¶ 1 BEA nae folofola a Jihova kia Mosese, Vakai, Kuou gaohi koe ke hage koe otua kia Felo: bea ko Elone ko ho taokete, ko hoo fakafofoga ia.

2 Bea ke ke lea aki ekoe aia kotoabe teu fekau kiate koe: bea e lea a ho taokete ko Elone kia Felo, koeuhi ke ne tuku atu ae fānau a Isileli mei hono fonua.

3 Bea teu fakafefeka ae loto o Felo, bea teu fakalahi eku mana mo eku mea fakaofo i he fonua ko Ijibite.

4 Ka e ikai tokaga a Felo kiate kimoua, koeuhi keu hili hoku nima ki Ijibite, o omi kituaa eku gaahi kau tau, mo hoku kakai koe fānau a Isileli, mei he fonua ko Ijibite i he gaahi tautea lahi.

5 Bea e hoko o ilo e he kakai Ijibite ko au ko Jihova, o kau ka mafao atu hoku nima ki Ijibite, o omi kituaa ae fānau a Isileli meiate kinautolu.

6 Bea nae fai e Mosese mo Elone o hage koe fekau a Jihova kiate kinaua, koia ia ne na fai.

7 Bea nae valugofulu ta‘u ae motua o Mosese, bea valugofulu ta‘u moe ta‘u e tolu ae motua o Elone, i he e na lea kia Felo.

¶ 8 Bea nae folofola a Jihova kia Mosese mo Elone, o beheage,

9 Oka lea a Felo kiate kimoua, o behe, Fakaha mai haa mo mana: te ke lea ai kia Elone, Too ho tokotoko, o ji ia i he ao o Felo, bea e hoko ia koe gata.

¶ 10 Bea naa na o, a Mosese mo Elone, o hoko atu kia Felo, bea ne na fai o hage koe fekau a Jihova: bea ji hifo e Elone hono tokotoko i he ao o Felo, moe ao o ene kau tamaioeiki, bea hoko ia koe gata.

11 Bea nae toki ui e Felo ke ha‘u foki ae kau tagata boto moe kau kikite: bea koeni, koe kau fie mana o Ijibite, naa nau fai behe foki aki e nau gaahi gaue fakalilolilo.

12 He naa nau taki taha ji ki lalo hono tokotoko, bea nae liliu ia koe gaahi gata: ka koe tokotoko o Elone naa ne folo hifo o oji ho nau gaahi tokotoko.

13 Bea ne fakafefeka ae loto o Felo, bea nae ikai te ne tokaga kiate kinautolu; o hage koe folofola a Jihova.

¶ 14 Bea nae folofola a Jihova kia Mosese, Kuo fefeka ae loto o Felo, oku ikai loto ia ke alu ae kakai.

15 Ke ke alu abogibogi kia Felo; vakai, oku alu atu ia ki he vai; bea te ke tuu koe o ofi ki he vee vai ko hono tali; bea ke ke too i ho nima ae tokotoko nae liliu koe gata.

16 Bea te ke lea kiate ia, Ko Jihova koe Otua oe kakai Hebelu kuo ne fekau au kiate koe, ke behe, Tukuage hoku kakai ke alu, koeuhi ke nau tauhi au i he toafa: bea vakai, oku teeki ai te ke tokaga ki ai.

17 Oku behe mai e Jihova, I he mea ni te ke ilo ko au ko Jihova: vakai, teu ta ae vai aia oku i he vaitafe, aki ae tokotoko oku i hoku nima, bea e liliu ia koe toto.

18 Bea koe gaahi ika oku i he vaitafe, e mate ia, bea e eho ae vaitafe: bea e fakalilia ae kakai Ijibite ke inu ae vai i he vaitafe.

¶ 19 Bea nae folofola a Jihova kia Mosese, Tala kia Elone, Too ho tokotoko, mo ke mafao atu ho nima ki he gaahi vai o Ijibite, ki ho nau vaitafe jii moe vai tafe lahi, ki he gaahi luovai, moe gaahi anovai, koeuhi ke liliu ia koe toto: koeuhi ke ai ae toto i he botu fonua kotoabe o Ijibite, i he gaahi aiaga vai akau, moe gaahi aiaga vai maka.

20 Bea nae fai e Mosese mo Elone, o hage koe fekau a Jihova: bea naa ne hiki hake ae tokotoko o ta‘i aki ae vai i he vaitafe i he ao o Felo, moe ao o ene kau tamaioeiki; bea nae liliu ae gaahi vai kotoabe i he vaitafe koe toto.

21 Bea nae mate ai ae ika nae i he vaitafe; bea nae namu eho ae vaitafe, bea ikai faa inu e he kakai Ijibite ae vai oe vaitafe; bea nae ai ae toto i he botu fonua kotoabe o Ijibite.

22 Bea nae fai behe be e he kau fie mana o Ijibite aki e nau gaahi gaue fakalilolilo: bea nae fefeka ai ae loto o Felo, bea nae ikai te ne tokaga kiate kinaua, o hage koe folofola a Jihova.

23 Bea foki atu a Felo o hu ki hono fale, bea nae ikai te ne fakatokaga‘i hono loto ki he mea ni.

24 Bea nae keli e he kakai Ijibite kotoabe o ofi ki he vaitafe ke ma‘u ae vai ke inu; he nae ikai te nau faa inu ae vai mei he vaitafe.

25 Bea nae ojiage ae aho e fitu, hili hono ta‘i ae vai lahi e Jihova.