Wóltaʼii 69
Diyin Yá Yáłtiʼí Joseph Smith díí diyingo bił ííshją́ą́ ályaa, Hiram, Ohiodi, Níłchʼitsʼósí 11, 1831 yihahgo. Diyingo ííshją́ą́ ádaalyaago ndaháasdzohígíí tʼáá tsxíłígo naaltsoos bee ndootʼááłgo ntsaa áłah aleehdi bee lą́ azlį́į́ʼ Níłchʼitsʼósí 1–2góó yoołkaałgo. Níłchʼitsʼósí 3góó yoołkaałgo, díí diyingo ííshją́ą́ ályaaígíí wóltaʼii 133 biih yidzoh, éí náás hoodeeshzhiizhgo Appendix bee wóójiʼ, éí bínáádeitʼą́. Oliver Cowdery éí díí Diyingo ííshją́ą́ ádaalyaago ndaháasdzoígíí dóó bee hazʼáanii Independence, Missourigóó, yidoojihgo áko naaltsoos bikʼidaʼashchį́įgo hahinidééhgo ádoolnííł éí áłtséédą́ą́ʼ bee bikʼihodiiniiʼ ńtʼę́ę́ʼ. Áádóó ałdóʼ béeso akǫ́ǫ́ yidoojih éí Missouridi Sodizin bee ndootʼááłgo biniyé aheesnil. Díí Diyingo ííshją́ą́ ályaaígíí biyiʼ áníigo éí John Whitmer Oliver Cowdery ákǫ́ǫ́ yił dooʼash áádóó Whitmer éí akééʼ náháneʼígíí ahiih yidooniłgo néíyiilááh éí Sodizinjí akééʼ náháneʼii dóó yá naʼazo dooleełgo bee bikʼihodiiniiʼ.
1–2, John Whitmer éí Oliver Cowdery Missourigóó yił dooʼash; 3–8, Naaltsoos néíyiizóóh doo, dóó nákééʼ náháneʼ biyiʼ siláa dooleełígíí ałhaneiyiinííł doo, áádóó ałdóʼ naʼnitin doo.
1 Dashíínółtsʼą́ą́ʼ, ní Bóhólníihii nihiDiyin God, shá naalʼaʼí Oliver Cowdery díí bikáʼadoolwołgo bá ádíshní. Shí ádíshníigo díí bee hazʼáanii dóó béeso kéyah Ziongóó yidoojihígíí bee bóhólnííhgo éí doo bee hódzáanii átʼée da, tʼáá hazhóʼí háida tʼáá aaníinii dóó baʼoodlíhígíí ákǫ́ǫ́ bił níʼáázhgo tʼéiyá.
2 Ákohgo, Shí, Diyin Bóhólníihii, díí shá naalʼaʼí, John Whitmer, éí shá naalʼaʼí Oliver Cowdery ákǫ́ǫ́ yił dooʼash nisin;
3 Áádóó ałdóʼ nákééʼ náháneʼ dóó tʼáá ałtso daʼílínígíí shisodizinjí bídadéitiʼígíí dóó haisídígíí tʼáá neizoh doo;
4 Áádóó ałdóʼ shá naalʼaʼí Oliver Cowdery dóó nááná łaʼ bá dahwéeʼaah dóó bíkáʼánídaajah doo.
5 Áádóó ałdóʼ, shá ndaalʼaʼí nahasdzáán yikááʼgóó adabiʼdeesʼaʼígíí binaanish baa dahideestʼánígíí yaa dahalneʼgo kéyah Ziongóó ándeidoodlííł;
6 Háálá éí kéyah Ziongi naanish baa dahideestʼánígíí yaa dahalneʼgo ákwéʼé bá hazʼą́ą doo.
7 Ákótʼée ndi, bíniʼdii shá naalʼaʼí John Whitmer ndahazʼą́ągóó dóó sodizin bá hooghan naaznilgóó łą́ągo yitah tádidoogaał, áko doo nanitłʼagóó béédahózinígíí néíyiilááh doo—
8 Yéego naʼnitin dóó yaa halneʼ doo, yaa naʼiizóóh doo, yééʼádlééh doo, ałʼąą dahaneʼígíí néíyiilááh doo, dóó tʼáá ałtsó sodizin bá yáʼátʼééh dooleełígíí yá néíyiilááh doo, áádóó ániid ndaakaiígíí Zion bikéyah bikááʼgóó biyaa dahidooʼaałígíí bá dooleeł, daʼíchííh dóó daʼíchííhjįʼ, hoolʼáágóó dóó ahoyéelʼáágóó bá dooleeł. Amen.