9. Temipale Ketilaní
ʻOku tuʻu ʻa e Temipale Ketilaní ʻi Ketilani, ʻi ʻOhaiō.
Ngaahi Meʻa Mahuʻinga naʻe Hoko aí: Ko e Temipale Ketilaní ʻa e ʻuluaki temipale naʻe langa ʻi he kuonga ko ʻení (T&F 88:119; 95). Naʻe mamata ʻa Siosefa Sāmita ʻi he temipale ko ʻení ʻi ha meʻa-hā-mai ki he puleʻanga fakasilesitialé (T&F 137). Naʻe tāpuakiʻi mo fakatapui ia ʻi he ʻaho 27 ʻo Māʻasi 1836 (T&F 109). Naʻe hā mai ʻa e Fakamoʻuí ʻi he ʻaho 3 ʻo ʻEpeleli 1836 ʻo Ne tali ʻa e temipalé ke hoko ko ha feituʻu ke Ne fakahā mai ai ʻEne folofolá ki Hono kakaí (T&F 110:1–10). Naʻe hili ʻa e hā mai ko ʻení, naʻe ʻaʻahi mai ai kia Siosefa Sāmita mo ʻŌliva Kautele ʻa Mōsese, ʻIlaiase, mo ʻIlaisiā, ʻa ia naʻa nau foaki kotoa mai kiate kinaua ʻa e ngaahi kī ʻo e lakanga fakataulaʻeikí mo ha ngaahi fakahinohino mahuʻinga (T&F 110:11–16). Naʻe ngāue ʻa e temipale ko ʻení maʻá e kakaí ʻi ha taʻu ʻe ua nai ki muʻa pea nau toki hola mei Ketilani koeʻuhi ko e fakatangá.