5. Vaitafe Sesikuehaná
ʻOku hā ʻi he tā ko ʻení ʻa e Vaitafe Sesikuehaná ʻa ia ʻoku ofi ki he Kolo ko Hāmoní, ʻi Penisilivēnia.
Ngaahi Meʻa Mahuʻinga naʻe Hoko aí: Naʻe ʻuluaki haʻu ʻa Siosefa Sāmita, ko e Siʻí, ki Hāmoni ʻi he 1825 ko ʻene kumi ngāue. Naʻá ne nofo heni mo ʻene tamaí ʻi he ʻapi ʻo ʻAisake Heili, ʻa ia naʻe ʻuluaki feʻiloaki ai ʻa Siosefa mo ʻEma Heili, ʻa ia ʻe hoko ko hono uaifi ʻi he kahaʻú (SS—H 1:56–57). Naʻe mali ʻa Siosefa mo ʻEma ʻi he ʻaho 18 ʻo Sānuali ʻo e 1827. Naʻe maʻu ʻe he Palōfitá ʻa e ʻū lauʻi peleti koulá he ʻaho 22 ʻo Sepitema 1827, ʻi Manisesitā, ʻi Niu ʻIoke, pea hili ha kiʻi taimi siʻi mei ai, naʻá ne hiki leva mo ʻEma ki Hāmoni ʻa ia naʻe kamata ai ʻene liliu ʻa e ngaahi peletí. Lolotonga hono liliu ʻo e Tohi ʻa Molomoná, naʻe fie ʻilo lahi ai ʻa Siosefa mo ʻŌliva Kautele ki he papitaisó peá na ʻalu atu ki ha feituʻu ʻi he vao ʻakaú ʻo ofi ki heni ke lotu ki he ʻEikí ʻo kau ki ai. Naʻe tali mai ʻena lotu ko iá, ʻi he hā mai ʻa Sione ko e Papitaisó ʻi he ʻaho 15 ʻo Mē 1829 (SS—H 1:66–74; T&F 13). Naʻá ne foaki mai ʻa e Lakanga Taulaʻeiki Faka-ʻĒloné kia Siosefa mo ʻŌliva. Naʻá na ʻalu hifo leva ki he vaitafé ʻo na fepapitaisoʻaki ai ʻa kinaua ki he fakamolemole ʻo e ngaahi angahalá. Naʻe fekau leva ʻe Sione ko e Papitaisó kia Siosefa mo ʻŌliva ke na fefakanofoʻaki ʻa kinaua ki he Lakanga Taulaʻeiki Faka-ʻĒloné. Naʻe ʻosi ha kiʻi taimi siʻi mei ai, naʻe hā mai ʻa Pita, Sēmisi, mo Sione ʻi he vahaʻa ʻo Hāmoni mo Kolesivilí ʻo foaki kia Siosefa mo ʻŌliva ʻa e Lakanga Taulaʻeiki Faka-Melekisētekí (T&F 27:12–13; 128:20).