Wóltaʼii 70
Diyin Yá Yáłtiʼí Joseph Smith díí diyingo bił ííshją́ą́ ályaa, Hiram, Ohiodi, Níłchʼitsʼósí 12, 1831 yihahgo. Diyin Yá Yáłtiʼí binákééʼ náháneʼ áníigo Níłchʼitsʼósí 1 dóó ńléí 12 yoołkááłjįʼ ntsaago áłah aleeh biniyéhígíí hólǫ́ǫgo, dį́į́ʼdí ahínéíkai. Akéedi áłah azlį́įʼgo, ayóó átʼáo daʼílį́įgo diyingo ííshją́ą́ ádaalyaaígíí Book of Commandments dóó naaltsoos Diyingo Naʼnitin dóó Bee Ahadaʼdeestʼáanii biih dadoodzohgo baa ndaháastʼįįd. Díí diyingo ííshją́ą́ ályaaígíí éí ntsaago áłah daʼazlį́į́ʼ bikééʼdóó kódaaníigo yee nídiijééʼ “nahasdzáán bikááʼgóó tsʼídá bee daʼatʼínígi átʼáo Sodizin daʼatahígíí bichʼįʼ ayóó átʼéego ílį́į doo.” Joseph Smith binákééʼ náháneʼ díígi átʼáo diyingo ííshą́ą́ ádaalyaaígíí yaa halneʼ “díí akéedi dayoołkáałdi Sodizin bitłʼááhdóó bee hadilyaaígíí, dóó nihokááʼ dineʼé bá yáʼátʼééh dooígíí, nihiYisdáʼiiníiłii bidiyingo hazʼą́ bi tʼáá aaníinii bibee aanídítį́hí éí nihokááʼ dineʼé kʼad bee baa náhojoosdliʼ.”
1–5, Aa Ádahalyáanii éí diyingo ííshją́ą́ ádaalyaaígíí naaltsoos yee nideidooʼááłgo bee bikʼidahodiiniiʼ; 6–13, Iiʼ Sizį́į́jí ádaatʼéii yee ndaalnishígíí éí bichʼįʼ nidaʼdoolyéełgo yídeíyíghahgo dabidiʼnílʼį́; 14–18, Akééʼ Naazíinii nahasdzáán bikáaʼgi ádaʼoolʼįįłígíí tʼáá aheełtʼéego bee bichʼįʼ bá adahóótʼiʼ doo.
1Áko shooh, daʼíísínółtsʼą́ą́ʼ, O Ziondi kéédahoohtʼíinii, áádóó shisodizin biiʼ daʼnohtahígíí tʼáá ánółtso nízaadę́ę́ʼ naahkaiígíí, Diyin Bóhólníihii bizaad dadoohtsʼį́į́h éí shá naalʼaʼí Joseph Smith, Jun. bichʼįʼ kódeeshłííł, áádóó shá naalʼaʼí Martin Harris ałdóʼ, áádóó shá naalʼaʼí Oliver Cowdery ałdóʼ, áádóó shá naalʼaʼí John Whitmer ałdóʼ, áádóó shá naalʼaʼí Sidney Rigdon ałdó, áádóó shá naalʼaʼí William W. Phelp ałdóʼ, ádabidííniidígíí bikʼehgo.
2Háálá Shí ábidideeshniił; ákohgo daʼdoohtsʼį́į́h dóó daʼíísínółtsʼą́ą́ʼ, háálá Diyin Bóhólníihii kóbíłní—
3Shí, Diyin Bóhólníihii, bikʼidadiishniiʼ, diyingo bił ííshją́ą́ ádeeshłaaígíí dóó bee hazʼáanii baa dahisíláhígíí éí yaa ádahalyą́ą dooleełgo dabíísį́į́ʼ, áádóó ałdóʼ náásgóó baa dahideeshłéłígíí ałdóʼ;
4Áádóó díígi átʼáo ákáʼanáʼáwogo naʼanishígíí éí ánahwiitʼaah bijį́įdi dahdeiyíléeh doo nisin.
5Ákohgo, Shí éí bee bikʼidadiishniiʼ, áádóó díí éí Diyin God bisodizin biyiʼ bindaanish, deiyiyééłyeed doo dóó naʼádíkid bídadéétʼiʼígíí, aooʼ, dóó bee bíkáʼadoowołígíí.
6Ákohgo, saad łaʼ bee bichʼįʼ haazdziih, díí éí doo sodizin daʼatahígíí doo yichʼįʼ kódeidoolííł da, nihokááʼ dineʼé ałdóʼ;
7Ákótʼée ndi, díí deinízinígíí dóó chodeidoołʼįįłígíí tʼáá biláahgo baa dahasyáhígíí, éí shinaalyéhí bá hooghan biih dahidooʼnił;
8Áádóó bee bíkáʼadoowołígíí dílzingo Ziongi kéédahatʼínígíí baa dahidoolyééł, áádóó náás daʼíchííhígíí ałdóʼ, diyingo hazʼą́ bibee hazʼáanii bikʼehgo bee bikʼidahozhdoodliiłígíí baa dahidoolyééł.
9Áko shooh, tʼáá ałtsó nihokááʼ dineʼé Diyin Bóhólníihii naanish yee diníʼánígíí éí díí yíyóókeed, Shí, Diyin Bóhólníihii ndi, baa hidíʼánígíí éí doodago náasdi nááná łaʼ diné baa diníʼą́ągo.
10Áádóó áko shooh, Diyin God bisodizin daʼatahígíí díí bee hazʼáanii tʼáá ałtso bídadéétʼiʼ;
11Aooʼ, azhą́ bishop ndi, áádóó Diyin Bóhólníihii binaalyéhí bá hooghan yaa áhályánígíí ndi, áádóó atsʼíseekʼehgo naachʼidgo bee bikʼihodiiniiʼígíí ałdóʼ.
12Iiʼ Sizį́įjí ádaatʼéii ídeiłʼį́į doogo bee bikʼidahodiiʼniiʼígíí, bichʼįʼ niʼdoolyéłígíí yííghahgo ndoolnish, ákaʼadoojahgo ndoolnishígiʼ átʼáo bikʼihodiiniiʼígíí nahasdzáán bikáaʼgi ádaʼoolʼįįł ádeidoolííł;
13Aooʼ, tʼáá bíláahdi, éí tʼáá bíláahdiígíí ahą́ą́h ndínóólyééł Iiʼ Sizį́ Diyinii ánínígíí bikʼehgo.
14Ákótʼée ndi, nahasdzáán bikáaʼgi ádaʼoolʼįįłígíí bee tʼáá ahidanołtʼée doo, doo éí bichʼįʼ niʼ danohłį́į da doo, ákódanohtʼéego éí Iiʼ Sizį́ Diyinii doo łą́ą́góó nihił ííshją́ą́ aʼdoołííł da.
15Kʼad, tʼah kǫ́ǫ́ dahiináádą́ą́ʼ shá ndaalʼaʼí díí bikáʼadoolwołgo bee bichʼįʼ haasdziih, áko bitsʼiijįʼ shibee akʼihojídlí bił ííshją́ą́ ádeeshłííł, áádóó yéego idadiilkaalígíí dóó aa ádahalyánígíí éí bikʼidahojidoodliił;
16Chʼiyáán dóó ééʼ bá; baadahideestʼánígíí bee; áádóó hooghan dóó kéyahígíí bee, tʼáá ałtso ádahoonííłii biyi Shí, Diyin Bohólníihii, naanish hólǫ́ǫgo bá ádeeshłííł, áádóó tʼáá ałtsogóó Shí, Diyin Bohólníihii, adabideeshaał.
17Háálá ląʼída yikʼi bídahólníihgo baʼahódlíí ńtʼę́ę́ʼ, áádóó doo bąąhági átʼéii ádeiłʼį́į́góó yáʼátʼééhgo ádaʼiilaa.
18Áko shooh, Shí, Diyin Bóhólníihii, aajiinishbaʼ áádóó bikʼihojideeshdliił, áádóó díí tʼáá ałtso binahjįʼ ił hózhǫ́ yiih hidookah. Tʼáá ákótʼée doo. Amen.