¶ 1 BEA nae hiki ho nau fonoga mei Elimi, bea ha‘u ae fakataha kotoabe oe fānau a Isileli ki he toafa ko Sini, aia oku i he vahaa o Elimi mo Sainai, i hono hogofulu ma nima oe aho, i hono ua oe mahina, hili e nau ha‘u mei he fonua ko Ijibite.

2 Bea nae lāuga i he toafa ae fakataha kotoabe ae fānau a Isileli kia Mosese mo Elone.

3 Bea nae lea ae fānau a Isileli kiate kinaua, o behe, Oku mau fakaamu ki he Otua, naa mau mate i he nima o Jihova i he fonua ko Ijibite, i he e mau kei tauutu ofi ki he gaahi kulo kakano, bea ne mau kai ma o makona; he kuo mo omi akimautolu ki he toafa ni, ke tamate‘i ae fakataha ni kotoabe aki ae fiekaia.

¶ 4 Bea nae folofola ai a Jihova kia Mosese, Vakai, Teu fakauha ae ma mei he lagi maa moutolu: bea e alu atu ae kakai o tanaki fakatuhotuha ki he aho kotoabe ae ma, koeuhi keu ahiahi‘i akinautolu, be te nau felaka‘i i he eku gaahi fekau be ikai.

5 Bea i hono ono oe aho e fai behe, te nau gaohi aia kuo na tuku, bea e tuoua hono lahi hake i he ma oku nau omi i he aho kehe.

6 Bea nae tala e Mosese mo Elone ki he fānau kotoabe a Isileli, Te mou toki ilo i he efiafi, kuo omi e Jihova akimoutolu mei he fonua ko Ijibite:

7 Bea i he abogibogi, te mou mamata ki he nāunāu o Jihova: he oku ne afio‘i hoo mou gaahi lāuga: bea kohai akimaua, koeuhi ke mou hanu ai kiate kimaua?

8 Bea behe e Mosese, E tuku e Jihova ae kakano kiate kimoutolu i he efiafi, moe ma i he bogibogi ke mou makona ai; he oku afio‘i e Jihova hoo mou lāuga aia oku mou lāuga ai kiate ia: bea kohai akimaua? oku ikai kiate kimaua hoo mou lāuga, ka kia Jihova.

¶ 9 Bea nae lea a Mosese kia Elone, Tala ki he fakataha kotoabe ae fānau a Isileli, Mou ha‘u o ofi ki he ao o Jihova: he kuo ne afio‘i hoo mou lāuga.

10 Bea vakai lolotoga ae lea a Elone ki he fakataha kotoabe ae fānau a Isileli, naa nau jio atu ki he toafa, bea vakai, kuo ha mai ae nāunāu o Jihova i he ao.

¶ 11 Bea nae folofola a Jihova kia Mosese, o behe,

12 Kuou ogo‘i ae lāuga ae fānau a Isileli: lea kiate kinautolu o behe, I he efiafi te mou kai kakano, bea i he bogibogi te mou makona i he ma: bea te mou ilo ko au ko Jihova ko ho mou Otua.

13 Bea i he ene efiafi nae hoko o behe, nae ha‘u ae fuifui kueili, bea nae uufi ae abitaga; bea i he bogibogi nae ufiufi takatakai ae abitaga e he hahau.

14 Bea i he alu hake ae hahau nae ufia ai, vakai, nae i ai i he fuga toafa ae mea jii botoboto, o hage koe hahau fefeka i he kelekele.

15 Bea i he mamata ki ai ae fānau a Isileli, naa nau febeheaki, Koeha ia? he nae ikai te nau ilo be koeha. Bea behe e Mosese kiate kinautolu, Koe ma eni kuo foaki mai e Jihova ke mou kai.

16 Koeni ae mea kuo fekau e Jihova, Tanaki ia e he tagata kotoabe o fakatatau ki he ene kai, koe oma e taha ma ae tagata taki taha, o fakatatau ki he lau o ho mou kakai; ke too taki taha ae tagata maa nautolu oku i hono gaahi fale fehikitaki.

17 Bea nae fai behe e he fānau a Isileli, o tanaki ia, nae lahi ae niihi, bea jii ae niihi.

18 Bea kuo fakafuofua aki ia ae oma, nae ikai hano toe, kiate ia nae tanaki o lahi, bea koia nae tanaki jii nae ikai hano majiva; naa nau tanaki ae tagata taki taha o fakatatau ki he ene kai.

19 Bea behe e Mosese, Oua naa tuku e ha tagata hano toe ki he abogibogi.

20 Ka nae ikai te nau tokaga kia Mosese; ka ko ho nau niihi nae tuku hano toe ki he abogibogi, bea nae uagahia ia, bea namuaa; bea nae ita a Mosese kiate kinautolu.

21 Bea naa nau tanaki ia i he bogibogi kotoabe, ae tagata taki taha o tatau mo ene kai: bea i he hoko o vela ae laa, nae vai o oji ia.

¶ 22 Bea i he ene hoko ki hono ono oe aho, naa nau tanaki o tuo ua hono lahi hake oe ma, koe oma e ua ki he tagata be taha: bea nae ha‘u ae kau bule kotoabe oe kakai o tala ia kia Mosese.

23 Bea behe eia kiate kinautolu, Koeni ia kuo folofola ai a Jihova, Koe mālōlō oe sabate maonioni kia Jihova abogibogi: ta‘o he aho ni, aia te mou ta‘o, bea haka aia te mou haka: bea koia oku toe, hilifaki ia ki he abogibogi maa moutolu.

24 Bea naa nau hilifaki ki he abogibogi, o hage koe fekau a Mosese: bea nae ikai namuaa, bea nae ikai ha uaga i ai.

25 Bea behe e Mosese, Kai ia he aho ni; he koe aho ni koe sabate ia kia Jihova: e ikai te mou ilo ia he aho ni i he goue.

26 Koe aho e ono te mou tanaki ia; ka i hono fitu oe aho aia koe sabate, e ikai jii i ai ia.

¶ 27 Bea hoko o behe, nae alu kituaa ae niihi i he kakai i hono fitu oe aho ke tanaki, ka nae ikai te nau ilo ia.

28 Bea nae folofola a Jihova kia Mosese, E tuku afe hoo mou tae fie tauhi eku gaahi fekau mo eku gaahi fono?

29 Vakai, koe mea i he foaki e Jihova ae sabate kiate kimoutolu, koia oku ne foaki ai kiate kimoutolu i hono ono oe aho, ae ma ki he aho e ua: mou nofo mau taki taha ae tagata i hono botu, oua naa alu ha tagata e toko taha mei hono botu i hono fitu oe aho.

30 Koia nae mālōlō ai ae kakai i hono fitu oe aho.

31 Bea nae ui hono higoa e he fale o Isileli, koe Mana: bea nae hinehina ia o hage koe tega‘i kolianita; bea ko hono ifo nae hage ha ma kuo gaohi aki ae honi.

¶ 32 Bea behe e Mosese, Ko eni ae mea kuo fekau e Jihova, Fakabito aki ia ae oma e taha ke fakatologa ki ho mou toutagata amui: koeuhi ke nau mamata ki he ma naaku fafaga aki akimoutolu i he toafa, i he eku omi akimoutolu mei he fonua ko Ijibite.

33 Bea nae fekau e Mosese kia Elone, Too mai ha ibu, bea fakabito ae oma e taha i he mana o ligi ia ki ai, bea hili ia i he ao o Jihova, ke tauhi maa ho mou gaahi toutagata.

34 Bea nae hili ia e Elone i he ao oe Fuakava ke tauhi ia o hage koe fekau a Jihova kia Mosese.

35 Bea nae kai mana ae fānau a Isileli i he ta‘u e fagofulu, o a‘u ki he e nau hoko ki he fonua nae kakai; naa nau kai mana o a‘u ki he e nau hoko ki he vee fonua o Kenani.

36 Bea koe oma, ko hono vahe hogofulu ia oe efa.