Wóltaʼii 82
Diyin Yá Yáłtiʼí Joseph Smith díí diyingo bił ííshją́ą́ ályaa, Independence, Jackson County hahoodzohgi, Missouridi, Tʼą́ą́chil 26, 1832 yihahgo. Sodizin bá hooghanjí bihigh priest dóó elders danilínígíí ahił ndahaʼáago. Áłah ílį́įgo ndahaʼáadi, Joseph Smith éí High Priesthood biʼAlą́ąjįʼ Naatʼaanii dooleełgo bá yadazhdiilniiʼ, éí naanish tʼáá íídą́ą́ bee bikʼihodiiniiʼ ńtʼę́ę́ʼ Yas Niłtʼees 25, 1832 yihahę́ędą́ą́ʼ (wóltaʼii 75gi alą́ąjįʼ saad dashijaaʼígíí yídííłtah) éí high priest, elder, dóó sodizin bá hooghan atah danilínígíí ntsaago áłah álį́įdi bee bikʼihodiiniiʼ. Díí diyingo ííshją́ą́ ályaaígíí éí tʼáá bítséedi diyingo ił ííshją́ą́ alyaayę́ę biyiʼ haitʼáo ádoolnííłgo baa hóóneʼ (wóltaʼii 78gi) éí naanish bikʼi ádééstʼįʼígíí haididoolííł—éí United Firm bee wóójiʼ (Joseph Smith yee nahazʼánígíí binahjįʼ, díí saad “óʼoolʼįįł” haʼnínée éí “naanish bikʼi ádééstʼįʼígíí” bee wóójiʼ)—Sodizin Bá Hooghan binaalyéhí báhooghan dóó naaltsoos álʼį́įgo bá hooghan yikʼideezʼį́į́ʼ dooleeł biniyé.
1–4, Tʼáá háiida tʼóó ahayóí baa deetʼánígíí, éí tʼóó ahayóí bínéídookił; 5–7, Nahasdzáán bikáaʼgi doo yáʼátʼéehii atixsgo bóhólnííh doo; 8–13, Diyin Bóhólníihii Yee haadzíʼígíí bikʼeh honiilʼį́įgo éí yeʼdoolííłgo bąąh silá; 14–18, Zion éí hózhǫ́ nizhónígo dóó hodílzingo ádiʼdoolnííł; 19–24, Nihokááʼ dineʼé tʼááłáʼí nízínígo binaagóó kéédahatʼínígíi bá yáʼátʼéehígíí yíká ádaatʼį́į doo.
1 Tʼáá aaníí, tʼáá aaníigo, Shí ánihidishní, shá ndaałʼaʼí, ndaʼisiyoosíʼígií baa ádaa nídaʼsidiyoohtʼą́ągo, Shí, Diyin Bóhólníihii ałdóʼ ákótʼáo, nihaa nídaʼdideeshʼááł.
2 Ákótʼée ndi, nihitahgóó éí yéego ndaʼiisíhígíí dahólǫ́; aooʼ, nihí ndi tʼáá ánółtso nidaʼisiyoosííʼ; ákondi tʼáá aaníigo nihichʼįʼ haasdziih, kʼad kodóó ádaa ádahoołyą́, dóó tʼáadoo nidaʼiyoosíhí, doo ákódaahtʼį́į́góó éí ánahwiitʼaah yishchʼííʼgo nihikʼi siláa doo.
3 Háálá tʼáá háiida tʼóó ahayóí baa deetʼánígíí éí tʼóó ahayóí bínéídookił; áádóó tʼáá háíshį́į́ ayóó átʼáo adinídínígíí yikʼijįʼ asihgo éí aláahgo tiʼhooʼnííh bee bá nahodootʼááł.
4 Diyingo shił ííshją́ą́ ádoolnííł danohsingo shízhiʼ bee nídáshidoohkąął, áádóó éí nihił ííshją́ą́ ádeeshłííł; bee nihichʼįʼ haasdzíhígíí, éí doo bikʼeh dahonołʼį́įgóó, bee hazʼáanii doo yikʼeh hółʼíinii dadohłeeł; áko shibee hazʼáanii kʼídanohtiʼgo tʼáá ákogi átʼéii dóó ánahwiitʼaah nihikʼi siláa dooleeł.
5 Éí bąą, tʼááłáʼí sizínígo bee bichʼįʼ haasdzíhígíí éí tʼáá ałtso bee bichʼįʼ haasdzííʼ doo: Hadaʼoosííd, háálá chʼį́įdii biʼiinízįįdii yee akʼehdidlíinii tʼáá ałtsogóó ąą kódoonííł, áádóó doo yáʼátʼéehii atxisgo bóhólnííh dooleeł;
6 Áádóó Diyin God nahasdzáán yikááʼ kéédahatʼíinii yikʼijįʼ báhóóchįįd; áádóó doo ndi łaʼ yáʼátʼéehgo ááníił da, háálá tʼáá ałtso yóóʼadahaaskai.
7 Áádóó áko, tʼáá aaníigo Shí nihichʼįʼ haasdziih, Shí, Diyin Bóhólníihii, bąąhági átʼéii doo nihikʼijįʼ síłʼą́ą da doo; nílááh deiínohkááh dóó tʼáadoo bąąhági ánáádaahtʼíní; ákondi háída bąąhági átʼéii ánááyiidlaago éí áłtsé asihę́ę bikʼijįʼ nídoodleeł, ní Bóhólníihii nihiDiyin God.
8 Áádóó ałdóʼ, tʼáá aaníigo Shí nihichʼįʼ haasdziih, beehazʼáanii ániidígíí nihaa dinishʼaah, áko nihá nisinígíí bikʼedadiʼdoohtį́į́ł;
9 Éí doodago, kótʼáo ałdishní, haitʼáo shidááhdóó ádaʼoołʼį́į dooleełígíí biniyé ádoołíłígíí bee nihił hashneʼ, áko éí da yisdánihidooʼish.
10 Shí, Diyin Bóhólníihii, shizaad bikʼeh dahonołʼį́įgo éí Shí bee haasdzííʼyę́ę beʼdeeshłííł; ákondi shizaad doo bikʼeh dahonołʼį́įgo éí, bee ádééhaasdzíʼę́ę doo beʼdeeshłííł da.
11 Éí bąą, tʼáá aaníigo Shí nihichʼįʼ haasdziih, áko shá ndaalʼaʼí Edward Partridge dóó Newel K. Whitney, A. Sidney Gilbert dóó Sidney Rigdon, dóó shá naalʼaʼí Joseph Smith, dóó John Whitmer dóó Oliver Cowdery, dóó W. W. Phelps dóó Martin Harris díí nihá yáʼátʼééh doo bee ahaʼdeetʼaah dóó bee hazʼáanii bee łaʼ danohłį́įgo nisoozį́į doo éí niʼiilzííhii doo bee kʼídadoohtih da, ákódaahdzaago éí tʼáá hooshchʼįʼ nihá nahodootʼááł, ałʼąą átʼéego naanish bee nihikʼidahodiiniiʼígíí bee—
12 Baa dahajoobáʼígíí tʼáá ałtso bídadéétʼiʼígíí, dóó tʼáá áłah kéyah Ziongi dóó kéyah Kirtlandgi bishopric tʼáá átʼé bídadéitʼiʼígíí yikʼidadéezʼį́į́ʼ doo;
13 Háálá niizį́ʼígi baa hoolzhiizhgo kéyah Kirtland dóó Zion bistake sésį́į́ʼ, éí Áláahdi Ayóó Átʼéii yikééʼ naazʼíinii bíkáʼadoolwoł biniyé.
14 Háálá Zion éí hózhǫ́ nizhónígo, dóó hodílzingo ádiʼdoolnííł; biníbaal siʼą́ągi hótsaago ádoolnííł; bistake bidziil dadooleeł; aooʼ, tʼáá aaníigo Shí nihichʼįʼ haasdziih, Zion yidoozįįł dóó biʼééʼ nizhónígíí yee hadidoonííł.
15 Éí bąą, díí beehazʼáanii nihaa dinishʼaah, díí ahadeetʼaah bee ádééhadadoohdzih, áádóó Diyin Bóhólníihii bibee hazʼáanii bikʼehgo ádaʼdoolnííł.
16 Áko shooh, díí ałdóʼ hódzáanii shitsʼą́ą́dóóígíí átʼé éí nihá yáʼátʼééh.
17 Áádóó tʼáá aheełtʼéego ádaʼołʼį́į́góó, éí doodago kótʼáo ałdishní, naadeełii tʼáá aheełtʼéego nihaa dahidoolyééł, háálá díí bee nihikʼidahodiiniiʼígíí naʼádíkid bídadéétʼiʼígíí éí bee bikʼidadinoohʼį́į́ʼ doo, nihokááʼ dineʼé tʼááłáʼí nízínígo yídin nilínígíí dóó bee bichʼįʼ anáhóótʼiʼígíí bikʼehgo, tʼáá ákogi ádaatʼéii yinízingo tʼéiyá—
18 Áádóó díí éí tʼáá átʼé Diyin God hiináanii bisodizin daʼatahígíí bíkáʼadoowoł biniyé kótʼée doo, áko nihokááʼ dineʼé tʼááłáʼí nízínígo yee danílínígíí łaʼ baa náádadidootʼááł, aooʼ, neeznádiindi ałhą́ą́h nániilaa doogo ndi, éí Diyin Bóhólníihii binaalyéhí bá hooghan biih hidooʼnił, éí tʼáá átʼéé ńtʼę́ę́ʼ sodizin daʼatahígíí binaadeełii daabí dooleeł—
19 Nihokááʼ dineʼé tʼááłáʼí nízínígo binaagóó kéédahatʼínígíi bá yáʼádaatʼéhígíí yíká ádaatʼį́į doo, áádóó Diyin God biʼayóó átʼéíi tʼéiyá deinélʼį́įgo tʼáá ałtsóní ádeiłʼį́į doo.
20 Díí naanish bikʼiʼádééstʼį́į́ʼ bee nihoníʼánígíí éí hoolʼáágóó bee nihikʼidiishniiʼ doo, áádóó nihikééʼdóó dah náádinoobįįłígíí ałdóʼ, éí doo nidaʼayoosííhgo tʼéiyá.
21 Áádóó tʼáá háíshį́į́ díí bee ahadeetʼánígíí yikʼijįʼ niʼiisííʼgo, dóó bijéí yikʼijį yistłʼisgo, éí shisodizin báhooghan bibee hazʼáanii bikʼehgo bá nahodootʼááł, áádóó bá nináʼályá bijį́įjįʼ Chʼį́įdii bitiʼhoonííh baa doodlóós.
22 Áádóó áko, tʼáá aaníigo Shí nihichʼįʼ haasdziih, díí éí hódzáanii átʼé, doo yáʼátʼéehii bee daʼatʼį́ bee nihikʼis ádá ádaałeʼ, áko doo ndanihidoołtsxił da.
23 Bee aa nídéeshtʼįįłii éí tʼáá shí shaa dadidoohʼááł, háálá éí bee shóhólnííh dóó tʼáá shí bikʼeh nináʼdeeshdlééł. Nihichʼįʼ hózhǫ́ náhásdlį́į́ʼ doo; bee nihikʼihosisdliʼígíí tʼáá nihił hólǫ́ǫ doo.
24 Háálá yá ąąsh hazʼą́, yéego bikééʼ nisoozį́įgoo tʼéiyá, hoolʼáágóó nihí dooleeł. Tʼáá ákótʼée doo. Amen.