1 Sa kaya vakaidina vakaoqo na Turaga vei kemudou sa soqoni vata mai mo dou rogoca na nona lewa me baleti kemudou:

2 Raica, sa ka talei vua na nomudou Turaga na ka oqo, ka ra sa reki kina na agilosi ena vukumudou; io sa rogo yani na soli ka ni loloma ni nomudou masu ki na daligadra na Turaga ni Saboca, ka sa volai ena ivola ni yacadra ko ira sa vakatabui, io ko ira ena vuravura vakasilesitieli.

3 Ia, au na tala yani vei kemudou e dua tale na Dauveivakacegui, io vei kemudou na wekaqu, me tiko e lomamudou, io na Yalo Tabu ni yalayala; ia oqo na Dauveivakacegui tale ka dua ka’u a yalataka vei iratou na noqu tisaipeli, me vaka sa vakadinadinataka ko Joni.

4 Raica na Dauveivakacegui oqo sai koya na yalayala ni bula tawamudu au sa solia vei kemudou, io na lagilagi ena matanitu silesitieli;

5 Na lagilagi oqori sai koya na nona lotu na Ulumatua, io na lotu ni Kalou, o koya sa savasava duadua mai na ka kecega, ena vukui Jisu Karisito na Luvena—

6 Raica sai koya sa lako cake, sai koya tale ga sa lako sobu mai ki ra sara, a sa kila na ka kecega ko koya ka sa curuma na ka kecega; io na rarama ni dina;

7 Io na dina sa serau. Sai koya oqo na rarama i Karisito. Me vaka ni sa tiko ena matanisiga, kei na rarama ni matanisiga, kei na kena kaukauwa sa buli mai kina.

8 Me vaka talega ni sa tiko ena vula, ka sa rarama ni vula, kei na kena kaukauwa sa buli mai kina;

9 Me vaka talega kina na rarama ni kalokalo, kei na kena kaukauwa sa buli mai kina;

10 Kei na vuravura talega, kei na kena kaukauwa, io na vuravura sara ga ko tucake tu kina.

11 Kei na rarama sa cila, ka sa vakararamataki iko, sa mai vua sa vakararamataka na matamu, sai koya na rarama vata ga sa vakabulabulataka na nomu kila ka;

12 Sai koya na rarama sa cila mai na iserau ni Kalou me vakasinaita na maliwa lala—

13 Ia na rarama oqo sa tiko ena ka kecega; sa solia na bula ki na ka kecega, sai koya na lawa sa cicivaki kina na ka kecega; io na kaukauwa ni Kalou o koya sa tiko ena nona itikotiko vakaturaga, o koya sa tiko ena lomasere ni gauna tawamudu, ka sa tiko ena ka kecega.

14 Oqo, au sa kaya vakaidina vei kemudou, ena vuku ni veivueti sa vakayacori vei kemudou, sa yaco kina na tucake tale mai na mate.

15 Ia na yalo kei na yago sa yaco me tamata vakayalo.

16 Kei na tucake tale mai na mate sai koya na vueti ni yalo.

17 Ia na vueti ni yalo sa rawa ena vukui koya sa vakabulabulataka na ka kecega; e lomaserena sa yalataki kina ni ra na taukena na vanua ko ira sa dravudravua kei ira sa yalomalua.

18 O koya, sa dodonu kina me vakatabui mai na veika kecega e sega ni dodonu, me vakarautaki kina ki na lagilagi vakasilesitieli;

19 Ia ni sa vakayacori oti na inaki a buli kina, ena qai vakaisalataki vakatui ena lagilagi, io ena iserau ni Kalou na Tamada;

20 Ia era na taukena me sega ni mudu ka sega ni mudu na yago ena matanitu silesitieli; ni sai koya oqori na inaki a caka ka tauyavu kina, kei na inaki oqori sa vakatabui kina.

21 Ia ko ira sa sega ni vakatabui ena lawa au sa solia vei kemudou, io na lawa i Karisito, sa dodonu me ra vakaivotavota ena dua tale na matanitu, io na matanitu teresitieli, se na matanitu tilesitieli.

22 Raica ko koya sa sega ni rawa ni muria na lawa ni matanitu silesitieli, ena sega ni tiko rawa ena lagilagi vakasilesitieli.

23 Kei koya sa sega ni rawa ni muria na lawa ni matanitu teresitieli, ena sega ni tiko rawa ena lagilagi vakateresitieli.

24 Kei koya sa sega ni rawa ni muria na lawa ni matanitu tilesitieli, e na sega ni tiko rawa ena lagilagi vakatilesitieli; o koya sa sega ni ganiti koya kina e dua na matanitu vakalagilagi. Ia me sa na tiko kina ena dua na matanitu ka sega ni matanitu vakalagilagi.

25 Kei na dua tale, au sa kaya vakaidina vei kemudou, sa muria tiko ko vuravura na lawa ni matanitu silesitieli, raica sa vakayacora na inaki a buli kina, ka sa sega ni talaidredre ki na lawa—

26 O koya, ena vakatabui kina; io, e dina ni na qai mate, ena vakabulabulataki tale, io ena vosota na kaukauwa sa vakabulabulataki kina, ka ra na taukena na yalosavasava.

27 E dina ga era na mate, ia era na tucake tale, ena yago vakayalo.

28 Ko ira na yalo vakasilesitieli era na rawata na yago vata ga era a taukena eke; io dou na rawata na yagomudou, ia na nomudou lagilagi sa lagilagi ni yago dou sa vakabulabulataki kina.

29 Koi kemudou sa vakabulabulataki ena dua na ivakatagedegede ni lagilagi vakasilesitieli, dou na qai rawata na kena vata ga oqori, io sa rawa ni ra rawata taucoko sara.

30 Ia ko ira tale ga sa vakabulabulataki ena dua na ivakatagedegede ni lagilagi vakateresitieli, era na rawata vakaidina na kena isau, io sa rawa ni ra rawata taucoko sara.

31 Kei ira talega sa vakabulabulataki ena dua na ivakatagedegede ni lagilagi vakatilesitieli, era na rawata vakaidina na kena isau, io sa rawa ni ra rawata taucoko sara.

32 Kei ira talega na kena vo era na vakabulabulataki; ia, era na dui lesu tale ki na nodra tikina, me ra marautaka na veika era vinakata me ra rawata, baleta ni ra a sega ni vinakata me ra marautaka na kena a dodonu me ra rawata.

33 A cava na kena yaga vua na tamata kevaka sa soli tu na isolisoli me nona, ka qai sega ni taura? Raica, sa sega ni marautaka na isolisoli sa soli vua, io sa sega tale ga ni marautaki koya sa solia.

34 Kei na dua tale, au sa kaya vakaidina vei kemudou, na veika sa cicivaki ena lawa ena maroroi talega ena lawa, ka na vakataucokotaki ka vakatabui talega kina.

35 Ia ko koya sa beca e dua na lawa, ka sega ni muria na lawa, ia sa segata me muria ga na lomana, ka sa lomana me ia tiko ga na ivalavala ca, ka sa bula tiko ga ena ivalavala ca, ena sega ni vakatabui ena lawa, io ena sega tale ga ena loloma cecere, na lewa dodonu, se na lewa. O koya, era na dukadukali tiko ga kina.

36 Raica sa tu na lawa ni veimatanitu kecega;

37 Ia sa levu tu na matanitu; ni sa tu ena maliwa lala kecega eso na matanitu, ka sa tu ena veimatanitu kecega eso na maliwa lala, io na matanitu lelevu se na matanitu lalai.

38 Ia na matanitu kecega sa tu na kena lawa; ia na lawa kece sa tu na kena ivakarau kei na ka sa vauci kina.

39 Ia ko ira kecega sa sega ni muria na kena ivakarau, era sa sega ni vakadonui.

40 Ni veika vuku e rau na sala vata ga kei na veika vuku; na yalomatua ena ciqoma na yalomatua; na dina sa rekitaka ga na dina; na ivalavala savasava ena taleitaka ga na ivalavala savasava; na rarama sa sala vata ga kei na rarama; na loloma cecere sa tokona ga na loloma cecere, ka kaya ni sa nona ko ira na nona; raica ena vakayacori ga na lewa dodonu ka kaya ni sa nona ko ira na nona; ia na lewa sa liu e matai koya sa tiko ena itikotiko vakaturaga ka sa liutaka tiko ka vakayacora na ka kecega.

41 Raica sai koya sa kila na ka kecega; sa tu e matana na ka kecega, ka vakavolivoliti koya na ka kecega; io sa ubia na ka kecega, ka sa tiko ena ka kecega, ka lako sivita na ka kecega; sa vakavolivolita na ka kecega; raica sa vu mai vua ka baleti koya na ka kecega, io na Kalou sa sega ni mudu ka sega ni mudu!

42 Kei na dua tale, au sa kaya vakaidina vei kemudou; sa virikotora ko koya na lawa ena ka kecega; era sa veitosoyaki kina ena kedra gauna kei na kedra yabaki;

43 Ka sa tudei tu na nodra dui sala, io na sala mai lomalagi kei vuravura, io na vuravura oqo kei na vuravura tale eso.

44 Ka ra sa dui veivakararamataki ena nodra dui gauna kei na nodra dui draki, ena nodra dui miniti, ena nodra dui auwa, ena nodra dui siga, ena nodra dui macawa, ena nodra dui vula, ena nodra dui yabaki—na veigauna kece oqori sa dua ga na yabaki vua na Kalou, ia e sega ni vakakina vua na tamata.

45 Sa sowiri ko vuravura ena nona itosotoso, ka sa solia na nona rarama na matanisiga ena siga, ka solia na nona rarama na vula ena bogi, sa solia vaka talega kina na nona rarama na kalokalo, ni ra sa sowiri voli ena lagilagi, ena loma ni nona kaukauwa na Kalou.

46 Meu na vakatauvatana beka kei na cava na veimatanitu oqo mo dou kila kina?

47 Raica, ko ira kecega era sa dui matanitu, ia na tamata sa raica e dua vei ira se dua sa lailai sara, sa raica tiko na lagilagi kei na kaukauwa ni Kalou.

48 Au sa kaya vei kemudou, dou sa raici koya vakaidina; e dina, ni a lako mai ko koya vei ira na nona ka qai sega ni kilai.

49 A sa cilava na butobuto na rarama, ia na butobuto sa sega ni kunea; ia ena yaco na siga dou na kila kina na Kalou, ni dou sa vakabulabulataki ki vua mai vua.

50 Dou na qai kila ni dou sa raici au, ka kila ni sai Au, ka ni sai Au na rarama dina sa tu vei kemudou, ka dou sa tu vei au; ia kevaka e sega dou sa ka wale ga.

51 Raica, au na vakatautauvatana na veimatanitu oqo kei na dua na tamata sa tu e dua na nona were, a sa talai ira yani na nona tamata me ra la’ki cukita.

52 A sa kaya vua na imatai: Mo lako ko iko ka cakacaka ena were, ia ena imatai ni auwa, au na qai lako yani vei iko, ia ko na raica na marau e mataqu.

53 A sa kaya vua na kena ikarua: Mo lako tale ga ko iko ki na were, ia ena ikarua ni auwa, au na qai lako yani vei iko ena marau e mataqu.

54 Ka sa vaka tale ga kina vua na ikatolu, sa kaya kina: Au na qai lako yani vei iko;

55 Kei na ikava, ka vaka tiko kina me yacova na ikatinikarua.

56 Ia sa qai lako yani na itaukei ni were vua na imatai ena imatai ni auwa, a sa tiko vata kei koya ena loma ni auwa oqori, raica sa marau ko koya ni sa raica na mata ni nona turaga.

57 Oti sa qai toki mai vua na imatai me lako talega vua na kena ikarua, kei na kena ikatolu, kei na kena ikava, ka vaka tiko kina me yacova na ikatinikarua.

58 Ka sa vakaoqori na nodra ciqoma kece na rarama ni matai koya na nodra turaga, na tamata yadua ena nona auwa, kei na nona gauna lokuci, kei na nona gauna donu—

59 A sa tekivu vua na imatai, ka vaka tiko kina me yacova na iotioti, ka vakakina mai vua na iotioti ki vua na imatai, kei na imatai vua na iotioti;

60 Io na tamata yadua ena nodra veitarataravi, me yacova ni sa oti na nodra dui auwa, io me vaka sa vakarota na nona turaga, io me vakalagilagi na nona turaga ena vukuna kei koya ena vuku ni nona turaga, io me ra vakalagilagi kecega.

61 Ia, au na vakatautauvatataka ki na vosa vakatautauvata oqo na veimatanitu oqo, kei ira na lewena—na matanitu yadua ena kena auwa, kei na kena gauna lokuci, kei na kena draki donu, io me vaka na lawa sa virikotora tu na Kalou.

62 Kei na dua tale, au sa kaya vakaidina vei kemudou, na wekaqu, au sa tukuna na veika oqo mo dou vakananuma e lomamudou, vata kei na ivakaro au sa solia vei kemudou, mo dou masuti au niu sa tu voleka vei kemudou—

63 Dou toro voleka mai vei au ka’u na qai toro voleka yani vei kemudou; dou vakasaqarai au vagumatua dou na qai kunei au; dou kerekere ka na soli vei kemudou; dou tukituki ka na dolavi vei kemudou.

64 Ia na ka kecega dou sa kerea vei Tamaqu ena yacaqu ena soli vei kemudou, io na veika me ganiti kemudou;

65 Ia kevaka dou sa kerea na ka sa sega ni ganiti kemudou, ena vuki me vakacacani kemudou.

66 Raica, na ka dou sa rogoca sa vaka na domona e dua sa kacikaci ena loma ni lekutu—ena loma ni lekutu, baleta ni sega ni rawa ni dou raici koya—na domoqu, baleta ni domoqu e Yalo; na Yaloqu sai koya na ka dina; na dina e tudei ka sega na kena icavacava; ia kevaka sa tu vei kemudou, dou na bula sautu sara.

67 Ia kevaka sa vakatabakidua na matamudou ki na noqu lagilagi, ena vakasinaiti ena rarama na yagomudou taucoko, ka na sega na tikimudou e butobuto; ia na yago sa vakasinaiti tu oqori ena rarama ena kila na ka kecega.

68 O koya, mo dou vakatabui kemudou me vagolei kina vakatabakidua vua na Kalou na nomudou vakanananu, ka me yaco mai kina na veisiga mo na raici koya; ni na cereka na ilati ni matana vei iko, ia ena yaco ena nona gauna ga, ena sala sa kilikili vua, ka me vaka na nona lewa.

69 Dou nanuma na iotioti ni noqu yalayala cecere vei kemudou; dou biuta tani vakayawa sara mai vei kemudou na vakanananu sega na betena kei na dredredre vakasivia.

70 Dou tiko mada, dou tiko mada eke ka kaciva kina e dua na soqoni tabu, io me ra soqoni mai kina ko ira era a tauyavutaka na cakacaka ni matanitu oqo.

71 Me ra masuta na Turaga o ira era a veivakasalataki kina ena nodra veilakoyaki voli, me ra vakasamataka e yalodra na ivakasala sa soli vei ira, me tei dua mada na gauna.

72 Raica ka rogoca, au na taqomaka na nomudou qele ni sipi, io au na kacivi ira na italatala qase ka tala yani vei ira.

73 Raica, au na kitaka kusarawa na noqu cakacaka ena kena gauna.

74 Kau na tukuna vei kemudou, dou a tauyavutaka na cakacaka ena iotioti ni matanitu oqo, e dua na ivakaro mo dou vakasoqoni kemudou vata, dou cokonaki kemudou, ka vakarautaki kemudou, ka vakatabui kemudou; io, dou vakasavasavataka sara na lomamudou, ka savata na ligamudou kei na yavamudou e mataqu, meu vakasavasavataki kemudou kina;

75 Me rawa niu vakadinadinataki kemudou kina vua na Tamamudou, na nomudou Kalou, ka noqu Kalou, ni dou sa savasava mai na nodra dra na itabatamata caka ca oqo; io me’u vakayacora kina na iotioti ni noqu yalayala cecere vei kemudou ena gauna ka’u sa lewa.

76 Au sa vakaroti kemudou tale ga mo dou ia tiko ga na masumasu kei na lolo mai na gauna oqo ka lako yani.

77 Kau sa solia talega vei kemudou e dua na ivakaro mo dou veivakavulici vakai kemudou ena ivakavuvuli ni matanitu.

78 Ia mo dou gumatua sara ena veivakavulici ena qai tiko vata kei kemudou na noqu loloma soli wale, mo dou dusimaki vakavinaka cake kina ena vuli, ena ivakavuvuli, ena ivunau, ena lawa ni kosipeli, kei na veika kece e baleta na matanitu ni Kalou, e dodonu mo dou kila;

79 Na veika ruarua mai lomalagi kei vuravura, kei na rukui vuravura; na veika sa oti yani, na veika ni gauna oqo, kei na veika ena qai yaco mai ena dua na gauna lekaleka; na veika ena noda vanua, na veika mai vanua tani; na nodra veivaluvaluti ka kidroa na veimatanitu, kei na lewa sa tau tu me baleta na vanua oqo; kei na kila ka talega me baleta na veivanua kei na veimatanitu—

80 Me rawa ni dou sa vakarau tu ena veika kecega, ena gauna au na talai kemudou yani kina mo dou vakalevulevuya na ilesilesi au sa lesi kemudou kina, kei na ilesilesi au sa lesia vei kemudou.

81 Raica, au sa talai kemudou yani mo dou wasea na nomudou ivakadinadina ka vunauci ira na tamata, ka sa yaco kina me nona itavi na tamata yadua sa vunauci me vunauca na wekana.

82 O koya, sa na sega kina na nodra iulubale, ia ena saumi e uludra na nodra ivalavala ca.

83 Raica ko koya sa vakasaqarai au kusarawa, ena kunei au vakaidina, io au na sega ni biuti koya.

84 O koya, mo dou tiko mada ka cakacaka vagumatua, me rawa kina ni dou na vakataucokotaki ena nomudou itavi mo dou lako yani vei ira na Matanitu Tani ena iotioti ni gauna, vei ira kecega ena cavuta mai na yacadra na Turaga, me ra vauca vata na lawa ka dregata na ivakadinadina, ka vakarautaki ira na yalododonu ki na auwa ni veilewai ena qai yaco mai;

85 Me kakua kina ni yaco ki yalodra na cudru ni Kalou, na veivakarusai ni veika vakasisila sa waraki ira tu na tamata dau caka ca, ena vuravura oqo kei na vuravura sa bera mai. Au sa kaya vakaidina vei kemudou, me ra ia tiko ga na cakacaka ena were ni vaini ko ira na italatala qase taumada, me yacova ni sa kacivi ira na gusu ni Turaga, ni sa bera ni yaco mai na nodra gauna; e sa bera ni savasava na nodra isulu mai na nodra dra na itabatamata oqo.

86 Ia mo dou tudei sara ena veisereki dou sa galala rawa mai kina; dou kakua tale ni tacori ena ivalavala ca, ia mo dou vakasavasavataka tiko na ligamudou me yacova ni sa lako mai na Turaga.

87 Raica ena sega mada ni oti e vica na siga sa na sakure ka tataivatia ko vuravura vaka ka vaka me vaka na tamata mateni; ka na vunia na matana na matanisiga, ena sega ni via solia mai na rarama; ena damudamu me vaka na dra na vula; era na rarawa vakalevu na kalokalo, ka ra na viritaki ira sobu mai me vaka na vua ni lolo sa lutu mai na vuna.

88 Raica ni sa oti na nomudou ivakadinadina sa na qai yaco mai vei ira na tamata na cudruvi kei na veivakararawataki.

89 Io ni sa oti na nomudou ivakadinadina sa na qai yaco mai na ivakadinadina ni tavuki ni vanua ka na vakavuna na vutugu e vuravura, era na bale sobu na tamata ki na qele ka sega ni tucake rawa.

90 Ia ena qai yaco talega mai na ivakadinadina ni domo ni kurukuru, kei na domo ni tibi ni liva, kei na domo ni cava, kei na domo ni ua ni waitui ni sa ulabaleta na kena iyalayala.

91 Raica ena yavavala na ka kecega; ia sa dina sara, ni ra na kani yatedra na tamata; ka rere na tamata kecega.

92 A ra na vuka na agilosi ena maliwa kei lomalagi, ka kaci ena domo levu, era na uvuca na davui ni Kalou, ka kaya: Dou vakarau, dou vakarau, Oi kemudou na lewei vuravura; ni sa yaco mai na lewa ni Kalou. Raica ka rogoca, sa lako mai na Tagane sa qai Vakawati; dou lako yani ka veitata kaya.

93 Ia ena qai rairai vakasauri mai lomalagi e dua na ivakatakilakila cecere, ka ra na raica vata na tamata kecega.

94 Ena uvuca na nona davui e dua tale na agilosi, ka kaya: Raica na lotu cecere koya, na tinadra na veika vakasisila, io ko koya sa vakamatenitaki ira na veivanua kecega ena waini ni cudru ni nona veidauci, sa vakararawataki ira na yalododonu ni Kalou, sa vakadavea na nodra dra—sai koya sa tiko ena vuqa na veivanua e vuravura, kei na veiyanuyanu ni wasawasa—raica, sai koya na sila ca ni vuravura; io sa vauci vata ena ivau eso; sa vakadreti matua sara na kena ivau ka sega na tamata e sereka rawa; o koya sa vakarau tu kina me vakamai. Ia ena uvuca vakabalavu ka vakadomoilevu na nona davui ko koya na agilosi, me ra rogoca na veimatanitu kecega.

95 Raica ena qai vakanomodi ko lomalagi me veimama ni auwa; ia ni sa oti ko ya ena qai cereki na ilati kei lomalagi, me vaka sa sereki na ivola balavu sa vivigi tu; io ena qai cereki na iubi ni matana na Turaga;

96 Ia ko ira na yalosavasava ka ra sa bula tu e vuravura ena gauna ko ya, era na vakabulabulataki ka kau cake me veitata kaya.

97 Ia ko ira sa moce no ena nodra ibulubulu era na tucake mai ni sa tadola na kedra ibulubulu; io era na kau cake tale ga me ra veitata kaya ena maliwa ni duru kei lomalagi—

98 Sai ira oqo na nei Karisito, ka ra sa kena ivua taumada, ko ira era na lako sobu mai kei koya e liu, kei ira era sa tu e vuravura ena nodra ibulubulu, kei ira sa kau cake me ra veitata kaya, sa yaco na ka kece oqo mai na domo ni davui ka uvuca tiko na agilosi ni Kalou.

99 Ia ni sa oti oqo ena qai uvuca na ikarua ni davui e dua tale na agilosi; sa na qai yaco na nodra vueti o ira era sa nei Karisito ni sa lako mai ko koya; ko ira era a tiko ena vale ni veivesu ko ya ka sa vakarautaki tu me baleti ira, me ra ciqoma kina na kosipeli, ka lewai me vakataki ira na tamata ena bula vakayago.

100 Kei na dua tale, ena uvu tale e dua na davui, na ikatolu ni davui; era na qai lako mai na yalo ni tamata me ra lewai, io ko ira sa dodonu me ra cudruvi;

101 Ia sai ira oqo na vo ni mate; ka ra na sega ni vakabulai tale me yacova ni sa oti e dua na udolu na yabaki, ka segai tale ga me yacova na ivakataotioti kei vuravura.

102 Ka na qai uvuci tale e dua na davui, sai koya na ikava ni davui, ka vaka: Sai ira ga era na vo tiko me yacova na iotioti ni siga sa levu koya mai muri, io na ivakataotioti, sai ira era na dukadukali tiko ga.

103 Ia ena qai uvuci tale e dua na davui, sai koya na ikalima ni davui, oqori na ikalima ni agilosi ka solia na kosipeli tawavakaiyalayala—ni vuka voli ena maliwa kei lomalagi, ki na veimatanitu kecega, na veimataqali, na duivosavosa, kei ira na tamata;

104 Ia ena vakaoqo na rorogo ni nona davui, ka kaya vei ira kecega na tamata mai lomalagi kei vuravura, kei na ruku i vuravura—ni na rogoca na daliga vakayadua, ka tekiduru na duru vakayadua, ka vakatusa na yame kecega, ni ra sa rogoca na domo ni davui, ni sa kaya: Dou rerevaka na Kalou ka vakalagilagi koya sa tiko ena itikotiko vakaturaga me sega ni mudu ka sega ni mudu; raica sa yaco mai na auwa ni nona lewa.

105 A sa dua tale na agilosi sa uvuca na nona davui, na ikaono ni agilosi, ka kaya: Sa bale ko koya sa vagunuvi ira na veimatanitu kecega ena waini ni cudru ni nona veidauci; raica sa bale, io sa bale!

106 A sa uvuca tale na nona davui e dua na agilosi, na ikavitu ni agilosi, ka kaya: Sa oti, sa oti! Sa vakamalumalumutaka ka sikaraka taudua ga na ikeli ni waini na Lami ni Kalou, io na ikeli ni waini ni cudru waqawaqa ni Kalou Kaukauwa.

107 Ia era na qai vakaisalataki na agilosi ena lagilagi ni nona kaukauwa, era na vakasinaiti na yalododonu ena nona lagilagi, ka ciqoma na nodra ivotavota vakawa ka ra na tautauvata ga kei koya.

108 Ena qai uvuca tale na nona davui na imatai ni agilosi me ra rogoca na tamata bula kecega, ka na vakatakila mai na veika sa kitaka vuni na tamata, kei na cakacaka e veivakurabuitaki ni Kalou ena imatai ni dua na udolu na yabaki.

109 Ena qai uvuca na ikarua ni agilosi na nona davui, ka vakatakila mai na veika sa kitaka vuni na tamata, na nanuma lo kei na gagadre ni lomadra, kei na cakacaka e veivakurabuitaki ni Kalou ena ikarua ni dua na udolu na yabaki—

110 Ka na vaka tiko kina me yacova ni sa uvuca na nona davui na ikavitu ni agilosi; a sa tucake tu ena vuravura kei na wasawasa ka bubului ena yaca i koya sa tiko ena itikotiko vakaturaga, ni sa oti na gauna; ia ena qai vesu ko Setani na gata makawa ko ya, o koya sa vakatokai me tevoro, raica ena vesu tu me oti mada e dua na udolu na yabaki.

111 Ia ena qai sereki mada vakalekaleka me soqoni ira vata na nona mataivalu.

112 Ia ko Maikeli, na ikavitu ni agilosi, na agilosi liu ena qai vakasoqoni ira vata na nona mataivalu, io ko ira na lewei lomalagi.

113 Ia ena vakasoqona vata na nona mataivalu ko koya na tevoro; io ko ira na lewei eli, ka ra na qai lako yani me veivala vata kei Maikeli kei na nona mataivalu.

114 Ena qai yaco na ivalu ni Kalou cecere; ka ra na qai biu tani na tevoro kei na nona mataivalu ki na nodra tikina, me ra na sega tale ni rawai ira na yalododonu.

115 Raica ena vala ena vukudra ko Maikeli, ka vakamalumalumutaki koya sa segata me taura na itutu nei koya sa tiko ena itikotiko vakaturaga, io ko koya na Lami.

116 Oqo na nona lagilagi na Kalou, kei ira era sa vakatabui; ia era na sega tale ni mate.

117 O koya, au sa kaya kina vakaidina vei kemudou na wekaqu, dou kaciva e dua na soqoni tabu me vaka au sa vakarota vei kemudou.

118 Ia me vaka ni sa sega ni taucoko sara na nomudou vakabauta, dou gumatua sara mo dou veivakavulici vakataki kemudou ena vosa ni yalomatua; io, dou vakasaqara mai na ivola vinaka na vosa ni yalomatua; dou vakasaqara na kila ka, io ena vuli kei na vakabauta.

119 Dou cokonaki kemudou; dou vakarautaka na veika sa yaga vei kemudou; dou tauyavutaka e dua na vale; io me vale ni masumasu, me vale ni lolo, me vale ni vakabauta, me vale ni vuli, me vale ni lagilagi, me vale vakaivakarau, me vale ni Kalou;

120 Ia mo dou curu kina ena yaca ni Turaga; ka lesu tale ena yaca ni Turaga; ia na nomudou veikidavaki kece sara me vakayacori ena yaca ni Turaga, ka me laveti cake kina na ligamudou vei koya sa Cecere Sara.

121 Ia mo dou muduka sara na veivosaki tawayaga, na veidredrevaki, kei na garogaro ca ni lomamudou, io na nomudou qaciqacia kei na vakasama sega na betena, kei na nomudou caka ca kecega.

122 Dou lesia e dua me nomudou qasenivuli, ia mo dou kakua ni vakamacala kecega ena dua vata na gauna; raica me dua ga e vosa ka ra vakarorogo na kena vo ki na nona ivakamacala, ia ni dou sa vosa oti kece, dou sa vuli ka veivakavulici kece tale ga, raica ena soli vakatautauvata na dodonu ki na tamata yadua.

123 Dou raica mo dou dau veilomani vakataki kemudou; dou kakua sara ni daukocokoco; dou veivukei vakataki kemudou me vaka e gadrevi ena kosipeli.

124 Dou kakua ni dauvakawelewele; dou vakasavasavataki kemudou; dou kakua ni dau veidusi vakataki kemudou; dou kakua ni daumoce sivia; dou moce vakayakavi mo dou bulabula kina; dou yadra vakamataka lailai, me makutu kina na yagomudou kei na nomudou vakasama.

125 Ia me kena ilutua dou vakaisulu ena ivau ni loloma uasivi, me vaka sa nomudou itutuvi, io sai koya na ivau sa uasivi sara kei na vakacegu.

126 Dou daumasu tiko ga mo dou kakua ni malumalumu, me yacova ni’u sa lesu tale mai. Raica, ka rogoca, au na lako kusarawa mai ka kauti kemudou vei au. Emeni

127 Kei na dua tale, na ivakarau ni mataveiliutaki ena nodra koronivuli na parofita, sa tauyavutaki me ra vulica kina na veika kecega sa yaga vei ira, io ko ira na vakailesilesi kece ni lotu, se ena dua tale na kena vosa, ko ira era sa kacivi ki na dua na ilesilesi vakalotu, io mai vei ira na bete levu ka kauta sara vei ira na dikoni—

128 Raica ena vakaoqo na ivakarau ni mataveiliutaki ena koronivuli: Ena tucake tu ena vanua sa vakarautaki vua ko koya sa lesi me peresitedi, se qasenivuli.

129 O koya, ena liu taumada ki na vale ni Kalou, io ena tiko ena vanua me ra rogoca ka kila vinaka kina na nona vosa ko ira na ivavakoso, io ena domo vakarauta ga.

130 Ia ni sa curu yani ki na vale ni Kalou, ni sa dodonu me liu duadua kina ko koya—raica oqo sa itavi bibi sara, ni sa kilikili me ivakaraitaki vei ira na kena vo ko koya—

131 Me tekiduru ka cabori koya ena masu vua na Kalou, me ivakatakilakila se ivakananumi ni veiyalayalati tawavakaiyalayala.

132 Ia ni ra qai curu ko ira era muri yani vua, me qai tucake ko qasenivuli, ka laveta cake na ligana ki lomalagi, io me laveta cake vakadodonu ka kidavaka na wekana se ko ira na wekana ena veivosa oqo:

133 Ko sa wekaqu se dou sa wekaqu? Au sa kidavaki kemudou ena yaca ni Turaga ko Jisu Karisito, me ivakatakilakila se ivakananumi ni veiyalayalati tawavakaiyalayala, io na veiyalayalati au sa ciqomi kemudou kina, raica au sa gadreva sara me tudei, sega ni yavalati, ka sega ni veiveisau, io me’u sa nomudou itokani ka wekamudou ena loloma soli wale ni Kalou ka me kena ivau na loloma, io me’u muria na vunau kecega ni Kalou ka sega ni cala kina, ka vakavinavinaka tiko ga me sega ni mudu ka sega ni mudu. Emeni.

134 Ia ko koya sa kunei ni sega ni ganiti koya na veikidavaki oqo, me kakua ni tiko ena kemudou maliwa; raica dou kakua ni laiva me vakadukadukalitaka na noqu vale ko koya.

135 Ia ko koya sa curu kina ka sa yalodina tiko vei au, se lewe dua se ra lewe vuqa na veiwekani, era na laveta cake na ligadra ki lomalagi ka kidavaka na peresitedi se qasenivuli, ena masu kei na veiyalayalati vata oqo, se ena nodra vaka-Emeni, ena ivakatakilakila vata oqo.

136 Raica, au sa kaya vakaidina vei kemudou, me vakaoqo na ivakarau ni nomudou veikidavaki vakataki kemudou ena vale ni Kalou, ena nodra koronivuli na parofita.

137 Ia dou sa vakaroti mo dou kitaka vakakina ena masumasu kei na vakavinavinaka, raica ena vakatakila vei kemudou na Yalo na veika kece mo dou kitaka ena vale ni Turaga, ena nodra koronivuli na parofita, io me yaco kina me vale ka itikotiko ni Yalo Tabu mo dou vakatataki cake kina.

138 Ia mo dou kakua ni vakacuruma vei kemudou ena koronivuli oqo e dua, kevaka e sega ni savasava mai na nodra dra na itabatamata oqo;

139 Ia sa rawa ni qai vakacurumi kevaka sa vakayacori vua na cakacaka vakalotu ni veivuiyava, raica oqo ga na ka sa virikotori kina na cakacaka vakalotu ni veivuiyava.

140 Kei na dua tale, me vakayacora ga na cakacaka vakalotu ni veivuiyava ko koya na peresitedi, se ko koya na italatala qase vakatulewa ni lotu.

141 Ia me tekivutaki ena masu; ia ni sa oti na kana madrai kei na gunu waini, me qai vauca na tolona me vaka na kena ivalavala sa tukuni ena ivola i Joni wase tinikatolu, na nona ivakadinadina me baleti au. Emeni.