6. Tuʻuʻanga ʻo e ʻApi ʻo Pita Uitemā ko e Lahí

ʻOku fakafofongaʻi ʻe he fale ʻakau ko ʻení ʻa e fale totonu ʻo Pita Uitemā ko e Lahí ʻi Feieti, Niu ʻIoke.

Ngaahi Meʻa Mahuʻinga naʻe Hoko aí: Naʻe fakaʻosi ʻe Siosefa Sāmita hono liliu ʻo e Tohi ʻa Molomoná ʻi heni ʻi he konga ki mui ʻo Sune ʻo e 1829. Naʻe mamata ʻa e Kau Fakamoʻoni ʻe Toko Tolú ki he ʻāngelo ko Molonaí pea mo e ngaahi peleti koulá ʻi ha vao ʻakau ofi mai ki he ʻapi ko ʻení. ʻOku pulusi he taimí ni ʻa ʻenau fakamoʻoní ʻi he konga ki muʻa ʻo e ngaahi tatau kotoa pē ʻo e Tohi ʻa Molomoná. Naʻe fakataha mai ha kakai ʻe toko 60 nai ʻi he ʻaho 6 ʻo ʻEpeleli 1830 ki he ʻapi ʻo Pita Uitemaá ke nau mamata tonu ʻi hono fokotuʻu ʻo e Siasi ʻo Sīsū Kalaisí (T&F 20). Naʻe fai ʻi heni ʻa e ngaahi ʻuluaki fakataha mo e ngaahi konifelenisi ʻa e Siasi naʻe toki fokotuʻu ní. Naʻe maʻu ha fakahā ʻe uofulu mei he ngaahi fakahā ʻa ia ʻoku ʻi he Tokāteline mo e Ngaahi Fuakavá ʻi he ʻapi ʻo Pita Uitemaá.