¶ 1 BEA te ke gaohi ae feilaulauaga aki ae akau koe sitimi, koe haga e hogofulu a hono loloa, moe haga e hogofulu a hono maukubu: e botubotu tatau be ae feilaulauaga: bea koe haga e ono a hono maoluga.

2 Bea te ke gaohi ae gaahi nifo i ai i hono tuliki e fa: e i he mea be koia a hono gaahi nifo: bea te ke aofi aki ia ae balasa.

3 Bea te ke gaohi hono gaahi ibu fakataliga efuefu, mo hono gaahi huolafalafa, mo hono gaahi ibu luoluo, mo hono gaahi huhu, moe gaahi ibu aiaga afi: ko hono gaahi ibu kotoabe ke ke gaohi aki ia ae balasa.

4 Bea te ke gaohi ki ai ae mea vagavaga aki ae balasa; bea ke gaohi i he mea vagavaga ae kavei balasa e fa i hono tuliki e fa.

5 Bea ke ai ia ki lalo i hono gataaga oe feilaulauaga ki loto, koeuhi ke hoko atu ae mea vagavaga o a‘u  hifo ki he vaeua oe feilaulauaga.

6 Bea ke gaohi ae haamo ki he feilaulauaga, koe ogo haamo mei he akau koe sitimi, o aofi ia aki ae balasa.

7 Bea e velo ae ogo haamo ki he kavei, bea e i hono botu e ua oe feilaulauaga ae ogo haamo ke haamo aki.

8 Ke ke gaohi ia aki ae laubaba ke luoluo i loto: o hage koia nae fakaha kiate koe i he mouga, te nau gaohi behe be ia.

¶ 9 Bea te ke gaohi ae lotoa oe fale fehikitaki: ki he botu oku haga ki toga e ai ae gaahi buibui tautau oe tubenu tuovalevale, koe haga e uageau hono loloa ki he botu e taha:

10 Bea ko hono bou e uofulu mo hono gaahi tuuga koe balasa ia; koe gaahi tautauaga oe gaahi bou mo ho nau takai koe siliva ia.

11 Bea e behe be ki he botu tokelau, e ai ae gaahi buibui tautau koe haga e uageau hono loloa, mo hono bou e uofulu mo ho nau tuuga balasa e uofulu; koe gaahi tautauaga e i he gaahi bou mo ho nau gaahi mea takai koe siliva.

¶ 12 Bea ki hono maukubu oe lotoa i he botu luluga e ai oe gaahi buibui tautau koe haga e teau: ke hogofulu ho nau bou, bea hogofulu mo ho nau tuuga.

13 Bea ko hono maukubu oe lotoa i he botu hahake koe haga e teau.

14 Koe buibui tautau i he botu e taha oe mataba, koe haga e tolugofulu: ke tolu ho nau bou, bea tolu mo ho nau tuuga.

15 Bea i hono botu e taha e ai ae buibui tautau koe haga e uofulu: ke tolu ho nau bou, bea tolu mo ho nau tuuga.

16 Bea e ai ki he mataba oe lotoa ae buibui tautau, koe haga e fagofulu, oe lanumoana, moe bauhiuhi, moe kulaahoaho, moe tubenu tuovalevale, kuo gaohi aki ae tuitui boto: ke fa ho nau bou, bea fa mo ho nau tuuga.

17 Koe gaahi bou kotoabe oku tuu takatakai i he lotoa e takai aki ia ae siliva; e siliva ho nau tautauaga, bea koe balasa ho nau gaahi tuuga.

¶ 18 Ko hono loloa oe lotoa koe haga e uageau, bea koe haga e teau a hono maukubu i he botu kotoabe, bea koe haga e hogofulu hono maoluga, oe tubenu tuovalevale, bea koe balasa ho nau gaahi tuuga.

19 Koe gaahi ibu kotoabe, oe fale fehikitaki i hono faiga gaue kotoabe, mo hono gaahi fa‘o kotoabe o ia, moe gaahi fa‘o kotoabe oe lotoa, koe balasa ia.

¶ 20 Bea te ke fekau ki he fānau a Isileli, koeuhi ke nau omi kiate koe ae lolo olive maa kuo tuki, ki he māma, koeuhi ke fakaulo mau be ae māma,

21 I he fale fehikitaki oe kakai i he tuabuibui, aia oku i he ao oe fuakava, e fai i ai a Elone mo hono gaahi foha, mei he efiafi ki he bogibogi, i he ao o Jihova: koe fekau fai mau be  ia o taegata ki ho nau gaahi toutagata, koeuhi koe fānau a Isileli.