¶ 1 BEA nae leaage a Mosese o behe, Kae vakai, e ikai te nau tui kiate au, be tokaga ki hoku le‘o: he te nau behe, Nae ikai ha mai a Jihova kiate koe.

2 Bea beheage e Jihova kiate ia, Koeha ena i ho nima? Bea naa ne behe, Koe tokotoko.

3 Bea behe eia, Ji ia ki he kelekele. Bea ne ji ia ki he kelekele, bea hoko leva ia koe gata; bea hola a Mosese mei hono ao.

4 Bea behe e Jihova kia Mosese, Mafao atu ho nima o buke ia i hono iku. Bea mafao atu eia hono nima, o ne buke ia, bea liliu ia koe tokotoko i hono nima.

5 Koeuhi ke nau tui ko Jihova koe Otua oe nau gaahi tamai, koe Otua o Ebalahame, koe Otua o Aisake, moe Otua o Jekobe, kuo ha mai kiate koe.

6 Bea toe beheage e Jihova kiate ia, Koeni, ai ho nima ki ho fatafata. Bea naa ne ai hono nima ki hono fatafata: bea i he ene too ia mei ai, vakai, kuo kilia hono nima bea hage koe uha hinehina.

7 Bea behe eia, Toe ai ho nima ki ho fatafata. Bea ne toe ai hono nima ki hono fatafata; bea toe too ia mei hono fatafata, bea vakai, kuo toe liliu ia ke hage koe aga o hono jino.

8 Bea e behe, kabau e ikai te nau tui kiate koe, be tokaga ki he le‘o oe uluaki fakailoga, te nau tui ki he le‘o oe fakailoga fakamui.

9 Bea e behe, kabau e ikai te nau tui foki ki he fakailoga ni e ua, be tokaga ki ho le‘o, bea te ke ohu ae vai mei he vaitafe, o liligi ia ki he kelekele: bea koe vai oku ke ohu mei he vaitafe, e liliu ia koe toto ki he kelekele momoa.

¶ 10 Bea beheage e Mosese kia Jihova, E hoku Eiki, Oku ikai koe le‘o afea au talu mei mu‘a, be talu hoo folofola ki hoo tamaioeiki: ka koe lea toohi au, moe elelo toohi.

11 Bea beheage e Jihova kiate ia, Kohai nae gaohi ae gutu oe tagata? bea kohai oku ne gaohi ae noa, be koe tuli, be koe mata a, be koe kui? ikai ko au Jihova?

12 Bea koeni, ke ke alu, bea ko au, teu i ho gutu, ke ako kiate koe aia te ke lea aki.

13 Bea ne behe eia, E hoku Eiki, Oku ou kole kiate koe, ke ke fekau i he nima o ia oku ke lelei ke fekau ki ai.

14 Bea nae tubu ai ae houhau o Jihova kia Mosese, bea ne behe, Ikai ko ho taokete a Elone oe faahiga o Livai? Oku ou ilo oku lea lelei ia. Bea vakai foki, oku ha‘u ia ke fakafetaulaki kiate koe: bea ka mamata ia kiate koe, bea e fiefia ia i hono loto.

15 Bea te ke lea koe kiate ia, o ai ae gaahi lea ki hono gutu: bea teu i ho gutu mo hono gutu, ke ako‘i akimoua aia te mo fai.

16 Bea e hoko ia ko hoo tagata lea ki he kakai: bea e hoko ia, io e iate koe ia, koe gutu, bea te ke iate ia koe fetogi oe Otua.

17 Bea te ke ave ae tokotoko ni i ho nima, aia te ke fai aki ae gaahi fakailoga.

¶ 18 Bea nae alu a Mosese o hoko atu kia Jetelo ko ene tamai i he fono, o ne behe kiate ia, Oku ou kole kiate koe ke ke tuku au keu alu, o foki atu ki hoku gaahi kaiga oku i Ijibite, o vakai be oku nau kei moui. Bea talaage e Jetelo kia Mosese, Alu i he fiemalie.

19 Bea behe e Jihova kia Mosese i Mitiane, Alu, o toe foki ki Ijibite: he kuo mate ae kau tagata kotoabe naa nau fie tamate‘i koe.

20 Bea nae ave e Mosese hono unoho mo hono ogo foha o fakaheka akinautolu ki he asi, bea toe alu ia ki he fonua ko Ijibite: bea nae too e Mosese ae tokotoko oe Otua i hono nima.

21 Bea nae folofola a Jihova kia Mosese, Oka ke ka alu ke toe hoko ki Ijibite, vakai, ke ke fai ae gaahi mana ni kotoabe i he ao o Felo, aia kuou ai ki ho nima: ka teu fakafefeka hono loto, bea e ikai te ne tuku ae kakai ke alu:

22 Bea te ke lea kia Felo, Oku behe mai e Jihova, Ko hoku foha a Isileli, io, ko hoku uluaki.

23 Bea oku ou tala atu kiate koe, Tukuage hoku foha ke alu, koeuhi ke ne tauhi au: bea kabau te ke taofi o ikai tukuage ia, vakai, Teu tamate‘i ho foha, io, a ho uluaki.

¶ 24 Bea nae hoko o behe i he hala i he fale talifonoga, nae fakafetaulaki a Jihova kiate ia, koe kumi ke tamate‘i ia.

25 Bea nae too ai e Sibola ae maka majila, o ne kamu‘i ene tama, o ne ji ia ki hono va‘e, o ne behe, Koe mooni koe unoho bani toto koe kiate au.

26 Koia ne ne tukuage ia ke alu: bea behe eia, Koe unoho bani toto koe, koe mea i he kamu.

¶ 27 Bea nae beheage e Jihova kia Elone, Alu atu ki he toafa ke fakafetaulaki kia Mosese. Bea nae alu atu ia, o fakafetaulaki kiate ia i he mouga oe Otua, bea ne uma kiate ia.

28 Bea nae tala e Mosese kia Elone ae gaahi lea kotoabe a Jihova aia nae fekau‘i ia, moe gaahi mana kotoabe naa ne fekau kiate ia.

¶ 29 Bea nae alu a Mosese mo Elone o fakakatoa ae kau mātua kotoabe oe fānau a Isileli.

30 Bea nae lea aki e Elone ae gaahi lea kotoabe aia nae folofola aki e Jihova kia Mosese, bea ne fai ae gaahi mana i he ao oe kakai.

31 Bea nae tui ae kakai: bea i he e nau fanogo kuo aahi a Jihova ki he fānau a Isileli, bea kuo afio ia ki he e nau mamahi, naa nau bunou hifo ho nau mata o hu.