¶ 1 BEA i he fanogo a Jetelo, koe taulaeiki o Mitiane, koe tamai i he fono kia Mosese, ki he mea kotoabe kuo fai e he Otua maa Mosese, bea ki hono kakai ko Isileli, bea moe omi e Jihova a Isileli mei Ijibite;

2 Bea too e Jetelo, koe tamai i he fono kia Mosese, a Sibola koe unoho o Mosese, hili ene fekau ke alu ia;

3 Mo ene ogo tama: koe toko taha i ai nae higoa ko Kesomi; he nae behe eia, Naaku nofo koe muli i he fonua kehe:

4 Bea ko nono higoa oe toko taha ko Eliesa; he nae behe eia, koe Otua o eku tamai, ko hoku tokoni, bea naa ne fakamoui au mei he heleta a Felo:

5 Bea nae ha‘u a Jetelo, koe tamai i he fono a Mosese, mo hono ogo foha, mo hono unoho kia Mosese i he toafa, aia naa ne abitaga ai i he mouga oe Otua:

6 Bea nae behe eia kia Mosese, Ko au Jetelo ko hoo tamai i he fono, kuou ha‘u kiate koe, mo ho unoho, mo ene ogo tama mo ia.

¶ 7 Bea nae alu kituaa a Mosese ke fakafetaulaki ki he ene tamai i he fono, o ne fakaabaaba ki ai, mo uma kiate ia; bea fefehui aki akinaua ki he e na lelei; bea naa nau ha‘u ki he fale fehikitaki.

8 Bea nae fakaha e Mosese ki he ene tamai i he fono, aia kotoabe kuo fai e Jihova kia Felo, bea ki he kakai Ijibite koeuhi ko Isileli, bea moe mamahi kotoabe kuo to kiate kinautolu i he hala, bea moe fakamoui akinautolu e Jihova.

9 Bea nae fiefia a Jetelo i he gaahi agalelei kotoabe aia kuo fai e Jihova ki Isileli, aia naa ne fakamoui mei he nima oe kakai Ijibite.

10 Bea behe e Jetelo, Fakafetai kia Jihova, aia kuo ne fakahaofi akimoutolu mei he nima oe kakai Ijibite, bea mei he nima o Felo, bea kuo ne fakahaofi ae kakai mei he nima oe kakai Ijibite.

11 Bea koeni, oku ou ilo ai oku lahi a Jihova i he gaahi otua kotoabe: koeuhi i he mea koia naa nau fai fakafiefielahi ai, nae maoluga lahi ia iate kinautolu.

12 Bea nae too e Jetelo koe tamai i he fono a Mosese, ae feilaulaututu moe gaahi feilaulau ki he Otua: bea nae ha‘u a Elone moe kau mātua kotoabe o Isileli, ke nau kai ma moe tamai i he fono a Mosese, i he ao oe Otua.

¶ 13 Bea bogibogi ai bea behe, nae nofo a Mosese ke fakamāu‘i ae kakai: bea nae tuu ae kakai o ofi kia Mosese mei he bogibogi o a‘u ki he efiafi.

14 Bea kuo mamata ae tamai i he fono a Mosese ki he mea kotoabe naa ne fai ki he kakai, nae behe eia, Koeha ae mea ni oku ke fai ki he kakai ni? koeha oku ke nofo toko taha ai be, bea tuu ae kakai kotoabe o ofi kiate koe mei he bogibogi ki he efiafi?

15 Bea behe e Mosese ki he ene tamai i he fono, Koeuhi oku ha‘u ae kakai ke fehui kiate au ki he Otua;

16 Oka ai haa nau mea, oku nau ha‘u kiate au; beau fakamāu ki he tagata moe tagata, beau fakaha kiate kinautolu ae gaahi fekau ae Otua, mo ene gaahi fono.

17 Bea nae lea ae tamai i he fono a Mosese kiate ia, o behe, Koe mea ni oku ke fai oku ikai lelei.

18 He te ke fakaaau o oji mooni koe, akoe moe kakai ni oku iate koe: he oku mamafa lahi aubito ae mea ni kiate koe: oku ikai te ke mafai ia ekoe toko taha be.

19 Koeni, fanogo ki hoku le‘o, bea teu akonaki‘i koe, bea e iate koe ae Otua: Ke ke i he kakai koe fehokota-kiaga moe Otua, koeuhi ke ke omi ae gaahi mea ki he Otua;

20 Bea te ke ekinaki ae gaahi tuutuuni, moe gaahi fono, bea ke fakaha kiate kinautolu ae hala oku totonu ke nau alu ai, moe gaahi gaue ke nau fai.

21 Bea koeni ke ke fili mei he kakai ae kau tagata oku mafai, oku manavahe ki he Otua, koe kau tagata oe mooni, oku fehia ki he manumanu; bea ke fakanofo akinautolu ke nau bule ki he gaahi toko afe, mo bule ki he gaahi toko teau, mo bule ki he gaahi nimagofulu, mo bule ki he gaahi hogofulu:

22 Bea tuku ke nau fakamāu ae kakai i he gaahi kuoga kotoabe: bea e behe, iloga ae mea lahi kotoabe, ke nau omi ia kiate koe, ka koe gaahi mea oku jii, ke nau fakamāu‘i: koia e hoko o faigofua ai kiate koe, bea te nau fai mo koe ke fua ae kavega.

23 Bea kabau te ke fai ae mea ni, bea fekau behe e he Otua kiate koe, te ke toki mafai ke tologa ai, bea e alu ae kakai ni kotoabe ki ho nau botu i he fiemalie.

24 Bea nae tokaga a Mosese ki he le‘o o ene tamai i he fono, o ne fai aia kotoabe naa ne lea ki ai.

25 Bea nae fili e Mosese ae kau tagata mafai mei Isileli kotoabe, o ne fakanofo akinautolu koe ulu oe kakai, koe kau bule ki he gaahi toko afe, moe kau bule ki he gaahi toko teau, koe kau bule ki he gaahi toko nimagofulu, moe kau bule ki he gaahi hogofulu.

26 Bea nae fakamāu ae kakai i he gaahi faahita‘u kotoabe; naa nau omi kia Mosese, ae gaahi mea faigataa, ka koe gaahi mea jii nae fakamāu ekinautolu.

¶ 27 Bea nae tuku e Mosese ene tamai i he fono ke ne alu; bea nae alu ia i hono hala ki hono fonua.