkãa no wɔ aber biara mu dɛ mma Ewuradze mmfa wɔ ber a ɔpɛ, na ontua wɔ ber a ɔhwɛ a oye ma no.

29 Dɛm ntsi, ber a hom yɛ ananmusifo yi, nna hom yɛ Ewuradze n’asomafo; na biribiara a hom bɛyɛ a ɔyɛ Ewuradze n’apɛdze no yɛ Ewuradze n’edwuma.

30 Na ɔdze hom esi hɔ dɛ hom nhwɛ ma n’ahotseweefo nnya dza wohia wɔ nda a odzi ekyir yi mu, ama woeenya egyapadze wɔ Zion asaase do.

31 Na hwɛ, emi, Ewuradze, mekã kyerɛ hom dɛ, hɔn nsa bɛkã, na emi me nsɛm si pi na munntwa abrɔdɔ.

32 Mbom ɔsɛ dɛ ndzɛmba nyinara ba mu wɔ hɔn aber do.

33 Dɛm ntsi, mma hom mmberɛ wɔ papayɛ ho, osiandɛ hom rotow dwumadzi kɛse bi ne fapem. Na ndzɛmba nkakraba mu na dza ɔyɛ akɛse fi mu ba.

34 Hwɛ, Ewuradze rohwehwɛ akoma nye adwen pa; na nyia ɔwɔ su pa na ɔyɛ setsie no, obedzi Zion asaase no do ndzepa wɔ nda a odzi ekyir yinom mu.

35 Na wobotwa etuatsewfo no efi Zion asaase do akyen, na wɔbɛpam hɔn efi hɔ, na worinnya asaase no nndzi.

36 Na nokwar, mese dɛ etuatsewfo no mmfi Ephraim no bɔgyaa mu, dɛm ntsi wobeyi hɔn efi mu.

37 Hwɛ, Emi, Ewuradze, maayɛ m’asɔr wɔ nda a odzi ekyir yi mu tse dɛ ɔtsɛmbuafo a ɔtsena koko anaa bea a ɔkrɔn do, dɛ orubobu aman atsɛn.

38 Na ɔbɛba dɛ hɔn a wɔtse Zion asaase do no bobu ndzɛmba a ɔfa Zion ho nyina atsɛn.

39 Na wɔbɔsɔ atorfo na enyidosomkyerɛfo ahwɛ, na hɔn a wɔnnyɛ asomafo na nkɔnhyɛfo no, wobohu hɔn.

40 Na bishop mpo a ɔyɛ ɔtsɛmbuafo no, nye n’apamfo no, sɛ woenndzi nokwar wɔ hɔn dwumadzi ho a, wobobu hɔn fɔ; na wɔdze binom esi hɔn ananmu.

41 Na hwɛ, mese hom dɛ Zion bɛyɛ prɔmprɔm, na Ewuradze n’enyimnyam bɛba no do;

42 Na ɔbɛyɛ frankaa dze ama nkorɔfo, na ɔman biara a ɔwɔ asaase yi do no bɛba no hɔ.

43 Na da bi bɛba a osian ɔno ntsi, aman a ɔwɔ asaase do no ho bɔpopo, na osian ne mba hɔn ho hu ntsi, wobosuro. Ewuradze na ɔakã iyi. Amen.