Wóltaʼii 68
Diyin Yá Yáłtiʼí Joseph Smith díí diyingo bił ííshją́ą́ ályaa, Hiram, Ohiodi, Níłchʼitsʼósí 1, 1831 yihahgo, Orson Hyde, Luke S. Johnson, Lyman E. Johnson, dóó William E. McLellin bá haitʼáo Diyin Bóhólníihii baa nitsíkeesígíí ííshją́ą́ ádoolnííł biniyé baa sohodoozin. Azhą́ díí ííshją́ą́ ályaaígíí éí hastʼóí dį́į́ʼgo bá ályaa ndi, ląʼída chʼétʼánígíí éí Sodizin atah danilínígíí ałdóʼ tʼáá átʼé bee bichʼįʼ haʼoodzííʼ. Díí diyingo ííshją́ą́ ályaaígíí éí Diyingo Naʼnitin dóó Bee Ahadaʼdeestʼáanii naaltsoos biyiʼ 1835 yihahgo haaltsʼidígíí Joseph Smith áníigo bééʼdeitsih.
1–5, Elder danilínígíí éí Iiʼ Sizį́ Diyinii dabidiiłnááhgo yee hadahadziihígíí éí Diyin bizaad átʼé; 6–12, Elder danilínígíí éí ndaʼnitin dóó tó yee daʼiisį́į́h doo, áádóó tʼáá aaníigo daʼoodlánígíí éí bee éédahózinii ádeiłʼį́į doo; 13–24, Aaron biyeʼké bitah áłtsé ndahachíhígíí éí Presiding Bishop da danilį́įgo áká anádaajah doo (jó éí, aa haʼniihgo éí bishop nilį́įgo bee ąą níditį́hí dah yoojih doo) Tsʼídá Alą́ąjįʼ Bídahólníhígíí dahweeʼáłígíí binahjįʼ; 25–28, Amá dóó azhéʼé baʼáłchíní Diyin binaʼnitin bee yisdáʼiildéehii bee ndadínóohtį́į́ł dabiʼdooʼniid; 29–35, Akééʼ Naazʼíinii éí Damóogo dahodísin doo, tʼáá áłahjįʼ áká anídaajah doo, dóó sodadilzin doo.
1Shá naalʼaʼí, Orson Hyde, éí hoolʼáágóó diyin binaʼnitin bee yisdáʼiildéehii yee naʼnitin doogo bee yiilzį́į́ʼ, éí Diyin God hiináanii bi Iiʼ Sizį́ Diyinii binahjįʼ, éí diné bitahgóó, dóó kédaayahgóó, doo yáʼádaashóonii áłah nídaadleehgóó, bisohodizin bá dahooghangóó, yił ndahaʼáó dóó tʼáá átʼé Diyin Bizaad hazhóʼí yee yił dahalneʼgo.
2Áádóó, dadínóhʼį́į́ʼ, dóó danółʼį́, áádóó díí éí bikʼehgo tʼáá ałtsó Diyin beʼadziilii baa dahaasyá, yee ndaʼnitin dooleeł biniyé bee bikʼidahodiiniiʼ—
3Áádóó díí yikʼehgo ádaʼałį́į doo, Iiʼ Sizį́ Diyinii nidabiiłnáago yinahjįʼ yádaałtiʼ doo.
4Áádóó Iiʼ Sizį́ Diyinii ndabiiłnáago yee yádaałtiʼígíí éí Diyin bizaad ádaatʼée doo, éí Diyin Bóhólníihii yinízinígíí bikʼehgo, dóó Diyin Bóhólníihii binitsíkees, éí Diyin Bóhólníihii bizaad, dóó Diyin Bóhólníihii bizhí átʼée doo, áádóó Diyin God bibee adziilii bee yisdáʼiildéehii tʼáá ałtsó bá átʼé.
5Áko shooh, díí éí Diyin Bóhólníihii nichʼįʼ yee ádééhaadzííʼ, O shá naalʼaʼí nilíinii.
6Ákohgo, baa nił hózhǫ́, dóó tʼáa doo náníldzidí, háálá Shí Diyin Bóhólníihii nił honishłǫ́, dóó nił sízį́į doo; áádóó shí éí shaa hólneʼ doo, azhą́ Jesus Christ ndi, Diyin God hiináanii biYeʼ nishłį́, Shí honishłǫ́ǫ́ ńtʼę́ę́ʼ, Shí kʼad honishłǫ́, índa Shí nínáádeeshdááł.
7Díí Diyin Bóhólníihii bizaad ánihiłní, shá naalʼaʼí Orson Hyde, áádóó ałdóʼ shá naalʼaʼí Luke Johnson, dóó shá naalʼaʼí Lyman Johnson, áádóó shá naalʼaʼí William E. McLellin, áádóó tʼáá anółtso elders baʼahódlí shisodizinjí atah danohłínígíí ałdóʼ bá—
8Tsʼídá tʼáá ałtso nihokááʼ bikááʼgóó, éí nahatʼá bee yisdáʼiildéehii bíndaʼnołtin dooleeł, bee óhólníihii nihąąh ninílahígíí bee ádaʼoołʼį́į doo, aTaaʼ, dóó aYeʼ, dóó Iiʼ Sizį́ Diyinii bízhiʼ binahjįʼ tó bee daʼoosį́į́h doo.
9Áádóó tʼáá háíshį́į́ oosdląądígíí dóó tó bee yilzį́ʼígíí éí yisdádoodlóós, áádóó tʼáá háíshį́į́ doo oosdląądígíí tiʼhooʼnííh bee bá nihodootʼááł.
10Áádóó tʼáá háíshį́į́ daʼoosdląądígíí éí bee éédahózinii ádeiłʼį́į doo, tʼáá bee akʼeʼashchínígi átʼéego.
11Áádóó nihí éí dahwéelzhíishii bee éédahózinii nihił béédahózin dooleełgo nihaa dahideestʼą́, dóó Diné Silį́įʼii nádááhdi bee yitʼínígíí ałdóʼ;
12Áádóó diyingo Azheʼé nilíinii tʼáá aníí ádaatʼéí yee yił hoolneʼígíí, éí adziilii bee hoolʼáágóó iiná ahídahaastłʼǫ́ǫgo ádadoołííł. Amen.
13Áádóó áko, bee ałhaʼdadeestʼáanii dóó bee hazʼáanii daabiłígíí, éí díí ádaatʼé—
14Náásgóó łaʼ, Diyin Bóhólníihii áníigo baa hoolzhiizhgo, łaʼ nááná bishop sodizin góneʼ naanish bee bikʼidahodidoonih, éí áłtséédą́ą́ʼ ádaʼałʼínéegi átʼáo ádaʼałʼį́į doo;
15Ákohgo dahodísinígíí high priest danilį́į doo, áádóó éí Diyin Bibeʼadziilii Melchizedek Wolyéhígíí Yilą́ąjįʼ Dahnaháaztʼánígíí bikʼidadidoolnih, tʼáá hazhóʼí Aaron tʼáá íiyisíí yitsʼą́ą́dóó yikahígí éí tʼáá hooschʼįʼ high priest dadooleeł.
16Áádóó Aaron tʼáá íiyisíí yitsʼą́ą́dóó yikahígíí éí bishopric atah dadooleełgo tʼáá íídą́ą́ bee hazʼą́ągo bee bá ahóótʼiʼ, éí Aaron biyeʼké alą́ąjįʼ nidahaazhchíinii danilį́įgo tʼéiyá ákótʼé;
17Háálá alą́ąjįʼ nidahaazhchíinii éí díí Diyin bibee adziilii yilą́ąjįʼ dahnaháaztʼánígíí tʼáá íídą́ą́ʼ bee bá ahóótʼiʼ, dóó éí tʼáá áłah bibee ąą nídítį́hí éí doodago óhólnííh bídéítʼiʼígíí dah yoojih.
18Nááná łaʼ diné éí díí dah asdáá góneʼ, díí Diyin bibee adziilii bee ąą nídítį́hí dah yoojihgo doo bee bá ahóótʼiʼ da, tʼáá hazhóʼí Aaron tʼáá íiyisíí yitsʼą́ą́dóó yigááłgo tʼéiyá.
19Ákondi, Diyin Bibeʼadziilii Melchizedek Wolyéhígíí dahyoolééłgo high priest nilíinii éí hóyahgo óhólnííh dahdeiyooléłígíí bindaanish tʼáá átʼé íídoolííłgo yíighah Bishop daniĺį́į doo Aaron yitsʼą́ą́dééʼ dineʼé yigáłígíí doo hólǫ́ǫ́góó, éí bikʼihodiiniiʼ dóó binaanish dooígíí bił hanih dóó adziilii dah yoolééł dooígíí bee yiilzį́į́h, éí Diyin Bibeʼadziilii Melchizedek Wolyéhígíí Alą́ąjįʼ Naazíinii atsiitʼááh dah dadilnihgo dabiisį́į́h.
20Áádóó tʼáá íyisíí Aaron dineʼé yitsʼą́ą́dééʼ yigááłgo, ałdóʼ, éí díí Aláahdi Naazíinii nídabidiiłtééh, dóó hodílzin yííghahígíí, dóó akʼah bąąh álʼįįh, dóó Aláadi Naazíinii deiyiisį́į́h, díí tʼáadoo ályaagóó doo ílį́įgo Diyin bibeʼadziilii dah yoolééłgo éʼéłʼį́į doo.
21Ákondi, Diyin bibeʼadziilii azheʼé dóó ayeʼʼjįʼ aa dahiditʼaahii bee haʼoodziʼígíí ídéétiʼgo, yił ahidiilchíín ííshjání áyilaago akʼah bee biʼdidoolzį́į́ł bee bá ahóótʼiʼ doo, éí doodago, Aláahdi Naatʼáanii danilíinii hódahgo wóójiʼígíí atsíítʼááh dah deesniiʼ ádeiléehgo Diyin Bóhólníihii ííshą́ą́ ályiilaaígíí bikʼehgo doo.
22Áádóó ałdóʼ, bishop éí doodago high priest díí naʼnitin doogo biʼdidoolzį́łígíí doo łaʼ baa náhódóotʼįįł da dóó asihgo doo bá nahodootʼááł da, tʼáá hazhóʼó sodizinjí biÁłtsé Naazíinii bidááhdóó tʼéiyá;
23Áádóó díí Áłtsé Naazíinii éí daʼasihgo bá nidahastʼą́ągo, tʼáá aaníigo yee hadaasdziʼígíí doo nátʼą́́ą́ʼ háádootʼááł da, áko asihígíí bá náhodootʼááł;
24Áádóó ádaanáʼooskango éí baa níʼdidootʼááł, sodizinjí bee ałhaʼdaʼdeestʼáanii dóó bee hazʼáanii ndahasyáhígíí bikʼehgo.
25Áádóó ałdóʼ, amá dóó azheʼé Ziondi áłchíní bee dahólónígíí, éí doodago bistake hadadilyaagóó, ádaanáʼookąąh, Christ, Diyin God hiináanii biYeʼ deiyoodlą́ą doo, tó bee alzį́į́h dóó Iiʼ Sizį́ Diyinii aa halyé atsíítʼááh dah adéésniiʼ bee, tseebíí béédááhaigo, díí tʼáá átʼé doo hazhóʼí yee nideinitingóó, díí asdzihígíí amá dóó azheʼé bikʼijįʼ doodzoh.
26Háálá díí éí Ziondi kéédahatʼíinii bibee hazʼáanii átʼée dooleeł, éí doodago bistake tʼáá ałtso hadadilyaagóó.
27Áádóó baʼáłchíní tseebíí béédaahaigo tó bee dabidiʼdoolzį́į́ł áko ádił ndaʼiisíʼígíí bá yooʼ ahididootʼááł, dóó atsiitʼááh dah adilnííh bá ádadoolnííł.
28Áádóó baʼáłchíní ałdóʼ sodizin dóó Diyin Bóhólníihiii bidááhdóó hazhoʼó kʼéhazdon dahiináago yee neidinóotįįł.
29Áádóó Ziongi kéédahtinígíí ałdóʼ Damóó bijį́ yá dahodísingo yikʼeh dahółʼį́į doo.
30Áádóó Ziongi kéédahatʼínígíí ałdóʼ binaanish ádeiłʼínígíí yéédaalniih doo, díí naanish bee bikʼi dahodiiniiʼígíí, yéego yíká ádaatʼį́įgo; háálá doo naalnishígíí Diyin Bóhólníihii bidááhdóó bééhodoonih.
31Kʼad, Shí, Diyin Bóhólníihii, Ziondi kéédahatʼínígíí doo baa shił hózhǫ́ǫ da, háála doo nidaalnishí danilinígíí bitah hólǫ́; dóó baʼáłchíní ałdóʼ doo yáʼádaashóonii yiiʼ danéísééh; áádóó hoolʼáágóó daʼílíinii doo yéego yíká ádaatʼį́į da, ákondi tʼáá ałtsojįʼ bił dahatsohgo dadéézʼį́į́ʼ.
32Díí doo hólǫ́ǫ da doo, dóó bitahdóó doo hólǫ́ǫ da doo; éí bąą, bíniʼdii shá naalʼaʼí Oliver Cowdery díí saad kéyah Ziondi yaa halneʼ doo.
33Áádóó saad łaʼ bee bichʼįʼ haazdziih—áko háiida ákweʼé hoolzhishgo Diyin Bóhólníihii yichʼįʼ sodadilzingo doo yikʼeh hółʼį́į́góó, bíniʼdii shi dineʼé yá nahwiiʼaahii díí diné yéédoolnih.
34Díí saad tʼáá ádaaníí dóó badaʼahódíii ádaatʼé; éí bąąh, tʼáadoo kʼídahohtíhí, áádóó tʼáadoo saad bidahidohʼaahí.
35Áko shooh, Shí éí Alpha dóó Omega nishłį́, áádóó tʼáá hooshchʼįʼ deeshááł. Amen.