Sehemu ya 9
Ufunuo uliotolewa kupitia kwa Joseph Smith Nabii kwa Oliver Cowdery, huko Harmony, Pennsylvania, Aprili 1829. Oliver anaonywa kuwa awe mvumilivu na anahimizwa kuridhika na kazi ya uandishi, kwa wakati huu, kama inavyosemwa na mfasiri, kuliko kujaribu kutafsiri.
1–6, Kumbukumbu nyingine za kale bado hazijatafsiriwa; 7–14, Kitabu cha Mormoni kinatafsiriwa kwa kuchunguza na kwa uthibitisho wa kiroho.
1 Tazama, ninakuambia wewe, mwana wangu, kwamba kwa sababu hukutafsiri kama ulivyotaka kutoka kwangu, na hivyo umeanza kuandika tena kwa ajili ya mtumishi wangu, Joseph Smith, Mdogo, hivyo ndivyo nipendavyo kwamba uendelee kuandika hadi utakapomaliza kumbukumbu hii, ambayo nimemkabidhi yeye.
2 Na halafu, tazama, kumbukumbu nyingine ninazo, ambazo nitakupa wewe uwezo ili uweze kusaidia kuzitafsiri.
3 Uwe mvumilivu, mwana wangu, kwani hiyo ni hekima kwangu, na haifai wewe kutafsiri kwa wakati huu.
4 Tazama, kazi ambayo umeitwa kuifanya ni kuandika kwa ajili ya mtumishi wangu Joseph.
5 Na, tazama, nimekunyangʼanya heshima hiyo, kwa sababu hukuendelea kuifanya kama vile ulivyoianza kutafsiri.
6 Usinungʼunike, mwanangu, kwani hiyo ni hekima kwangu kukutendea namna hiyo.
7 Tazama, wewe hujaelewa; ulidhani ya kuwa Mimi nitakupatia tu wewe, wakati wewe hukutafakari isipokuwa kuniomba Mimi tu.
8 Lakini, tazama, ninakuambia, kwamba unalazimika kulichunguza katika akili yako; ndipo uniulize kama ni sahihi, na kama ni sahihi nitaufanya moyo wako uwake ndani yako; kwa njia hiyo, utahisi kuwa hiyo ni sahihi.
9 Lakini kama siyo sahihi hutapata hisia za namna hiyo, bali mzubao wa mawazo ambayo yatakufanya usahau kitu kile kisicho sahihi; kwa sababu hiyo, huwezi kuandika kile kilicho kitakatifu ila kimetolewa kwako kutoka kwangu.
10 Sasa, kama ungelijua hivi ungeliweza kutafsiri; hata hivyo, haifai kuwa wewe utafsiri sasa.
11 Tazama, ilifaa wakati ulipoanza; lakini ukaogopa, na muda umekwisha pita, na haifai tena sasa;
12 Kwani, huoni kwamba nimempa mtumishi wangu Joseph nguvu za kutosha, ambazo kwa hizo zatosheleza? Na wala hakuna kati yenu niliye mhukumu.
13 Fanya jambo hili ambalo nimekuamuru, na wewe utastawi. Uwe mwaminifu, na usijiingize katika majaribu.
14 Simama imara katika kazi ambayo nimekuitia, na wala unywele wa kichwa chako hautapotea, na wewe utainuliwa juu siku ya mwisho. Amina.