¶ 1 BEA nae hoko o behe, hili e na alea mo Saula, nae febikitaki ae laumalie o Jonatane moe laumalie o Tevita, bea nae ofa a Jonatane kiate ia o hage ko hono laumalie oona.

2 Bea nae ave ia e Saula i he aho koia, bea nae ikai toe tuku ia ke alu ki abi ki he fale o ene tamai.

3 Bea nae toki alea ai a Jonatane mo Tevita i he tuakava, koe mea i he ene ofa kiate ia o hage ko hono laumalie oona.

4 Bea nae too e Jonatane hono bulubulu oona aia naa ne kofu aki, o ne foaki ia kia Tevita, mo hono gaahi kofu, io, a ene heleta foki, mo ene kaufana, bea mo hono nonoo.

¶ 5 Bea nae alu e Tevita ki he botu kotoabe nae fekau ia ki ai e Saula, bea naa ne fai fakabotoboto: bea nae fakanofo ia e Saula ke bule ki he kau tagata tau, bea nae ogolelei ia i he ao oe kakai kotoabe, bea i he ao foki oe kau tamaioeiki a Saula.

6 Bea nae hoko o behe, i he e nau ha‘u i he liu mai a Tevita mei he tamate‘i oe tagata Filisitia, nae hu mai kitua ae kau fefine mei he gaahi kolo kotoabe o Isileli ke fakafetaulaki ki he tu‘i ko Saula, o nau hiva mo mee hobohobo aki ae gaahi mea tatagi, i he fiefia lahi, bea moe gaahi mea faiva.

7 Bea nae fetaliaki akinautolu e he kau fefine i he e nau ta ae mea, o nau behe, Kuo ta‘i e Saula ene gaahi toko afe, ka ko Tevita ene gaahi toko mano.

8 Bea nae houhau lahi a Saula, bea fakahouhau kiate ia ae lea koia; bea behe eia, Kuo nau tuku kia Tevita ae gaahi toko mano, bea kuo nau tuku kiate au ae gaahi toko afe be: bea koeha ha mea oku toe ke ne ma‘u, ka koe buleaga be?

9 Bea nae lamaji e Saula a Tevita talu mei he aho koia.

¶ 10 Bea bogibogi hake, bea behe, nae hoko kia Saula ae laumalie kovi mei he Otua, bea nae kikite ia i he loto fale: bea nae ta e Tevita aki hono nima o hage ko ene muaki fai: bea nae i he nima o Saula ae tao.

11 Bea nae velo e Saula ae tao; he nae behe eia, teu velo‘i aki a Tevita, io ki he holiji fale. Bea nae kalo malie a Tevita mei hono ao o liuga ua.

¶ 12 Bea nae manavahe a Saula kia Tevita, he nae iate ia a Jihova, ka kuo alu ia mei a Saula.

13 Koia nae hiki ai ia e Saula meiate ia, o ne fakanofo ia koe eiki tau ki he toko afe: bea nae fealuaki be ia i he ao oe kakai.

14 Bea nae tabuekina a Tevita i hono gaahi hala kotoabe; bea nae iate ia a Jihova.

15 Koia i he mamata a Saula oku fai fakabotoboto lahi aubito ia, nae manavahe ia kiate ia.

16 Ka nae ofa kia Tevita a Isileli kotoabe mo Juta, koe mea i he ene fealuaki i ho nau ao.

¶ 17 Bea nae behe e Saula kia Tevita, Vakai, ko hoku ofefine tuu kimua ko Melabi, teu atu ia kiate koe ko ho unoho: ka ke fai fakato‘a koe o fai kiate au ae gaahi tau a Jihova. He nae behe e Saula, Ke oua naa hoko hoku nima kiate ia, ka ke hoko ae nima oe kau Filisitia kiate ia.

18 Bea nae behe e Tevita kia Saula, Kohai au? bea koeha eku moui? be koe fale o eku tamai i Isileli, koeuhi keu hoko ai au koe foha i he fono ki he tu‘i?

19 Ka nae hoko o behe, i he hoko ae gaahi aho nae tonu ke atu ai a Melabi koe ofefine o Saula kia Tevita, nae atu ia kia Atilili koe tagata Mihola ke na unoho.

20 Bea nae ofa kia Tevita a Mikale, koe ofefine o Saula: bea naa nau fakaha ia kia Saula, bea nae fiemalie ai ia.

21 He nae behe e Saula, Teu foaki ia kiate ia koeuhi ke hoko ia koe tauhele kiate ia, bea koeuhi ke hiki hake ae nima oe kau Filisitia kiate ia. Koia ne behe ai e Saula kia Tevita, Ke ke hoko he aho ni ko hoku foha i he fono i ha toko taha o kinaua.

¶ 22 Bea nae fekau e Saula ki he ene kau tamaioeiki, o behe, Ke mou alea fakalilolilo mo Tevita, o behe, Vakai, oku fiefiemalie ae tu‘i kiate koe, bea oku ofa a ene kau tamaioeiki kotoabe kiate koe: bea koeni, ke ke fie hoko koe foha i he fono ki he tu‘i.

23 Bea nae lea aki e he kau tamaioeiki a Saula ae gaahi lea ni i he teliga o Tevita. Bea nae behe e Tevita, He oku mou mahalo koe mea maamaa ke hoko koe foha i he fono ki he tu‘i, ka koe tagata majiva au, bea koe tua be?

24 Bea nae tala kia Saula e he ene kau tamaioeiki, o behe, Nae lea behe be a Tevita.

25 Bea behe e Saula, Te mou lea behe be kia Tevita, Oku ikai tokaga ae tu‘i ki he koloa, ka koe mua kili e teau oe kakai Filisitia, koe sauni ki he gaahi fili oe tu‘i. Ka nae tokaga a Saula ke ta‘i a Tevita e he nima oe kau Filisitia.

26 Bea i he fakaha e he ene kau tamaioeiki kia Tevita ae gaahi lea ni, nae fiemalie lahi ai a Tevita ke hoko koe foha i he fono oe tu‘i: bea nae teeki ai kakato ae gaahi aho.

27 Koia nae alu ai a Tevita, aia mo ene kau tagata, bea ne tamate‘i i he kakai Filisitia ae kau tagata e toko uageau; bea nae omi e Tevita ho nau mua kili, o atu o lau kakato ki he tu‘i koeuhi ke hoko ia koe foha i he fono oe tu‘i. Bea nae atu kiate ia e Saula hono ofefine ko Mikale ke hoko ko hono unoho.

¶ 28 Bea nae ha kia Saula o ne ilo oku ia Tevita a Jihova, bea oku ofa a Mikale ae ofefine o Saula kiate ia.

29 Bea nae tubu o ajili ai ae manavahe a Saula kia Tevita; bea nae hoko a Saula koe fili mau ai be o Tevita.

30 Bea nae alu atu kitua ae houeiki oe kakai Filisitia: bea hili e nau alu atu, bea behe, nae fai fakabotoboto lahi hake a Tevita i he kau tamaioeiki kotoabe a Saula; koia nae hoko o maogooga ai hono higoa.