Wóltaʼii 66
Diyin Yá Yáłtiʼí Joseph Smith díí diyingo bił ííshją́ą́ ályaa, Hiram, Ohiodi, Ghąąjįʼ 29, 1831 yihahgo. William E. McLellin éí Diyin Bóhólníihii tʼáá nahonitingi díí ashdlaʼgo naʼídíkid Diyin Yá Yałtiʼí yił ííshją́ą́ íídoolíiłgo yaa néiyooskan, éí Joseph Smith doo bił bééhózin da ńtʼę́ę́ʼ. McLellin áníigo, Diyin Yá Yáłtiʼí Diyin Bóhólníihii neiyídéíłkid dóó díí diyingo bił ííshją́ą́ ályaa.
1–4, Hoolʼáágóó diyingo bee ahaʼdeetʼáanii éí Jesus Christ binaʼnitin bee yisdáʼiildéehii tʼáá áłtso átʼé; 5–8, Elders éí ndaʼnitin, dóó tʼáá aaníí átʼéii yaa dahalneʼ doo, áádóó dineʼé yił ndahaʼáa doo; 9–13, Naʼnitinjí ákáʼaʼayeed bijidiilkaalgo éí hoolʼáágóó iiná haa doolyéełgo há bee nahodootʼááł.
1Áko shooh, shá naalʼaʼí William E. McLellin éí Diyin Bóhólníihii kóbíłní—Nikʼihojisdliʼ, nibąąhági ádaatʼéii bitsʼą́ąjįʼ kwííndzaaígíí, dóó tʼáá aaníinii yiniłtsoodígíí biniinaa, ní Diyin Bóhólníihii náNináʼnídláhígíí, nihokááʼ dineʼé Yisdáʼyiiníiłii, tʼáá ląʼída shizhiʼ deiyoosdląądígíí ndi.
2Tʼáá aaníigo nichʼįʼ haasdziih, hoolʼáágóó diyingo shibee ahaʼdeetʼáanii nídinláhígíí biniinaa nikʼihojisdliʼ, shinaʼnitin bee yisdáʼiildéehii tʼáá átʼéhígíí ndi, éí nihokááʼ dineʼé baʼáłchíní bichʼįʼ kólyaa, áko hoolʼáágóó iiná baa dahidoolyééł dóó akéedi dayoołkáałgo ayóó ádaatʼéii ííshją́ą́ ádaalyaaígíí bił dahólǫ́ǫ doo, Diyin yá yádaaltiʼí dóó hastóí naakitsʼáadah ałkʼidą́ą́ʼ nídeiyíízohyę́ęgi átʼáo.
3Tʼáá aaníigo nichʼįʼ haasdziih, shá nanilʼaʼí William, doo naah chin da, ndi doo tʼáá ałtso nahjįʼ kwíínlaa da; áko, shidááhdóó doo yáʼádaashónígíí, baa ádaa náʼiiníkąąh, ní Diyin Bóhólníihii, háálá Diyin Bóhólníihii éí nił ííshją́ą́ íídoolííł.
4Áádóó áko, tʼáá aaníigo, Shí, Diyin Bóhólníihii, nídadéítʼiʼígíí, éí doodago Shí ná nisinígíí nił ííshją́ą́ ádadeeshłííł.
5Áko shooh, tʼáá aaníigo nichʼįʼ haasdziih, áko shí nisinígíí éí shinahatʼá bee yisdáʼiildéehii kédaayahgóó bee naʼnítin doo, dóó kin dahnaazhjaaʼgóó, aooʼ, dóó ninaagóó ndahazʼą́ tʼah doo Diyin bizaad bee nidabidiʼnitinígíí bitahgóó.
6Kweʼé tʼóó kónízáhájįʼ nanináa doo; áłtsé tʼah kéyah Zion gódeʼ dóónááł lágo; ákondi béeso tʼáá bííníghahígíí bichʼįʼ ádíílííł, bichʼįʼ ánílééh; éí doodaiiʼ, dóó tʼáadoo kéyah naadeetʼaahígíí baa ntsíníkeesí.
7Haʼaʼaahjigo kédaayahígíí bichʼįʼ dínááh, tʼáá ałtso ndahazʼą́ą́góó tʼáá aníí átʼéii baa hálneʼ doo, tʼáá ałtso dineʼé bisodizin ndaaznilgóó, áádóó áadi dineʼé bił nahaʼáa doo.
8Bíniʼdii shá naalʼaʼí Samuel H. Smith bił yíʼash doo, dóó bitsʼą́ą́ʼ dahdoonááł lágo, dóó nił hóóneʼígíí bee bił hodíílnih; áádóó háida beʼoodląʼ yaʼólíhígíí éí tʼáá naagháágóó bidziilgo ádoolnííł; áádóó Shí, Diyin Bóhólníihii, nihił naashdeeh doo.
9Bitah dahoneezgaiígíí bitsiitʼááh dah didíílnihgo bikʼi sodidíílzįįł, áádóó yáʼátʼééh nídadoodleeł. Doo éí nídíídááł da Shí, Diyin Bóhólníihii, hooghangóó nídíídááł nidííniidgo índa. Nichʼįʼ nahwiiʼnáago haʼíínílníi doo. Ííníkeed, áko yíníkeedígíí naa doolyééł; dáádílkał náníłtsʼin, áko ná ąą ádoolnííł.
10Tʼáadoo ni kʼehoʼdidlíigo ntsíníkeesí. Tʼáá ałtso doo yáʼádaashóonii yóó adidííʼááł. Tsʼídá doo aaʼdidííłeeł da—éí bee naʼnitaahígíí níʼdiiłʼá.
11Díí saad béénílniih doo, háálá tʼáá aaníinii dóó bee daʼoodláanii ádaatʼé; áádóó naanish bee nikʼihodiiniiʼígíí nił nilį́įgo íínísin, áádóó ląʼí da dineʼé hoolʼáágóó ił hózhǫ́ bitsiitʼáagi dahólǫ́ǫgo dahataałgo Zionjįʼ bił nídííkah.
12Díí nihoníyą́ąjįʼ tʼáá ákónítʼį́į doo, hoolʼáágóó iiná naatʼááh chʼah éí shiZhéʼé bílaʼ nishnáagi naadootʼááł, éí hajoobaʼ dóó tʼáá aaníinii tʼáá ałtso bee hólǫ́.
13Tʼáá aaníí, Bóhólníihii nihiDiyin God kóní, nihá Nináʼnídláii, Jesus Christ ndi. Amen.