¶ 1 BEA i he gaahi aho koia nae fakataha e he kakai Filisitia ho nau gaahi kau tau ki he tau, ke nau tau‘i a Isileli. Bea nae behe e Akisi kia Tevita, Ko eni ke ke ilo bau te tau o mo koe ki he tau, akoe mo ho kau tagata.

2 Bea nae behe e Tevita kia Akisi, Koe mooni te ke ilo bau aia oku mafai e hoo tamaioeiki. Bea nae behe e Akisi kia Tevita, Koia teu fakanofo koe koe tauhi o hoku ulu o taegata.

¶ 3 Ka koeni kuo bekia a Samuela, bea nae tegihia ia e Isileli kotoabe, o nau tanu ia i Lama, io i he ene kolo nofoaga aana. Bea kuo oji hono kabuji e Saula mei he fonua akinautolu nae ma‘u laumalie kovi, moe kau kikite loi.

4 Bea fakakatoa fakataha akinautolu e he kakai Filisitia, o nau ha‘u o abitaga i Sunemi: bea nae fakakatoa fakataha e Saula a Isileli kotoabe, o nau ha‘u o abitaga i Kiliboa.

5 Bea i he mamata a Saula ki he tau ae Filisitia, nae manavahe ia, bea tetetete lahi hono loto.

6 Bea i he fehui a Saula ki a Jihova, nae ikai tali ia e Jihova, i ha miji, be i he Ulimi be i he kau balofita.

¶ 7 Bea nae behe e Saula ki he ene kau tamaioeiki, Mou kumi kiate au ha fefine oku iate ia ha laumalie kovi, koeuhi keu alu atu, bea fehui kiate ia. Bea nae behe e he ene kau tamaioeiki kiate ia, Vakai, oku ai ae fefine i Enitoa oku iate ia ae laumalie kovi.

8 Bea nae fakabuli ia e Saula, o ne ai ae gaahi kofu kehe, bea alu ia, moe ogo tagata, bea naa nau hoko atu ki he fefine i he bouli: bea behe eia, Oku ou kole kiate koe, ke ke fakaha kiate au i he laumalie, bea ke o hake kiate au, aia teu tala kiate koe.

9 Bea nae behe e he fefine kiate ia, Vakai, oku ke ilo aia kuo fai e Saula, koeuhi ko ene tamate‘i akinautolu nae i ai ae gaahi laumalie kovi, moe kau kikite, mei he fonua: koia koeha oku ke to ai ae tauhele ki he eku moui, keu mate ai au?

10 Bea nae fuakava a Saula kiate ia ia Jihova, o behe, Hage oku moui a Jihova e ikai hoko ha tautea kiate koe, koeuhi koe mea ni.

11 Bea nae behe ai e he fefine kiate ia, Kohai ia teu o hake kiate koe? Bea behe eia, O hake kiate au a Samuela.

12 Bea i he ene mamata ae fefine kia Samuela, nae tagi kalaga o le‘o lahi ia: bea lea ae fefine kia Saula, o behe, Koeha kuo ke kākā‘i ai au? he ko Saula koe.

13 Bea nae behe e he tu‘i kiate ia, Oua naa ke manavahe: he koeha kuo ke mamata ai? Bea behe e he fefine kia Saula, Kuou mamata ki he gaahi otua oku alu hake mei he kelekele.

14 Bea beheage eia kiate ia, Koeha hono aga? Bea nae behe eia, Oku alu hake ae tagata motua; bea oku bulou aki ia ae bulubulu. Bea nae ilo e Saula ko Samuela ia, bea tulolo ia mo hono fofoga ki he kelekele, bea naa ne bunou hifo ia.

¶ 15 Bea nae behe e Samuela kia Saula, Koeha kuo ke ue‘i ai au ke o hake au? Bea talaage e Saula, Kuou mamahi lahi; he oku tau‘i au e he kakai Filisitia, bea kuo alu ae Otua iate au, bea oku ikai te ne kei talia au, i he kau balofita, be i he gaahi miji: koia kuou ui ai kiate koe, koeuhi ke ke fakaha kiate au aia oku lelei keu fai.

16 Bea nae behe e Samuela, Bea koeha kuo ke fehui ai kiate au, ka kuo alu a Jihova iate koe, bea kuo hoko ia ko ho fili?

17 Bea kuo fai e Jihova kiate koe, o hage ko ene lea iate au: he kuo ha‘e e Jihova ae buleaga mei ho nima, o ne foaki ia ki ho kaugaabi, io kia Tevita:

18 Koe mea i he ikai te ke talagofua ki he le‘o o Jihova, bea fai kia Amaleki hono houhau lahi, koia kuo fai ai e Jihova ae mea ni kiate koe he aho ni.

19 Bea koeni foki e tukuage e Jihova a Isileli mo koe ki he nima oe kakai Filisitia: bea ko koe mo ho gaahi foha te mou iate au abogibogi: bea e tukuage foki e Jihova ae tau a Isileli ki he nima oe kakai Filisitia.

20 Bea nae to lafalafa leva a Saula ki he kelekele, bea ne manavahe lahi, koe mea i he gaahi lea a Samuela, bea nae ikai toe ha malohi iate ia; he nae teeki kai ia i he aho kotoa koia, be i he bo kotoa.

¶ 21 Bea nae ha‘u ae fefine kia Saula, o ne vakai oku mamahi lahi, bea naa ne behe kiate ia, vakai, kuo fai talagofua a hoo kaunaga ki ho le‘o, bea kuou ei eku moui ki hoku nima, bea kuou tokaga ki hoo gaahi lea aia naa ke lea kiate au.

22 Bea koeni, oku ou kole kiate koe, ke ke tokaga koe foki ki he le‘o o hoo kaunaga, bea tuku keu ai ae koga ma jii i ho ao; bea ke kai koeuhi ke ke ma‘u ae malohi i hoo alu i ho hala.

23 Ka nae fakafiji ia, o ne behe, E ikai teu kai. Ka ko ene kau tamaioeiki fakataha moe fefine naa nau fakaloto‘i ia. Koia nae tuu hake ia mei he kelekele, bea hekeheka ki he mohega.

24 Bea nae ma‘u e he fefine ae uhiki bulu jino i he fale; bea nae fakatootoo o tamate‘i ia, o ne ave ae mahoaa, bea natu ia, bea ta‘o aki ia ae gaahi foi ma tae fakalevani:

25 Bea naa ne omi ia ki he ao o Saula, bea ki he ao o ene kau tamaioeiki; bea naa nau kai. Hili ia naa nau tuu hake, bea alu i he bo koia.