LSS, Mātiu 7:1–2. Fakafehoanaki mo e Mātiu 7:1–2
ʻOua ʻe fakamaau taʻe-māʻoniʻoni.
1 Ko ʻeni ko e ngaahi lea ʻeni naʻe ako ʻe Sīsū ki heʻene kau ākongá ʻa ia ʻoku totonu ke nau lea ʻaki ki he kakaí.
2 ʻOua ʻe fakamaau taʻe-māʻoniʻoni, koeʻuhi ke ʻoua naʻa fakamāua ʻa kimoutolu; kae fakamaau ʻi he fakamaau ʻoku māʻoniʻoni.
LSS, Mātiu 7:4–8. Fakafehoanaki mo e Mātiu 7:3–5
ʻOku akonaki ʻa Sīsū ki Heʻene kau ākongá ke nau fakafehuʻi e kau tangata tohí, kau Fālesí, kau taulaʻeikí, mo e kau Līvaí koeʻuhi ko ʻenau mālualoí.
4 Pea ko e tahá, ke mou pehē kiate kinautolu, Ko e hā ʻokú ke mamata ai ki he malamalaʻi ʻakau ʻoku ʻi he mata ʻo ho tokouá, kae ʻikai te ke tokanga ki he fuʻu ʻakau ʻoku ʻi ho mata ʻoʻoú?
5 Pe ʻe fēfē haʻo pehē ki ho tokouá, Tuku ke u toʻo mai ʻa e malamalaʻi ʻakau mei ho matá; kae ʻikai ke ke lava ʻo vakai ki he fuʻu ʻakau ʻi ho mata ʻoʻoú?
6 Pea folofola ʻa Sīsū ki heʻene kau ākongá, ʻOku mou vakai ki he kau tangata tohí, mo e kau Fālesí, pea mo e kau taulaʻeikí, mo e kau Līvai? ʻOku nau akonaki ʻi honau ngaahi falelotú, kae ʻikai ke nau tokanga ki he fonó, pe ko e ngaahi fekaú; pea kuo nau hē mei he halá, pea halaia ʻi he fai angahalá.
7 Ke ʻalu ʻa kimoutolu pea lea kiate kinautolu, Ko e hā ʻoku mou akonakiʻi ai ki he kakaí ʻa e fonó mo e ngaahi fekaú, ka ko e fānau kimoutolu ʻo e faihalá?
8 Ke mou lea kiate kinautolu, ʻA e kau mālualoi, tomuʻa lī ʻa e fuʻu ʻakau ʻoku ʻi ho matá; pea te ke toki mamata totonu ke toʻo e malamalaʻi ʻakaú mei he mata ʻo ho tokouá.
LSS, Mātiu 7:9–11. Fakafehoanaki mo e Mātiu 7:6
ʻOku akoʻi ʻe Sīsū ʻEne kau ākongá ke malanga ʻaki ʻa e fakatomalá pea ʻoua ʻe fakahā ʻa e ngaahi meʻa lilo ʻo e puleʻangá ki he māmaní.
9 Ke ʻalu ʻa kimoutolu ki he māmaní, ʻo pehē ki he kakai kotoa pē, Fakatomala, he ʻoku ofi mai ʻa e puleʻanga ʻo e langí kiate kimoutolu.
10 Pea ko e ngaahi meʻa lilo ʻo e puleʻangá ke mou tauhi ia ʻi homou lotó; he ʻoku ʻikai ʻaonga ke foaki ʻa e meʻa ʻoku māʻoniʻoní ki he fanga kulií; pe laku hoʻomou ngaahi mataʻi tofé ki he fanga puaká, telia naʻa nau malamalaki ia ʻi honau lalo vaʻé.
11 Koeʻuhí ʻe ʻikai lava ʻe he māmaní ʻo maʻu ʻa e ngaahi meʻa ʻa ia ʻoku ʻikai lava ʻe kimoutolu, ʻo kātakiʻí; ko ia ke ʻoua naʻa mou ʻoatu hoʻomou ngaahi mataʻi tofé kiate kinautolu, telia naʻa nau tafoki mai ʻo haehae ʻa kimoutolu.
LSS, Mātiu 7:12–17. Fakafehoanaki mo e Mātiu 7:7–8
ʻOku akonaki ʻa Sīsū ki Heʻene kau ākongá ko e Tamaí ʻokú ne foaki e fakahaá kiate kinautolu kotoa pē ʻoku kolé.
12 Lea kiate kinautolu, Kole ki he ʻOtuá; kole, pea ʻe foaki ia kiate kimoutolu; kumi, pea te mou ʻilo; tukituki, pea ʻe toʻo ia kiate kimoutolu.
13 He ko ia kotoa pē ʻoku kolé, ʻokú ne maʻu; pea ko ia ʻoku kumí, ʻokú ne ʻilo; pea ko ia ʻoku tukitukí, ʻe toʻo kiate ia.
14 Pea pehē ʻe he kau ākongá kiate ia, Te nau lea kiate kimautolu, Ko kimautolú ʻoku mau angatonu pea ʻikai fie maʻu ke akoʻi kimautolu ʻe ha tangata. ʻOku mau ʻiloʻi naʻe fanongo ʻa e ʻOtuá kia Mōsese mo ha niʻihi ʻo e kau palōfitá; ka he ʻikai te ne fanongo kiate kimautolu.
15 Pea te nau pehē, ʻOku mau maʻu ʻa e fonó ki homau fakamoʻuí, pea ʻoku feʻunga ia kiate kimautolu.
16 Pea tali ʻe Sīsū, mo pehē ki heʻene kau ākongá, Ko ia ke mou lea kiate kinautolu,
17 Ko hai ha tangata ʻiate kimoutolu, ʻoku ʻi ai hano foha, pea nofo ia ʻi tuʻa, pea te ne pehē, Tamai, fakaava ho falé ke u hū atu ʻo maʻu meʻatokoni mo koe, pea he ʻikai te ne pehē, Haʻu, ʻe hoku foha; he ko ia ʻoku ʻaʻakú ʻe ʻaʻau ia, pea ko ia ʻaʻaú ʻe ʻaʻaku ia?