¶ 1 BEA nae folofola a Jihova kia Mosese, o behe.

2 I he uluaki aho oe uluaki mahina, te ke fokotuu ae fale tabu oe fale fehikitaki oe kakai.

3 Bea te ke ai ki ai ae buha oe fuakava, bea ufiufi aki ae buha ae buibui.

4 Bea te ke omi ki ai ae balebale, bea ke ai o fakatonutonu ae gaahi mea oku totonu ke ai ki ai; bea ke omi ki ai ae tuuga māma, o tutu ae gaahi māma o ia.

5 Bea te ke tuku ae feilaulauaga koula ki he mea namu kakala, i he ao oe buha oe fuakava, bea ai ae buibui tautau ki he mataba oe fale fehikitaki.

6 Bea te ke fokotuu ae feilaulauaga oe feilaulau tutu i he ao oe mataba oe fale tabu oe fale fehikitaki oe kakai.

7 Bea te ke fokotuu ae sene i he vahaa oe fale fehikitaki oe kakai, moe feilaulauaga, bea ke ai ki ai ae vai.

8 Bea te ke fokotuu hono lotoa o takatakai ia, bea tautau hake hono buibui i he mataba oe lotoa.

9 Bea te ke ave ae lolo tākai, o tākai aki ae fale fehikitaki, moe mea kotoabe oku i ai, mo ke fakatabu‘i ia, mo hono gaahi nāunāu kotoabe o ia: bea e maonioni ia.

10 Bea te ke tākai ae feilaulauaga oe feilaulau tutu, mo hono gaahi nāunāu kotoabe, o fakatabu‘i ae feilaulauaga: bea e hoko ia koe feilaulauaga fugani maonioni.

11 Bea te ke tākai ae sene mo hono tuuga, o fakatabu‘i ia.

12 Bea te ke omi a Elone mo hono gaahi foha ki he mataba oe fale fehikitaki oe kakai, o kaukau‘i akinautolu aki ae vai

13 Bea te ke ai kia Elone ae gaahi kofu maonioni, bea tākai ia, o fakatabu‘i ia; koeuhi ke ne gaue kiate au i he gaue fakataulaeiki.

14 Bea te ke omi hono gaahi foha, o fakakofu aki akinautolu ae gaahi kofutua.

15 Bea te ke tākai akinautolu o hage ko hoo tākai e nau tamai, koeuhi ke nau gaue kiate au i he gaue fakataulaeiki: he ko ho nau tākai ia ki he gaue fakataulaeiki mooni o taegata i ho nau toutagata kotoabe tuku fakaholo.

16 Bea nae fai ia e Mosese: o hage koe mea kotoabe nae fekau e Jihova kiate ia, nae behe ene fai.

¶ 17 Bea i he uluaki mahina i hono ua oe ta‘u, i he uluaki  aho oe mahina, nae hoko o behe, nae fokotuu hake ae fale fehikitaki.

18 Bea nae fokotuu hake e Mosese ae fale fehikitaki, o ne fakamau hono gaahi tuuga, bea nae fokotuu hake a hono gaahi laubaba, bea ai ki ai hono gaahi akau fakamau, bea nae fokotuu hono gaahi bou.

19 Bea naa ne folahi atu ae fakabuloga i oluga i he fale fehikitaki, bea nae ai hono fakabuloga e taha ki ai i oluga: o hage koe fekau a Jihova kia Mosese.

¶ 20 Bea naa ne ave ae fuakava o ne ai ia ki he buha, bea nae ai ae ogo akau haamo ki he buha, bea nae hili ae nofoaga aloofa ki oluga i he buha.

21 Bea naa ne omi ae buha ki loto i he fale fehikitaki, bea nae fokotuu ai ae buibui ufiufi, bea nae ufiufi ai ae buha oe fuakava o hage koe fekau a Jihova kia Mosese.

¶ 22 Bea naa ne tuku ae balebale ki he fale fehikitaki oe kakai, ki he botu tokelau oe fale fehikitaki, i tua i he buibui.

23 Bea naa ne tuku lelei i ai ae ma, i he ao o Jihova; o hage koe fekau a Jihova kia Mosese.

¶ 24 Bea naa ne ai ae tuuga māma i he fale fehikitaki oe kakai, o haga tonu atu ki he balebale, i he botu toga oe fale fehikitaki.

25 Bea naa ne tutu ae gaahi māma i he ao o Jihova; o hage koe fekau a Jihova kia Mosese.

¶ 26 Bea naa ne ai ae feilaulauaga koula i he fale fehikitaki oe kakai i he ao oe buibui:

27 Bea naa ne tutu ae mea namu kakala i hono fuga oia; o hage koe fekau a Jihova kia Mosese.

¶ 28 Bea naa ne tautau hake ae buibui i he mataba oe fale fehikitaki.

29 Bea naa ne fokotuu ae feilaulauaga oe mea tutu o ofi ki he mataba oe fale tabu oe fale fehikitaki oe kakai, o ne atu i ai ae feilaulau tutu, moe feilaulau meakai; o hage koe fekau a Jihova kia Mosese.

¶ 30 Bea naa ne fokotuu ae sene i he vahaa oe fale fehikitaki oe kakai moe feilaulauaga, bea nae ai ki ai ae vai, ke kaukau aki.

31 Bea ko Mosese mo Elone mo hono gaahi foha naa nau fanofano ho nau nima, mo kaukau‘i ho nau va‘e i ai:

32 I he e nau hu ki he fale fehikitaki oe kakai, bea i he e nau ha‘u o ofi ki he feilaulauaga, naa nau kaukau; o hage koe fekau a Jihova kia Mosese.

33 Bea naa ne fokotuu ae lotoa o fakatakamilo ki he fale fehikitaki, moe feilaulauaga, o fokotuu hake ae buibui ki he mataba oe lotoa. Bea nae fakaoji behe e Mosese ae gaue.

¶ 34 Bea hili ia nae ufiufi leva e he ao ae fale fehikitaki oe kakai, bea nae fakafonu e he nāunāu o Jihova ae fale fehikitaki.

35 Bea nae ikai mafai e Mosese ke hu ki he fale fehikitaki oe kakai, koe mea i he nofo mau ki ai ae ao, bea nae fakafonu e he nāunāu o Jihova ae fale fehikitaki.

36 Bea ka too hake ae ao mei he ene fakamalumulu ae fale fehikitaki, nae fonoga ae fānau a Isileli i ho nau gaahi fonoga kotoabe:

37 Bea kabau nae ikai too hake ae ao, bea nae ikai te nau fonoga, kae oua ke hoko ae aho kuo too hake ai ia.

38 He nae fakamalumalu ae fale fehikitaki e he ao o Jihova i he aho, bea nae i ai ae afi i he bouli, i he ao oe fale kotoabe o Isileli, i ho nau gaahi fonoga kotoabe.