¶ 1 BEA te ke omi kiate koe ho taokete ko Elone, mo hono gaahi foha mo ia, mei he fānau a Isileli, koeuhi ke gaue ia kiate au i he gaue ae taulaeiki, io, a Elone, mo Natabi, mo Abiu, mo Eliesa, mo Itama, koe gaahi foha o Elone.

2 Bea te ke gaohi ae gaahi kofu tabu ki ho taokete ko Elone ke fakaeieiki mo matamatalelei.

3 Bea te ke lea kiate kinautolu oku loto boto, aia kuou fakafonu aki ae laumalie boto, koeuhi ke nau gaohi ae gaahi kofu o Elone, ke fakatabu‘i ia, koeuhi ke ne gaue kiate au i he gaue fakataulaeiki.

4 Bea koe gaahi kofu eni te nau gaohi; koe jifafatafata, moe efoti, moe kofu fakatōtōlōfa moe kofu kuo fakanikoniko‘i, moe tatā, moe noo: bea te nau gaohi ae gaahi kofu tabu kia Elone ko ho taokete, mo hono gaahi foha, koeuhi ke gaue ia kiate au i he gaue fakataulaeiki.

¶ 5 Bea te nau too ae koula moe lanumoana, moe bauhiuhi, moe kulaahoaho, moe tubenu tuovalevale.

6 Bea te nau gaohi ae efoti aki ae koula, moe lanumoana, moe bauhiuhi, moe kulaahoaho, moe tubenu tuovalevale, i he gaue fakabotoboto.

7 Ko hono botu e ua i he uma e fakahoko fakataha i hono kaba; bea e hoko o fakataha ia.

8 Bea koe noo fakanikoniko‘i oe efoti, aia oku i ai, e i he mea be koia, o fakatatau ki hono gaohi: io, ae koula, moe lanumoana, moe bauhiuhi, moe kulaahoaho, moe tubenu tuovalevale.

9 Bea te ke too ae maka oniki e ua, o tohi togi ki ai ae gaahi higoa oe fānau a Isileli:

10 Ke i he maka e taha ae higoa e ono, moe higoa e ono ke i he maka e taha, o fakatatau ki he e nau hohoko.

11 Te ke togitogi ae gaahi higoa oe fānau a Isileli i he ogo maka, aki ae gaue ae tufuga togi maka, bea hage koe togitogi oe mama; te ke gaohi ia ke mau i he aiaga koula.

12 Bea te ke ai ae maka e ua ki he uma eo efoti koe ogo maka fakamanatu ki he fānau a Isileli: bea e fua ho nau higoa e Elone i hono uma e ua i he ao o Jihova, koe mea fakamanatu.

¶ 13 Bea te ke gaohi ae ogo fakamau koula;

14 Moe jeni koula haohaoa e ua i hono mui e ua; te ke gaohi ia i he gaue fihifihi, bea fakamau ae ogo jeni fihifihi ki he ogo fakamau.

¶ 15 Bea te ke gaohi ae jifafatafata oe fakamau i he gaue fakabotoboto; te ke gaohi ia o hage koe gaue ae efoti: i he koula, moe lanumoana, moe bauhiuhi, moe kulaahoaho, moe tubenu tuovalevale te ke gaohi aki ia.

16 E tatau be hono botu e fa oka belu ua; koe haga be taha hono loloa o ia, moe haga be taha hono maukubu o ia.

17 Bea te ke fakamau ki ai ke fono i ai ae otu maka e fa: ko hono uluaki otu koe satio, moe tobasi, moe kabukeli: ko hono uluaki otu ia.

18 Ko hono ua oe otu koe emalata, moe safaia, moe taimoni.

19 Bea ko hono tolu oe otu koe likua, moe aketi, moe ametisi.

20 Bea ko hono fa oe otu, koe belili, moe oniki, moe jasiba: e ai aki ia ae koula ki ho nau gaahi tuuga.

21 Bea e i he maka ae gaahi higoa oe fānau a Isileli, koe hogofulu ma ua, o fakatatau ki ho nau higoa, o hage koe togitogi oe mama: e tuu taki taha mo hono higoa o fakatatau mo ho nau faahiga e hogofulu ma ua.

¶ 22 Bea te ke gaohi i hono botu e ua oe jifafatafata ae seini oe koula haohaoa oe gaue fihifihi.

23 Bea te ke gaohi i he jifafatafata ae kavei koula e ua, bea ke ai ae kavei e ua ki he mui e ua oe jifafatafata.

24 Bea te ke ai ae seini koula fihifihi e ua i he kavei e ua oku i he mui e ua oe jifafatafata.

25 Bea ko hono botu kehe e ua oe seini fihifihi te ke fakamau ki he fakamau, o tuku ia ki he botu e ua oe uma i he efoti i hono ao.

¶ 26 Bea te ke gaohi ae kavei koula e ua, bea ai ia ki he mui e ua oe jifafatafata i hono kaba, aia oku i he botu oe efoti ki loto.

27 Bea te ke gaohi ae kavei koula e ua, o ai ia ki he botu e ua oe efoti i lalo, o ofi ki hono botu ki ao, o haga tonu atu ki he fakamau e taha, i oluga i he noo fakanikoniko‘i oe efoti.

28 Bea te nau nonoo ae jifafatafata aki a hono gaahi kavei ki he kavei e ua oe efoti, aki ae noo lanumoana, koeuhi ke i oluga ia i he noo fakanikoniko‘i oe efoti, bea koeuhi ke oua naa vete ae jifafatafata mei he efoti.

29 Bea e fua e Elone ae gaahi higoa oe fānau a Isileli i he jifafatafata oe fakamāu i hono loto, oka alu ia ki he botu maonioni, koe fakamanatu mau ai be i he ao o Jihova.

30 Bea te ke ai i he jifafatafata oe fakamāu ae Ulimi moe Tumemi: bea te na i he loto o Elone, i he ene hu ki he ao o Jihova: bea e fua mau ai be e Elone i hono loto i he ao o Jihova ae fakamāu‘i oe fānau a Isileli.

¶ 31 Bea te ke gaohi ke oji ae kofu oe efoti aki ae lanumoana.

32 Bea e ai hono ava i oluga ki loto: bea e ai ae takai ki he ava oe mea kuo fi, o hage koe ava oe kofutua, telia naa mahae ia.

33 Bea i hono kaba ki lalo ke ke gaohi hono teuga ke hage koe fua‘i akau, oe lanumoana, moe bauhiuhi, moe kulaahoaho, ke tuu takatakai i hono kaba; moe gaahi fafagu koula i ho nau vahaa o takatakai.

34 Koe fafagu koula moe fua‘i akau, koe fafagu koula moe fua‘i akau, i he kaba oe kofu o takatakai.

35 Bea e ai ia kia Elone ke fai ae tauhi: bea e ogona hono kini oka hu atu ia ki he botu maonioni i he ao o Jihova, bea i he ene ha‘u ki tua, koeuhi ke oua naa mate ia.

¶ 36 Bea te ke gaohi ae bale oe koula haohaoa, bea tohi togi ki ai, o hage koe togi oe mama, KOE MAONIONI KIA JIHOVA.

37 Bea e ai ia ki he noo lanumoana, koeuhi ke i he tatā ia; e ai ia ki he mu‘a tatā.

38 Bea e i he la‘e ia o Elone, koeuhi ke fua e Elone ae hia oe gaahi mea maonioni, aia oku fakatabu‘i e he fānau a Isileli i he e nau gaahi mea ofa kotoabe; bea e tuu mau be ia ki hono la‘e, koeuhi ke lelei ai akinautolu i he ao o Jihova.

¶ 39 Bea te ke ai ae tuitui ki he kofu oe tubenu tuovalevale, mo ke gaohi ae tatā aki ae tubenu tuovalevale, bea ke gaohi hono noo aki ae gaue oe tuitui.

¶ 40 Bea te ke gaohi ae gaahi kofu ma ae gaahi foha o Elone, bea ke gaohi ae gaahi noo moo nautolu, mo ke gaohi ae gaahi tatā moo nautolu, ke fakaeieiki bea ke matamatalelei.

41 Bea ke ai ia kia Elone ko ho taokete, bea ki hono gaahi foha mo ia; bea te ke tākai akinautolu, o fakanofo akinautolu, bea fakatabu‘i akinautolu, koeuhi ke nau gaue kiate au i he gaue fakataulaeiki.

42 Bea te ke gaohi ae gaahi kofu va‘e moo nautolu ke ufiufi e nau telefua: te nau hifo mei he nootagavala ki he ateiva‘e:

43 Bea e ai ia kia Elone, bea ki hono gaahi foha, oka nau ka ha‘u ki he fale fehikitaki oe kakai, be i he e nau ha‘u o ofi ki he feilaulauaga ke tauhi i he botu maonioni; telia naa nau fai hala, bea mate ai; koe fekau tuu mau eni kiate ia, bea ki hono hako amui iate ia.