1 Wokman blong mi, Orson Haed, mi bin singaotem hem tru long odinesen blong hem blong talemaot gospel we i no gat en, tru long Spirit blong God we i laef, long wan pipol i go long narafala pipol, mo long wan graon i go long narafala graon, long ol grup blong ol nogud man, insaed long haos blong prea blong olgeta, mo tokbaot gud evri skripja wetem olgeta mo stap eksplenem evri skripja long olgeta.

2 Mo, luk, mo luk gud, hemia i wan eksampol long olgeta evriwan we mi bin odenem long prishud ia, we mi bin givim wok long olgeta blong oli go aot—

3 Mo hemia i eksampol we i go long olgeta, se bae oli mas toktok olsem we Tabu Spirit i lidim olgeta.

4 Mo wanem we bae oli talem taem Tabu Spirit i lidim olgeta, bae i kam skripja, bae i tingting blong Lod, bae i maen blong Lod, bae i toktok blong Lod, bae i voes blong Lod, mo paoa blong God we i go kasem fasin blong sevem man.

5 Luk, hemia i promes blong Lod long yufala, O yufala we yufala i ol wokman blong mi.

6 Taswe, yufala i stap glad, mo yufala i no fraet, from we mi Lod, mi stap wetem yufala, mo bae mi stanap wetem yufala; mo bae yufala i testifae abaot mi, we mi Jisas Kraes, se mi Pikinini blong God we i laef, se mi bin stap, se mi stap, mo se bambae mi kam.

7 Hemia i toktok blong Lod long yufala, wokman blong mi Orson Haed, mo tu, wokman blong mi, Luk Jonson, mo wokman blong mi, Liman Jonson, mo wokman blong mi, Wiliam E. MakLelin, mo long evri fetful elda blong jos blong mi—

8 Yufala i go long ful wol; prijim gospel long evri man, mo stap mekem hemia wetem atoriti we mi bin givim long yufala, mo stap mekem baptaes long nem blong Papa, mo long nem blong Pikinini, mo long nem blong Tabu Spirit.

9 Mo hem we i biliv mo i kasem baptaes bambae mi sevem hem, mo hem we i no biliv bambae devel i stap kontrolem hem.

10 Mo hem we i biliv bae i gat blesing wetem ol saen we oli stap folem hem, olsem we oli bin raetem.

11 Mo long yufala, bae Lod i givim blong save ol saen blong ol taem, mo ol saen blong taem we Pikinini blong Man bae i kam;

12 Mo hamas long olgeta we Papa i talem, bambae yufala i gat paoa blong silim olgeta blong go kasem laef we i no save finis. Amen.

13 Mo naoia, long saed blong ol samting antap long ol kavenan mo ol komanmen, i gat olgeta samting ia i stap—

14 I gat i stap afta, long stret taem blong Lod, ol narafala bisop blong setem olgeta apat long jos, blong oli givhan semmak folem faswan;

15 Taswe, bambae oli ol hae pris we oli klin inaf, mo Fas Presidensi blong Melkesedek Prishud bae i jusum olgeta, be i no olsem sapos oli kamaot stret long laen blong Eron.

16 Mo sapos oli kamaot stret long laen blong Eron, oli gat wan stret raet folem loa, long ofis blong bisop, sapos oli ol fasbon blong ol boe blong Eron;

17 From ol fasbon oli holem raet blong prisaed ova long prishud ia, mo ol ki o atoriti blong prishud ia.

18 I no gat man i gat wan raet folem loa long ofis ia, blong holem ol ki blong prishud ia, be sapos nomo hem i kamaot stret long laen ia mo hem i fasbon blong Eron.

19 Be, from se wan hae pris blong Melkesedek Prishud i gat atoriti blong mekem wok long evri ofis we oli anda long hemia, bae hem i save lidim ofis blong bisop taem i no gat wan stret laen blong Eron i stap, mo tu, sapos oli singaotem hem mo setem hem apat mo oli odenem hem long paoa ia, anda long ol han blong Fas Presidensi blong Melkesedek Prishud.

20 Mo tu, wan we i kamaot stret long laen blong Eron, Presidensi i mas jusum hem, mo mas faenem hem i klin inaf, mo oli mas anoentem hem, mo odenem hem anda long ol han blong Presidensi ia, sapos no, hem i no gat raet folem loa blong mekem wok wetem prishud blong olgeta.

21 Be, wetem paoa blong toktok ia long saed blong raet blong olgeta blong prishud we i kamdaon long papa i go long boe, oli save askem blong oli anoentem olgeta sapos we, long eni taem, oli save pruvum laen blong olgeta, o oli pruvum se i tru, tru long revelesen we i kam long Lod anda long ol han blong Presidensi we oli tokbaot fastaem.

22 Mo bakegen, i no gat bisop o hae pris we bambae oli setem hem apat from seves ia we bae oli putum hem long kot o panisim hem from eni fasin blong brekem loa, be nomo long fored blong Fas Presidensi blong Jos;

23 Mo folem hamas oli faenem hem i rong long fored blong Presidensi ia, tru long testemoni we oli no save pruvum se i rong, bambae hem i kasem panismen;

24 Mo sapos hem i sakem sin, bambae hem i kasem fogivnes, folem ol kavenan mo ol komanmen blong jos.

25 Mo bakegen, folem hamas ol papa mo mama oli gat ol pikinini long Saeon, o long eni long ol stek blong hem we oli bin stanemap, we oli no tijim olgeta blong andastanem doktrin blong fasin blong sakem sin, fet long Kraes Pikinini blong God we i laef, mo baptaes mo presen we i Tabu Spirit tru long fasin blong putum han antap long hed, taem oli gat eit yia, bae sin ia i stap long hed blong papa mo mama blong olgeta.

26 From hemia bae i wan loa long ol pipol we oli stap long Saeon, o long eni stek blong hem we oli bin setemap.

27 Mo ol pikinini blong olgeta bambae oli mas kasem baptaes blong kam klin aot long ol sin blong olgeta taem oli gat eit yia, mo oli mas kasem odinens blong fasin blong putum han antap long hed blong olgeta.

28 Mo oli mas tijim tu ol pikinini blong olgeta blong prea, mo blong wokbaot long stret laef long fored blong Lod.

29 Mo olgeta we oli stap long Saeon bae oli mas obei long Sabat dei blong holem i tabu.

30 Mo olgeta we oli stap long Saeon bae oli mas tingbaot tu ol wok blong olgeta, folem hamas oli jusum olgeta blong wok, wetem evri fasin blong stap fetful; from man we i stap nating, bambae oli tingbaot hem long fored blong Lod.

31 Nao, mi, Lod, mi no glad wetem ol pipol we oli stap long Saeon, from we i gat ol man we oli stap nating long medel blong olgeta; mo ol pikinini blong olgeta oli stap groap tu long fasin nogud; mo tu, oli no stap lukaotem ol rij samting blong taem we i no save finis, be ae blong olgeta i fulap long fasin blong stap griri.

32 Ol samting ia oli no sapos blong stap olsem, mo i mas aot wantaem long medel blong olgeta; taswe, wokman blong mi, Oliva Kaodri i mas tekem ol toktok ia i go long graon blong Saeon.

33 Mo mi givim wan komanmen long olgeta—se hem we i no stap mekem ol prea blong hem long fored blong Lod long stret taem blong hem, oli mas tingbaot hem long fored blong jaj blong ol pipol blong mi.

34 Ol toktok ia oli tru mo yufala i save trastem; taswe, no brekem olgeta, mo no tekemaot eni toktok long olgeta.

35 Luk, mi mi Alfa mo Omega, mo mi kam kwiktaem. Amen.