Jekjōn 77
Revelesōn leļo̧k n̄an Josep Smith Rikanaan eo, ilo Hiram, Ohio, epaakeļo̧k M̧aaj 1832. Bwebwenato an Josep Smith ej kwaļo̧k, “Ekkejeltok ippān ukok eo an Jeje ko Rekwōjarjar, iaar bōk kōmmeļeļe in ijin ilaļ kōn Revelesōn eo an Rikwōjarjar Jon.”
1–4, Mennin mour ko ewōr aer jetōb im renaaj jokwe ilo lo̧udin̄din̄ indeeo; 5–7, Laļ in ewōr jon̄an toun an pād in 7,000 iiō ko; 8–10, Eoktak enjeļ ro rej kōjepļaaktok gospel eo im jipan̄ ioon laļ; 11, sil eo an 144,000; 12–14, Kraist enaaj bar itok ilo jinoin kajiljilimjuon to̧ujin iiō ko; 15, Ruo rikanaan renaaj jerkaktok n̄an laļ eo an riJu.
1 K. Ta lo̧jet in glass eo Jon eaar kōnono kake, jebta 4, im eoon eo kein kajiljino in Revelesōn?U. Ej laļ in, ilo jekjek eo an em̧ōj kokwōjarjare, ej jamin wabanban, im ejjeļo̧k jem̧ļo̧kin.
2 K. Ta eo kōmin meļeļe jān mennin mour ko emān, kōnono kaki ilo ejja eoon in wōt?U. Rej wāween ekkōnono, kar kōjerbali jān Rikkwaļo̧k revelesōn eo, Jon, ilo kōmmeļeļeiki lan̄, paredais eo an Anij, m̧ōņōņō an armej, im an mennin mour awiia ko, im an mennin tōbalbal ko, im an bao ko in mejatoto; men eo me ej kanniōk ej āinwōt men eo ej jetōb; jitōbōn armej ej āinwōt ānbwin eo an armej eo, ej āinwōt barāinwōt jitōbōn mennin mour, im mennin mour otemjej ko Anij eaar kōm̧anm̧ani.
3 K. Mennin mour awiia ko emān rej kajjojo bōk jikin juon wōt mennin mour ke, ak rej ke bōk jikin ļamļam ko ak ellaajrak ko?U. Rej emān mennin mour kajjojo wōt, ko me kar kwaļo̧ki n̄an Jon, n̄an bōk jikin aiboojoj eo an ļamļam ko an mennin mour ko ilo ellaajrak ak jekjek eo kar kōm̧anm̧an n̄an er, ilo lem̧ōņōņō kōn aer lo̧udin̄din̄ indeeo.
4 K. Ta eo kōmin meļeļe jān māj ko im pein bao ko, ko ewōr ippān mennin mour ko?U. Māj ko mājeer ej bōk jikin meram im jeļāļo̧kjeņ, meļeļein, er reobrak kōn jeļāļo̧kjeņ; im pein bao ko peier rej bōk jikin kajoor, n̄an kōm̧akūt, n̄an kōm̧m̧an, im men ko āierļo̧k wōt.
5 K. Ta eo kōmin meļeļe kōn emān im ron̄oul elder, ro kōnono kake jān Jon?U. Jen meļeļe bwe elder rein im Jon eaar lo er, rekar elder ro rekar tiljek ilo jerbal eo an jerbal in im rekar mej; ro rej an ra ko jiljilimjuon an eklejia ko, im rekar ālikin iien eo pād ilo paredais eo an Anij.
6 K. Ta eo kōmin meļeļe kōn bok eo Jon eaar loe, eo kar sili itulikin kōn jiljilimjuon sil ko?U. Jen meļeļe bwe ewōr ie ankilaan em̧ōj kar kwaļo̧ke, mennin ittino ko, im jerbal ko an Anij kar kwaļo̧ki; mennin ņojak ko kōn wāween An kōm̧akūtkūt laļ ilo iien eo jiljilimjuon to̧ujin iiō ko ilo an wōnm̧aanļo̧k ak ilo ļamļam in wabanban eo an.
7 K. Ta eo kōmin meļeļe kōn jiljilimjuon sil ko me ej sil kaki?U. Jen meļeļe bwe sil eo kein kajuon ewōr ie men ko an juon to̧ujin iiō ko m̧oktata, im barāinwōt to̧ujin iiō ko kein karuo, im āindein m̧aanļo̧k m̧ae eo kein kajiljilimjuon.
8 K. Ta kōmin meļeļe kake enjeļ ro emān, kōnono kaki er ilo jebta eo kein kajiljilimjuon im eoon eo kein kajuon ilo Revelesōn?U. Jen meļeļe bwe rein emān rej enjeļ ro jilkinļo̧k jān Anij, ro em̧ōj leļo̧k kajoor n̄an er ioon m̧ōttan ko emān in laļ, n̄an lo̧mo̧o̧ren mour im n̄an ko̧kkure; errein ro ewōr ippāer gospel eo ejjeļo̧k jem̧ļo̧kin n̄an leļo̧k n̄an aolep laļ, bwij, lo, im armej; ewōr ippāer kajoor n̄an kili lan̄ ko, n̄an sili n̄an mour ak n̄an jolaļļo̧k n̄an ijoko ilo kapin marok.
9 K. Ta kōmin meļeļe kōn enjeļ eo ej wanlaļtak jān rear, Revelesōn jebta jiljilimjuon im eoon eo kein karuo?U. Jen meļeļe bwe enjeļ eo ej wanlaļtak jān rear ej e eo me kar leļo̧k sil eo an Anij emour ioon bwij ko jon̄oulruo an Israel; kōn menin, ej kūr n̄an enjeļ ro emān ewōr ippāer gospel eo ejjeļo̧k jem̧ļo̧kin, im ba: Jab kōmetak laļ, im jab lo̧jet, im jab wōjke ko, m̧ae em̧oj ad kar sili ro karejeran Anij ilo dam̧aer. Im, eļan̄n̄e kom̧ naaj bōk e, en̄in ej Elias eo en kar itok n̄an aini ippān doon bwij ko an Israel im kōjepļaaktok aolep men ko otemjeļo̧k.
10 K. Iien ta eo men kein kōnono kaki ilo jebta in renaaj dedeļo̧k?U. Renaaj dedeļo̧k ilo to̧ujin iiō ko kein kajiljino, ak ilo peļļo̧k in sil eo kein kajiljino.
11 K. Ta eo kōmin meļeļe jān sili jibukwi im en̄oulemān to̧ujin, jān aolep bwij ko an Israel—jon̄oulruo to̧ujin jān kajjojo bwij?U. Jen meļeļe bwe ro rej sili er rej pris utiej ro, kar kapit er n̄an laajrak ekwōjarjar eo an Anij, n̄an kōm̧akūtkūt gospel eo ejjeļo̧k jem̧ļo̧kin; bwe er rej ro kar kapit jān aolep laļ, bwij, lo, im armej, jān enjeļ ro im n̄an er kar leļo̧k kajoor ioon aolep aelōn̄ ko ilo laļ, n̄an bōktok jon̄an wōt enaaj itok n̄an kabun̄ eo an M̧aanje eo.
12 K. Ta eo kōmin meļeļe jān jan̄ in jilel ko, kar ba kaki ilo jebta eo kein karuwalitōkin Revelesōn?U. Jen meļeļe bwe āinwōt Anij eaar kōm̧anm̧an laļ in ilo jiljino raan ko, im ilo raan eo kein kajiljilimjuon Eaar kadedeļo̧k jerbal eo An, im kar kokwōjarjar e, im barāinwōt kar ejaake armej jān būn̄aln̄al in laļ em̧ool āindein, ilo jinoin kajiljilimjuon to̧ujin iiō ko Irooj Anij enaaj kokwōjarjare laļ, im kadedeļo̧k lo̧mo̧o̧r eo an armej, im ekajet aolep men ko otemjeļo̧k, im naaj wiaik aolep otemjeļo̧k, ijello̧kun wōt men eo Ekar jab likūt ilo kajoor eo An, n̄e E naaj sili aolep men otemjeļo̧k, n̄an jem̧ļo̧k eo an aolep men otemjeļo̧k; im jan̄ in jilel ko an enjeļ ro jiljilimjuon rej kōpoojak im kadedeļo̧k im jerbal eo An, ilo jinoin kajiljilimjuon to̧ujin iiō ko—kōpoojak eo an iaļ eo m̧okta jān iien itok eo An.
13 K. N̄āāt eo men kein renaaj dedeļo̧k, ko rekar jeje ilo jebta eo kein karuwatimjuon in Revelesōn?U. Renaaj dedeļo̧k ālikin peļļo̧k eo an sil eo kein kajiljilimjuon, m̧okta jān itok eo an Kraist.
14 K. Ta eo kōmin meļeļe jān bok eo edik me Jon eaar kan̄e, āinwōt kar ba kake ilo jebta eo kein kajon̄oul in Revelesōn?U. Jen meļeļe bwe ekar juon mijen, im juon kain̄i, n̄an e n̄an ainitok bwij ko an Israel; lo en̄n ej Elias, eo, āinwōt e ekar jeje, eaikuj itok im kōjepļaaktok aolep men otemjeļo̧k.
15 K. Ta meļeļe eo kōn rikam̧ool ro ruo, ilo jebta eo kein kajon̄ouljuon in Revelesōn?U. Rej ruo rikanaan ro renaaj kar jerkaktok n̄an laļ eo an riJu ilo raan ko āliktata, ilo iien ōjepļaaktok eo, im n̄an kanaan n̄an riJu ro ālikin aer kar kuktok im kar kalōk jikin kwelo̧k in Jerusalem ilo āneo āneen ro jemāer.