LSS, Mātiu 4:1, 5–6, 8–9. Fakafehoanaki mo e Mātiu 4:1, 5–6, 8–9; naʻe fai ʻa e ngaahi liliu tatau ʻi he Luke 4:2, 5–11
ʻOku tataki ʻa Sīsū ʻe he Laumālié, ka ʻoku ʻikai ko Sētane.
1 Pea naʻe toki tataki atu ʻa Sīsū ʻe he Laumālié ki he feituʻu maomaonganoá, ke ne ʻi he ʻOtuá.
5 Pea naʻe toki ʻohake ʻa Sīsū ki he kolo tapú, pea tuku ia ʻe he Laumālié ʻi he tumutumu ʻo e temipalé.
6 Pea naʻe toki haʻu ʻa e tēvoló kiate ia ʻo pehē ange, Kapau ko e ʻAlo koe ʻo e ʻOtuá, fakatō hifo koe ki lalo, he kuo tohi, Te ne tuku ki heʻene kau ʻāngeló ʻa e fekau ke nau tokangaʻi koe, pea te nau hapahapai koe ʻi honau nimá, telia naʻa touʻia ho vaʻé ʻi ha maka.
8 Pea naʻe toe ʻi he Laumālié ʻa Sīsū, peá ne ʻohake ia ki ha moʻunga māʻolunga ʻaupito, ʻo ne fakaʻaliʻali kiate ia ʻa e ngaahi puleʻanga kotoa ʻo e māmaní pea mo honau nāunaú.
9 Pea naʻe toe haʻu ʻa e tēvoló kiate ia, ʻo pehē ange, Te u ʻoatu ʻa e ngaahi meʻá ni kotoa pē maʻau, ʻo kapau te ke fakatōmapeʻe ki lalo ʻo hū kiate au.
LSS, Mātiu 4:11. Fakafehoanaki mo e Mātiu 4:11
ʻOku fekau ʻe Sīsū ʻa e kau ʻāngelo ke nau tauhi kia Sione ko e Papitaisó.
11 Pea ko ʻeni naʻe ʻafioʻi ʻe Sīsū kuo tuku ʻa Sione ki he fale fakapōpulá, pea naʻá ne fekau atu ʻa e kau ʻāngelo, pea vakai, naʻa nau haʻu ʻo tauhi kiate ia.
LSS, Mātiu 4:18. Fakafehoanaki mo e Mātiu 4:19
ʻOku lea ʻa e kau palōfita ʻo e Fuakava Motuʻá ʻo kau kia Sīsū.
18 Pea pehē ʻe ia kiate kinaua, ko au ia ʻa ia naʻe tohi ʻe he kau palōfitá ʻo kau ki aí; muimui ʻiate au, pea te u ngaohi ʻa kimoua ko e ongo toutai tangata.
LSS, Mātiu 4:22. Fakafehoanaki mo e Mātiu 4:23
ʻOku fakamoʻui ʻe Sīsū ʻa e kakai ʻa ia naʻe kau ai ʻa kinautolu ʻoku tui ki Hono huafá.
22 Pea naʻe fononga holo ʻa Sīsū ʻi Kāleli kotoa ʻo akonaki ʻi honau ngaahi fale lotú, mo malanga ʻaki ʻa e ongoongolelei ʻo e puleʻangá; mo fakamoʻui ʻa e ngaahi mahaki kehekehe kotoa pē, pea mo e ngaahi faʻahinga mahaki kotoa pē naʻe ʻi he kakai ʻa ia naʻa nau tui ki hono huafá.