11. Tuʻuʻanga ʻo e Temipale ʻi Hihifo Mamaʻó

Naʻe hoko ʻa e kiʻi kolo ko Hihifo Mamaʻo, ʻi Mīsulí ko e ʻapi ia ki ha Kāingalotu ʻe toko 3,000 ki he 5,000 nai, ʻa ia naʻa nau kumi hūfanga mei he fakatanga ʻi he Vahefonua Siakisoní mo e Vahefonua Keleí. Naʻe fekau ʻe he ʻEikí e Kāingalotú ʻi he 1838 ke nau langa ha temipale heni (vakai ki he T&F 115:7–8). Naʻe taʻofi kinautolu ʻe he kau fakatangá mei hono fai iá. Naʻe puke pōpula ʻa e Palōfita ko Siosefa Sāmitá mo e niʻihi ʻo e kau taki ʻo e Siasí ʻi he taʻu tatau pē he ʻaho 31 ʻo ʻOkatopa ʻo e taʻu ko iá, pea naʻe hili hano fakamāuʻi kinautolu ʻi Lisimoni, naʻe ʻave kinautolu ʻo tuku pōpula ʻi he Fale Fakapōpula Lipetií. Naʻe tuli ʻa e Kau Māʻoniʻoni ʻi he Ngaahi ʻAho Kimui Ní mei Hihifo Mamaʻo mo e ngaahi kolo kehe ʻi Mīsuli ʻo nau hiki ki ʻIlinoisi lolotonga ʻa e faʻahitaʻu momoko ʻo e 1838–1839.

Ngaahi Meʻa Mahuʻinga naʻe Hoko aí: Naʻe fakatapui ha konga kelekele ke tuʻu ai ha temipale, pea fakatoka mo hono ngaahi makatulikí. Naʻe maʻu heni ha fakahā ʻe fitu ʻoku pulusi ʻi he Tokāteline mo e Ngaahi Fuakavá (vahe 113–115; 117–120). Naʻe fanauʻi ʻa Siosefa F. Sāmita, ko e Palesitenisī hono ono ʻo e Siasí ʻi he ʻaho 13 ʻo Nōvema 1838 ʻi Hihifo Mamaʻo. Naʻe hoko ʻa Hihifo Mamaʻo ʻi ha kiʻi taimi siʻi ko e hetikuota ʻo e Siasí lolotonga ʻa e taki ʻa e Palōfita ko Siosefa Sāmitá.