Wóltaʼii 75
Diyin Yá Yáłtiʼí Joseph Smith díí diyingo bił ííshją́ą́ ályaa, Amherst, Ohiodi, Yas Niłtʼees 25, 1832 yihahgo. Díí diyingo ííshją́ą́ ályaaígíí naakigo ííshją́ą́ ályaaígíí ałhiihyiyíínil (áłtséhígíí 1 dóó ńléí 22jįʼ saad dashijaaʼígíí dóó 23 dóó ńléí 36jįʼ saad dashijaaʼígíí átʼé) tʼáá éí bijį́ ííshją́ą́ ályaa. Éí hoolzhishgi ntsaago áłah náʼádleehdi Joseph Smith High Priesthood Yilą́ąjįʼ Sizį́į doogo bá yádazhdiilniiʼ dóó yiilzį́į́ʼ. Łaʼ elders kʼad naanish baa dahideestʼánígíí yéego bídahwidiilʼááł danízin. Éí bikééʼdóó díí diyingo ííshją́ą́ ádaalyaa.
1–5, Elders baʼahódlíhígíí éí Jesus Christ nahatʼá bee yisdáʼiildéehii yindaʼniłtinígíí hoolʼáágóó iiná baa dahidoolyééł; 6–12, Aaʼáhályáanii nihił hólǫ́ǫ doogo biká sodadołzin, éí tʼáá ałtsóní yee nanihinitin; 13–22, Elders yee nidaʼnitin doo bił aadaanínígíí éí yá ndahwiidooʼááł; 23–36, Ndaʼnitiní yił háájéʼígíí Sodizin Dah Yikahdééʼ bíkáʼadoojah.
1 Tʼáá aaníí, tʼáá aaníigo, Shí ánhidishní, Shí shiIiʼ Sizį́ Diyinii bízhí bee yáshtiʼ, Alpha dóó Omega ndi, nihiDiyin Bóhólníihii dóó nihiDiyin God—
2 Daʼíísínółtsʼą́ą́ʼ, O shinahatʼá bee yisdáʼiildéehii bee ndaʼnohtingo bee ákáʼadeeshwoł dadoohniidígíí, dóó shidáʼákʼeh dadoołdahígíí.
3 Áko shooh, Shí nihichʼįʼ haasdziih shí íinisingo dahdidoohkah dóó tʼáadoo ndaʼáhodołziidí, tʼáadoo tʼóó nihił dahóyéʼí ákondi yéego ndaałnish—
4 Nihizhí dilníʼgiʼ átʼáo dediitsʼaʼgo ádadoohłííł, diyingo nihił ííshją́ą́ ádaashłaaígíí dóó bee hazʼáanii bee nihił hweeshneʼígíí bikʼehgo tʼáá aaníinii baa dahołneʼ doo.
5 Áádóó ákótʼáo, akʼeh dahonołʼį́įgo ląʼígo daneestʼáanii bidaʼastłʼǫ́ǫgo deiyínóheeh doo, dóó ayóó átʼáo naatʼá chʼah nihikʼidadíʼą́ą doo, dóó nihiʼ ayóó átʼéii, dóó doo anoonééłgóó, hoolʼáágóó dahinohnáa doo.
6 Éí bąą, tʼáá aaníigo, shá naalʼaʼí William E. McLellin ábidishní, haʼaʼaahjigo bił nahazʼą́ bichʼįʼ abííłʼaʼę́ę bitsʼą́ą́ nínádiishdlá;
7 Áádóó naanish ániidígíí dóó saad ániidígíí bee bichʼįʼ haasdziih, éí Shí, Diyin Bóhólníihii, bijéí biyiʼdóó doo yáʼátʼééhgóó yáłtiʼígíí biniinaa bichʼahoshishké;
8 Áádóó niʼiisííʼ; ákótʼée ndi, éí bee baanídíníʼą́ dóó ánáábidshní, Shádiʼááhjigo kédaayahgóó dínááh.
9 Áádóó bíniʼdii shá naalʼaʼí Luke Johnson ákǫ́ǫ́ yił dooʼash, dóó bee bichʼįʼ haasdzíʼę́ę yaa halneʼ doo—
10 Diyin Bóhólníihii bízhiʼ binahjįʼ Aaʼáhályáanii bíká sodółzin doo, éí tʼáá ałtsoní yinízinígíí yee neidínóotįįł—
11 Tʼáá áłahjįʼ sodilzin doo áko doo bąąh nidahwiikaad da doo biniyé; áádóó díí nihoníyą́ąjįʼ yikʼeh dahóółʼįįdgo, Shí éí bił honishłǫ́ǫ doo.
12 Áko shooh, díí éí Bóhólníihii nihiDiyin God nihá yinízin. Tʼáá ákótʼée doo. Amen.
13 Áádóó ałdóʼ, tʼáá aaníigo Diyin Bóhólníihii kónihiłní, bíniʼdii shá naalʼaʼí Orson Hyde dóó shá naalʼaʼí Samuel H. Smith haʼaʼaahjigo kédaayahgóó yichʼįʼ dahdidooʼash, dóó bee bichʼįʼ hadohdzih bidííniidyę́ę yee yił hodoolnih; áádóó tʼáá aaníigo tʼáá áłah aʼólíigo, nínółʼį́, díí nihoníyą́ąjįʼ Shí bił honishłǫ́ǫ doo.
14 Áádóó ałdóʼ, tʼáá aaníigo shá naalʼaʼí Lyman Johnson, áádóó shá naalʼaʼí Orson Pratt ábidishní, éí ałdóʼ haʼaʼaahjigo kédaayahgóó dahdidooʼash; áádóó áko shooh, dóó nółʼį́, éí ałdóʼ díí nihoníyą́ąjįʼ, Shí bił honishłǫ́ǫ doo.
15 Áádóó ałdóʼ, shá naalʼaʼí Asa Dodds, dóó shá naalʼaʼí Calves Wilson ábishní, éí ałdóʼ eʼeʼaahjigo kédaayahgóó dahdidooʼash, áádóó shinahatʼá bee yisdáʼiildéehii yee naʼnitin doo, shí ábidííniidígi átʼáo ndi.
16 Áádóó tʼáá háíshį́į́ akʼeh hółʼį́į́shį́į́ tʼáá ałtsoní yikʼeh didlíi doo, dóó nihóníyáadi yisdáʼdahidoohkah.
17 Áádóó ałdóʼ, shá naalʼaʼí Major N. Ashley, dóó shá naalʼaʼí Burr Riggs ábidishní, bíniʼdii bí ałdóʼ shádiʼáájigo kédaayahgóó dooʼash.
18 Aooʼ, bíniʼdii díí tʼáá ałtsogóó ahidookah, adabííłʼaʼgóó, dahoghangóó, dóó kin dah naazhjaaʼgóó, dóó kin haalʼá dóó kin daałánígóó.
19 Áádóó łaʼ hooghan biih dahisookaigóó, dóó hóshdę́ę́ʼ danihidííniidgóó, hooghan bikʼidahozhdoohdliił.
20 Áádóó łaʼ hooghan biih dahisookaigóó, dóó doo hóshdę́ę́ʼ danihidííniidgóó tsxį́į́łgo hooghandóó dahididoohkah, dóó nihikeeʼ bikʼijįʼ łeezh bąąh ndanołdééh kótʼáo tʼáá aaníigo bee bikʼijįʼ hadadoohdzih.
21 Áádóó nihí éí ił hózhǫ́ dóó baa hózhóonii nihiiʼ hadadeezbin doo; dóó díí bee nihił béédahózin doo, áko ndahwiitʼaah bijį́įdi éí hoghan hazʼą́ bá ndahodiyoohʼááł, dóó bikʼijįʼ hadadoohdzih;
22 Áádóó ánihwiitʼaah beiníłką́ądi dineʼé doo yá ádaashóoniijígóó hózhǫ́ bá yáʼátʼééh doo, éí hooghan éí ndagaʼ doo; éí bąą, nihiʼééʼ nihoozhnííʼ gónaaʼígíí beʼohtłʼóh dóó tʼáá akʼeh dahonołʼį́, dóó tʼáá áłtsoní bikʼeh dadohdlį́į doo, dóó nihóníyáadi yisdándahidoohkah. Tʼáá ákótʼée doo. Amen.
23 Áádóó ałdóʼ, Diyin Bóhólníihii kónihiłní, O elders shisodizinjí atah danohłínígíí, laanaa danohsingo áko nihídéétʼiʼ nihá yinízinígíí nihił béédahodoozįįł—
24 Áko shooh, Shí nihichʼįʼ haasdziih, áko sodizin binaanish hooghan ndahazʼą́ nídabiʼdiisdláʼígíí, dóó nahasdzáán bikááʼgóó adabiʼdiisʼaʼgóó Diyin binahatʼá bee yisdáʼiildéehii yee ndaʼnitinígíí bíkáʼadoowoł.
25 Ákohgo, Shí, Diyin Bóhólníihii, díí bee nihichʼįʼ haasdziih, áko bił haojééʼ nihighan bá hazʼą́ bá chódaołtʼeeh, nihikʼis sodizin daʼatahígíí bijéí nihichʼįʼ aa ádeiyiilaaígíí bikʼehgo.
26 Áádóó tʼáá átʼé bighan nahazʼą́ą́dóó bííghahdą́ą́ʼ ndahidoonéełgi hadeidínóótaał, áádóó sodizin daʼatahígíí bíkáʼadoohjah, áko adahwiisʼáágóó nidadínóotįįł doogáłígíí doo niʼ kódoonííł da, haʼaʼaahjigo éí doodago eʼeʼaahjigo, éí doodago náhookǫsjigo, éí doodago shádiʼááhjigo deeskaigo.
27 Bíniʼdii nídashídíłkid éí bił dahodoonih, dááʼdílkał ndeididoołtsʼį́į́ł áko bichʼįʼ ąąʼ ádoolnííł, áádóó yáʼąąshdééʼ bił hodoonih, Aaʼáhályáanii ndi bił hodoolnih, háajigo dookahígíí.
28 Áádóó ałdóʼ, Shí tʼáá aaníigo nihichʼįʼ haasdziih, tʼááłáʼí nízínígo diné tʼáá bí bighan hazʼą́ yá íídoołííłii, bíniʼdii yá éʼélééh, dóó diyin chʼah doo yóóʼiidoołniił da; dóó bíniʼdi sodizin góneʼ ndaalnish.
29 Áádóó bíneʼdii dinéʼ tʼááłáʼí nízinígo tʼáá áłtsóníjįʼ bidinilkaal. Áádóó doo nideeshnish da danízinígíí éí sodizin bá hooghan góneʼ doo bá hazʼą́ą da, tʼáá hazhóʼí ádaa nídáʼooskan dóó hashtʼeʼ ádaʼdiilyaago tʼéiyá.
30 Ákohgo, bíniʼdii shá naalʼaʼí Simeon Carter dóó shá naalʼáʼí Emer Harris díí naʼnitinígíí yee łaʼ dooleeł;
31 Áádóó ałdóʼ shá naalʼaʼí Ezra Thayre dóó shá naalʼaʼí Thomas B. Marsh;
32 Áádóó ałdóʼ shá naalʼaʼí Hyrum Smith dóó shá naalʼaʼí Reynolds Cahoon;
33 Áádóó ałdóʼ shá naalʼaʼí Daniel Stanton dóó shá naalʼaʼí Seymour Brunson;
34 Áádóó ałdóʼ shá naalʼaʼí Sylvester Smith dóó shá naalʼaʼí Gideon Carter;
35 Áádóó ałdóʼ shá naalʼaʼí Ruggles Eames dóó shá naalʼaʼí Stephen Burnett;
36 Áádóó ałdóʼ shá naalʼaʼí Micah B. Welton dóó shá naalʼaʼí Eden Smith ałdóʼ. Tʼáá ákótʼée doo. Amen.