¶ 1 BEA nae folofola a Jihova kia Mosese, o behe,

2 Vakai, kuou ui a Besalili koe foha o Uli, koe foha o Hua, i he faahiga o Juta:

3 Bea kuou fakafonu ia i he laumalie oe Otua, i he boto, bea i he loto matala, moe faa ilo, bea i he gaahi gaue fakatufuga kotoabe,

4 Ke fifili ki he gaahi gaue fakabotoboto, ke gaue i he koula, moe siliva, moe balasa.

5 Bea i he tātā oe gaahi maka koloa, ke fakamau ia, bea i he tātā ae akau, moe gaue i he gaahi gaue fakatufuga kotoabe.

6 Bea ko au, vakai, kuou foaki mo ia a Aholiabi koe foha o Ehisamaki, i he faahiga o Tani: bea kuou ai ae boto ki he loto o kinautolu kotoabe oku loto boto, koeuhi ke nau faa gaohi aia kotoabe kuou fekau kiate koe:

7 Koe fale fakatahaaga oe kakai, moe buha oe fuakava, moe nofoaga aloofa oku hilifaki ki hono fuga, mo hono gaahi nāunāu kotoabe oe fale fehikitaki,

8 Moe balebale mo hono nāunāu, moe tuuga māma maonioni mo hono nāunāu kotoabe, moe feilaulauaga oe mea namu kakala,

9 Moe feilaulauaga oe feilaulau tutu mo hono nāunāu kotoabe, moe sene mo hono tuuga,

10 Moe gaahi kofu oe gaue, moe gaahi kofu tabu kia Elone koe taulaeiki, moe gaahi kofu ki hono gaahi foha, ke nau gaue ai i he gaue fakataulaeiki,

11 Moe lolo tākai, moe mea namu kakala ki he botu maonioni: te nau fai o fakatatau ki he mea kotoabe kuou fekau kiate koe.

¶ 12 Bea nae folofola a Jihova kia Mosese, o behe,

13 Ke ke lea foki ki he fānau a Isileli, o behe, Koe mooni te mou tauhi hoku gaahi sabate: he koe fakailoga ia iate au mo ki moutolu i ho mou gaahi toutagata kotoabe; koeuhi ke mou ilo ko au ko Jihova oku ou fakatabu‘i akimoutolu.

14 Koia te mou tauhi ai ae sabate; he oku tabu ia kiate kimoutolu: koia kotoabe oku uli‘i ia koe mooni e tamate‘i ia: he koia kotoabe e fai i ai ha gaue, e motuhi ae tagata koia mei hono kakai.

15 Oku gofua ke fai ae gaue i he aho e ono; ka i hono fitu, koe sabate oe mālōlō, koe maonioni kia Jihova: koia kotoabe oku fai ha gaue i he aho sabate, koe mooni e tamate‘i ia.

16 Koia, e tauhi ae sabate e he fānau a Isileli, ke tokaga ki he sabate i ho mou gaahi toutagata kotoabe, koe fuakava mau ai be ia.

17 Koe fakailoga ia iate au moe fānau a Isileli o taegata: he nae gaohi e Jihova i he aho e ono ae lagi moe fonua, bea naa ne tutuku i hono fitu oe aho, bea fiemalie ai.

¶ 18 Bea hili ene folofola kia Mosese i he mouga ko Sainai, naa ne atu kiate ia ae maka e ua oe fuakava, koe ogo maka, kuo tohi aki ae louhi‘i nima oe Otua.