4 Pea kuo fakatahatahaʻi ʻe ia e kau taulaʻeiki lahi kotoa pē, fakataha mo e kau tangata tohi ʻo e kakaí, peá ne fekau kiate kinautolu, ʻo pehē, Ko e fē ʻa e feituʻu kuo tohi ʻe he kau palōfitá, ʻa ia ʻe ʻaloʻi ai ʻa e Kalaisí? He naʻá ne manavahē lahi, ka naʻe ʻikai ke ne tui ki he kau palōfitá.

5 Pea naʻa nau pehē kiate ia, Kuo tohi ʻe he kau palōfitá ʻe ʻaloʻi ia ʻi Pētelihema ʻo Siuteá, he kuo nau lea pehē,

6 Naʻe hoko mai e folofola ʻa e ʻEikí kiate kimautolu, ʻo pehē, Pea ko koe Pētelihema, ʻa ia ʻoku tuʻu ʻi he fonua ʻo Siuteá, ʻe ʻaloʻi ʻiate koe ha pilinisi, ʻa ia ʻoku ʻikai ko e siʻi hifo ʻi he kau pilinisi ʻo Siuteá; he ʻe haʻu meiate koe ʻa e Mīsaiá, ʻa ia te ne fakamoʻui hoku kakai ʻIsilelí.

24 Pea naʻe hoko ʻo pehē naʻe tupu hake ʻa Sīsū mo hono ngaahi tokouá, pea fakaʻau ia ʻo mālohi, pea tatali ki he ʻEikí ki he taimi ʻe kamata ai ʻene ngāué.

25 Pea naʻá ne tauhi ki heʻene Tamaí, pea naʻá ne lea ʻo ʻikai hangē ko e kakai kehé, pea naʻe ʻikai faʻa akoʻi ia; he naʻe ʻikai fie maʻu ha tangata ke ne akoʻi ia.

26 Pea naʻe hili ʻa e ngaahi taʻu lahi, pea hokosia ʻa e houa ʻo ʻene ngāue ke faí.

34 Ko e hā ʻoku ʻikai ke mou tali ai e malanga ʻaʻana kuo fekauʻi mai ʻe he ʻOtuá? Kapau ʻoku ʻikai ke mou tali eni ki homou lotó, he ʻikai ke mou tali au; pea kapau he ʻikai ke mou tali au, he ʻikai ke mou tali ia kuó ne fekauʻi au ke fakamoʻoniʻí; pea ko hoʻomou ngaahi angahalá ʻoku ʻikai hamou pulupulu.

35 Ko ia, fakatomala, pea ʻomi e ngaahi fua ʻoku ngali mo e fakatomalá;

36 Pea ʻoua te mou pehē ʻiate kimoutolu, Ko e fānau kimautolu ʻa ʻĒpalahame, pea ko kimautolu pē ʻoku maʻu e mālohi ke ʻomi ha hako ki heʻemau tamai ko ʻĒpalahamé; he ʻoku ou tala atu kiate kimoutolu, ʻoku malava ke fakatupu ʻe he ʻOtuá mei he ngaahi maká ni ha fānau kia ʻĒpalahame.

38 Ko e moʻoni ʻoku ou papitaiso ʻa kimoutolu ʻaki ʻa e vai, ʻi hoʻomou fakatomalá; pea ʻi he hāʻele mai ʻa ia ʻoku ou fakamoʻoniʻí, ʻa ia ʻoku lahi ange ʻiate aú, ʻoku ʻikai taau mo au ke toʻo hono topuvaʻé, (pe ko hono tuʻungá ʻoku ʻikai lava ke u fakakakato,) ʻo hangē kuó u lea ʻakí, ko e moʻoni ʻoku ou papitaiso kimoutolu kimuʻa peá ne hāʻele maí, koeʻuhí he ka ne hāʻele mai ʻe lava ke ne papitaiso kimoutolu ʻaki ʻa e Laumālie Māʻoniʻoni mo e afi.

39 Pea ko ia ia te u fakamoʻoniʻí, ʻe ʻi hono toʻukupú ʻa hono ī, pea te ne fakamaʻa ʻaupito hono hahaʻangá, mo tānaki ʻa hono uité ki he feleokó; ka ʻi he kakato ʻo hono kuonga ʻoʻoná te ne tutu e kafukafú ʻaki ʻa e afi taʻe mate.

40 Ko ia ne haʻu ʻa Sione, ʻo ne malanga mo papitaiso ʻi he vaitafe ko Soataní; ʻo fakamoʻoni, ko ia ʻe hāʻele mai ʻi hono tuʻá, ʻokú ne maʻu e mālohi ke papitaiso ʻaki ʻa e Laumālie Māʻoniʻoní mo e afí.

43 Pea naʻe folofola ʻa Sīsū, ʻo pehē ange kiate ia, Tuku ke u papitaiso ʻiate koe, he ʻoku taau mo kitautolu ke fakahoko ʻa e māʻoniʻoni kotoa pē. Pea naʻá ne tuku ke fai ia.

44 Pea ʻalu hifo ʻa Sione ki he vaí ʻo ne papitaiso ia.

45 Pea kuo hili hono papitaiso ʻo Sīsuú, naʻe ʻalu hake leva ia mei he vaí, pea naʻe mamata ʻa Sione, pea ʻiloange, naʻe fakaava mai ʻa e ngaahi langí kiate ia, peá ne mamata ki he Laumālie ʻo e ʻOtuá ʻoku maliu hifo ʻo hangē ko e lupe ʻo tuʻu ʻia Sīsū.

46 Pea ʻiloange, naʻá ne fanongo ki ha leʻo mei he langí, ʻoku pehē, Ko hoku ʻAlo ʻofaʻanga ʻeni, ʻa ia ʻoku ou fiemālie lahi ai. Fanongo kiate ia.