LSS, Mātiu 16:25–29. Fakafehoanaki mo e Mātiu 16:24–26
ʻOku fakamatala ʻe Sīsū hono ʻuhinga ke “fua hoto kolosí”; ko e fakafisi mei he anga taʻe-faka-ʻOtuá mo e holi fakamāmani kotoa pea tauhi ʻEne ngaahi fekaú.
25 Pea toki folofola ʻa Sīsū ki heʻene kau ākongá, Kapau ʻe muimui ha tangata kiate au, tuku ke ne liʻaki ʻe ia ia, pea toʻo hake hono kolosí ʻo muimui ʻiate au.
26 Pea ko ʻeni, ko e meʻa ke toʻo hake ai ʻe ha tangata ʻa hono kolosí, ko ʻene fakafisi ia mei he anga taʻe faka-ʻOtua kotoa pē, mo e holi kovi fakamāmani kotoa pē, pea tauhi ʻeku ngaahi fekaú.
27 ʻOua naʻa maumauʻi ʻeku ngaahi fekaú ke fakahaofi hoʻomou moʻuí; he ko ia ʻe kalofaki ʻene moʻuí ʻi he māmani ko ení, ʻe mole ia ʻi he māmani ka hokó.
28 Pea ko ia ʻe mole ʻene moʻuí ʻi he māmani ko ʻení, koeʻuhí ko aú, te ne maʻu ia ʻi he maama ka hokó.
29 Ko ia, siʻaki ʻa māmani, pea fakamoʻui homou laumālié; he ko e hā hano ʻaonga ki ha tangata, kapau te ne maʻu e māmaní kotoa, kae mole hono laumālie ʻoʻoná? Pe ko e hā ʻe foaki ʻe ha tangata ke fakafetongi ʻaki hono laumālié?