¶ 1 BEA nae ai ae tagata o Benijimani, ko Kisi hono higoa, koe foha o Abieli, koe foha o Siloa, koe foha o Bikolati, koe foha o Afia koe tagata Benijimani, koe tagata malohi.

2 Bea nae iate ia ae foha ko Saula hono higoa, koe tagata talavou lelei, mo toulekeleka: bea nae ikai ha tagata i he fānau a Isileli nae lelei hake iate ia: mei hono uma o fai ki oluga nae maoluga lahi taha be ia i he kakai kotoabe.

3 Bea nae he ae faga asi a Kisi ko ene tamai. Bea nae behe e Kisi kia Saula ko hono foha, Ko eni ke ke ave ae toko taha oe kau tamaioeiki, bea ke alu o kumi ae faga asi.

4 Bea nae alu ia, o aji i he mouga o Ifalemi, o ne ojiki ae fonua o Salisa, ka nae ikai te na ilo akinautolu: bea naa na toki o o aji i he fonua o Salima, bea nae ikai te nau i ai: bea alu ia o aji i he fonua oe kakai Benijimani, ka nae ikai te na ilo akinautolu.

5 Bea i he e na hoko ki he fonua o Sufi, nae behe e Saula ki he ene tamaioeiki nae iate ia, Ke ta tafoki; telia naa tuku e he eku tamai ene tokaga ki he faga asi, bea hoko o tokaga kiate kitaua.

6 Bea nae behe eia kiate ia, Vakai mai, oku i he kolo ni ae tagata oe Otua, bea koe tagata ogoogolelei ia; oku hoko mooni aia kotoabe oku ne lea ki ai: bea koeni ke ta o ki ai; hei ilo be te ne faa fakaha mai ho ta hala ke ta o ai.

7 Bea nae behe ai e Saula ki he ene tamaioeiki, Kae vakai, kabau te ta o, koeha te ta ave ki he tagata? he kuo oji ae ma i he e ta gaahi ibu, bea oku ikai ha mea ofa ke atu ki he tagata oe Otua: koeha oku ta ma‘u?

8 Bea nae toe lea ae tamaioeiki kia Saula, o behe, Vakai, oku iate au hono fa oe vahe oe sikeli siliva: teu atu ia ki he tagata oe Otua, ke ne fakaha ho ta hala.

9 (I he alu ha tagata i mu‘a i Isileli ke fehui ki he Otua, nae lea ia o behe, Ha‘u ke tau o ki he tagata kikite: he koia oku ui ni koe Balofita, nae ui ia i mu‘a koe tagata kikite.)

10 Bea nae behe e Saula ki he ene tamaioeiki, Oku lelei hoo lea, ha‘u ke ta o. Koia ne na o ai ki he kolo aia nae i ai ae tagata oe Otua.

¶ 11 Bea i he e na o hake i he mouga ki he kolo, naa na ilo ae kau finemui nae alu ke utu vai, bea ne na behe kiate kinautolu, Oku i heni ae tagata kikite?

12 Bea naa nau tali akinaua, o behe, Oku i ai ia; vakai, oku alu muomua ia iate kimoua: mo fakatootoo, he nae ha‘u he aho ni ia ki he kolo; he oku ai ae katoaga ae kakai he aho ni i he botu maoluga:

13 I hoo mo hoko ki he kolo, te mo ilo leva ia, i he teeki ke alu hake ia ki he botu maoluga ke kai: koeuhi e ikai kai e he kakai kae oua ke hokoage ia, he oku ne tabuaki ae feilaulau; bea hili ia, e toki kai akinautolu nae tala ki ai. Koia mo o hake eni; he koe feituulaa eni te mo i lo ia.

14 Bea naa na o hake ki he kolo: bea i he e na hoko hake ki he kolo, vakai, nae hu kitua a Samuela kiate kinaua, koeuhi ke alu hake ki he botu maoluga.

¶ 15 Ka koeni kuo oji hono fakaha e Jihova ki he teliga o Samuela i he aho nae mu‘a i he hoko atu a Saula, o behe,

16 Feuga moe feituulaa ni abogibogi teu fekau kiate koe ae tagata mei he fonua o Benijimani, bea te ke fakanofo ia koe eiki ki hoku kakai ko Isileli, koeuhi ke ne fakamoui hoku kakai mei he nima oe kau Filisitia: he kuou vakai ki hoku kakai, koeuhi kuo hoko hake e nau tagi kiate au.

17 Bea i he mamata a Samuela kia Saula, nae behe e Jihova kiate ia, Vakai koe tagata eni aia neu lea ai kiate koe! Koia ia te ne bule ki hoku kakai.

18 Bea nae unuunu atu a Saula kia Samuela i he mataba, o ne behe, Oku ou kole kiate koe ke ke tala mai, koefe ae fale oe tagata kikite?

19 Bea nae tali e Samuela a Saula, o behe, Ko au koe tagata kikite: ke ke alu muomua iate au ki he botu maoluga, he te tau kai mo au he aho ni, bea teu tuku koe ke alu abogibogi, bea teu tala kiate koe aia kotoabe oku i ho loto.

20 Bea koe mea i he faga asi aia nae he i he aho e tolu kuo hili, oua naa tokaga ho loto ki ai; he kuo ilo akinautolu. Bea oku tau ki ahai ae holi a Isileli kotoabe? Ikai oku iate koe, bea ki he fale kotoabe o hoo tamai?

21 Bea nae tali e Saula o beheage, Ikai koe tagata Benijimani au i he faahiga oku jii hifo i he gaahi faahiga o Isileli? Bea ko hoku fale koe jii taha be i he gaahi fale oe faahiga o Benijimani? bea koeha oku ke lea behe ai kiate au?

22 Bea nae ave e Samuela a Saula mo ene tamaioeiki, o ne omi akinaua ki he botu fale kuo teuteu, o ne fakanofo akinaua i he botu lahi taha be iate kinautolu nae tala, aia koe toko tolugofulu nai.

23 Bea nae behe e Samuela ki he gaohi kai, Omi ae tufakaga naaku atu kiate koe, aia naaku lea ki ai kiate koe, Tuku be ia o tauhi.

24 Bea nae too e he gaohi‐kai ae alaga nima, mo ia nae i ai, o tuku ia i he ao o Saula. Bea nae behe e Samuela, Vakai, koia oku toe! ke tuku ia i ho ao, bea ke kai: he nae tauhi ia kiate koe o a‘u ki he feituulaa ni talu eku behe, Kuou tala ki he kakai. Bea koia nae kai e Saula mo Samuela i he aho koia.

¶ 25 Bea i he e nau alu hifo mei he botu maoluga ki he kolo, nae alea a Samuela mo Saula i he tua fale.

26 Bea naa nau tuu hegihegi hake: bea feouga moe maa ae aho, nae ui e Samuela ke alu hake a Saula ki he tua fale, o behe, Tuu hake koeuhi keu tuku koe ke ke alu. Bea nae tuu hake a Saula, bea naa na o kitua fakatouoji be, aia mo Samuela ki he mamao.

27 Bea i he e na o hifo ki hono gataaga oe kolo, nae behe e Samuela kia Saula, Fekau ki he tamaioeiki ke alu muomua iate kitaua, (bea nae alu atu ia,) ka ke tuu mau be akoe, koeuhi keu fakaha kiate koe ae folofola ae Otua.