Wóltaʼii 78
Diyin Yá Yáłtiʼí Joseph Smith díí diyingo bił ííshją́ą́ ályaa, Kirtland, Ohiodi, Wóózhchʼį́į́d 1, 1832 yihahgo. Ákweʼé yoołkááłgo, Diyin Yá Yáłtiʼí dóó łaʼ naatʼáanii danilínígíí Sodizin bá hooghan naanish bídadéétʼiʼígíí biniyé áłah silį́į́ʼ. Díí diyingo ííshją́ą́ ályaaígíí áłtsʼéedą́ą́ʼ éí Diyin Yá Yáłtiʼí, Sidney Rigdon, dóó Newel K. Whitney Missourigóó dohkah biʼdoonii dóó áadi Sodizin Bá Hooghan binaalyéhí báhooghan dóó naaltsoos álʼį́įgo bá hooghan ndootʼááł éí “naanish bikʼi ádééstʼįʼígíí” ályaa, éí Zion hadilnééhígíí béeso yá ííłʼį́į doo dóó baadahojoobáʼígíí bee bikáʼanáʼáwoʼ doo. Díí naanish bikʼiádééstʼiʼígíí, éí United Firm bee wóójiʼ, éí Tʼą́ą́chil 1832 yihahgo hadilyaa dóó éí 1834 yihahgo doo ahínéíkáhgóó ályaa (woltaʼii 82gi yídííłtah). Díí ałtsʼákaidóó, Joseph Smith hooʼááłgo kódííniid, “naalyéhí bá hooghan baa dahojoobaʼígíí bíkáʼaʼayeedgo naʼanish” éí kʼad díígiʼ átʼáo bee wójíi doo “naalyéhí bá hooghan dóó naaltsoos álʼį́įgo niitʼánígíí” éí diyingo ííshją́ą́ ályaaígíí biyiʼ baa hóóneʼ, áádóó saad “óʼoolʼįįł” éí saad “naanish bikʼi ádééstʼįʼígíí” bee wóójiʼ.
1–4, Akééʼ Naazíinii éí naalyéhí bá hooghan hashtʼedeidoolííł dóó nideidooʼááł; 5–12, Binaadeełii hódzą́ągo chodeiyoołʼį́įgo éí yisdáʼiildééhgóó abidooʼish; 13–14, Diyin God bisodizin bá hooghan éí doo nahasdzaan bikááʼgóó ádziilii nidabiloʼ da doo; 15–16, Michael (Adam) éí Diyin Ayóó Átʼéii (Christ) yiyaa naalnish; 17–22, Akʼeh dahołʼínígíí bikʼidahojídlíi doo, háálá tʼáá ałtsoní baa dahidoolyééł.
1Diyin Bóhólníihii éí Joseph Smith, Jun. yichʼįʼ haadzííʼ, kóníigo: Dashíínółtsʼą́ą́ʼ, ní Bóhólníihii nihiDiyin God, ałah soolį́hígíí, éí shisodizin bá hooghan biyiʼ hódahgo priesthood bee danihiʼdiilzį́į́ʼ;
2Áádóó yáʼąąshdééʼ biʼdiilzį́į́ʼgo nihichʼįʼ haadzíʼígíí deisínółtsʼą́ą́ʼ, éí saad bee hódzáanii nihijaayiʼjįʼ yee hadoodzih, áko bee nidashídóółkidígíí binahjįʼ yisdádoohkah, ní Bóhólníihii Diyin God.
3Háálá tʼáá aaníigo nihichʼįʼ hadeesdzihígíí, baa hoolzhiizh, dóó áyíídídę́ę́ʼ bichʼįʼ hoolzhish; dóó áko shooh, díí danołʼį́, shidineʼé binaanish ádeidoolíłígíí yíká hashtʼeʼádadoolnííł, éí naalyéhí bá hooghan shidineʼé baa dahajoobáʼígíí bá ndootʼááł dóó bikʼiʼádééstʼį́į́ doo, tʼáá áłah kweʼé hazʼą́ągi dóó kéyah Ziondi—
4Háálá éí tʼáá áłahjįʼ siláa doo dóó shisodizin bá hooghan hoolʼáágóó óʼoolʼįįł bee hadilyaa doo, áko biniyéí náásgóó yigááł doo, díí éí ádąąh ndasoolá, nihokáá dineʼé yee yisdádookahgo, áádóó nihiTaaʼ Diyin yáʼąąshdi hólóonii biʼayóó átʼéii bichʼįʼ;
5Áko yáʼąąshdi hólónígíí aheełtʼéego bee ahadaʼdinóhtʼą́ą doo, aooʼ, dóó niʼ bikáaʼgi dahólónígíí ałdóʼ bee, háálá éí yáʼąąshdi dahólónii bee nídadidoohłééł.
6Háálá nahasdzáán bikáaʼgi doo aheełtʼéego ádaʼołʼį́į́góó éí yáʼąąshdi aheełtʼéego doo nihaa dahidiyoolyééł da;
7Háálá celestial hazʼą́ągi nihá hodeeshʼaał danohsingo, éí ánihidííniidyę́ę dóó bee nihoníʼánée bee hashtʼeʼ ádadiʼdoołnííł.
8Áádóó áko, tʼáá aaníigo Diyin Bóhólníihii kónihiłní, nihí díí óʼoolʼįįł biniyé ahínáohkahígíí, tʼáá ałtso ádaołʼínígíí bee dahshídínóhsingo ádaʼołʼį́į dooleeł;
9Éí doodago, kótʼáo ałdishní, bíniʼdii shá naalʼaʼí Newel K. Whitney dóó shá naalʼaʼí Joseph Smith, Jun., áádóó shá naalʼaʼí Sidney Rigdon akééʼ naazíinii Ziondi yił ahíídookahgo nidahaʼáa doo;
10Doo ákótʼéego éí Chʼį́įdii tʼáá aaníinii ádaatʼéhígíí bijéí yee shitsʼą́ąjigo kwíídoolííłgo yíká átʼį́, áko yóó ahidookah dóó bá hashtʼeʼdaalyaayę́ę doo yikʼi daʼdidootį́į́ł da.
11Ákohgo, bee hazʼáanii Shí nihaa nishłé, ádééhaʼoodzííʼ éí doodago hoolʼáágóó Diyin bee ałhaʼdeetʼaah éí haadeitʼéego doo bikʼeh hodiilʼįįłígíí bichʼįʼ hashtʼeʼ ádadoołnééh.
12Áádóó tʼáá háíshį́į́ kʼíínítʼįʼígíí éí binaanish dóó bisodizin bá hooghan góneʼ bee bikʼihodiiniiʼígíí bitsʼą́ą́ʼ nídidiyoolyééł, áádóó Chʼį́įdii bitiʼhoonííh bichʼįʼ ndoodlóós ńléí bá nináʼályáajįʼ bijį́įjįʼgo índa.
13Áko shooh, díí bichʼįʼ bíká hashtʼenihiishłaa, dóó bitłʼááh bee haʼootłʼin, dóó díí éí bikʼehgo ádaʼdoołííłgo nihaanílá, éí binahjįʼ bee nihichʼįʼ haasdzíʼígíí ałtso bidahodoołííł;
14Áko shi bee nihikʼihojishdliʼígíí binahjįʼ, azhą́ tiʼhoonííh nihikʼi silį́į́ʼ ndi, tʼáá ałtso celestial hazʼą́ biyaa dahiináanii éí sodizin bá hooghan tʼááłáhígi átʼéego niłdzilgo sizį́į doo;
15Áko naatʼááh chʼah nihá hashtʼeilyaaígíí deidoołbįįł, dóó ląʼí diyingo ndahazʼą́ bikʼi dahoohʼááłgo ánihidiʼdoolnííł, ní Bóhólníihii Diyin God, Zion biʼAyóó Átʼéii, éí Adam-ondi-Ahman bitłʼááh siléí haidiilaa;
16Éí Michael nihinanitʼaʼí dooleełgo yikʼidiilniiʼ, dóó niłdzilgo sizį́įgo áyiilaa, dóó hódahgo akʼihooʼááłgo áyiilaa, áádóó Diyin Ayóó Átʼéii binaʼnitin dóó binahatʼá binahjįʼ bee yisdáʼiildéehii bibee aanídítį́hí yeiníjaaʼ, áádóó hojideezlį́įʼgi índa nááhoʼdiilyáhígíí nidi doo bééhózin da.
17Tʼáá aaníí, tʼáá aaníigo, Shí ánhidishní, nihí áłchíní yázhí danohłį́, dóó nihiTaaʼ yee nihikʼihozhdoodliiłígíí nihá dahyoojih dóó nihá hashtʼeyiilaago doo nihił béédahózin da;
18Áádóó kʼad tʼáá áłtsoní dah deinółéehgo doo bideinóhah da; ákótʼée ndi, nihił dahózhǫ́ǫ doo, háálá Shí éí náasee niheeshʼish doo. Diyingo hazʼą́ danihííʼ doo, dóó hoolʼáágóó atʼíinii nihee dahólǫ́ǫ doo.
19Áádóó tʼáá háíshį́į́ ahééh nízingo tʼáá ałtsoni bee yílyáhígíí éí ayóó átʼéego ábidiʼdoolnííł; áádóó éí nahasdzáán bikáá siléí bee hólǫ́ǫ dooleeł, neeznádiindi ałhą́ą́h nániilaa doogo ndi, aooʼ, áádóó tʼáá bilááhgóó.
20Ákohgo, ánihidííniidyę́ę ałtso ádadoołííł, ní nihá Nináʼnídláii, Ahman biYeʼ ndi, éí tʼahdoo náánihidiilééhdą́ą́ʼ tʼáá ałtsóní nihá hashtʼeiyiilaa;
21Háálá nihí éí Ałtsé Yizhchíinii bisodizinjí dahdeiyíkááhígíí danohłį́, áádóó kʼos biyiʼjįʼ Bóhólníihii bidááh diikah, áádóó nihokááʼ dineʼé tʼáá łaʼí nízínígo baa dahideestʼánígíí baa dahidoolyééł.
22Áádóó tʼáá haishį́į́ díí nihokááʼ bikááʼ baʼahódlí dóó hóyą́ągo akiʼdéezʼį́ʼígíí éí tʼáá ałtsóní baa dahideestʼánígíí daabí dooleeł. Amen.