LSS, Mātiu 6:14. Fakafehoanaki mo e Mātiu 6:13; naʻe fai mo e ngaahi liliu tatau ʻi he Luke 11:4
ʻOku ʻikai tuku ʻa kitautolu ʻe he ʻEikí ke tō ki he ʻahiʻahí.
14 Pea ʻoua naʻa tuku ʻa kimautolu ke tō ki he ʻahiʻahi, kae fakamoʻui kimautolu mei he koví.
LSS, Mātiu 6:22. Fakafehoanaki mo e Mātiu 6:22
Kapau ʻe hanga taha ʻa hotau matá ki he nāunau ʻo e ʻOtuá, ʻe fakafonu ʻa hotau sinó kotoa ʻaki ʻa e maama.
22 Ko e maama ʻo e sinó ʻa e matá; ko ia kapau ʻe hanga taha ho matá ki he nāunau ʻo e ʻOtuá, ʻe fakafonu ho sinó kotoa ʻaki ʻa e maama.
LSS, Mātiu 6:25–27. Fakafehoanaki mo e Mātiu 6:25; 10:10
ʻOku fakatokanga ʻa Sīsū ki Heʻene kau ākongá ʻo kau ki he faingataʻa ʻo ʻenau ngāué ka ʻokú Ne talaʻofa te Ne teuteuʻi e halá pea ʻe tokonaki ʻe he Tamai Hēvaní maʻanautolu.
25 Pea ʻoku ou toe pehē kiate kimoutolu, ʻAlu ʻa kimoutolu ki māmani, pea ʻoua naʻa tokanga ki he māmaní; he ʻe fehiʻa ʻa māmani kiate kimoutolu, pea fakatangaʻi kimoutolu, pea kapusi kimoutolu mei honau ngaahi falelotú.
26 Ka neongo ia, ke mou ʻalu atu mei he fale ki he fale, ʻo akonaki ki he kakaí; pea te u muʻomuʻa ʻiate kimoutolu.
27 Pea ʻe tokonaki ʻe hoʻomou Tamai fakalangí maʻamoutolu, ha faʻahinga meʻa pē te mou fie maʻu ʻi he meʻakaí, ha faʻahinga meʻa te mou kai; pea mo e vala, mo e meʻa ke mou tuí.
LSS, Mātiu 6:38. Fakafehoanaki mo e Mātiu 6:33
ʻOku totonu ke tau fuofua kumi ke langa hake ʻa e puleʻanga ʻo e ʻOtuá.
38 Ko ia, ʻoua ʻe kumi ki he ngaahi meʻa ʻo e māmaní kae fuofua kumi ke langa hake ʻa e puleʻanga ʻo e ʻOtuá, pea fokotuʻu ʻa ʻene māʻoniʻoní, pea ʻe toki fakalahi atu ʻa e ngaahi meʻá ni kotoa pē kiate kimoutolu.