LSS, Mātiu 21:33. Fakafehoanaki mo e Mātiu 21:32–33
Kuo pau ke fakatomala ʻa e tangatá ki muʻa peá ne toki lava ʻo tui kia Kalaisi.
33 He ko ia naʻe ʻikai tui kia Sione ʻi heʻene lea ʻo kau kiate aú, ʻe ʻikai te ne lava ʻo tui kiate au, tuku kehe kapau te ne tomuʻa fakatomala.
LSS, Mātiu 21:47–56. Fakafehoanaki mo e Mātiu 21:45–46
ʻOku fakahā ʻe Sīsū ko Ia ʻa e fuʻu maka-tulikí. ʻOku ʻoatu ʻa e ongoongoleleí ki he kau Siú pea toki hoko ki he kakai Senitailé. ʻE fakaʻauha ʻa e kau fai angahalá, ʻo ka hāʻele mai ʻa Sīsū.
47 Pea ʻi he fanongo ʻa e kau taulaʻeiki lahí mo e kau Fālesí ki heʻene ngaahi talanoa fakatātaá, naʻa nau ʻilo ko ʻene lea ia ʻo kau kiate kinautolu.
48 Pea naʻa nau fepehēʻaki ʻiate kinautolu, ʻOku pehē nai ʻe he tangatá ni te ne lava ʻo fakaʻauha toko taha pē ʻa e puleʻanga lahí ni? Pea naʻa nau ʻita kiate ia.
49 Ka ʻi heʻenau feinga ke puke iá, naʻa nau manavahē ki he kakaí, koeʻuhí he naʻa nau ʻilo ʻoku pehē ʻe he kakaí ko ha palōfita ia.
50 Pea ko ʻeni naʻe haʻu ʻene kau ākongá kiate ia, pea naʻe folofola ʻa Sīsū kiate kinautolu, ʻOku mou ofo ʻi he ngaahi lea ʻo e talanoa fakatātā ʻa ia kuó u lea ʻaki kiate kinautolú?
51 Ko e moʻoni, ʻoku ou pehē kiate kimoutolu, Ko au ʻa e maká, pea naʻe liʻaki au ʻe he kau fai angahala ko iá.
52 Ko e maka-tuliki mahuʻingá au. ʻE hinga ʻa e kau Siú ʻiate au, pea ʻe maumauʻi ʻa kinautolu.
53 Pea ʻe ʻave ʻa e puleʻanga ʻo e ʻOtuá meiate kinautolu, pea ʻe ʻoatu ia ki ha puleʻanga ʻa ia ʻe tupu ai hono ngaahi fua; (ko e ʻuhinga ki he kau Senitailé.)
54 Ko ia, ʻilonga ia ʻe tō ki ai ʻa e maka ní, ʻe momosi ia ke efuefu.
55 Pea ko ia ʻo ka haʻu ʻa e ʻEiki ʻo e ngoué, te ne fakaʻauha ʻa e kau tangata angakovi, mo fai angahala ko iá, pea te ne toe ʻoatu ʻene ngoue vainé ki ha kau tauhi ngoue kehe, ʻio ʻi he ngaahi ʻaho fakaʻosí, ke nau ʻoatu kiate ia ʻa e ngaahi fua ʻi honau ngaahi faʻahitaʻú.
56 Pea naʻe toki mahino kiate kinautolu ʻa e talanoa fakatātā ʻa ia naʻá ne folofola ʻaki kiate kinautolú, ʻa ia ʻe fakaʻauha foki mo e kau Senitailé, ʻo ka hāʻele hifo ʻa e ʻEikí mei he langí ke pule ʻi heʻene ngoue vainé, ʻa ia ko e māmaní pea mo hono kakai ʻo iá.